2
1 ಬಿಜೆಕ್ಕೆಮ ತುಮೊಕನ ಐನ ತುಮೊನೆ ತ್ರಾಸಮಾ ಪಾಡು ನೈ ಕೈನ ಮಿ ಫೈಸಲೊ ಕರಲಿದ್ಯೊಸ.
2 ಮಿಜ಼ ತುಮೊನೆ ದುಖ ದಿದ್ಯೊಮ, ಮನೆ ಕುನ್ನ ಖುಶಿ ಕರಸ? ಮಾರಾಕ್ಹು ದುಖಮಾ ಪಡಲವಾಲಾ ತುಮೆ ನ್ಹವೈ ಸು?
3 ತಿನಾಹುತಿ ಮಿ ತೆ ಪತ್ರ ಬರ್ದ್ಯೊಸ; ಮನೆ ಖುಶಿ ಕರಾಲಾಜ ಮನೆ ದುಖಮಾ ಪಾಡು ನೈ ಕೈನ ಮಿ ಆಯೊ ನೈ ಮಾರಿ ಖುಶಿಜ಼ ತುಮಾರಿ ಖುಶಿ ವ್ಹೈ ಕೈನ ಮಿ ತಿಳದಿಲಿದ್ಯೊಸ.
ದುಶ್ಮನು
4 ಮಿ ತುಮೊನೆ ಘನ್ನೊ ತ್ರಾಸಕ್ಹು ವರಿ ಮನಸ ದುಕ್ಕಕರಿಲಿನ ವರಿ ರೊತೊಜ ಬರದ್ಯೊಸ. ಮಾರು ಉದ್ದೆಶ ತುಮೊನೆ ದುಖ ಕರುಕೈನ ನ್ಹವೈ.ತೆ ನೈಸೊ ಮಿ ತುಮೊನೆ ಕೆಕ್ಲೊ ಮಯಾ ಕರೊಸ ಕೈ ತಿಳ್ಸವಾನು ವ್ಹೈ.
5 ಮನಸೆ ದುಖ ಕರಾಲೊ ತುಮೊಮಾ ಯಕ್ಲೊ ರ‍್ಹೈತಬಿ ತೆ ಕ್ಹಾಲಿ ಮನೆ ಯಕ್ಕಜ಼ ದುಖ ನತ್ತಿ ಕರ‍್ಯೊಸ ತುಮಾರಾಮಾ ಘನ್ನಾಜ಼ನಾವೊನೆ ದುಖ ಕರ‍್ಯೊಸ. ತೆ ದುಖ ಕ್ಹಾರಾ ಜ಼ನಾವೊನೆ ಥಯುಸ ಕೈನ ಮಿ ಕತೊ ನೈ.
6 ಹವಾ ಮನಕ್ಹನೆ ತುಮಾರಾ ಘನ್ನಾ ಮನಕ್ಹೊ ಕ್ಹು ಮಳಲ ಶಿಕ್ಷಾ ಬಸ್ಸ.
7 ಹಮ್ನಾ ತುಮೆ ತಿನೆ ತಿನೆ ಶಿಕ್ಷಾ ದಿದ್ಯಾವಾಚಿ ತಿನೆ ಮಾಫಕರೊ, ತಿನೆ ಮಯಾ ಕರೊ. ನೈತೊ ತೆ ಘನ್ನೊ ದುಖಮಾ ಡುಬಿ ಜಾ಼ವಸ.
8 ತಿನಾಹುತಿ ತಿನೆ ತುಮೆ ಮಯಾ ದೆಕಾಡು ಕೈನ ಮಾಂಗಿಲ್ಯುಸ.
9 ಕ್ಹಾರಾ ವಿಷಯಮಾ ತುಮೆ ವಿಧೆಯ ಥಯಾಸು ನೈ ಕೈನ ತುಮಾರಿ ಚಾಳಿಯೊ ಪರಿಕ್ಷಾ ಕರ್ಲಿನ ತಿಳಿದಿಲ್ಯು ಕೈನ ತೆಜ಼ ಉದ್ದೆಶಕ್ಹು ಬರ್ದ್ಯೊಸ.
10 ತುಮೆ ಕಿನೆ ಮಾಫ ಕರೊಶಿ ನೈ ತಿನೆ ಮಿಬಿ ಮಾಫ ಕರುಸ. ತುಮಾರಾ ಹುತಿಜ಼ ತಿನೆ ಕ್ರಿಸ್ತನಾ ಸನ್ನಿದಾನಮಾ ಮಾಫ ಕರ‍್ಯೊಸ.
