10
ಲಾಸ್ಟನು ಬಲಿದಾನ
1 ಧರಮಶಾಸ್ತ್ರ ಅಗು ಆವಾನು ರ‍್ಹಯಲ ಚೊ಼ಕಿಯೊ ಸಂಗತಿಯೊನು ಭೌಲೊ ಯಕ್ಕಜ಼ ವ್ಹೈ. ತಿನಾಹುತಿ ತೆ ಧರಮಶಾಸ್ತ್ರ ಹರಿಯಕ್ಕ ವರಕ್ಹೆ ಹಮೆಶಾಬಿ ಯಕ್ಕಜ಼ ತಾರಾನಿ ಬಲಿ ಚ಼ಡಾವೊ, ಕ್ಹುದಾನಾ ನಜಿಕ ಆವಾಲಾವೊನೆ ಕೆಳಾಮಾಜ಼ ಪರಿಪುರ್ಣ ಕರಿನ ಲಾವಾನೆ ಥಾತು ನೈ.
2 ಬಲಿನೆ ಲಾಯಲ ಕ್ಹಾರು ಹುಬರೈ ಪಡತುತು, ಕಾಕದ್ಯಾಮ ಆರಾದನಾ ಕರಾಲಾ ಯಕ್ಕ ಸಲ ಶುದಿ ಥಯಲ್ಪರ ತ್ಯುನೊನೆ ಪಾಪ ಕವಾನು ಕದ್ರಾತು ನ್ಹೊತು.
3 ಹಮ್ನಾತಬಿ ತೆ ಯಜ್ಞ ಬಲಿಯೊಕ್ಹು ಹರ ವರಕ್ಹಮಾ ಪಾಪೊ ಶೆಂ ಕರಾನು ಛೆ,
4 ಕಾಕದ್ಯಾಮ ಹೊರಿಯೊನು ವರಿ ಬಕ್ರಾವೊನು ರಗತಕ್ಹು ಪಾಪ ಪರಿಹಾರ ಕರಾನು ಸಾಧ್ಯ ನತ್ತಿ.
5 ತಿನಾಹುತಿ ಕ್ರಿಸ್ತ ಭುಲೊಕಮಾ ಆತಾಮಾ,
(ಕ್ಹುದಾ) ಬಲಿಯೊನು ಕಾಣಿಕೆ ತುನೆ ಪಸಂದ ನ್ಹೊತು, ತೆನೈಸೊ ಮನೆ ಯಕ್ಕ ಅಂಗ ತಯ್ಯಾರ ಕರಿನ ದಿದ್ಯೊಸ,
6 ಕ್ಹಾರಾ ತರಾನಿಯೊ ಬಲಿಯೊಮಾ ಪಾಪ ಪರಿಹಾರನಾ ಬಲಿಯೊಮಾ ತು ಕ್ಹುಶಿ ಥಾತೊ ನೈ.
7 ಮಿ ತೆಳಾಮಾ, ಹಮ್ನಾ, ಕ್ಹುದಾ, ಗ್ರಂಥನಾ ಸುರಳಿಮಾ ಮಾರಾಹುತಿ ಬರ್ದಲ ಲಿಂಗತಜ಼ ತಾರಿ ಚಿತ್ತ ಪುರಾ ಕರಾನಾ ಹುತಿ ಆಯೊಸ” ಕೈನ ಕದ್ಯೊ.
8 ಧರಮಶಾಸ್ತ್ರನಾ ಪ್ರಕಾರ ಚಡಾಯೆಲ ಬಲಿಯೊಮಾ, ಕ್ಹಾರಾ ತರಾನಾ ಬಲಿಯೊಮಾ ವರಿ ಪಾಪ ಪರಿಹಾರನಾ ಬಲಿಯೊ ತುನೆ ಪಸಂದ ನ್ಹೊತು. ತು ತ್ಯವಾ ಕ್ಹಾರಾಮಾ ಕ್ಹುಶಿ ಥಾತೊ ನೈ” ಕೈನ ಕದ್ಯೊಸ.
9 ತೆ ಥಯಲಪರ ತೆ ದೆಕ, ತಾರಿ ಚಿತ್ತ ಪುರಾ ಕರಾನಾ ಹುತಿ ಆಯೊಸ” ಕೈನ ಕದ್ಯೊಸ. ತೆ ಬೆವಾನು ಪುರಾ ಕರಾನಾ ಹುತಿ ಯಕ್ವಾನೆ ಕಾಡಿ ಪಡಸ.
