ಎಫೆಸದವರಿಗೆ ಬರೆದ ಪತ್ರಿಕೆ
1 ಎಫೆಸವಾಲಾವೊನೆ ಬರ್ದಲ ಪತ್ರ
ವಳಕ
ಎಫೆಸವಾಲಾವೊನೆ ಬರ್ದಲ ಪತ್ರ ಕ್ರಿಸ್ತಕ್ಹು 60 ವರಕ್ಹ ಬರ್ದಲ ವ್ಹೈ. ಕೊಲೆಸ್ಸೆವಾಲಾವೊನೆ ಬರ್ದಲ ಪತ್ರ ಎಜ಼ ಟೈಮ್ಮಾ ಬರ್ದಲ ವ್ಹೈ ಕೈನ ಕವಸ. ಬರ್ದಾಲೊ ತಿನಾಕ್ಹು ತೆ ಅಪೊಸ್ತಲ ಪೌಲಾ ವ್ಹೈಕೈನ ವಳಕ ಪಾಡಿಲಿಸ. (1 ಅದ್ಯಾಯ 1 ವಚನಾ) ಕೊಲಸ್ಸೆಮಾ ರ‍್ಹಯಲ ಲಿಂಗತ ವೈಯಕ್ತಿಕ ವಂದನೆ ಎಫೆಸ್ಸೆವಾಲಾವೊನೆ ಬರ್ದಿನ ಪತ್ರಿಕೆಮಾ ದಿಕ್ಹಿನ ಆಯಾವಾಚಿ ರ‍್ಹಯುತಬಿ ಘನ್ನೊ ಅದ್ಯಾಯ ಬರ್ದಲವಾಲಾ ಎ ಪತ್ರ ಪೌಲಾ ಬರ್ದ್ಯೊಸ ಕೈನ ವಪ್ಪಿಲಿವಸ ಇನಾ ಹುತಿ ಎ ಪತ್ರ ತೆ ಪ್ರಾಂತ್ಯಮಾ ಘನ್ನಿಯೊ ಸಭೆನೆ ಫೈಲಾಯಲ ಛೆ. ಪೌಲಾ ಎ ಪತ್ರ ಬರ್ತಾಮಾ ತೆ ಜೆಲ್ಮಾ ವ್ಹತ್ತೊ ಕವಾನುಬಿ ಬರ್ದ್ಯೊಸ. (3. 1 41 ವರಿ 620 ವಚನಾ) ಪೌಲಾ ಎ ಪತ್ರ ಎಫೆಸೆನಾ ಸಭೆನೆ ಮಳಾನೆ ಜಾ಼ತಾಮಾ ತುಕಿಯಾಸನಾ ಮುಲಕ ಮೊಕಲ್ಯೊಸ ( 6 ಅದ್ಯಾಯ 21 ತಿ 22 ವಚನಾ) 1 ಎಫೆಸ್ಸ ಗಾಮ ಯಕ್ಕ ಮ್ಹೊಟು ಗಾಮ ವ್ಹತ್ತು ರೊಮ ಸಾಮ್ರಾಜ್ಯನು ಅಶರ ಎಶ್ಯಾ. ಮೈನರ ಪ್ರಾಂತ್ಯನಿ ರಾಜಧಾನಿ ವ್ಹತಿ. ಎಫೆಸ್ಸೆ ಗಾಮಾ ಗ್ರಿಕ ದಿವಸ್ತಾನ ಅರ್ಥಮಿಸಲ ದೆವಾಲಯ ಥೈನ ಪ್ರಸಿದ್ದ ಥೈತಿ. (ಅಪೊಸ್ತಲ ಕೃತ್ಯ 19 ಅದ್ಯಾಯ 23 ತಿ 31 ವಚಾನಾ ಲಕ್ಕಾ) ಎಫೆಸ ಗಾಮನು ಸಭೆ ಶುರುಥಾತಾಮಾ ಘನ್ನಿ ತಾಕತ ವ್ಹತಿ. ತೆನೈಸೊ ಪಾಚಾ಼ತೊ ಅಂತ್ಯ ಕರಾನು ಟೈಮ ಆಯೊತೊ. (ಪ್ರಕಟಣೆ 2 ಅದ್ಯಾಯ 1 ತಿ 7 ವಚನಾ). 