2
ಖಾಸ ರಕ್ಷಣೆ
1 ತಿನಾಹುತಿ ಅಪ್ನೊನೆ ಶಿಕ್ಲಾಯಲ ಸಂಗತಿಯೊನಾ ಲಿಂಗತ ಘನ್ನಾ ಹುಶಾರಕ್ಹು ಚಾ಼ಲು, ಕ್ಹರಿನಿ ವಾಟ ಛೊಡ್ಯಾ ಬಗರ ಹುಶಾರ ರ‍್ಹೌ.
2 ಕ್ಹುದಾ ತಿನಾ ದುತೊನಾ ಮುಕಾಂತರ ದಿದಲ ವಾಕ್ಯಾ ಕ್ಹರಿನಿ ವ್ಹೈ ಕೈನ ದೆಕಾಡಿನ ದಿದಲ ಶೆ. ಯಹುದ್ಯೊ ಆ ವಾಕ್ಯಾನೆ ವಿರುದ್ದ ತಪ್ಪ ಕರತಾಮಾ ವರಿ ಆ ವಾತ ನೈ ಐಕ್ತಾಮಾ ತಿನಾ ತಕ್ಕ ತ್ಯುನೊನೆ ಶಿಕ್ಷಾ ಮಳತಿತಿ.
3 ಅಪೊನೆ ದಿದಲ ಎ ಖಾಸ ರಕ್ಷಣೆ ಅಪೆ ಧ್ಯಾನ ನೈ ದಿದ್ಯಾಮ ಅಪೊನೆ ಶಿಕ್ಷಾ ಮಳಸ. ಆ ಪೈಲಾಜ಼ ಕರ್ತಾ ಕದಲ ಛೆ ವರಿ ತಿಕ್ಹು ಐಕಲವಾಲಾ ರಕ್ಷಣೆನಾ ಹುತಿ ಅಪೊನೆ ಹಜು಼ ಘಟ್ಟ್ಟ ಕರ್‍ಯಾಸ.
4 ಎನೈಸೊ ಕ್ಹುದಾ ತಿನಾ ಅದ್ಭುತ ಕಾಮುಕ್ಹು, ಸುಚಕ ಕಾರ‍್ಯೊಕ್ಹು, ಘನ್ನಾ ತರಾನಾ ಮ್ಹೊಟಾ ಕಾಮೊಕ್ಹು ವರಿ ಪವಿತ್ರ ಆತ್ಮಾನಾ ವರಾಕ್ಹು ತಿನಾ ಮನಸೆ ಆಯಲ ತಿಮ್ಮ ದಿವಾನಾ ಮುಲಕ ತೆ ದೆಕಾಡಿನ ದಿದ್ಯೊ.
ಮನಕ್ಹೊನೆ ರಕ್ಷಣೆ ದಿವಾನಾ ಹುತಿ ಕ್ರಿಸ್ತ ಮನಕ್ಹ ಥೈನ ಆಯೊ
5 ಮಿ ಹಮ್ನಾ ತುಮೊನೆ ಕವಾನು ಅಗು ಆವಾನು ನವು ಜಗತ್ನೆ ಆಳಾನೆ ಕ್ಹುದಾ ದೆವ ದುತನೆ ಇನಿಲಿದ್ಯೊ ನೈ.
6 ಎ ಪವಿತ್ರ ಗ್ರಂಥನಾ ಯಕ್ಕ ಭಾಗಮಾ - ಕ್ಹುದಾ, ತು ಮನಕ್ಹೊನೆ ಕಾ ಶೆಂ ಕರು? ತು ಮನಕ್ಹೊನಾ ಹುತಿ ಕಾ ಚಿಂತಾ ಕರು? ತೆ ತೆಕ್ಲು ಖಾಸ ವ್ಹೈ ಸು?
