15
1 ಮಯಾನಾ ಭಾಯೊ ಭೆನೊ, ಮಿ ತುಮೊನೆ ಕದಲ ಚೊ಼ಕಿ ಸಂದೆಶ ಶೆಂ ಕರೊ. ತುಮೆ ತಿನೆ ಸ್ವಿಕಾರ ಕರ‍್ಯಾಸ. ತಿಮಾಜ಼ ಘಟ್ಟ ಥೈನ ಹುಬ್ರಯಾಸ.
2 ಮಿ ತುಮೊನೆ ಚೊ಼ಕಿ ಸಂದೆಶ ಕೈನ ದಿದಲ ಸಂಗತಿನೆ ಘಟ್ಟ ವಿಶ್ವಾಸ ಕರ‍್ಯಾಮ ತುಮೆ ಜ಼ಲಮ ಉದ್ದಾರ ಪಡ್ದಿಲಿವೊಶಿ. ನೈತೊ ತುಮಾರು ವಿಶ್ವಾಸ ಹಾಳಥಾಸ.
3 ಮಿ ಪಡ್ದಿಲಿದಲ ಖಾಸ ವ್ಹೈ ಕೈನ ತಿಳ್ದಿಲಿನ ತುಮೊನೆ ವಪ್ಪಸಾಯೊಸ. ತೆ ಕಯು ಕಯು ವ್ಹೈ ಕದ್ಯಾಮ, ಪವಿತ್ರ ಗ್ರಂಥಮಾ ಕದಲ ಪ್ರಕಾರ ಕ್ರಿಸ್ತ ಯೆಸು ಅಪ್ನಾ ಪಾಪೊನಾ ಪರಿಹಾರನಾ ಹುತಿ ಜ಼ಲಮ ದಿದ್ಯೊ.
4 ತಿನೆ ಮಜಾ಼ರಮಾ ಘಾಲ್ಯಾ. ತೆಜ಼ ಗ್ರಂಥನಾ ಪ್ರಕಾರ ತನ್ವಾ ದಿನ್ನೆ ತೆ ಪುನರುತ್ಥಾನ ಥಯೊ.
5 ಪಾಚಾ಼ತು ಕೆಫನೆಬಿ ಬಾರಾ ಜ಼ನಾವೊನಾ ಶಿಷ್ಯಾವೊನೆ ದಿಕ್ಹ್ಯೊ.
6 ಪಾಚಲ್ತೊ ಯಕ್ಕಜ಼ ಟೈಮಮಾ ಪಾಂಚ಼ ಕ್ಹೊ ತಿಬಿ ಜಾ಼ಸ್ತ ಭಾಯೊನೆ ತೆ ದಿಕ್ಹ್ಯೊ. ತಿಮಾನಾ ದಕ್ಹಾ ಜ಼ನಾ ಮರಿ ಗಯಾತಾ ಘನ್ನಾ ಜ಼ನಾ ಹಜು಼ನಬಿ ಜಿವ್ತಾ ಛೆ.
7 ತೆ ಥಯಲ್ಪರ ಯಾಕೊಬನೆಬಿ ಪಾಚಲ್ತೊ ಕ್ಹಾರಾ ಅಪೊಸ್ತಲೊನೆ ದಿಕ್ಹ್ಯೊ.
8 ಲಾಸ್ಟೆ ದಿನ್ನ ಭರಾತಿ ಪೈಲಾಜ಼ ಹುಟ್ಟಲ ಬಚ್ಚಾ಼ ಲಿಂಗತ ಮನೆಬಿ ದಿಕ್ಹ್ಯೊ.
9 ಮಿ ತಬಿ ಅಪೊಸ್ತಲೊಮಾ ನ್ಹಾನೊ ವ್ಹೈ, ಅಪೊಸ್ತಲ ಕವಾನಾ ನಾಮನೆಬಿ ಲಾಯಕ ನತ್ತಿ. ಕಾಕದ್ಯಾಮ ಸಭೆವಾಲಾ ಮನಕ್ಹೊನೆ ತ್ರಾಸ ದಿದ್ಯೊ.
