ಕೊಲೊಸ್ಸೆಯರಿಗೆ ಬರೆದ ಪತ್ರಿಕೆ
ಕೊಲೆಸ್ಸೆವಾಲಾವೊನೆ ಬರ್ದಲ ಪತ್ರ
ವಳಕ
1 ಕೊಲೆಸ್ಸವಾಲಾವೊನೆ ಬರ್ದಾನು ಪತ್ರ ಪೌಲಾ ಬರ್ದಸ. 1:1 ತೆ ಎ ಪತ್ರ ಕ್ರಿಸ್ತ ಹುಟ್ಟೆಲ ಪರ ಘನು 60 ವರಕ್ಹಮ್ಮಾ ಬರ್ದಸ. ತೆ ಟೈಮಾ ತೆ ಘನೊ ರೊಮನಾ ಜೆಲಮ್ಮಾ ವ್ಹತ್ತೊ. ಕೊಲೆಸ್ಸ ಬರ್ದಲ ಪತ್ರ ಎಫೆಸ ಬರ್ದಲ ಪತ್ರ ವರಿ ತಿಮೊಥಿನೆ ಬರ್ದಲ ಪತ್ರ ತೆ ಪತ್ರವೊನೆ ಜೆಲಮ್ಮಾ ಬರ್ದಲ ಪತ್ರ ಕೈನ ಕವಸ. ಕಾಕದ್ಯಾಮ ತೆ ಪತ್ರ ಬರ್ದತ್ತಾಮಾ ತೆ ಜೆಲಮ್ಮಾ ವ್ಹತ್ತೊ. ತೆ ಪತ್ರ ಕೊಲೆಸ್ಸ ಗಾಮವಾಲಾವೊನೆ ಬರ್ದಸ. 2:1 ಮಾ ಕದಲಲಿಂಗತ ಕೊಲೆಸ್ಸ ಸಭೆನೆ ಶುರು ಕರ‍್ಯೊ ನೈ,ತೆನೈಸೊ ತಿನಾಹುತಿ ದಕ್ಹಾ ಜವಾಬ್ದರಿಯೊ ವ್ಹಂದಿಲಿದ್ಯೊ. ಎಪಪ್ರೊದಿತ ಕೊಲೆಸ್ಸವಾಲೊ ಥೈನ ರ‍್ಹಯಲಕ್ಹು ತೆ ಸಭೆ ಭಾಂದಾನಾಹುತಿ ಸಾಧ್ಯ ಛೆ. ಪೌಲಾ ಸಭೆಮ್ಮಾ ದಕ್ಹಾ ಸುಳ್ಳ ಬೊದನೆ ಚಾ಼ಲಾಕ್ಹು ಕಾಳಜಿ ಕರಾವಾಲೊ ಥಾವಸ. ತೆ ಪತ್ರಮ್ಮಾ ತೆ ಘನೊ ತೆ ವಿಷಯಮಾ ಬರ್ದಸ. ತ್ಯಾ ಜು಼ನು ವಡಂಬಡಿಕೆ ಯಹುದ್ಯೊ ನಿಯಮನು ವಿಶ್ವಾಸಿಯೊ ಪಾಲನೆ ಕರು ಕೈನ ಖಾಸ ಕರಿನ ಸುನ್ನತಿ ಕರಲಿವಾನು ಕೈನ ವತ್ತಾಯ ಕರಾನು ಯೆಹುದಿಯೊ ವಿಶ್ವಾಸಿಯೊನು ಕವಾನು ಯಕ್ಕ ಗುಂಪ ವ್ಹತ್ತು. ಪೌಲಾ ಸ್ಪಷ್ಟ ವಿಸ್ವಾಸಿಯೊ ಕ್ಹುದಾಕ್ಹು ಸ್ವಿಕಾರ ಕರಾನು ಕ್ರಿಸ್ತನಾ ಹೊರತಾಗಿ ಕುನ ವರಿ ಕೈಯುಜ಼ ಜರುತ್ತ ನತ್ತಿ. ವರಿ ತೆ ಬೊದನೆ ಮನಕ್ಹೊ ಉಪಯೊಗ ಕರು ನೈಸೊ ಕಾರಣಪರ ಹೊಂದಿಲಿನ ಜಾ಼ವಸ ಕೈನ ಬರ್ದಸ. 2:8