11 ಸೈತಾನ ಅಪೊನೆ ಮೊಸ ಕರಿಪಾಡು ನೈ ಕೈನ ಅಮ ಕರ‍್ಯೊ. ತೆ ಸು ಕರಸ ತಿನಾ ವಿಚಾರೊ ಕಿಮ ಶೆ ಕೈನ ಅಪೆತೊ ಚೊ಼ಕಿ ತರಾಜ಼ ತಿಳದಿಲಿದ್ಯಾಸ.
ತ್ರೊವಾನೆ ಪೌಲಾನಿ ಪ್ರಯಾಣ
12 ಕ್ಹುದಾ ಮಾರಾ ಹುತಿ ಬಾಕಲ ಕಾಡ್ಯೊಸ ಕೈನ ವಿಚಾರ ಕರಲಿನ ಕ್ರಿಸ್ತನಿ ಸುವಾರ್ತೆ ಕವಾನೆ ಮಿ ತ್ರೊವಾ ಕವಾನಾ ಗಾಮೆ ಆಯೊ.
13 ರ‍್ಹೈತುಬಿ ತ್ಯಾ ಮಾರೊ ಭೈ ತಿತ ನೈ ಮಳಲಕ್ಹು ಮನೆ ಸಮಾದಾನ ಥಯು ನೈ ತಿನಾ ಹುತಿ ತ್ಯಾ ರ‍್ಹಯಲ ಕ್ಹಾರಾವೊನೆ ಮಳಿನ ತ್ಯಾಂತೊ ಮೆಕೆದ್ಯೊನೆ ಆಯೊ.
ಕ್ರಿಸ್ತ ಮುಲಕ ಜಯ
14 ಕ್ಹುದಾ ಸ್ತೊತ್ರಾ ಥಾವಾದೆ ಕ್ರಿಸ್ತನಾ ಮುಲಕ ಕೆಳಾಮಾಬಿ ಅಪೊನೆ ಜಿತ್ತಾಡಾಲೊ ವ್ಹೈ. ಕ್ಹುದಾನು ಗ್ಯಾನನಿ ಚೊ಼ಕಿ ಬಾಸ ಕ್ಹಾರಿ ಜ಼ಗಾ ಫೈಲಾವಾನೆ ಅಪೊನೆ ಉಪಯೊಗ ಕರ‍್ಯೊಸ.
15 ರಕ್ಷಣೆ ಮಾಟ ರ‍್ಹಯಲ ಕುನ ವಾಲಾವೊನೆ ವರಿ ನಾಶ ಕೈನ ವಾಟ್ಮಾ ರ‍್ಹ ಮನಕ್ಹೊ ಕ್ಹುದಾ ಮಾ ಕ್ರಿಸ್ತ ಪವಿತ್ರ ಥಯಾಸ.
16 ಅಪೆ ನಾಶನಾ ವಾಟ್ಮಾ ರ‍್ಹಯಲ ವಾಲಾವೊನೆ ತ್ಯುನೆ ಬಳಾನು ಆಗ ಥಯಾಸ; ರಕ್ಶನನಾ ವಾಟ್ಮಾ ರ‍್ಹಯಲವಾಲಾವೊನೆ ಜುವ ದಿವಾಲಾ ಸುಗಂದ ವ್ಹೈ. ಹವಾ ಕಾಮೊನೆ ಕುನ್ನ ಲಾಯಕ ವ್ಹೈ?
17 ಕೆಕ್ಲಾಲಿ ಮನಕ್ಹೊ ಕ್ಹುದಾನಿ ವಾಕ್ಯಾ ತಿಮಾ ಸು ಚಾ಼ಯೆ ತೆ ಘಾಲಿನ ಕೈನ ವ್ಯಾಪಾರ ಕರಸ. ಹಮೆ ತೊ ತಿಮ್ಮ ನವೈ. ಕ್ಹುದಾ ಕಂತಾಜ ಇನಿಲಿದಲವಾಲಾ ಥೈನ ಕ್ಹುದಾ ಕ್ಹಾಮಾ ಕ್ರಿಸ್ತ ಯೆಸುನಾ ಅನ್ಯೊನ್ಯತೆಮಾ ಹಮೆ ಸು ಹೊತ್ತು ತೆಜ಼ ತುಮೊನೆ ಕದ್ಯಾಸ.