10 ಮಿ ಹಮ್ನಾ ಎ ಸ್ಥಿತಿಮಾ ರ‍್ಹವಾನು ಕ್ಹುದಾನಿ ಮರ್ಗಾಕ್ಹುಜ಼ ವ್ಹೈ. ತಿನಿ ಮರ್ಗಾ ಮಪರ ವ್ಯರ್ಥ ಥೈ ನೈ. ಮಿ ತ್ಯುನಾ ಕ್ಹಾರಾವೊತಿಬಿ ಹೆಚ್ಕಿ ಶ್ರಮಾ ಕರಿನ ಸೆವೆ ಕರ‍್ಯೊಸ. ತೆ ಕರಲವಾಲೊ ಮಿ ನ್ಹವೈ, ಮಾರಾಮಾ ರ‍್ಹವಾನಿ ಕ್ಹುದಾನಿ ಮರ್ಗಾಜ಼ ಕರಲ ವ್ಹೈ.
11 ಮಿ ರ‍್ಹಯೊತಬಿ ಸು, ತ್ಯುನೆ ರ‍್ಹಯಾತಬಿ ಸು? ಹಮೆ ಕದಲ ಸಂದೆಶ ಯಕ್ಕಜ಼ ವ್ಹೈ. ತಿನೆ ತುಮೆ ಬರೊಕ್ಹೊ ಕರ‍್ಯಾಸ.
12 ಕ್ರಿಸ್ತ ಯೆಸು ಮೌತತೊ ಪುನರುತ್ಥಾನ ಹೊಂದಿಲಿದ್ಯೊ ಕೈನ ಹಮೆ ಕವಾಮಾ, ಮರಲವಾಲಾ ಪುನರುತ್ಥಾನ ನೈ ಥಾತಾ ಕೈನ ತುಮೊಮಾ ದಕ್ಹಾ ಜ಼ನಾ ಕವಾನು ಕಿಮ್ಮ ವ್ಹೈ?
13 ಮರಲವಾಲಾ ಪುನರುತ್ಥಾನ ನತ್ತಿ ಕೈನ ಕ್ಹರಿ ರ‍್ಹಯಮ ಕ್ರಿಸ್ತ ಯೆಸು ಪುನರುತ್ಥಾನ ನತ್ತಿ ವ್ಹಂದಿಲಿದ್ಯೊ ಕೈನ ಥಯು.
14 ಕ್ರಿಸ್ತ ಯೆಸು ಪುನರುತ್ಥಾನ ನತ್ತಿ ಥಯೊ ಕದ್ಯಾಮ ಹಮಾರಿ ಬೊದನೆ ವ್ಯರ್ಥ ವ್ಹೈ ವರಿ ತುಮಾರೊ ಬರೊಕ್ಹೊಬಿ ವ್ಯರ್ಥ ವ್ಹೈ.
15 ಎನೈಸೊ ಮರಲವಾಲಾ ಪುನರುತ್ಥಾನ ನೈ ಥಾತಾ ಕವಾನು ಕ್ಹರಿಜ಼ ರ‍್ಹಯಮ ಕ್ಹುದಾ ಕ್ರಿಸ್ತ ಯೆಸುನೆ ಪುನರುತ್ಥಾನ ನತ್ತಿ ಕರಲ ಲಿಂಗತ ಥಯು. ಕ್ಹುದಾ ಕ್ರಿಸ್ತ ಯೆಸುನೆ ಮೌತತೊ ಪುನರುತ್ಥಾನ ಕರ‍್ಯೊಸ ಕೈನ ಸಾಕ್ಷಿ ಕದಲ ಹಮೆ ತೆಳಾಮಾ ಕ್ಹುದಾನಾ ಹುತಿ ಸುಳ್ಳ ಸಾಕ್ಷಿ ಕದಲ ಲಿಂಗತ ಥಯು.
16 ಮರಲವಾಲಾ ಪುನರುತ್ಥಾನ ನೈ ಥಾತಾ ಕೈನ ಕದ್ಯಾಮ ಕ್ರಿಸ್ತ ಯೆಸುಬಿ ಪುನರುತ್ಥಾನ ನತ್ತಿ ಥಯೊ.