ಪಿಠಿಕೆ
1) ಕೊಲೆಸ್ಸ ಸಬೆನೆ ವಂದನೆ ಕರತ್ತೊ ಪೌಲಾ ತೆ ಪತ್ರ ಶುರು ಕರಸ. 1:1-2
2) ಪಾಚಲ್ತೊ ತೆ ಕ್ರಿಸ್ತನಾ ಶ್ರೆಷ್ಠತೆನಾಹುತಿ ಖಾಸ ಕರಿನ ಕೊಲೆಸ್ಸಮಾ ರ‍್ಹಯಲ ಸುಳ್ಳ ಬೊದನೆನೆ ಪ್ರತಿ ಉತ್ತರ ದಿವಾನಾ ವಿಷಯಮ್ಮಾ ಬರ್ದಸ. 1:3—3:4
3) ತೆ ಘನ್ನಾ ಪತ್ರಿಯೊ ಲಿಂಗತ ಪೌಲಾ ತಿನು ಅರ್ಧಕ್ಹು ಅರ್ಧು ಪತ್ರ ವಿಶ್ವಾಸಿಯೊ ಜಿವ್ನಾಕರು ಕೈನ ಖಾಸ ರ‍್ಹಯಲ ಸುಚನೆ ದಿವಸ. 3:5—4:6
4) ಪೌಲಾ ವಂದನಾ ಕರಾನಾ ಮುಲಕ ವರಿ ತೆ ಪತ್ರ ಬಿಜಾ಼ ಸಬೆಮ್ಮಾ ಜೊ಼ರ ಒದು ಕೈನ ಸುಚನೆ ದೆತೊ ಪೌಲಾ ತೆ ಪತ್ರನಾ ಕ್ಹರಾವಸ. 4:7-18
1
1 ಕ್ಹುದಾ ತಿನಾ ಚಿತ್ತಾನಾ ಅನುಸಾರ ಯೆಸುಕ್ರಿಸ್ತನೊ ಅಪೊಸ್ತಲ ಥಯಲ ಪೌಲಾ ವರಿ ಭೈ ಥಯಲ ತಿತಾ ಬರ್ದಲ ಪತ್ರ.
2 ಕೊಲೆಸ್ಸಮಾ ರ‍್ಹಯಲ ಕ್ಹುದಾನಾ ಮನಕ್ಹೊನೆ ಕದ್ಯಾಮ ಕ್ರಿಸ್ತಮಾ ಬರೊಕ್ಹೊವಾಲಾ ವರಿ ಪವಿತ್ರ ಥಯಲ ಭಾಯೊ, ಭೆನೊನೆ ಮಿ ಎ ಪತ್ರ ಮಾರೊ ಭಯ ಥಯಲ ತಿಮೊಥಿನಾ ಕ್ಹಾತೆ ಮಳಿನ ಬರ್ದಾಡ್ಯೊಸ. ಮಾರೊ ಬಾ ಥಯಲ ಕ್ಹುದಾಕ್ಹು ತಮೊನೆ ಮರಗಾ,ಶಾಂತಿ ಮಳಾದೆ.
3 ಹಮೆ ಪ್ರಾರ್ಥನಾ ಕರ್ತಾಮ್ಮಾ ತಮಾರಾ ವಿಷಯಮ್ಮಾ ಕ್ಹುದಾನೆ ಸ್ತೊತ್ರ ಕೈಯೆಸ. ಮಾರೊ ಪ್ರಭು ಥಯಲ ಯೆಸು ಕ್ರಿಸ್ತ ಬಾ ಥಯಲ ಕ್ಹುದಾ
4 ಹಮೆ ಕ್ಹುದಾನೆ ಸ್ತೊತ್ರ ಕರಾನೆ ಕಾರಣ ಸುವೈ ಕದ್ಯಾಮ ಕ್ರಿಸ್ತಮಾ ಯೆಸುಮಾ ರ‍್ಹಯಲ ತಮೊನೆ ರ‍್ಹಯಲ ಬರೊಕ್ಹಾನಾ ಹುತಿ, ಕ್ಹುದಾ ಮನಕ್ಹೊ ಪರ ತಮೊನೆ ರ‍್ಹಯಲ ಮಯಾನಾಹುತಿ ಪುಚ್ಯೊಸ.
5 ತಮೊನೆ ನಿರಿಕ್ಷೆ ರ‍್ಹಯಲನಾಹುತಿ ಕ್ರಿಸ್ತನಾ ಪರ ಬರೊಕ್ಹೊ ಮ್ಹೆಲ್ಯಾ ವರಿ ಕ್ಹುದಾನಾ ಮನಕ್ಹೊನೆ ಮಯಾ ಕರ‍್ಯೊ. ತಮೆ ನಿರಿಕ್ಷೆ ಕರಾನು ತಮಾರಾಹುತಿ ಸ್ವರ್ಗಲೊಕಮಾ ತಯಾರ ಕರ‍್ಯಾಸ ಕವಾನು ತಮೊನೆ ತಿಳ್ದಾಸ. ತಮೊನೆ ತಿಳ್ಸಾಯೆಲ ಕ್ಹರಿ ವಾಕ್ಯ ಕದ್ಯಾಮ ಸುವಾರ್ತೆನೆ ತಮೆ ಪುಚತ್ತಾಮ್ಮಾ ತೆ ನಿರಿಕ್ಷೆನಾಹುತಿ ತಿಳದಿಲಿದ್ಯಾಸ.
6 ತಮೆ ಸುವಾರ್ತೆ ಐಕಿ ಕ್ಹುದಾನಿ ಮರಗಾನಿ ಕ್ಹರಿ ತಿಳ್ದಿಲಿದಲಕ್ಹು ಸುವಾರ್ತೆ ತುಮೊಮ್ಮಾ ಘನಿ ಥಾವಾಡಿಸ ವರಿ ಮನಕ್ಹೊನೆ ಆಶಿರ್ವಾದ ಥೈನ ರ‍್ಹೈಯುಸ. ತಿನಾಲಿಂಗತಜ಼ ದುನಿಯಾಮಾ ಕ್ಹಾರಿ ಜ಼ಗಾಬಿ ಸುವಾರ್ತೆ ಘನಿ ಥಾವಾಡಿಸ ವರಿ ಆಶಿರ್ವಾದ ಥೈನ ರ‍್ಹವಸ.
7 ತಮೆ ಎಪಫ್ರದಿಕ್ಹು ಕ್ಹುದಾನಿ ವರಗಾ ತಿಳ್ದಿಲಿದ್ಯಾಸ. ತೆ ಹಮಾರಾ ಕ್ಹಾತೆ ಸೆವೆ ಕರಾಡ್ಯೊಸ. ಹಮೆ ತಿನೆ ಮಯಾ ಕರೆಯೆಸ. ತೆ ಹಮಾರಾಹುತಿ ಕ್ರಿಸ್ತನೊ ಬರೊಕ್ಹೊವಾಲೊ ಸೆವಕ ಥಯೊಸ.
8 ಪವಿತ್ರ ಆತ್ಮಾನೆ ಪ್ರೆರಿತ ಥಯಲ ತುಮಾರಿ ಮಯಾನಾ ಹುತಿ ರ‍್ಹಯಲ ವಿಷಯ ಮನೆ ಕೈನ ದಿದಲ ತೆಜ಼ ವ್ಹೈ.
