ಯೊಹಾನನು ಬರೆದ ಮೊದಲನೆಯ ಪತ್ರಿಕೆ
1 ಯೊಹಾನ ಬರ್ದಲ ಪತ್ರ
ವಳಕ
ಯೊಹಾನ ಬರ್ದಲ ಯಕ್ವಾ ಪತ್ರಿಕೆಮಾ ಅಪೊಸ್ತಲ ಥಯಲ ಯೊಹಾನ ಯೆಸು ಸ್ವಾಮಿ ಹುಟ್ಟಲ್ಪರ 50-100 ವರಕ್ಹನಾ ವಚ್ಮಾ ಬರ್ದ್ಯೊಸ. ಯೊಹಾನ ಆ ಪತ್ರಿಕೆ ತೆಜ಼ ಬರ್ದ್ಯೊಸ ಕೈನ ದೆಕಾಡಿನ ನತ್ತಿ ದಿದ್ಯೊ, ತೆ ಪೈಲಾ ಅದ್ಯಾಯ ಮಾಜ ತೆ ಯೆಸು ಸ್ವಾಮಿನು ಜಿವಿತ ವರಿ ತೆ ಮರಿನ ತನ್ನ ದಿನ ಥಯಲ್ಪರ ಉಟಿನ ಆಯೆಲ ದೆಕಲ ವಾಲೊ ವ್ಹೈ ಕೈನ ದೆಕಾಡಿನ ದಿವಸ ಯೊಹಾನ ಬರ್ದಲ ಯಕ್ವಾ ಪತ್ರಿಕೆಮಾ ಬರ್ದಲ ತರಿಕೊ ಯೊಹಾನ ಬರ್ದಲ ಸುವಾರ್ತಾನಾ ಬುಕ್ಕನಾ ಕ್ಹಾತೆ ಘನ್ನು ಮಳಸ. ಯೊಹಾನ ಬರ್ದಲ ಸುವಾರ್ತಾನು ಬುಕ್ಕ ಯೊಹಾನಜ಼ ಬರ್ದ್ಯೊಸ ಕೈನ ಕ್ಹಾರಾಜ಼ನಾ ಬರೊಕ್ಹೊ ಕರಸ ತಿನಾಲಿಂಗತಜ಼ ಯೊಹಾನ ಬರ್ದಲ ಯಕ್ವಾ ಬೆವಾ ವರಿ ತನವಾ ಪತ್ರಿಕೆ ಯೊಹಾನ ಎಫೆಸಮಾ ರ‍್ಹತಾಮಾ ಬರ್ದ್ಯೊಸ ಕೈನ ಕ್ಹಾರಾಜ಼ನಾ ಬರೊಕ್ಹೊ ಕರಸ.
ಯೊಹಾನನಿ ಸಬೆ ಕ್ಹುದಾಜ಼ ನತ್ತಿ ಕೈನ ಕವಾಲಾ ಮನಕ್ಹೊ ಕ್ಹು ತ್ರಾಸ ಖಾತಾಮಾ ಯೆಸು ಸ್ವಾಮಿಪರ ಬರೊಕ್ಹೊ ಮುಕ್ಕಲವಾಲಾವೊನಾ ಹುತಿ ಆ ಪತ್ರಿಕೆ ಬರ್ದ್ಯೊಸ ತೆ ಸಬೆನಾ ಮನಕ್ಹೊ ಯೆಸು ಸ್ವಾಮಿ ಕ್ಹುದಾ ವ್ಹೈ ಮಾತ್ರ ಯೆಸು ಸ್ವಾಮಿ ಮನಕ್ಹನಾ ರುಪಮಾ ಆಯೊಸ ಕೈನ ನೈ ಬರೊಕ್ಹೊ ಕರಲಕ್ಹು ಯೊಹಾನ ಯೆಸು ಸ್ವಾಮಿನಾ ಕ್ಹಾತೆ ರ‍್ಹತಾಮ ತೆ ತಿನೆ ಮುಟ್ಟಲ ತೆ ಯೆಸು ಸ್ವಾಮಿನಾ ಕ್ಹಾತೆ ರ‍್ಹತಾಮಾ ಹರಯಕ್ಕ ಥಯಲ ಆ ಪತ್ರಿಕೆಮಾ ಬರ್ದಸ 1:1-3 ಯೊಹಾನ ಆ ಪತ್ರಿಕೆ ಶಾನಾ ಹುತಿ ಬರ್ದ್ಯೊಸ ಕದ್ಯಾಮ ತಿನಿ ಖುಶಿ ಪುರಾ ಥೌ 1:4 ಯೆಸು ಸ್ವಾಮಿಪರ ಬರೊಕ್ಹೊ ಮ್ಹೆಲಲವಾಲಾ ಪಾಪಕ್ಹು ದುರ ರ‍್ಹೌ ಕೈನ 2:1 ತಪ್ಪ ಭೊದನೆಕ್ಹು ವಾಚು಼ ಕೈನ 2:26 ವರಿ ಯೆಸು ಸ್ವಾಮಿಪರ ಬರೊಕ್ಹೊ ಮ್ಹೆಲಲವಾಲಾವೊನೆ ರಕ್ಷಣೆ ಮಳಸಜ಼ ಕೈನ ದೆಕಾಡಿನ ದಿವಾನಾ ಹುತಿ 5:13
ಪಿಠಿಕೆ
1) ಯೊಹಾನ ತೆ ಕಿನೆ ಪತ್ರ ಲಿಕ್ಕಾಡೊಸ ವರಿ ಶಾನಾ ಹುತಿ ಬರ್ದಾಡ್ಯೊಸ ಕೈನ ಕವಸ 1:1,4
2) ವರಿ ಕ್ಹುದಾ ಅಪೊನೆ ಕಿಮ ಉಜಾಲು ಥಯೊಸ ವರಿ ಅಪ್ನೊ ಯೆಸು ಸ್ವಾಮಿ ಕಿಮ ಹೊತ್ತೊ ಅಪೆಬಿ ತಿನಾ ಲಿಂಗತ ಕಿಮ ರ‍್ಹೌ ಕೈನ ಕದ್ಯೊಸ. 1:5—3:10
3) ತೆ ಥಯಲ್ಪರ ಅಪೆ ಯಕ್ಲಾನೆ ಯಕ್ಲೊ ಕಿಮ ಮಯಾ ಕರು ಕೈನ ಕವಾನಿ ಆಗ್ಯಾ ಶೆ ದಿಲಾವಸ3:11; 5:2
4) ಯೊಹಾನ ಪತ್ರಿಕೆಮಾ ಸು ಕವಾನು ಕೈನ ಕ್ಹರಾವಾಸ. 5:13-21
1
ಜ಼ಲಮ ದಿವಾನಿ ವಾಕ್ಯಾ
1 ಎ ಜಗತ ಶುರು ಥಾವಾತಿ ಅಗ್ದುರಜ಼ ರ‍್ಹಯಲ ಜ಼ಲಮ ರ‍್ಹಯಲ ಕ್ಹುದಾನಿ ಹುತಿ ಹಮೆ ತುಮೊನೆ ಬರ್ದಾಡ್ಯಾಸ; ಎ ಕ್ಹಾರು ಕಾನೊಕ್ಹು ಐಕ್ಯಾಸ; ಡೊಳಾಕ್ಹು ದೆಕ್ಯಾಸ; ಧ್ಯಾನ ದಿನ ದೆಕ್ಯಾಸ, ಹತೊಕ್ಹು ಮುಟ್ಟಿನ ದೆಕ್ಯಾಸ.
2 ತೆ ಜ಼ಲಮ ಹಮೊನೆ ದಿಕ್ಹ್ಯೊಸ. ಹಮೆ ತೆ ದೆಕಲ ಹುತಿ ತಿನಾ ಹುತಿ ಸಾಕ್ಷಿ ಕೈಯೆಸ. ಹಮೆ ಹಮ್ನಾ ತುಮೊನೆ ತೆ ಜಿವ್ತಾ ಜ಼ಲಮ್ನಿ ಸಾಕ್ಷಿ ಕವಾಡ್ಯಾಸ. ತೆ ಬಾ ಥಯಲ ಕ್ಹುದಾನಾ ಕ್ಹಾತೆ ಹಮೆಶಾನೊ ಜ಼ಲಮ ವ್ಹೈ. ಕ್ಹುದಾ ತೆ ಹಮೆಶಾನೊ ಜ಼ಲಮ ದೆಕಾಡ್ಯೊ.