17 ಕ್ರಿಸ್ತ ಯೆಸು ಪುನರುತ್ಥಾನ ನತ್ತಿ ಥಯೊ ಕದ್ಯಾಮ ತುಮಾರೊ ಬರೊಕ್ಹೊ ವ್ಯರ್ಥ ವ್ಹೈ, ವರಿ ತುಮೆ ಹಜು಼ನಬಿ ತುಮಾರಾ ಪಾಪಮಾಜ಼ ಛೆ.
18 ಎನೈಸೊ ಕ್ರಿಸ್ತ ಯೆಸುಮಾ ಮರಲವಾಲಾ ಕ್ಹಾರಾ ಜ಼ನಾ ಹಾಳ ಥಯಾ ಕದಲ ಲಿಂಗತ ವ್ಹೈ.
19 ಕ್ರಿಸ್ತ ಯೆಸುಮಾ ಅಪೊನೆ ರ‍್ಹವಾನೊ ಬರೊಕ್ಹೊ ಕ್ಹಾಲಿ ಎ ಜಿ಼ಂದಗಿನೆ ಸಿಮಿತ ರ‍್ಹಯಮ ಅಪೆ ಕ್ಹಾರಾ ಮನಕ್ಹೊತಿಬಿ ಕಿಳ ವ್ಹೈ.
20 ತೆನೈಸೊ ಕ್ರಿಸ್ತ ಪುನರುತ್ಥಾನ ಥೈನ ಆಯೊ. ಮರಲವಾಲಾವೊಮಾ ಪಸ್ಟ ಫಲ ಥಯೊ.
21 ಯಕ್ಕ ಮನಕ್ಹಕ್ಹು ಮರಣ ಆಯಲ ಲಿಂಗತ ಯಕ್ಕ ಮನಕ್ಹಕ್ಹು ಮರಲವಾಲಾವೊನೆ ಪುನರುತ್ಥಾನ ಆಯುಸ.
22 ಆದಾಮನಾ ಸಂಬಂಧಕ್ಹು ಕ್ಹಾರಾ ಜ಼ನಾ ಮರಣನೆ ಗುರಿ ಥಯಲ ಲಿಂಗತ ಕ್ರಿಸ್ತ ಯೆಸುನಾ ಸಂಬಂಧಕ್ಹು ಕ್ಹಾರಾ ಜ಼ನಾ ಜಿವ್ತಾ ಥೈನ ಉಟಸ.
23 ಎ ಭಾಗ್ಯನೆ ಯಕೆಕ್ಲೊ ಕ್ರಮಬದ್ದ ತರಿಕಾಮಾ ಪಡ್ದಿಲಿವಸ. ಪಸ್ಟ ಫಲ ಥೈನ ಕ್ರಿಸ್ತ ಯೆಸುಜ಼ ಜಿವ್ತೊ ಥಯೊ. ಪಾಚಾ಼ತಾ, ಕ್ರಿಸ್ತ ಯೆಸುನೆ ಮಳಲವಾಲಾ ಯೆಸು ವರಿ ಯಕ್ಕೆಮ ಆತಾಮಾ ಜಿವ್ತಾ ಥಾವಸ.
24 ಅಂತ್ಯ ಆವಾನು ತೆ ಥಯಲ್ಪರಜ಼ ವ್ಹೈ. ತೆಳಾಮಾ ಯೆಸು ಕ್ಹಾರು ಸಾಮ್ರಾಜ್ಯ ಅದಿಕಾರ ತಾಕತ ಹಾಸಿಲ ಕರಿನ ಬಾ ಥಯಲ ಕ್ಹುದಾನೆ ಒಪ್ಸಿನ ದಿವಸ.
25 ಕ್ಹುದಾ ತಿನಾ ಕ್ಹಾರಾ ದುಶ್ಮನೊನೆ ತ್ಯುನಾ ಪಗೊ ಹೆಟಾ ಘಾಲೆ ಲಕ್ಕಾ ತ್ಯುನೆ ರಾಜ್ಯ ಕ್ರಿಸ್ತ ಆಳು.
