ಇಬ್ರಿಯರಿಗೆ ಬರೆದ ಪತ್ರಿಕೆ
ಹಿಬ್ರಿಯವಾಲಾವೊನೆ ಬರ್ದಲ ಪತ್ರ
ವಳಕ
ಹಿಬ್ರಿಯವಾಲಾವೊನೆ ಬರ್ದಲ ಪುಸ್ತಕ ಯಕ್ಕ ಉತ್ತೆಜನ ದಿವಾನು ಪತ್ರ ವ್ಹೈ. ಯೆಸು ಜು಼ನ್ನಾ ವಡಂಬಡಿಕೆಮಾನು ಘನ್ನಾ ಪ್ರವಾದನೆ ಪುರಾ ಕರಾನು ದೆಕಾಡಿನ ದಿವಸ. ಆ ಬುಕ್ಕ ಪ್ರಸಂಗ ಲಿಂಗತ ಬರ್ದಲ ಛೆ. ಇಮಾ ಯೆಸು ಜು಼ನ್ನಾ ವಡಂಬಡಿಕೆಮಾ ಪ್ರವಾದನೆ ವರಿ ಯಹುದಿನೊ ಮ್ಹೊಟೊ ಯಾಜಕನಾ ಕಾಮೊ ಕಿಮ್ಮ ಪುರಾ ಕರ‍್ಯೊಸ ಕವಾನು ದೆಕೆಸ. ಕವಾನು 60 ಹೆಚ್ಕಿ಼ ಜು಼ನ್ನಾ ವಡಂಬಡಿಕೆಮಾ ಉಲ್ಲೆಖ ಛೆ. ಎ ಕ್ಹಾರಾನಾ ಹುತಿ ಸ್ಪಷ್ಠತಾಕ್ಹು ದೆಕಾಡಿನ ದಿವಸ. ಇನಾಹುತಿ ಎ ಪುಸ್ತಕ ಯಹುದಿ ವಿಸ್ವಾಶಿಯೊನೆ ಪ್ರೊಸ್ತಾಹ ದಿವಾನು ಪುಸ್ತಕ ಕವೈಲಿದಲ ರ‍್ಹವಸ. ಯೆಸು ಕಿಮ ಧರ್ಮ ಶಾಸ್ತರ ಪುರಾ ಕರ‍್ಯೊ. ತಿನಾಹುತಿ ಮನಕ್ಹೊ ಹಜು಼ನ ಕೆಳಾಮಾಜ಼ ದಿವಾನೆ ಜ಼ರುರತ್ತ ನತ್ತಿ ಕವಾನು ಹಿಬ್ರಿಯ ಪುಸ್ತಕ ದೆಕಾಡಿನ ದಿವಸ. ಕ್ಹಾರಾ ಕಾಲನಾ ಹುತಿ ಯಕ್ಕಸಕಾ ಕ್ಹಾರಾ ಪಾಪಿಯೊನೆ ಹುತಿ ಯೆಸು ಬಿಲಿ ಥಯೊ. ಕ್ಹುದಾಮಾ ಬರೊಕ್ಹೊ ಮ್ಹೆಲಾನೆ ತಿಮಾ ಮ್ಹೆಲಾನೆ ಸಾದ್ಯ ಥಾವಾನೆ ಹುತಿ ಕರಾನು ಯೆಸು ಕ್ರಿಸ್ತನೆ ಪಾಲ್ಸು ಕೈನ ಹಿಬ್ರಿಯ ಪುಸ್ತಕ ಹಮ್ನಾನಾ ದಿನ್ಮಾ ವಿಸ್ವಾಸಿಯೊನೆ ಪ್ರೊತಸ್ಆಹ ದಿವಸ. ಹಿಬ್ರಿ ಪುಸ್ಕ ಕುನ್ನ ಬರ್ದ್ಯಾಸ. ಕವಾನು ಕಿನೆಜ಼಼ ಗ್ವತ್ತ ನತ್ತಿ ವರಿಬಿ ವಿದ್ವಾಂಸೊ ಅಪೊಸ್ತಲ ಥಯಲ ಪೌಲ ಲುಕ ಬರ್ನಾಬಾಸ ವಸ ಕೈನ ಸಲಹಾ ದಿವಸ. ಎ ಬರ್ದಲ ಟೈಮಬಿ ಖಚಿತ ನತ್ತಿ. ತೆನೈಸೊ ಘನ್ನಾ ಕ್ರಿಸ್ತನು ಜನನ ಥಯಲ್ಪರ 70 ವರಕ್ಹಮ ಯೆರುಸೆಲಮ ಗಾಮ ಹಾಳ ಕರ‍್ಯಾ. ವರಿಬಿ ಬರ್ದಲವಾಲೊ ಎ ಪತ್ರಮಾ ಯೆರುಸೆಲೆಮ ನಾಶ ಕರಸ ಕವಾನು ತರಿಕಾಮಾ ಬೊಲಸ ಹಿಬ್ರಿಯ ಪುಸ್ತಕ ರೊಮಮಾ ಬರ್ದಲ13:24 ವರಿ ಘನ್ನಿಸಲಾ ಸಭೆಮಾ ತೆ ಫೈಲಯುಸ.
ಪಿಠಿಕೆ
1 ಬರ್ದಲವಾಲೊ ಕ್ಹುದಾನಿ ಪ್ರವಾದಿಯೊ ವರಿ ದೆವದುತೊತಿಬಿ ಶ್ರೆಷ್ಠ ವ್ಹೈ ಕವಾನು ದೆಕಾಡಿನ ದಿವಸ 1:1—4:13
2 ತೆ ಥಯಲ್ಪರ ತೆ ಯೆರುಸೆಲೆಮೆ ದೆವಾಲಯಮಾ ಸೆವ ಕರ್ತೊ ರ‍್ಹಯಲ ಕ್ಹು ಯೆಸು ಮ್ಹೊಟೊ ವ್ಹೈ. ಕೈನ ದೆಕಾಡಿನ ದಿವಸ. 4:14—7:28
3 ಕ್ಹುದಾ ಮೊಶೆನಾ ಮುಲಕ ತಿನಾ ಮನಕ್ಹೊನಾ ಕ್ಹಾತೆ ಕರಲ ಜು಼ನ್ನು ಒಡಂಬೆಡಿಕತಿಬಿ ಯೆಸುನು ಸೆವೆನು ಕಾಮ ಮ್ಹೊಟು ರ‍್ಹಯಲ ಕವಾನು ದೆಕಾನಿನೆ ದಿವಸ. 8:1—10:31
4 ಯೆಸು ಕ್ಹಾರಿ ತರಾಮಾ ಉನ್ನತ ವ್ಹೈ ಕವಾನು ಕದಲ್ಪರ ಬರ್ದಲವಾಲೊ ಘನ್ನಿ ಪ್ರಾಯೊಗಿಕ ವಾಟೊ ದಿವಸ. 10:32—13:17
5 ಲಾಸ್ಟಮಾಬರ್ದಲವಾಲೊ ದಕ್ಹಾ ಪ್ರಾತ್ಸಹಕರಾನು ವಾತೊ ಕೈನ ವಂದನೆ ಕತೊ ಪತ್ರ ಲಾಸ್ಟ ಕರಸ. 13:18-25
1
ಕ್ಹುದಾ ತಿನಾ ದಿಕ್ರಾನಾ ಮುಕಾಂತರ ಬೊಲಲ
1 ಪೈಲಾನಾ ದಿನ್ನೊಮಾ ಅಪ್ನಾ ಮನಕ್ಹೊನಾ ಕ್ಹಾತೆ ಪ್ರವಾದಿಯೊಕ್ಹು ಬಿಜಿ-ಬಿಜಿ ತರಾಮಾ ಕ್ಹುದಾ ಘನ್ನಿ ಸಲಾ ಬೊಲ್ಯೊ.