3) ಪೌಲಾ ಬರ್ದಲನಾ ಅರ್ದಾಕ್ಹು ಅರ್ದು ಪತ್ರ ಕ್ಹುದಾ ತಿನಾ ಮನಕ್ಹೊನೆ ಕಿಮ್ಮ ಇನಿಲಿದ್ಯೊ ವರಿ ಯೆಸು ಕ್ರಿಸ್ತನಾ ಮುಲಕ ತ್ಯುನಾ ಪಾಪೊಕ್ಹುಜ಼ ತ್ಯುನೊನೆ ಕಿಮ ವಚಾ಼ಡ್ಯೊ ಕವಾನು ತಿಳಸಾವಸ. ತೆ ಸಭೆನೆ ಕ್ರಿಸ್ತನಾ ಅಂಗನೆ ವರಿ ಕ್ರಿಸ್ತನ ತಿನು ಮಾತು ಥಯೊಸ ವರಿ ಕ್ರಿಸ್ತ ಮುಲಾನೊ ದಗ್ಡಾನೆ ಹೊಲ್ಸಸ. ಬೆವಾನಾ ಅರ್ದಾಭಾಗಮಾ ಪೌಲಾ ಕ್ರಿಸ್ತನಿ ಜಿವ್ನಾ ಕಿಮ್ಮ ಜಿವ್ನಾ ಕರು ವಳಕ ಪಾಡಿನೆ ದಿವಸ.
ಪಿಠಿಕೆ
1 ) ಪೌಲಾ ತಿನು ವಳಕ ಕವಸ ವರಿ ಎಫೆಸೆವಾಲಾವೊನೆ ವಂದನೆ ಕವಸ. 1:1-2
2 ) ಪಾಚಲ್ತೊ ತೆ ಕ್ರಿಸ್ತಮಾ ಹುತಿ ಸಭೆ ರ‍್ಹಯಲ ಸಂಭಂದನಾ ಹುತಿ ಕವಸ) 1:3—3:21
3) ಪಾಚಲ್ತೊ ಪೌಲಾ ವಿಸ್ವಾಶಿಯೊನೆ ಕಿಮ ಜಿವ್ನಾ ಕರು ಕವಾನಾ ಹುತಿ ಬರ್ದಸ.
4) ಲಾಸ್ಟಮಾ ಪೌಲಾ ದಕ್ಹಿಯೊ ಸಲಹೆ ದಿವಸ.
1
1 ಕ್ರಿಸ್ತ ಯೆಸುನೊ ಅಪೊಸ್ತಲ ಥಯಲ ಪೌಲಾ ಮಿ ಕ್ಹುದಾನಿ ಆಸನಿಂಗತ ಅಪೊಸ್ತಲ ಥಯೊಸ. ಎಫೆಸ ಗಾಮ್ಮಾ ರ‍್ಹವಾಲಾ ವರಿ ಕ್ರಿಸ್ತ ಯೆಸುಪರ ಬರೊಕ್ಹೊ ಮ್ಹೆಲಲ ಪರಿಶುದ್ಧ ಕ್ಹುದಾನಾ ಮನಕ್ಹೊನೆ ಮಿ ಎ ಪತ್ರ ಬರ್ದಾಡ್ಯೊಸ.
2 ಅಪ್ನೊ ಬಾ ಥಯಲ ಕ್ಹುದಾ ವರಿ ಪ್ರಭು ಥಯಲ ಯೆಸು ಕ್ರಿಸ್ತ ತುಮೊನೆ ಮರಗಾ ಶಾಂತಿ ದಿವಾದೆ.
3 ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನೊ ಕ್ಹುದಾ ಬಾ ಥಯಲವಾಲಾನೆ ಸ್ತೊತ್ರ ಥಾವಾದೆ. ಸ್ವರ್ಗಮಾ ರ‍್ಹವಾನು ಹರ ಯಕ್ಕ ಆಶಿರ್ವಾದ ಕ್ಹುದಾ ಅಪೊನೆ ಕ್ರಿಸ್ತಮಾ ದಿದ್ಯೊಸ.