26 ಕ್ಹಾರಾತಿ ಲಾಸ್ಟೆ ಖಲಾಸ ಥಾವಾನು ದುಶ್ಮನಜ಼ ಮರಣ ವ್ಹೈ.
27 "ಕ್ಹುದಾ ಕ್ಹಾರುಜ಼ ಹತ್ಮಾ ಲಿನ ತಿನಾ ಪಾದಪಿಠ ಕರಿಲಿದ್ಯೊಸ" ಕೈನ ಬರ್ದಲ ಛೆ" ಕ್ಹಾರುಜ಼ ಹತ್ಮಾ ಲಿದಲ ಛೆ" ಕೈನ ಕತಾಮಾ, ತಿಮ್ಮ ಅದಿನ ಕರಿಲಿದಲ ಕ್ಹುದಾ ತಿಮಾ ಮಳ್ಯೊ ನೈ ಕವಾನು ಸ್ಪಶ್ಟ ಛೆ.
28 ಕ್ಹಾರುಜ಼ ಕ್ರಿಸ್ತ ಯೆಸುನಾ ಅದಿನಮಾ ಥಯಲ್ಪರ ದಿಕ್ರೊ ಥಯಲ ತೆಜ಼, ಕ್ಹಾರುಜ಼ ಅದಿನ ಕರಿನ ದಿದಲ ಕ್ಹುದಾನೆ ಅದಿನ ಥೈನ ರ‍್ಹವಸ. ತೆಳಾಮಾ ಕ್ಹುದಾ ಕ್ಹಾರಾವೊನೆ ಕ್ಹಾರುಜ಼ ಥೈನ ರ‍್ಹವಸ.
29 ಮರಲವಾಲಾವೊನೆ ಪುನರುತ್ಥಾನ ನತ್ತಿ ಕದ್ಯಾಮ, ಮರಲವಾಲಾವೊನಾ ಹುತಿ ಬಾಪ್ತಿಸ್ಮ ಕರೈ ಲಿವಸತೊ ತಿನು ಉದ್ದೆಶ ಸು ವ್ಹೈ? ಮರಲವಾಲಾವೊನೆ ಪುನರುತ್ಥಾನ ನತ್ತಿ ಕದ್ಯಾಮ ತ್ಯುನಾ ಹುತಿ ಬಾಪ್ತಿಸ್ಮ ಕರಾನು ಉಪಯೊಗ ಸು ವ್ಹೈ?
30 ಅಪೆಬಿ ಕಾ ಹರಯಕ್ಕ ಟೈಮ್ಮಾ ಖತ್ರಾಮಾ ಕಾ ಪಡಾಡ್ಯಾಸ?
31 ಹೊ ಭಾಯೊ ಭೆನೊ, ಹರಯಕ್ಕ ದಿನ್ನ ಮಿ ಮೌತನಾ ಮ್ಹೊಡಾಮಾ ಛೆ. ಅಪ್ನೊ ಪ್ರಭು ಯೆಸು ಕ್ರಿಸ್ತಮಾ ತುಮಾರಾ ಹುತಿ ಮನೆ ರ‍್ಹವಾನಿ ಹೆಮ್ಮೆಕ್ಹು ಎ ಕ್ಹರಿಬಿ ಕವಾಡ್ಯೊಸ.
32 ಮಿ ಎಫೆಸಮಾ ಮೃಗ ಯುದ್ದ ಕರಲ ಮನಕ್ಹೊನಾ ಹುತಿ ರ‍್ಹಯಮ ಮನೆ ಸು ಫೈದೊ ನತ್ತಿ? ಮರಲವಾಲಾ ಪುನರುತ್ಥಾನ ನೈ ಥಾತಾ ಕದ್ಯಾಮ"ಆವೊ ಅಪೆ ಖೈಯೆ, ಪಿಯ್ಯೆ, ವಂತಾ ಮರಿಯೆಸ್ತೊ" ಯೆಶಾಯ 22. 13
33 "ಮೊಸ ಜಾ಼ವೊ ನಕೊ; ಕೆಟ್ಟ ಸವಾಸ ಚೊ಼ಕಾ ಪನನೆ ಕೆಡಸಸ್"
34 ಗೌರ ಕರಿನ ವಿಚಾರ ಕರೊ! ನಿತಿವಂತವಾಲಾ ಥೈನ ಹುಶಾರಕ್ಹು ರ‍್ಹವೊ. ಪಾಪ ಕರೊ ನಕೊ. ದಕ್ಹಾ ಜ಼ನಾವೊನೆ ಕ್ಹುದಾನಾ ಹುತಿ ಗ್ಯಾನಜ಼ ನತ್ತಿ; ತುಮೊನೆ ಸರಮ ಔಜ಼ ಕೈನ ಎ ಕವಾಡ್ಯೊಸ.
35 ಮರಲವಾಲಾವೊನೆ ಪುನರುತ್ಥಾನ ಥಾವಾನು ಕಿಮ್ಮ? ಕಯಾ ಅಂಗಕ್ಹು ಪಡ್ದಿಲಿವಸ? ಕೈನ ಕುನ್ನಬಿ ಸವಾಲ ಕರ ಸಕಸ.
36 ಪಿಸಾಳಾ! ತು ಬಿತ್ತಲ ಬಿಯ್ಯೊ ನೈ ಮರ‍್ಯೊಮ, ತೆ ಜಿವ್ತು ಥಾವಸ ಸು?
37 ದೆಕ; ಯಕ್ಕ ಟೈಮ ಘೌ ರ‍್ಹವಾದೆ ಬಿಜಿ಼ ಕಯುಬಿ ಬಿಯ್ಯೊ ರ‍್ಹವಾದೆ ಬಿತ್ತತಾಮಾ ಖಾಲಿ ಬಿಯ್ಯಾಜ಼ ಘಾಲಸ ತೆನೈಸೊ ಅಗು ಬೆಳದಾನು ಝಾಡ ಬಿತ್ತತೊ ನೈ.
38 ತೆನೈಸೊ ಕ್ಹುದಾ ತಿನಿ ಪಸಂದ ಲಿಂಗತ ತಿನೆ ಅಂಗ ದಿವಸ. ಯಕೆಕ್ಕ ಬಿಯ್ಯಾನೆ ತಿನಾ ತಕ್ಕ ಅಂಗ ದಿವಸ. ಆದಿಕಾಂಡ 1. 11
39 ಕ್ಹಾರಾ ಅಂಗೊ ಯಕ್ಕಜ಼ ತರಾನಾ ನ್ಹವ್ಹೈ; ಮನಕ್ಹನು ಅಂಗ ಬಿಜು಼ ವ್ಹೈ, ಜಾನವರನು ಅಂಗ ಬಿಜು಼ ವ್ಹೈ, ಪಕ್ಷಿಯೊನು ಅಂಗ ಬಿಜು಼ ವ್ಹೈ ಮಚ಼್ಲಿನು ಅಂಗ ಬಿಜು಼ ವ್ಹೈ.
40 ಎನೈಸೊ ಸ್ವರ್ಗನಾ ಅಂಗೊ ಛೆ, ಭುಲೊಕನಾ ಅಂಗೊ ಛೆ, ತೆನೈಸೊ ಸ್ವರ್ಗನಾ ಅಂಗೊನು ಮಹಿಮಾಜ಼ ಬಿಜಿ಼ ವ್ಹೈ, ಭುಲೊಕನಾ ಅಂಗೊನಿ ಮಹಿಮಾ ಬಿಜಿ಼ ಛೆ.
41 ಸುರ್ಯಾನು ಉಜಾಲು ಯಕ್ಕ ತರಾ ರ‍್ಹಯಮ, ಚಂದಪ್ಪಾನು ಉಜಾಲು ಬಿಜಿ಼ ತರಾ ರ‍್ಹವಸ, ತಿನಾ ಲಿಂಗತಜ಼ ಚಿಕ್ಕಿಯೊನು ಉಜಾಲುಬಿ ಬಿಜಿ಼ ತರಾ ವ್ಹೈ.
42 ಮರಲವಾಲಾವೊನೆ ಥಾವಾನು ಪುನರುತ್ಥಾನ ತಿನಾ ಲಿಂಗತಜ಼ ರ‍್ಹವಸ. ಬಿತ್ತಾನು ಹಾಳ ಥಾವಾನು. ಪುನರುತ್ಥಾನ ಥಾವಾನು ಹಮೆಶಾ ರ‍್ಹವಾನು ವ್ಹೈ.