10 ಯೆಸು ಕ್ರಿಸ್ತ ಯಕ್ಕಸಲ ತಿನು ಅಂಗ ಬಲಿ ದಿನ ಕ್ಹುದಾನಿ ಚಿತ್ತ ಪುರಾ ಕರಲ ಹುತಿಜ಼ ಅಪೆ ಶುದ್ಧ ಥಯಲವಾಲಾ ಥಯಾ.
11 ತೆನೈಸೊ ಹರಯಕ್ಲೊ ಯಾಜಕ ದಿನೆಬಿ ಸೆವೆ ಕರತೊ ಕೆಳಾಮ್ಮಾಜ ಪಾಪ ನೈ ಕಡಾವಾನು, ಯಕ್ಕ ತರಾನಾ ಬಲಿಯೊ ಹಗ್ಲೆಲಾ ಚಡಾತೊ ಹುಬ್ರಯೊಸ.
12 ತೆನೈಸೊ ಕ್ರಿಸ್ತ ಪಾಪೊನಾ ಹುತಿ ಹಮೆಶಾಬಿ ಯಕ್ಕಜ಼ ತರಾನಿ ಬಲಿ ಚಡಾಯೆಲ ಪರ ಕ್ಹುದಾನಾ ಬಾಜು಼ಮಾ ಬೈಟ್ಯೊ.
13 ತ್ಯಾತೊ ತಿನಾ ವಿರೊದಿಯೊ ತಿನಾ ಪಗೊ ಮ್ಹೆಲಾನಿ ಜ಼ಗಾ ಕರೆಲಕ್ಕಾಬಿ ತೆ ಕೈದತೊ ರ‍್ಹವಸ.
14 ತೆ ಶುದ್ಧ ಥಾವಾಲಾವೊನೆ ಯಕ್ಕಜ಼ ಸೆಮ ಹಮೆಶಾಬಿ ಪರಿಪುರ್ಣ ಕರ‍್ಯೊಸ.
15 ಪವಿತ್ರಾತ್ಮಬಿ ಅಪೊನೆ ಸಾಕ್ಷಿ ದಿವಾಲೊ ಥೈನ,
16 ತೆ ದಿನ್ನೊ ಆಯಲ ಪರ ಮಿ ತ್ಯುನಾ ಕ್ಹಾತೆ ಕರಲಿವಾನಿ ಒಂಡಬಡಿಕೆ ಅಮ್ಮ ರ‍್ಹವಸ, ಮಾರಿಯೊ ಆಗನ್ಯಾ ತ್ಯುನಾ ಮನಸೊಮಾ ಮ್ಹೆಲುಸ, ತ್ಯುನಾ ಮನಸೊಮಾ ತೆ ಕ್ಹಾರು ಬರದುಸ ಕೈನ ಕರ್ತಾ ಕವಸ. ಎಕ್ಹಾರು ಕದಲ್ಪರ ಹಜು಼ನ,
17 ತ್ಯುನಾ ಪಾಪೊ ತ್ಯುನಾ ಕೆಟ್ಟ ಕಾಮೊಕ್ಹು ಮಿ ಕೆಳಾಮಾಜ ಶೆಂ ನೈ ಮ್ಹೆಲೆತೊ” ಕೈನ ಕದ್ಯೊ.
18 ಪಾಪ ಮಾಫ ಥಯಲ ಟೈಮಮಾ ಹಜು಼ನಬಿ ತೆ ಕ್ಹಾರಾ ವಿಷಯಮಾ ಬಲಿಯೊ ದಿವಾನು ಜರುರತ ನತ್ತಿ.
19 ಇಮ್ಮ ರ‍್ಹಯಾಮಾ ಭಾಯೊ, ಯೆಸು ತಿನಾ ರಗತಕ್ಹು ತಿನಾ ಅಂಗನಾ ಮುಲಕ ಅಪೊನೆ ನಯಾ ಜ಼ಲಮನಿ ವಾಟ ಖುಲಾ ಕರಿನ ದಿದ್ಯೊಸ.
20 ತಿನಾ ಮುಲಕ ಘನು ಪರಿಶುದ್ಧ ರ‍್ಹಯಲ ಜ಼ಗಾ ಜಾ಼ವಾನೆ ಅಪೊನೆ ಭರೊಕ್ಹೊ ಮಳೊಸ
21 ವರಿ ಕ್ಹುದಾನಾ ಘರದಾನ ಪರ ಅದಿಕಾರ ರ‍್ಹಯಲ ಚೊ಼ಕೊ ಯಾಜಕ ಅಪೊನೆ ಛೆ.