9 ಇಮ್ಮ ರ‍್ಹಯಲ ಹುತಿ ಎ ತುಮಾರಿ ಮಯಾನಾ ಹುತಿ ಹಮೆ ಐಕಲ ದಿಂತಾ ತುಮಾರಾ ಹುತಿ ಇಕ್ಹರ‍್ಯಾವಾಚಿ ತುಮೆ ಕ್ಹಾರಿ ತರಾನಿ ಆತ್ಮಿಕನಿ ವಿಷಯನಾ ಹುತಿ ಗ್ಯಾನಕ್ಹು ಕ್ಹುದಾನಿ ಚಿತ್ತ ತಿಳದಿಲಿವಾನಾಹುತಿ
10 ಕ್ಹುದಾನಿ ಪಸಂಪ ಡೊಳಾ ದಿಕ್ಹಾವರಕ್ಹಾ ತುಮೆ ಚೊ಼ಕಾ ಥಛ ಕೈನ ಕ್ಹಾರಿ ತರಾನಾ ಚ಼ೊಕಾ ಫಲ ದಿವಾಲಾ ಥೌ ಕೈನ ಬೆಳತ್ತಾ ರ‍್ಹೌ ಕೈನ
11 ತಿನಿ ಮಹಿಮಾನಿ ತಾಕತ ಲಿಂಗತ ಕ್ಹಾರಿ ತರಾಮಾ ತಾಕತ ಹೊಂದಿನ ಕ್ಹಾರಿ ರಾಕ್ಹು ತಡ್ಇಲಿವಾನು ಶಾಂತಿ ಸಮಾಧನಕ್ಹು ತಡ್ದಿಲ್ಯು ಕೈನ,
12 ಕ್ಹುದಾನಾ ಭಕ್ತೊ ಕ್ಹುದಾನಾ ಉಜಾಲಾಮಾ ರ‍್ಹಯಲ ವಾಟೊ ಲಿವಾನಾ ಹುತಿ ಅಪೊನೆ ಯೊಗ್ಯ ಕರಿನ
13 ಕ್ಹುದಾ ಅಪೊನೆ ಅಂದಕಾರನೊ ಅದಿಕಾರಮತೊ ಛೊಡೈನ ತಿನಾ ಮಯಾನಾ ದಿಕ್ರಾನಾ ರಾಜ್ಯಮಾ ಮಳಾಯೊ.
14 ಎ ದಿಕ್ರಾಮಾ ಅಪ್ನಾ ಪಾಪೊ ಮಾಫಕರಿನ ಅಪೊನೆ ಬಿಡುಗಡೆ ಥೈ.
15 ಕ್ರಿಸ್ತ ನೈ ದಿಕ್ಹಾನು ಕ್ಹುದಾನು ರೊಪ ವ್ಹೈ. ಕ್ಹಾ ಸೃಷ್ಠಿನೆ ತೆಜ಼ ಮ್ಹೊಟೊ ವ್ಹೈ.
16 ಭುಪರ ಲೊಕಮಾ ರ‍್ಹಯಲ ದಿಕ್ಹಾನಿ ನೈ ದಿಕ್ಹಾನು ಕ್ಹಾರುಜ಼ ಸಿಂಹಾಸನ್ನ ರ‍್ಹೈನೆಕಾ ಕ್ಹಾರವೊಪರ ಅದಿಕಾರ ರ‍್ಹೈನೆಕಾ ತಿನಾಕ್ಹುಜ಼ ತಯ್ಯಾರ ಥಯು. ಕ್ಹಾರುಜ಼ ತಿನಾಕ್ಹುಜ಼ ವರಿ ತಿನಾಹುತಿಜ಼ ತಯ್ಯಾರ ಥಯು.
17 ತೆ ಕ್ಹಾರಾವೊತಿ ಪೈಲಾಜ಼ ರ‍್ಹಯಲವಾಲೊ ವ್ಹೈ. ತಿಮಾ ಕ್ಹಾರುಜ಼ ಯಕ್ಕ ಥಯುಸ.
18 ಸಬೆ ಕವಾನು ಅಂಗನೆ ತೆ ಮಾತು ಥಯೊಸ. ಕ್ಹಾರಾವೊಮಾ ತೆಜ಼ ಪೈಲಾ ವ್ಹೈ. ಮರಲವಾಲಾವೊಮಾತೊ ತೆಜ಼ ಜಿವ್ತೊ ಥೈನ ಉಟಿನ ಆಯಲವಾಲೊ ತೆಜ಼ ವ್ಹೈ.
19 ಕಾಕದ್ಯಾಮ ತಿಮಾಜ಼
20 ವರಿ ತೆ ಶಿಲುಬಿಪರ ಚುವಾಯಲ ರಗತಕ್ಹು ತಿಕ್ಹು ಸಮಾಧಾನ ಹುಟ್ಸಿನ ವರಿ ಭುಪರಲೊಕಪರ ರ‍್ಹಯಲ ಕ್ಹಾರುಜ಼ ತಿನಾ ದಿಕ್ರಾನಾ ಮುಲಕ ಸಮಾಧಾನ ಕರಿಲ್ಯು ಕೈನ ಬಾ ಥಯಲ ಕ್ಹುದಾ ಆಸ ಕರ‍್ಯೊ.
