ಪೌಲನು ಥೆಸಲೊನಿಕದವರಿಗೆ ಬರೆದ ಎರಡನೆಯ ಪತ್ರಿಕೆ
2 ಥೆಸಲೊನಿಕವಾಲಾವೊನೆ ಬರ್ದಲ ಪತ್ರ
ವಳಕ
ಅಪೊಸ್ತಲ ಥಯಲ ಪೌಲಾಕ್ಹು ಥೆಸಲೊನಿಕವಾಲಾವೊನೆ 2 ಪತ್ರ ಬರ್ದಲ ವ್ಹೈ. 1:1 1 ಥೆಸಲೊನಿಕವಾಲಾವೊನೆ ಬರ್ದಿನ ದಕ್ಹೊ ಟೈಮ ಥಯಲಪರ ಎ ಪತ್ರ ಬರ್ದ್ಯೊ ಯೆಸು ಕ್ರಿಸ್ತ ಹುಟ್ಟಿನ 51 ವರಕ್ಹ ಥಯಲಪರ ಎ ಪತ್ರ ಬರ್ದ್ಯೊ. ಪೌಲಾ ಎ ಪತ್ರನೆ ಥೆಸಲೊನಿಕ ಸಭೆನೆ ಬರ್ದಲ ಪರ ತೆ ಪೌಲಾ ಕೊರಿಂಥ್ಯಮಾ ಇನೆ ಎ ಸಭೆನೆ ಪೌಲಾ ಬೆವಾ ಮಿಶ್ನರನಾ ಪ್ರಯಾಣಮಾ ತಿಳ್ದಿಲಿದಲ ವ್ಹೈ. ಅಪೊಸ್ತಲೊ 17:1-10 ಅಪೊಸ್ತಲ ಕೃತ್ಯ ಬುಕ್ಮಾ ಇಮ್ಮ ಕವಸ ಎ ಸಭೆ ದಕ್ಹಾ ಯಹುದ್ಯೊ ವರಿ ಘನ್ನಾ ಗ್ರಿಕವಾಲಾವೊಕ್ಹು ಭಂದೈಯು.
ಥೆಸಲೊನಿಕ ಸಭೆವಾಲಾ ಲಾಸ್ಟ ದಿನ್ನನಾ ಹುತಿ ಕ್ರಿಸ್ತ ಬೆವಾ ಸಲಾ ಆವಾನಾ ಹುತಿ ಸಂಬಂಧ ರ‍್ಹಯಲ ವಿಷಯನಾ ಹುತಿ ವಿಚಾರ ಕರಲ ರ‍್ಹೌ ತಿನಾಹುತಿ ಪೌಲಾ ಎ ಬೆ ಪತ್ರಮಾ ಇನಾ ಹುತಿ ಥೆಸಲೊನಿಕವಾಲಾವೊನೆ ಘನೊ ಬರ್ದ್ಯೊಸ. ಥೆಸಲೊನಿಕನು ಅರದು ಬುಕ್ಕ ಲಾಸ್ಟನಾ ದಿನ್ನೊನಾ ಹುತಿ ಬರ್ದಲ ಛೆ ವರಿ ಅರದು ಬುಕ್ಕ ಸ್ವಭಾವಾನಾ ಹುತಿ ಹುಷಾರಕಿ ದಿದ್ಯೊಸ ಕ್ಹಾರಾ ತ್ಯುನಾ ತ್ಯುನಾ ಅನ್ನನಾ ಹುತಿ ಕಾಮ ಕರು ಕೈನ ಹುಷಾರಕಿ ದಿದ್ಯೊಸ. 3:6-10
ಪಿಠಿಕೆ
1) ಪೌಲಾ ಎ ಪತ್ರ ತಿನೆ ವರಿ ತಿನಾ ಕ್ಹಾತೆ ರ‍್ಹಯಲವಾಲಾವೊನೆ ವಳಕ ಕರಾನಾ ಹುತಿ ಎ ಪತ್ರ ಖಾಸ ವಾತೊಮಾ ಎ ಪತ್ರನು ಶುರುವಾತ ಕರಸ. 1:1-2
2) ಪಾಚಲ್ತೊ ಥೆಸಲೊನಿಕ ಸಭೆನೆ ಶೆಂ ಕರಿನ ಕ್ಹುದಾನೆ ಧನ್ಯವಾದ ಕತೊ ತ್ಯುನಾ ಹುತಿ ಪ್ರಾಥನಾ ಕರಸ. 1:3-12