3 ಹಮೆ ದೆಕಲ ಕ್ಹಾರು ವರಿ ಐಕಲ ಹಮ್ನಾ ಹಮೆ ತುಮೊನೆ ಕವಾಡ್ಯಾಸ. ಕಾ ಕದ್ಯಾಮ ತುಮೆ ಹಮಾರಿ ಅನ್ಯುನತೆಮಾ ಪಾಲ ಲಿವಾಲಾ ಥೌ ಕೈನ ಹಮಾರಿ ಆಸ ವ್ಹೈ. ಅಪ್ನಿ ಅನ್ಯುನೆತೆ ಬಾ ಥಯಲ ಕ್ಹುದಾ ವರಿ ತಿನೊ ದಿಕ್ರೊ ಯೆಸು ಕ್ರಿಸ್ತನಾ ಕ್ಹಾತೆ ರ‍್ಹವಾನು ವ್ಹೈ.
4 ಅಪ್ನಿಕ್ಹು ಪುರಾ ಥಾವಾದೆ ಕೈನ ಹಮೆ ತುಮೊನೆ ಎ ಸಂಗತಿಯೊ ಬರ್ದಾಡ್ಯಾಸ.
ಕ್ಹುದಾ ಉಜಾಲು ವ್ಹೈ
5 ಹಮೆ ಕ್ಹುದಾಕಂತು ಐಕಿನ ತುಮೊಕನ ಕವಾನಿಯೊ ವಾತೊ ಕಯ್ಯೊ ವ್ಹೈ ಕದ್ಯಾಮ, ಕ್ಹುದಾ ಉಜಾಲು ವ್ಹೈ. ತಿಮಾ ಅಂದಾರು ನತ್ತಿ.
6 ತಿನಾಹುತಿ ಕ್ಹುದಾನಾ ಕ್ಹಾತೆ ಅನ್ಯುನ್ಯೆತಾಮಾ ಛೆ ಕೈನ ಹಮೆ ಕೈಲಿನ, ಅಂದಾರಾಮಾ ಜಿವಸ್ತಾ ರ‍್ಹಯ್ಯಾಮ ಸುಳ್ಳ ಕದಲಲಿಂಗತ ಥಯ್ಯು. ಕಾಕದ್ಯಾಮ ಅಪೆ ಕ್ಹರಿ ಪಾಲನ ನತ್ತಿ ಕರಾಡ್ಯಾ.
7 ಕ್ಹುದಾ ಉಜಾಲು ಥೈನ ಛೆ. ತಿನಾಹುತಿ ಅಪೆ ಉಜಾಲಾಮಾ ಜಿವ್ನಾ ಕರು. ಅಪೆ ಉಜಾಲಾಮಾ ಜಿವ್ನಾ ಕರಾಲಾ ರ‍್ಹಯಾಮ ಯಕ್ನಾ ಯಕ್ಕ ಅನ್ಯುನ್ಯೆತಾಮಾ ಛೆ ಕೈನ ವರಿ ಕ್ಹುದಾನೊ ದಿಕ್ರೊ ಯೆಸು ರಗತ ಅಪ್ನಾ ಕ್ಹಾರಾ ಪಾಪೊಕ್ಹು ಛೊಡಾವಸ.
8 ಅಪೊಮಾ ಪಾಪ ನತ್ತಿ ಕೈನ ಕೈಲಿದ್ಯಾಮ, ಅಪೊನೆ ಅಪೆಜ಼ ಮೊಸ ಕರಲಿವಾಲಾ ಥಯಾಸ. ವರಿ ಅಪೊಮಾ ಕ್ಹರಿ ನತ್ತಿ.
9 ತೆನೈಸೊ ಅಪ್ನಾ ಪಾಪೊ ಕೈಲಿದ್ಯಾಮ, ತೆ ಬರೊಕ್ಹೊವಾಲೊ ನಿತಿವಂತವಾಲೊ ರ‍್ಹಯಲ ಹುತಿ ಅಪ್ನಾ ಕ್ಹಾರಾ ಕೆಟ್ಟ ಕಾಮೊ ಮಾಫ ಕರಿನ ಅಪೊನೆ ಶುದ್ಧ ಕರಸ.
10 ಅಪೆ ಪಾಪ ಕರ‍್ಯಾ ನತ್ತಿ ಕೈನ ಕದ್ಯಾಮ ಕ್ಹುದಾನೆಜ಼ ಸುಳ್ಳ ವ್ಹೈ ಕೈನ ಕವಾಲಾ ಥಯಾಸ ವರಿ ಕ್ಹುದಾನಿ ವಾಕ್ಯಾನೆ ನೈ ವಪ್ಪಿಲಿವಾಲಾ ಥೈಯೆಸ.