2 ತೆನೈಸೊ, ಎ ಲಾಸ್ಟನಾ ದಿನ್ನೊಮಾ ಕ್ಹುದಾ ಅಪ್ನಾ ಕ್ಹಾತೆ ತಿನಾ ದಿಕ್ರಾನಾ ಮುಕಾಂತರ ಬೊಲ್ಯೊಸ. ತಿನಾ ದಿಕ್ರಾಕ್ಹುಜ಼ ಕ್ಹುದಾ ಪುರಾ ದುನಿಯಾಮಾನು ಹರಯಕ್ಕ ಸೃಷ್ಟಿ ಕರ‍್ಯೊ, ವರಿ ಹರಯಕ್ಪರ ತಿನೆ ಅದಿಕಾರ ದಿದ್ಯೊ.
3 ಕ್ಹುದಾನಿ ಮಹಿಮಾ ತಿಮಾ ದಿಕ್ಹಿನ ಐ. ತೆ ಕ್ಹುದಾನಾ ಲಿಂಗತಜ ವ್ಹತ್ತೊ, ತೆ ತಿನಾ ತಾಕತ ಭರಲ ವಾಕ್ಯಾಕ್ಹು ಕ್ಹಾರಾವೊನೆ ಆಸ್ರೊ ವ್ಹತ್ತೊ. ವರಿ ತೆ ಮನಕ್ಹೊನೆ ತ್ಯುನಾ ಪಾಪೊಕ್ಹು ಶುದ್ಧ ಕರಿನ ಕ್ಹಾರಾವೊತಿ ಉಪ್ಪರ ರ‍್ಹಯಲ ಸ್ವರ್ಗಮಾ ಕ್ಹುದಾನಾ ಸಿದಾ ಬಗಲ ಬೈಟ್ಯೊ.
4 ಕ್ಹುದಾ ತಿನೆ ದೆವದುತೊನಾ ನಾಮೊತಿಬಿ ಮ್ಹೊಟು ನಾಮ ತಿನೆ ಮ್ಹೆಲ್ಯೊತೊ, ಕಾಕದ್ಯಾಮ ಕ್ಹುದಾ ತಿನೆ ದೆವದುತೊತಿಬಿ ಮ್ಹೊಟೊ ಕರ‍್ಯೊತೊ.
5 ಕಿಮ್ಮ ಕದ್ಯಾಮ ಕ್ಹುದಾ ಕಯಾಜ ದೆವದುತನೆ ಅಮ್ಮ ಕದ್ಯೊ ನತ್ತಿ, ತು ಮಾರೊ ದಿಕ್ರೊ ವ್ಹೈ ಮಿಜ಼ ತುನೆ ಹಮ್ನಾ ಪಡದಿಲಿದ್ಯೊಸ ವರಿ ಮಿ ತಿನೊ ಬಾ ಥೈನ ರ‍್ಹೌಸ ತೆ ಮಾರೊ ದಿಕ್ರೊ ಥೈನ ರ‍್ಹವಸ.
6 ತೆನೈಸೊ ಕ್ಹುದಾ ತಿನಾ ಪೈಲಾರ ದಿಕ್ರಾನೆ ದುನಿಯಾಮಾ ಫರಿನ ವಳಾತಾಮಾ, ದೆವದುತೊ ಕ್ಹಾರಾ ತಿನೆ ಆರಾಧನಾ ಕರು” ಕೈನ ಕದ್ಯೊಸ.
7 ದುತೊನಾ ಹುತಿ ಕ್ಹುದಾ ಕವಾನು ಸುವೈ ಕದ್ಯಾಮ, ಕ್ಹುದಾ ತಿನಾ ದುತೊನೆ ವಾರಾ ನಿಗಂತಬಿ ವರಿ ತಿನಾ ಸೆವಕೊನೆ ಆಗನಾ ಕೆಂಡಾ ಲಿಂಗತಬಿ ಕರ‍್ಯೊಸ.