7 ಕ್ಹಾಲಿ ದಕ್ಹಾ ಟೈಮನಾ ಹುತಿ ತು ತಿನೆ ದೆವದುತೊತಿ ನಕ್ಕರಜ಼ ಕಮ್ಮ ಕರ‍್ಯೊಸ. ತು ತಿನೆ ಮಹಿಮಾನು ವರಿ ಮರ್ಯಾದಿ ಕವಾನು ಕಿರಿಟ ಮುಕ್ಯೊಸ.
8 ಕ್ಹಾರು ತಿನಾ ಪಗೊನಾ ಹೆಟೊ ಘಾಲಿನ ಕ್ಹಾರು ತಿನಾ ಬಸ್ಮಾ ದಿದ್ಯೊ. ಕ್ಹುದಾ ಕ್ಹಾರು ತಿನಾ ಹತ್ಮಾ ದಿನ ಯಕ್ಕಬಿ ಚಿಜ಼ ಛೊಡ್ಯಾ ಬಗರ ಹರಯಕ್ಕ ತಿನಾ ಅಧಿನಮಾ ದಿದ್ಯೊತಬಿ, ಹರಯಕ್ಕ ಚಿಜ಼ಪರ ತೆ ರಾಜ಼ ಕರಾನು ಹಮೊನೆ ಹಜು಼ನಬಿ ದೆಕಾಡಾ ನತ್ತಿ.
9 ದಕ್ಹಾ ಟೈಮ ಲಕ್ಕಾ ಯೆಸುನೆ ದೆವದುತೊತಿ ನಕ್ಕರಜ಼ ಕಮ್ಮ ಕರ‍್ಯೊ. ತೆನೈಸೊ ಯೆಸು ಸ್ವಾಮಿ ಅಪ್ನಾಹುತಿ ದುಕ್ಕ ಖೈನ ಮರಲಹುತಿಜ಼ ಅಪೊನೆ ಮಹಿಮಾನು ವರಿ ಮರ್ಯಾದಿನು ಕಿರಿಟ ಮಳ್ಯುಸ. ತಿನಾಹುತಿಜ಼ ಕ್ಹುದಾನಾ ಕೃಪಾಕ್ಹು ಯೆಸು ಸ್ವಾಮಿ ಕ್ಹಾರಾವೊನಾ ಹುತಿ ಕಷ್ಟ ಅನಭವಿಸಿನ ಮರ‍್ಯೊ.
10 ಕ್ಹಾರು ಸೃಷ್ಟಿ ಕರಲ ಕ್ಹುದಾಜ಼ ವ್ಹೈ. ಕ್ಹಾರಾ ಸೃಷ್ಟಿ ಥಯಲ ತಿನಿ ಮಹಿಮಾನಾ ಹುತಿಜ಼ ವ್ಹೈ. ಕ್ಹುದಾ ತಿನಾ ಬಚ್ಚಾವೊನಾ ಕ್ಹಾತೆ ತಿನಿ ಮಹಿಮಾ ವಾಟಿಲಿವಾನಾ ಹುತಿ ತೆ ತ್ಯುನೊನೆ ರಕ್ಷಣೆಮಾ ಚ಼ಲಾವಾನಾ ಹುತಿ ಕ್ಹುದಾ ಯೆಸು ಸ್ವಾಮಿನೆ ಕ್ಹಾರಿ ತರಾನಿ ತ್ರಾಸ ದಿವಾನಾ ಮುಕಾಂತರ ತಿನೆ ಪುರಾ ರಕ್ಷಕ ಕರ‍್ಯೊ.
11 ಮನಕ್ಹೊನೆ ಪರಿಶುದ್ಧ ಕರಾಲೊ ಯೆಸು ವರಿ ತಿನಾ ಮುಕಾಂತರ ಪರಿಶುದ್ಧ ಥಾವಾಲಾ ಮನಕ್ಹೊ ಯಕ್ಕಜ಼ ಘರವಾಲಾ ವ್ಹೈ. ತಿನಾಹುತಿ ತೆ ಮನಕ್ಹೊನೆ ಭಾಯೊ, ಭೆನೊ ಕವಾನೆ ತೆ ಸರಮಾಯೊ ನೈ.