4 ಜಗತ್ತ ಸೃಷ್ಟಿ ಥಾವಾತಿ ಪೈಲಾಜ಼ ಕ್ಹುದಾ ಅಪೊನೆ ಕ್ರಿಸ್ತಮಾ ಇನಿಲಿದ್ಯೊ. ತಿನಿ ಸನ್ನಿಧಿಮಾ ಅಪೆ ಮಯಾಕ್ಹು ರ‍್ಹೈನ ಪರಿಶುದ್ಧ ನಿರದೊಷಿಯೊ ರ‍್ಹಯಲ ರ‍್ಹೌಕೈನ ತಿನು ಉದ್ದೆಶ ವ್ಹತ್ತು.
5 ಅಪೊಪರ ರ‍್ಹಯಲ ಮಯಾಕ್ಹು ಕ್ರಿಸ್ತ ಯೆಸುನಾ ಮುಲಕ ಅಪೊನೆ ತಿನಾ ಸ್ವಂತ ಬಚ್ಚಾ ಥೈನ ಕರಿಲಿವಾನೆ ತೆ ಪೈಲಾಜ಼ ನಿರಧಾರ ಕರ‍್ಯೊತೊ. ತೆ ತಿನಿ ಚಿತ್ತ ವರಿ ಉದ್ದೆಶ ವ್ಹತ್ತಿ.
6 ಕ್ಹುದಾನಿ ಮರಗಾಕ್ಹು ಥಯಲ ಎ ನಿರಧಾರ ತಿನೆ ಸ್ತೊತ್ರಾ ಥಾವಾನೆ ಕಾರಣ ವ್ಹೈ. ಕ್ಹುದಾ ತೆ ಮರಗಾ ತಿನಾ ಮಯಾನಾ ದಿಕ್ರಾನಾ ಮುಕಾಂತರ ಅಪೊನೆ ಉಪಾರ ಮನಸ್ಸಕ್ಹು ದಿದ್ಯೊಸ.
7 ತಿನಾ ರಗತಕ್ಹು ಅಪೊನೆ ಬಿಡುಗಡೆ ಮಳಿ. ಕ್ಹುದಾನಿ ಮ್ಹೊಟಿ ಮರಗಾಕ್ಹು ಅಪ್ನಾ ಪಾಪೊ ಮಾಫ ಥಯಾ.
8 ಕ್ಹುದಾ ಅಪೊನೆ ತೆ ಮರಗಾ ಪುರಾಜ಼ ಉದಾರ ಮನಸಕ್ಹು ದೆಕಾಡ್ಯೊ. ಕ್ಹುದಾ ತೆ ದಡೈನ ಮ್ಹೆಲಲ ಪ್ಲಾನ ಅಪೊನೆ ತಿಳಾಸಾನಾ ಮುಕಾಂತರ ಅಪೊನೆ ಪುರಾಜ಼ ಗ್ಯಾನ ತಿಳವಳಿಕಿ ದಿದ್ಯೊ.
9 ಕ್ಹುದಾ ಎ ತಿನಿ ಉದ್ದೆಶಕ್ಹು ಕರ‍್ಯೊ. ಕ್ರಿಸ್ತನಾ ಮುಲಕ ಎ ಪುರಾ ಕರಾನೆ ತೆ ಪ್ಲಾನ ಕರ‍್ಯೊ.
10 ಕಾಲ ಪುರಾ ಥಯಲಪರ ಜಿಮಿನ ವರಿ ಸ್ವರ್ಗಮಾ ರ‍್ಹಯಲ ಕ್ಹಾರುಜ಼ ಕ್ರಿಸ್ತಮಾ ಮಳೈನ ತಿನಿ ಅಧಿನ ಕರು ಕೈನ ಕ್ಹುದಾನಿ ಯೊಜನೆ ವ್ಹತಿ.
11 ತೆನೈಸೊ ಅಪೆ ಕ್ಹುದಾನಾ ಬಚ್ಚಾ಼ ಥೈಯೆ ಕೈನ ಕ್ರಿಸ್ತಮಾ ಅಪೊನೆ ಇನಿಲಿದ್ಯಾ. ಅಪೆ ತಿನಾ ಬಚ್ಚಾ಼ ಥೈಯೆಕೈನ ಕ್ಹುದಾ ತಿನಿ ಚಿ಼ತ್ತಲಿಂಗತ ಪೈಲಾಜ಼ ಪ್ಲಾನ ಕರ‍್ಯೊತೊ.