3) ಪೌಲಾ ಬೆಂವಾ ಪತ್ರಮಾ ಲಾಸ್ಟನಾ ದಿನ್ನನಾ ಹುತಿ ಕದ್ಯೊಸ. 2
4) ಪಾಚಲ್ತೊ ಸೊಮಾರಿತನನಿ ಸ್ವಭಾನು ವಿರುದ್ದ ವರಿ ಕ್ಹಾರಾ ಜ಼ನಾ ಕಾಮ ಕರು ಕೈನ ಮಾಂಗಿಲಿವಸ. 3:1-15
5) ಸಭೆನೆ ನಮಸ್ಕಾರ ಕರ‍್ತೊ ಪೌಲಾ ಎ ಪತ್ರ ಪುರಾ ಕರ‍್ಯೊಸ. 3:16-18
1
ಮಾರೊ ಬಾ ಥಯಲ ಕ್ಹುದಾಕನ ವರಿ ಪ್ರಭು ಥಯಲ ಯೆಸು ಕ್ರಿಸ್ತಮಾ ರ‍್ಹಯಲ ಥೆಸಲೊನಿಕವಾಲಾವೊನಿ ಸಬೆನೆ ಪೌಲಾ, ಸಿಲ್ವಾನ ವರಿ ತಿಮೊತಿ ಬರ್ದಾನು ಪತ್ರ. ಅಪ್ನೊ ಬಾ ಥಯಲ ಕ್ಹುದಾ ವರಿ ಪ್ರಭು ಥಯಲ ಯೆಸು ಕ್ರಿಸ್ತನಿ ಕೃಪಾ ವರಿ ಶಾಂತಿ ತುಮೊಮಾ ರ‍್ಹವಾದೆ. ಮಾರಾ ಭಾಯೊ ವರಿ ಭೆನೊ ತುಮಾರಿ ವಿಷಯಮಾ ಹಮೆಶಾಬಿ ಕ್ಹುದಾನೆ ಸ್ತೊತ್ರಾ ಕಯೆಸ. ಇಮ್ಮ ಕರಾನು ಚೊ಼ಕು ವ್ಹೈ. ಕಾ ಕದ್ಯಾಮ ತುಮಾರೊ ಬರೊಕ್ಹೊ ವರಿ ಹೆಚ್ಕಿ಼ ಥಯಲ ಹುತಿ ತುಮಾರಿ ಮಯಾ ಹೆಚ್ಕಿ಼ ಥಾತಿ ರ‍್ಹವಸ. ಕ್ಹುದಾನಿ ಸಭೆಮಾ ತುಮಾರಾ ಹುತಿ ಖುಶಿಕ್ಹು ಕಯೆಸ. ತುಮೊಮಾ ರ‍್ಹಯಲ ಬರೊಕ್ಹೊ ತಡ್ದಿಲಿವಾನಾ ಹುತಿ ಬಿಜಿ಼ಯೊ ಸಭೆಮಾ ಕಯೆಸ. ತುಮೆ ಕಷ್ಟ ಪಡ್ಯಾತಬಿ ವರಿಬಿ ತ್ರಾಸೊ ಖಾದ್ಯಾತಬಿ ಬರೊಕ್ಹಾಮಾ ಜಿವ್ನಾ ಕರಾಡಾಸ. ಕ್ಹುದಾ ನ್ಯಾಯ ರ‍್ಹಯಲ ಫೈಸಲೊ ಕರಸ ಕೈನ ತೆಜ಼ ದೆಕಾಡಿನ ದಿವಸ ಕ್ಹುದಾನಿ ರಾಜ್ಯನೆ ತುಮೆ ಯೊಗ್ಯ ಥೈನ ತುಮೆ ತ್ರಾಸ ಖಾವಾನು ತೆ ರಾಜ್ಯನಾ ಹುತಿಜ಼ ವ್ಹೈ. ಕ್ಹುದಾ ನ್ಯಾಯ ರ‍್ಹಯಲಜ಼ ಕರಸ. ತುಮೊನೆ ತ್ರಾಸ ದಿವಾನಾ ಮನಕ್ಹೊನೆ ಕ್ಹುದಾಜ಼ ತ್ರಾಸ ದಿವಸ. ತೆ ತ್ರಾಸಮಾ ಪಡಲ ತುಮೊನೆ ವರಿ ಹಮೊನೆ ಸಮಾದಾನ ದಿವಸ. ಪ್ರಭು ಥಯಲ ಯೆಸು ತಿನಾ ದುತೊನಾ ಕ್ಹಾತೆ ಸ್ವರಗತೊ ಆತಾಮಾ ಎ ಸಮಾದಾನ ದಿವಸ. ಪ್ರಭು ಯೆಸು ಕ್ರಿಸ್ತ ಸ್ವರಗತೊ ಆಗನಿ ಜ್ವಾಲಾನಾ ಕ್ಹಾತೆ ಆತಾಮಾ ಸುವಾರತೆನೆ ನೈ ವಿಧೆಯ ಥಯಲವಾಲಾವೊನೆ ವರಿ ಇನ್ಕಾರಲ ವಾಲಾವೊನೆ ಶಿಕ್ಷಾ ದಿವಸ. ತ್ಯುನೊನೆ ಪ್ರಭುನಾ ಕ್ಹಾತೆ ರ‍್ಹವಾನೆ ತ್ಯುನೊನೆ ಮೌಕೊ ಮಳ್ತೊ ನೈ ವರಿ ಹಮೆಶಾನಿ ಶಿಕ್ಷಾ ಥಾವಾಸ. ತೆ ತಿನಿ ಮ್ಹೊಟಿ ತಾಕತನಾ ಕ್ಹಾತೆ ತ್ಯುನೊನೆ ದುರ ಮ್ಹೆಲಸ. 10 ಪ್ರಭು ಥಯಲ ಯೆಸು ದಿಕ್ಹ್ತಾಮಾ ಎ ಕ್ಹಾರು ಥಾವಸ. ತೆ ತಿನೆ ಮಳಾನು ರ‍್ಹಯಲ ವೈಭವ ಸ್ವಿಕಾರ ಕರಾನೆ ತಿನಾ ಪರಿಶುದ್ಧ ಮನಕ್ಹೊನಾ ಕ್ಹಾತೆ ದಿಕ್ಹಸ. ನಂಬಲ ಮನಕ್ಹೊ ತಿನೆ ದೆಕಿನ ಘಾಬ್ರಾ ಥಾವಸ. ಹಮೆ ಕದಲ ನಂಬಲವಾಲಾ ತುಮೆ ವಿಸ್ವಾಸಿಯೊನಾ ಕ್ಹಾತೆ ರ‍್ಹವೊಸಿ. 11 ತಿನಾಹುತಿ ಹಮೆಶಾಬಿ ತುಮಾರಾ ಹುತಿ ಚೊ಼ಕಿ ವಾಟಮಾ ತುಮೆ ಜಿವ್ನಾ ಕರು ಕೈನ ಕ್ಹುದಾ ತುಮೊನೆ ಬಲಾಯೊ, ತೆ ವಾಟಮಾ ತುಮೆ ಜಿವ್ನಾ ಕರಾನಾ ಹುತಿ ಪ್ರಾಥನಾ ಕರಿಯೆಸ. ತುಮೊಮಾ ರ‍್ಹಯಲ ಚೊ಼ಕಾ ಚೊ಼ಕಾಜ಼ ಕಾಮೊ ಕರಾನಾಹುತಿ ತುಮೊನೆ ಪ್ರೊತ್ಸಾಹ ಕರಸ. ತುಮೊಮಾ ರ‍್ಹಯಲ ಬರೊಕ್ಹೊ ತುಮಾರಾ ಮುಕಾಂತರ ಕಾಮ ಕರಸ. ಎ ಕಾಮೊ ತುಮೆ ಜಾಸ್ತಿ-ಜಾಸ್ತಿ ಕರಾನೆ ಕ್ಹುದಾ ತಿನಿ ತಾಕತಕ್ಹು ಕರಾದೆ ಕೈನ ಮಾಂಗಿಲಿಯೆಸ. 12 ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನು ನಾಮ ತುಮೊಮಾ ಮಹಿಮೆ ಥಾವಾದೆ ಕೈನ ವರಿ ತುಮೊನೆಬಿ ತಿಮಾ ಮಹಿಮಾ ಮಳಾದೆ ಕೈನ ಹಮೆ ಪ್ರಾಥನಾ ಕರಿಯ್ಯೆಸ. ತೆ ಮಹಿಮಾ ಅಪ್ನೊ ಕ್ಹುದಾ ವರಿ ಪ್ರಭು ಯೆಸು ಕ್ರಿಸ್ತಕ್ಹುಜ಼ ಆವಸ.