22 ತಿನಾಹುತಿ ಕೆಟ್ಟ ಮನಸಾಕ್ಷಿನೆ ವಳಕಿನ ಶುದ್ಧ ಕರಲಿನ, ಪಾತಳಾ ಪಾನಿಕ್ಹು ಧ್ವೈಲಿದಲ ಅಂಗಕ್ಹು, ಯಕ್ಕಜ಼ ಮನಸಕ್ಹು, ಬರೊಕ್ಹಾಕ್ಹು ಪುರಾ ಚಿತ್ತಕ್ಹು, ಕ್ಹುದಾನಾ ನಜಿಕ ಐಯೆ.
23 ಅಪೆ ಅಪನಿ ಆಸಕ್ಹು ಕರಿಲಿದಲ ಮಾಂಗಿಲಿದಲನಾ ಹುತಿ ಚಂಚಲ ಥಯಾವಾಚಿ ಘಟ್ಟ್ಟ ಮನಸಕ್ಹು ಭಾಂದಿನ ಧರಲಿಯೆ, ಕಾಕದ್ಯಾಮ ವಾಗ್ದಾನ ಕರಲವಾಲೊ ಬರೊಕ್ಹೊವಾಲೊ ವ್ಹೈ.
24 ಅಪೆ ಯಕ್ನಾ ಯಕ್ಕ ಚಿಂತಾ ಕರಾಲಾ ಥೌ ಮಯಾ ಕರತಾ ರ‍್ಹೌ ಕೈನ ಚೊ಼ಕಾ ಕಾಮೊ ಕರು ಕೈನ ಯಕ್ನಾ ಯಕ್ಕ ಅಗು ಬಡಾವಾನು ಕೊಶಿಶ ಕರಿಯೆ.
25 ಸಬೆ ಮಳಾನಿ ರುಡಾನೆ ದಕ್ಹಾಜ಼಼ನಾ ಛೊ಼ಡಿಪಡಲ ಲಿಂಗತ ಅಪೆಬಿ ಛೊಡ್ಯಾವಾಚಿ ತೆ ದಿನ್ನ ನಜಿಕ ಆವಸ ಕೈನ ತುಮೆ ತಿಳದಿಲಿದಲಕ್ಹು ಯಕ್ನಾ ಯಕ್ಕ ವರಿ ಜಾಸ್ತಿ ಅಗು ಬಡಾನು ಕೊಶಿಶ ಕರಿಯೆ.
26 ಅಪೆ ಕ್ಹರಿನು ಗ್ಯಾನ ವ್ಹಂದಿಲಿದಲ್ಪರಬಿ ಪಾಪ ಕರ‍್ಯಾಮಾ ಪಾಪ ಪರಿಹಾರನಾ ಹುತಿ ಕೈಜ಼ ಬಲಿ ಉಗರಿ ನತ್ತಿ.
27 ತಿನಾ ಬದಲ ಘನ್ನು ಭುಚ಼ಕಾನು ರ‍್ಹಯಲ ನ್ಯಾಯನಾ ಫೈಸಲಾನಿ ಆಸ ವರಿ ಕ್ಹುದಾನಾ ವಿರೊದಿಯೊನೆ ಬಾಳಾನಿ ಘನಿ ಶಿಟ್ಟನಿ ಆಗ ರ‍್ಹವಸ.
28 ಮೊಶೆ ಧರಮಶಾಸ್ತ್ರನೆ ತಿರಸ್ಕಾರ ಕರಲವಾಲಾವೊನೆ ಬೆ ನೈತೊ ತನ್ನ ಸಾಕ್ಷಿಯೊನಾ ಉಪ್ಪರ ಮರಾಗಾ ನೈಸೊ ಮರಣನಿ ಶಿಕ್ಷಾನೆ ಥಾತುತು ತೆಕ್ಲುಜ಼.
29 ತಿಮ್ಮ ರ‍್ಹತಾಮಾ, ಕ್ಹುದಾನಾ ದಿಕ್ರಾನೆ ಕ್ಹುಂದಿನ, ತಿನಾಕ್ಹು ತೆ ಶುದ್ಧ ಕರಲಿನ ಒಂಡಬಡಿಕೆನಾ ರಗತನೆ ಅಶುದ್ಧ ವ್ಹೈ ಕೈನ, ಕ್ಹುದಾನಿ ಮರಗಾ ರ‍್ಹಯಲ ವರಾನೆ ಆತ್ಮಾನೆ ಠುಕ್ರಾವಸ ಸು, ಹಜು಼ನ ಕೆವಾ ಖತರನಾಕ ಶಿಕ್ಷಾನೆ ಗುರಿ ಥಾವಸ ಕೈನ ತ್ಯುಮೆಜ ವಿಚಾರ ಕರಿನ ದೆಕೊ?