12 ಇಮ್ಮ ರ‍್ಹತಾಮಾ ತಿನಿ ವಿಚಾರ ವರಿ ಆಸಲಿಂಗತ ಹರಿಯಕ್ಕ ಕರಾಲೊ ಕ್ಹುದಾಜ಼ ವ್ಹೈ.
13 ಎ ತುಮೊನೆಬಿ ಲಾಗು ಥಾವಸ. ತುಮೆ ಕ್ಹರಿ ಭೊದನೆನಾ ಹುತಿ ಕದ್ಯಾಮ ತುಮಾರಿ ರಕ್ಷಣೆನಾ ಹುತಿ ಸುವಾರ್ತೆನಾ ಹುತಿ ಪುಚ್ತಾ಼ಮಾ ಕ್ರಿಸ್ತಮಾ ಬರೊಕ್ಹೊ ಮ್ಹೆಲೊ. ಕ್ಹುದಾ ತಿನಿ ವಾಗ್ದಾನನಾ ಲಿಂಗತ ತುಮೊನೆ ಪವಿತ್ರ ಆತ್ಮಾನೆ ದಿವಾನಾ ಮುಕಾಂತರ ತುಮೊಪರ ತಿನಿ ಖಾಸ ರ‍್ಹಯಲ ಶಿಕ್ಕೊ ಘಾಲ್ಯೊ.
14 ಕ್ಹುದಾ ತಿನಾ ಮನಕ್ಹೊ ವಗ್ದಾನ ಕರಲ ಕ್ಹಾರು ಅಪೆ ವ್ಹಂದಿಲಿಯೆಸ ಕವಾನೆ ತೆ ಪವಿತ್ರ ಆತ್ಮಾಜ಼಼ ಕ್ಹಮ ಥೈಸ. ಕ್ಹುದಾ ಕಮೈಲಯಿದಲ ಮನಕ್ಹೊನಿ ಎ ಪುರಾಜ಼ ವಿಮೊಚನೆ ಕರಸ. ಕ್ಹುದಾನಿ ಮಹಿಮಾನೆ ಸ್ತೊತ್ರಾ ಥೌ ಕೈನ ಎ ಕ್ಹಾರಾನು ಉದ್ದೆಶ ಥೈಯುಸ.
15 ಕರ್ತಾ ತಿನಾಹುತಿಜ಼ ಮಾರಿ ಪ್ರಾಥನಾಮಾ ಮಿ ತುಮೊನೆ ಶೆ ಕರಿಲಿನ ತುಮಾರಿ ವಿಷಯಮಾ ಕ್ಹುದಾನೆ ಹಮೆಶಾಬಿ ಸ್ತೊತ್ರ ಕೌಸ ಪ್ರಭು ಥಯಲ ಯೆಸುಮಾ ತುಮೊನೆ ರ‍್ಹಯಲ ಬರೊಕ್ಹಾನಾ ಹುತಿ
16 ವರಿ ಕ್ಹಾರಾ ಕ್ಹುದಾನಾ ಮನಕ್ಹೊಪರ ತುಮೊನೆ ರ‍್ಹಯಲ ಮಯಾನಾ ಹುತಿ ಐಕಲ ದಿನಂತೊಬಿ ಮಿ ತುಮಾರಿ ವಿಷಯಮಾ ಕ್ಹುದಾನೆ ಸ್ತೊತ್ರ ಕೌಸ.
17 ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನೆ ಕ್ಹುದಾ ಮಹಿಮಾನೊ ಸ್ವರುಪ ಥಯಲ ಬಾ ಥಯಲವಾಲಾನೆ ಮಿ ಹಮೆಶಾಬಿ ಪ್ರಾಥನಾ ಕರುಸ ಕ್ಹುದಾನಿ ಗ್ಯಾನಕ್ಹು ಕದ್ಯಾಮ ತೆ ತುಮೊನೆ ತಿಳಸಾಯಲ ಗ್ಯಾನಕ್ಹು ತುಮೊನೆ ಗ್ಯಾನಿ ಕರಾನಿ ಆತ್ಮಾ ತೆ ತುಮೊನೆ ದಿವಾದೆ ಕೈನ ಮಿ ಪ್ರಾಥನಾ ಕರುಸ.