8 ದಿಕ್ರಾನಾ ಹುತಿತೊ ಕ್ಹುದಾ, ತಾರು ಸಿಂಹಾಸನ ಯುಗೊ ಯುಗೊತಕಾ ರ‍್ಹವಸ ನ್ಯಾಯನಿ ಲಾಕಡಿಜ ತಾರಿ ರಾಜ ಕರಾನಿ ಲಾಕಡಿ ವ್ಹೈ.”
9 ತು ನ್ಯಾಯನೆ ಮಯಾ ಕರ‍್ಯೊ ವರಿ ಅನ್ಯಾಯ ದ್ವೆಶ ಕರ‍್ಯೊ. ತಿನಾಹುತಿ ತಾರೊ ಕ್ಹುದಾಜ಼, ತುನೆ ತಾರಾ ಕ್ಹಾತೆ ರ‍್ಹಯಲವಾಲವೊತಿಬಿ ಮ್ಹೊಟಿ ಜ಼ಗಾಮಾ ಬೈಟಾಡಿನ ಘನ್ನಿ ಖುಶಿನಾ ತೆಲಕ್ಹು ಅಬಿಷೆಕ ಕರ‍್ಯೊ” ಕೈನ ಕದ್ಯೊ.
10 ವರಿ ತೆನೈಸೊ ಕ್ಹುದಾ ಅಮ್ಮ ಕವಸ, ಕರ್ತಾ ಆದಿಮಾ ತು, ಜಿಮಿನನೆ ಫಾಯಾ ಘಾಲ್ಯೊಸ ವರಿ ಹಬಾಳತೊ ತಾರಾ ಹತನು ಕಾಮ ವ್ಹೈ.”
11 ತೆನೈಸೊ ಆ ಕ್ಹಾರು ಹಾಳ ಥೈ ಜ಼ಾವಸ, ಮಾತ್ರಾ ತು ಹಮೆಶಾಬಿ ರ‍್ಹಶಿ. ತೆ ಕ್ಹಾರು ವಣ್ಣಾವೊನಾ ನಿಗಂತ ಜುನ್ನು ಥಾವಸ.
12 ತೆ ಕ್ಹಾರು ಉಪ್ಪರಲ್ಯು ಅಂಗ್ಡಾನಾ ಲಿಂಗತಬಿ ವರಿ ವಣ್ಣಾವೊನಾ ಲಿಂಗತಬಿ ತು ಮಡಚಿ ಪಡಶಿ ವರಿ ತೆ ಬದಲಿ ಥಾವಸ. ತುತೊ ಕೆಳಾಮಾಜ಼ ಬದ್ಲಿ ಥಾತೊ ನೈ. ತಾರಿ ವಯಸ್ಸ ಕೆಳೆಜ಼ ಕ್ಹರತಿ ನೈ.
13 ವರಿ ಕ್ಹುದಾ ಕಯಾ ದೆವದುತನಾ ಹುತಿಬಿ ಅಮ್ಮ ಕದ್ಯೊ ನತ್ತಿ. ಮಿ ತಾರಾ ದುಶ್ಮನೊನೆ ತಾರಾ ಪಗನಾ ಹೆಟೊ ಘಾಲೆ ಲಕ್ಕಾ ತು ಮಾರಾ ಸಿದಾ ಹತ ಬಗಲ ಬೈಟ,ಕಿರ್ತನೆ 110:1
14 ತೆ ದೆವದುತೊ ಕ್ಹಾರಾ ಕ್ಹುದಾನಿ ಸೆವಾ ಕರಾಲಾ ಆತ್ಮಾ ವ್ಹೈ ವರಿ ರಕ್ಷಣೆ ಹೊಂದಾಲಾ ಮನಕ್ಹೊನಿ ಮದತ ಕರಾನೆ ವಳಾಯಲವಾಲಾ ವ್ಹೈ.