12 ಯೆಸು ಕ್ಹುದಾನೆ ಅಮ್ಮ ಕವಸ; ಮಿ ಮಾರಾ ಮನಕ್ಹೊಕನ ತು ಮಾರಾ ಕ್ಹಾತೆ ಸು ಕರ‍್ಯೊ ಕೈನ ಕೌಸ ವರಿ ಮಿ ತ್ಯುನಾ ವಚ್ಮಾ಼ ತಾರಾ ನಾಮನಿ ಮಹಿಮಾ ಹೊಗಳುಸ.
13 ತೆ ವರಿ ಅಮ್ಮ ಕವಸ; ಮಿ ಕ್ಹುದಾಪರ ಬರೊಕ್ಹೊ ಮ್ಹೆಲುಸ. ವರಿ ಯಕ್ಕ ಸಲಾ ತೆ ಕವಸ; ಮಿ ನ್ಹ್ಯಾಛೆ. ಕ್ಹುದಾ ಮನೆ ದಿದಲ ಬಚ್ಚಾ಼ವೊನಾ ಕ್ಹಾತೆ ಛೆ.
14 ಬಚ್ಚಾ ಕಿಮ್ಮ ಅಂಗ ಹೊಂದ್ಯಾಸ ತಿನಾಹುತಿ ಯೆಸು ಸ್ವಾಮಿಬಿ ತ್ಯುನಾ ಲಿಂಗತ ಥಯೊ ತೆ ಮೌತನಾ ಮುಕಾಂತರ ಕದ್ಯಾಮ ಮೌತನಾ ಅದಿಕಾರಿ ರ‍್ಹಯಲ ಸೈತಾನನೆ ನಾಶ ಕರಾನಾ ಹುತಿ
15 ತ್ಯುನೊನೆ ಮರಾನಿ ಯಕ್ಕ ಭೆಂಕ್ಹು ಪುರಾ ಜಿಂದಗಿ ಆಳಥೈನ ರ‍್ಹಯಲವಾಲಾವೊನೆ ಛೊಡಾವಾನಾಹುತಿ ತ್ಯುನಾ ಲಿಂಗತ ಥೈನ ಆಯೊ
16 ತೆ ಸಹಾಯಾ ಕರಾನು ಅಬ್ರಹಾಮನಾ ಖಾಂದಾನಾವಾಲಾವೊನೆ ಯಕ್ಕಜ಼ ವ್ಹೈ. ದೆವದುತೊನೆ ನ್ಹವೈ.
17 ತಿನಾಹುತಿಜ ತೆ ಹರಯಕ್ಕ ವಿಷಮಾ ತಿನಾ ಭಾಯೊ ಭೆನೊನಾ ಲಿಂಗತ ರ‍್ಹವಾನು ಜರುರತ ವ್ಹತ್ತು. ಅನಾ ಲಿಂಗತ ತೆ ಮನಕ್ಹೊನೆ ಪಾಪೊಕ್ಹು ಛೊಡಾವಾನಾ ಹುತಿ ಕ್ಹುದಾನಾ ಕಾಮೊಮಾ ಮರಗಾ ದೆಕಾಡಾಲೊ ಬರೊಕ್ಹಾವಾಲೊ ಮ್ಹೊಟೊ ಯಾಜಕ ಥಯೊ.
18 ತೆ ಕಿಮ್ಮ ಶೊಧನೆಮಾ ಪಡಿನ ಕಸ್ಟ ಅನಭವಿಸ್ಯಲ ಹುತಿ ಹಮ್ನಾ ಕುನ್ನ ಶೊಧನೆಮಾ ಪಡಸ ತ್ಯುನಿ ಮದತ ಕರಾನೆ ಕಾಬಿಲ ಛೆ.