30 ಮುಯ್ಯಿನೆ ಮುಯ್ಯಿ ಫೆಡಾನು ಮಾರು ಕಾಮ ವ್ಹೈ, ಮಿಜ಼ ಪ್ರತಿಫಲ ದಿವಾಲೊ ವ್ಹೈ ಕೈನ ಕದಲವಾಲಾನೆ ವಳಕೆಸ. ತೆನೈಸೊ ಕರ್ತಾ ತಿನಾ ಮನಕ್ಹೊನೆ ಫೈಸಲೊ ಕರಸ ಕೈನ ಕದ್ಯೊಸ.
31 ಜುತೊ ರ‍್ಹಯಲ ಕ್ಹುದಾನಾ ಹತ್ತಮಾ ಕ್ಹಾಪಡಾನು ಕೆಕ್ಲುಕಿ ಖತರನಾಕ ವ್ಹೈ.
32 ತಿಮ್ಮ ರ‍್ಹತಾಮಾ ತುಮೆ ಗ್ಯಾನನು ಉಜಾಲು ವ್ಹಂದಿಲಿದಲ ಪರ ಕಷ್ಟನಾ ಅನುಭವ ಕವಾನಿ ಘನ್ನಿ ಹೊರಾಟ ತಡದಿಲಿನ ಪಾಚ಼ಲ್ಯಾ ದಿನ್ನೊ ಶೆ ಕರಿಲಿವೊ.
33 ದಕ್ಹಾದಿನ ತುಮೆ ಮನಕ್ಹೊನಾ ಹತೆ ಕದ್ರಾವಾನು ತ್ರಾಸ ಅನುಭವಸೊ ಕದ್ರೈಲಿವಾನೆ ಗುರಿ ಥಾವೊನಕೊ. ದಕ್ಹಾದಿನ ತ್ಯೌ ಕ್ಹಾರು ಅನುಭವಿಸಲೊನಾ ಕ್ಹಾತೆ ಮಳಿನ ರ‍್ಹೈನ ತ್ಯೌ ಕ್ಹಾರು ವಾಟಿ ಲಿವಾಲಾ ಥಾವೊ ನಕೊ.
34 ತುಮೆ ಜೆಲಮಾ ರ‍್ಹಯಲವಾಲಾವೊನೆ ಮರಗಾ ದೆಕಾಡೊ ತುಮಾರಾ ಹುತಿ ಚೊ಼ಕು ಘಟ್ಟ ರ‍್ಹಯಲ ರ‍್ಹವಾನಿ ಆಸ್ತಿ ಛೆ ಕೈನ ಚೊ಼ಕಿತರಾ ತಿಳ್ದಿನ ತುಮಾರಿ ಆಸ್ತಿ ಉದಾಳಿವಾಲಾವೊನೆ ಕ್ಹುಶಿಕ್ಹು ಛೊಡಿನ ದಿದ್ಯಾಸ.
35 ತಿನಾಹುತಿ ತುಮಾರಿ ಧೈರ್ಯ ಛೊಡಿಪಾಡೊನಕೊ. ತಿನೆ ಮ್ಹೊಟಿ ಪ್ರತಿಫಲ ಛೆ.
36 ತುಮೆ ಕ್ಹುದಾನಿ ಚಿತ್ತ ಪುರಾ ಕರಲಪರ ವಾಗ್ದಾನ ವ್ಹಂದಿಲ್ಯು ಕದ್ಯಾಮ ತುಮೊನೆ ತಾಳ್ಮೆನಿ ಜ಼ರುರತ ಛೆ.
37 ಆವಾಲೊ ಬಿಜಾ಼ ದಕ್ಹಾ ಟೈಮಮಾ ಆವಸ ತಡಾ ಕರತೊ ನೈ.
38 ವರಿಬಿ ಮಾರು ರ‍್ಹಯಲವಾಲೊ ನಿತಿಕ್ಹು ವರಿ ಬರೊಕ್ಹಾಕ್ಹು ಜಿವ್ನಾ ಕರಸ, ತೆ ತಿಕ್ಹು ಪಾಚೊ಼ ಸರಕ್ಯೊಮ ತಿಮಾ ಮಾರಿ ಮೆಚಿಕೆ ರ‍್ಹತಿ ನೈ.
39 ಅಪೆತೊ ಪಾಚಾ಼ ಸರಕ್ಯಾಚಿ ರ‍್ಹೈನ ಹಾಳ ಥಾತಾ ನೈ ಬರೊಕ್ಹೊ ಕರಾಲಾ ಥೈನ ಆತ್ಮಾ ರಕ್ಷಣೆ ವ್ಹಂದಾಲಾ ಥಯಾಸ.