43 ಕೆಟ್ಟ ಸ್ಥಿತಿಮಾ ಬಿತ್ತಾವಸ; ಮಹಿಮಾಮಾ ಪುನರುತ್ಥಾನ ಥಾವಸ; ಬಲಹಿನ ಸ್ಥಿತಿಮಾ ಬಿತ್ತಾವಸ, ತಾಕತ ವ್ಹಂದಿಲಿನ ಪುನರುತ್ಥಾನ ಥಾವಸ;
44 ಬಿತ್ತಲ ಪ್ರಾಕೃತ ಅಂಗ ಥೈನ ಬಿತ್ತಾವಸ; ಪುನರುತ್ಥಾನ ಥಾವಾನು ಆತ್ಮಿಕ ಅಂಗ ವ್ಹೈ. ಪ್ರಾಕೃತ ಅಂಗ ರ‍್ಹವಾನು ರ‍್ಹಯಮ ಆತ್ಮಿಕ ಅಂಗ ರ‍್ಹವಾನು ಕ್ಹರಿಜ಼ ವ್ಹೈ.
45 "ಪಸ್ಟ ಮನಕ್ಹ ಥಯಲ ಆದಾಮ ಜ಼ಲಮ ಲಿದಲ ಮನಕ್ಹ ವ್ಹೈ "ಕವಾನು ಪವಿತ್ರ ಗ್ರಂಥಮಾ ಬರ್ದಲ ಛೆತೊ. ಲಾಸ್ಟನೊ ಆದಾಮ ತುಬಿ ಜ಼ಲಮ ದಿವಾಲೊ ಆತ್ಮಾ ಥಯೊ.
46 ಆತ್ಮಿಕ ರ‍್ಹಯಲ ಪೈಲಾ ಆಯಲ ನ್ಹವ್ಹೈ, ಪ್ರಾಕೃತ ರ‍್ಹಯಲ ಪೈಲಾ ವ್ಹೈ; ಪಾಚಾ಼ತು ಆತ್ಮಿಕ ರ‍್ಹಯಲ ವ್ಹೈ.
47 ಪೈಲಾ ಮನಕ್ಹ ಮಾತಿಕ್ಹು ಕರಲ ವ್ಹೈ; ಜಿಮಿನನೆ ಮಳಲವಾಲೊ ವ್ಹೈ, ಬೆವಾ ಮನಕ್ಹ ಸ್ವರ್ಗತೊ ಆಯಲವಾಲೊ ವ್ಹೈ.
48 ಮಾತಿಕ್ಹು ಹುಟ್ಟಲವಾಲೊ ಕ್ಯವೊ ಛೆ ಮಾತಿನೆ ಸಂಬಂಧ ರ‍್ಹಯಲವಾಲಾ ತ್ಯವಾಜ಼ ಥಾವಸ; ಸ್ವರ್ಗತೊ ಆಯಲವಾಲೊ ಕ್ಯವೊ ಛೆ ಸ್ವರ್ಗನಾ ವ್ಹೈ.
49 ಅಪೆ ಮಾತಿಕ್ಹು ಹುಟ್ಟಲವಾಲಾನಾ ರುಪ ಲಿದಲ ಪ್ರಕಾರ ಸ್ವರ್ಗತೊ ಆಯಲವಾಲಾನಾ ರುಪ ಲ್ಯು.
50 ಮಯಾನಾ ಭಾಯೊ ಭೆನೊ, ಮಿ ಕವಾನು ಸುವ್ಹೈ ಕದ್ಯಾಮ, ಹಾಳ ಥಾವಾನು ಅಂಗ ಕ್ಹುದಾನಿ ರಾಜ್ಯನೆ ವಶಮಾ ನೈ ಕರಸಕ್ತು; ತಿನಾನ ಲಿಂಗತಜ಼, ಹಾಳ ಥೈನ ಜಾ಼ವಾನು ಅಮರತ್ವನೆ ಬಾದ್ಯ ಥಾವಾನೆ ಸಾಧ್ಯಾ ನತ್ತಿ.