21 ಎನೈಸೊ ಪೈಲಾನ ಕಾಲ್ಮಾ ರ‍್ಹಯಲ ಬಿಜಾ಼ ಮನಕ್ಹೊ ಕೆಟ್ಟ ಕಾಮೊಕ್ಹು ಮನಸ್ಮಾ ಶಿಟ್ಟ ಮ್ಹೆಲ್ಲಿನ ತಿನಾ ವಿರೊದಿಯೊ ಥಯಾತಾ.
22 ಹಮ್ನಾತೊ ಕ್ಹುದಾ ತುಮೊನೆ ಯೆಸು ಕ್ರಿಸ್ತನಾ ಅಂಗನಾ ಮರಣನಾ ಮುಲಕ ವಪ್ಪಂದ ಕರಿಲಿದ್ಯೊಸ. ಕ್ಹುದಾ ತಿನಿ ಸನ್ನಿಧಿಮಾ ತುಮೊನೆ ಪರಿಶುದ್ಧ ಕರಿನ, ತುಮೊಮಾ ಸುಜ಼ ತಪ್ಪ ನೈಸೊ ಕರಿನ ಹುಬ್ರಾಡು ಕೈನ ಕ್ಹುದಾ ಇಮ್ಮ ಕರ‍್ಯೊ.
23 ಹಬಾಳನಾ ಹೆಟು ರ‍್ಹಯಲ ಕ್ಹಾರಿ ಸೃಷ್ಟಿನೆ ಕದಲ ಸುವಾರ್ತೆಕ್ಹು ಹುಟ್ಟಲ ಆಸಕ್ಹು ಹಲ್ಲು ನೈ ಕೈನ ಬರೊಕ್ಹಾಮಾ ಘಟ್ಟ್ಟ ಹುಬ್ರಯಲ ರ‍್ಹಯಾಮ
24 ಮಿ ಹಮ್ನಾ ತುಮಾರಾ ಹುತಿ ಅನುಭವಿಸ್ತೊ ರ‍್ಹಯಲ ತ್ರಾಸಮಾ ಖುಶಿ ರ‍್ಹೈನ ಕ್ರಿಸ್ತನಾ ತ್ರಾಸಮಾ ಹಜುಸನ ಉಗ್ರಲ ಸಭೆ ಕವಾನಿ ತಿನಾ ಅಂಗನಾ ಹುತಿ
25 ಕ್ಹುದಾನಾ ಮನಸ ಲಿಂಗತ ತುಮಾರಾ ಚೊ಼ಕಾನಾ ಹುತಿ ಮಿ ತುಮಾರಿ ಸಭೆನೆ ಸೆವಕ ಥಹಯೊ.
26 ಎ ದಡಿ ರ‍್ಹಯಲ ಕ್ಹರಿನಿ ವಾಕ್ಯಾ ಪಾಚ಼ಲ್ಯಾ ಯುಗತು ಮಾತಾ ಮಾತಾತು ದಡಿನ ವ್ಹತ್ತು. ತೆ ವಾಕ್ಯಾ ಕ್ಹುದಾ ಹಮ್ನಾ ತುಮಾರಾ ಕ್ಹಾಮಾ ಲಾಯೊಸ.
27 ಎ ಮರ್ಮಾನಿ ಮಹಿಮಾ ಕೆಕ್ಲು ಛೆ ಕವಾನು ಬಿಜಾ಼ ಮನಕ್ಹೊನೆ ಕವಾನಾ ಹುತಿ ಕ್ಹುದಾ ಮನಸ ಕರ‍್ಯೊ.
28 ಅಪೆ ತಿನೆ ಕತಛೆ, ಕ್ಹಾರಾವೊನೆಬಿ ಗ್ಯಾನ ಕತಾ ವರಿ ಕ್ಹಾರಾವೊನೆ ರ‍್ಹಯಲ ಕ್ಹಾರುಜ಼ ಗ್ಯಾನ ಕತಾ
29 ಮಾರಾಮಾ ಕಾಮಾ ಪುರಾ ಕರಾನು ಕ್ಹುದಾನಿ ತಾಕತಕ್ಹು ಇನಾಹುತಿಜ಼ ರಾಬುಸ.