18 ತುಮೆ ತುಮಾರಾ ಮನಸ್ಮಾ ಹಜು಼ನ ಹೆಚ್ಕಿ಼ ಗ್ಯಾನ ಆವಾದೆ ಕೈನ ಪ್ರಾಥಾನ ಕರುಸ ಅಪೆ ಕೆಯ್ಯೊ ಆಸ ಹೊಂದಿಲ್ಯು ಕೈನ ಕ್ಹುದಾ ಅಪೊನೆ ಇನಿಲಿದ್ಯೊಸ ಕವಾನು ತೆಳಾಮಾ ತಿಳದಿಲಿವೊಸಿ; ತೆ ತಿನಾ ಪರಿಶುದ್ಧ ಮನಕ್ಹೊನೆ ವಾಗ್ದಾನ ಕರಲ ಆಶಿರ್ವಾದ ಕೆಕ್ಲು ಮ್ಹೊಟು ವ್ಹೈ ಕವಾನು ತಿಳ್ದಿಲಿವೊ.
19 ಬರೊಕ್ಹೊ ಮ್ಹೆಲಾನು ಅಪೊನೆ ಕ್ಹುದಾನಿ ತಾಕತ ಕೆಕ್ಲೊ ಮ್ಹೊಟು ವ್ಹೈ ಕವಾನು ತೆಳಾಮಾ ತುಮೆ ತಿಳದಿಲಿವೊಸಿ. ಕ್ರಿಸ್ತನೆ ಮರಣಮಾತೊ ಜಿವ್ತೊ ಕರಿನ ಉಟಾಡಾನೆ ಕ್ಹುದಾ ಉಪಯೊಗ ಕರಲ ಮ್ಹೊಟಿ ತಾಕತ ತೆಜ಼ ವ್ಹೈ.
20 ಕ್ಹುದಾ ಕ್ರಿಸ್ತನೆ ಸ್ವರಗಾಮಾ ತಿನಾ ಶಿದಾಬಗಲ ಬೈಟಾಡಿಲಿದ್ಯೊ.
21 ಕ್ಹುದಾ ಕ್ರಿಸ್ತನೆ ಕ್ಹಾರಾ ಅದಿಪತಿಯೊತಿಬಿ ಅದಿಕಾರಿಯೊತಿಬಿ ತಾಕತವಾಲಾವೊತಿಬಿ ರಾಜಾ಼ವೊತಿಬಿ ಮ್ಹೊಟೊ ಕರ‍್ಯೊ. ಎ ದುನಿಯಾಮಾ ರ‍್ಹೈನೆಕಾ ಅಗಲ್ಯಾ ದುನಿಯಾಮಾ ರ‍್ಹವಾದೆ ದಿದಲ ಕಯುಬಿ ನಾಮ ರ‍್ಹಯಲವಾಲಾವೊತಿಬಿ ಕ್ರಿಸ್ತ ಮ್ಹೊಟೊ ವ್ಹೈ.
22 ಕ್ಹುದಾ ಹರಿ ಯಕ್ಕಪರ ಕ್ರಿಸ್ತನಾ ಅದಿಕಾರಮಾ ದಿದ್ಯೊ. ಸಬೆನಾ ಹುತಿ ಕ್ಹುದಾ ತಿನೆ ಹರಿಯಕ್ಕಪರ ಮ್ಹೊಟೊ ಕರ‍್ಯೊ.
23 ಸಬೆ ಕ್ರಿಸ್ತನು ಅಂಗ ಥಯುಸ. ಸಬೆ ಕ್ರಿಸ್ತಕ್ಹು ಭರಿ ಗೈಯುಸ. ತೆ ಕ್ಹಾರುಜ಼ ಹರಿಯಕ್ಕ ವಿಷಯಮಾ ಪುರಾ ಕರಸ.