51 ದೆಕೊ! ಯೆಳಕ್ಕಾ ದಡಿ ರ‍್ಹಯಲ ಸಂಗತಿ ಮಿ ತುಮೊನೆ ಕೌಸ, ಅಪೆ ಕ್ಹಾರಾ ಮರ‍್ತಾ ನೈ, ಬದಲಾವಣೆ ಥೈಯೆಸ.
52 ಲಾಸ್ಟ ತುತ್ತುರಿನು ಆವಾಜ಼ ಡುಬ್ತಾಮಾ, ದಕ್ಹಿ ಯೆಳಮಾ, ಡೊಳಾ ಝಾಕೆ ಲಕ್ಕಾ ಬದಲಾವಣೆ ಅಪೆ ಕ್ಹಾರಾ ಥೈಯೆಸ. ಹೊ, ತುತ್ತುರಿ ಮೊಳಗಿ ಮರಲವಾಲಾ ನಿರ್ಣಯ ಥೈನ ಉಟಸ, ಅಪೆ ರುಪಾಂತರ ಥಯೆಸ.
53 ಹಾಳ ಥಾವಾನಾ ಎ ಅಂಗ ನಿರ್ಲತ್ವ ಘಾಲಿವಸ, ಮರಣನೆ ಅದಿನ ಥಯಲ ಎ ಅಂಗ ಅಮರತ್ವ ಘಾಲಿವಾನು ಜ಼ರುರಿ ಛೆ.
54 ಹಾಳ ಥಾವಾನು ಎ ಅಂಗ ನಿರ್ಲಯತ್ವ ಘಲಿದಲ ಪರ ಮರಣನೆ ಅದಿನ ಥಯಲ ಎ ಅಂಗ ಅಮರತ್ವನೆ ಘಾಲಿದಲ ಪರ ಬರ್ದಲ ವಾತ ಪುರಾ ಥಾವಸ.
55 ಎ! ಮರಣ ತಾರಿ ಝಿತ್ತ ಕಿಜಾ಼ ಛೆ? ಎ! ಮರಣ ತಾರಿ ಬಿಜಾ಼ವೊನೆ ಹಾಳ ಕರಾನಿ ತಾಕತ ಕಿಜಾ಼ ಛೆ?
56 ಮೌತನಿ ಕೊಂಡಿ ಪಾಪಜ಼ ವ್ಹೈ; ಪಾಪನಿ ತಾಕತನಿ ಆದಾರ ಧರ್ಮ ಶಾಸ್ತ್ರನಾ ವಿಧಿಯೊಜ಼ ವ್ಹೈ.
57 ತೆನೈಸೊ ಅಪ್ನೊ ಕರ್ತಾ ಥಯಲ ಯೆಸು ಕ್ರಿಸ್ತನಾ ಮುಲಕ ಅಪೊನೆ ಝಿತ್ತ ದಿವಾಲಾ ಕ್ಹುದಾನೆ ಹಮೆಶಾಬಿ ಮಹಿಮಾ ಥಾವಾದೆ.
58 ತಿನಾ ಹುತಿ ಮಾರಾ ಮಯಾನಾ ಭಾಯೊ ಭೆನೊ, ಘಟ್ಟ ಥೈನಬಿ ನಿಶ್ಚಲ ಥೈನ ರ‍್ಹವೊ. ಕಾಕದ್ಯಾಮ ತುಮೆ ಕ್ಹುದಾನಿ ಸೆವಾಮಾ ಕರಾನಿ ಕೊಶಿಶ ವ್ಯರ್ಥ ನೈ ಥಾತು. ತೆ ತಿಳ್ದಿಲಿನ ಕ್ಹುದಾನು ಕಾಮ ಹಮೆಶಾಬಿ ಘನ್ನಿ ಆಸಕ್ತಿಕ್ಹು ವರಿ ಹಮೆಶಾಬಿ ಶ್ರಧ್ದಾ ರ‍್ಹಯಲವಾಲಾ ಥೈನ ಕರಾಲಾ ಥಾವೊ.