3
ಕ್ಹುದಾನಾ ಬಚ್ಚಾ
1 ಬಾ ಅಪೊನೆ ಘನ್ನೊ ಮಯಾ ಕರ‍್ಯೊ! ಕ್ಹುದಾನಾ ಬಚ್ಚಾ಼ ವ್ಹೈ ಕೈನ ಕವೈಲಿವಾನಾ ಯಕ್ಲೊ ಕ್ಹುದಾ ಅಪೊನೆ ಮಯಾ ಕರ‍್ಯೊ. ಅಪೆ ಕ್ಹರಿಮಾಜ಼ ಕ್ಹುದಾನ ಬಚ್ಚಾ಼ ವ್ಹೈ. ತೆನೈಸೊ ಜಗತ್ಮಾ ರ‍್ಹಯಲ ಮನಕ್ಹೊತೊ ಹಮೆ ಕ್ಹುದಾನಾ ಬಚ್ಚಾ಼ ವ್ಹೈ ಕವಾನು ತಿಳ್ದಿಲಿದ್ಯಾ ನತ್ತಿ. ಕಾಕದ್ಯಾಮ ತ್ಯುನೆ ಕ್ಹುದಾನೆ ವಳಕ್ಯಾ ನತ್ತಿ.
2 ಮಯಾನಾ ದೊಸ್ತೊ, ಹಮ್ನಾ ಅಪೆ ಕ್ಹುದಾನಾ ದಿಕ್ರಾ ಥಯಾಸ. ಅಗಾ ಅಪೆ ಸು ಥೈಯೆಸ ಕೈನ ಅಪೊನೆ ದೆಕಾಡಿನ ದಿದ್ಯೊ ನತ್ತಿ.
3 ಕ್ರಿಸ್ತಮಾ ಆಸ ಮ್ಹೆಲಲ ಹರಿ ಯಕ್ಲಾ ಕ್ರಿಸ್ತ ಕಿಮ ಪರಿಶುದ್ಧ ಛೆ ತಿನಾ ಲಿಂಗತಜ಼ ಹರಿ ಯಕ್ಲಾ ಪರಿಶುದ್ಧ ಥೌ.
4 ಪಾಪ ಕರಾಲೊ ಕ್ಹುದಾನಿಯೊ ಆಗನ್ಯಾ ದಾಟಿನ ಜಾ಼ವಲೊ ಥಾವಸ. ಹೊ ಪಾಪ ಕರಾನು ವರಿ ಕ್ಹುದಾನಿಯೊ ಆಗನ್ಯಾನೆ ವಿರುದ್ದ ಕರಾಲೊಬಿ ತ್ಯುನೊನೆ ಸುಜ಼ ಫರಕ ನ್ಹವೈ.
5 ಕ್ರಿಸ್ತ ಮನಕ್ಹೊನೆ ಪಾಪಕ್ಹು ಛೊಡಾವಾ ಹುತಿ ಆಯೊಸ ಕವಾನು ತುಮೊನೆ ಗ್ವತ್ತ ಛೆ. ತಿಕನ ಪಾಪ ಕವಾನು ನತ್ತಿ.
6 ತಿನಾಹುತಿ ಕ್ರಿಸ್ತಮಾ ರ‍್ಹಯಲ ಮನಕ್ಹ ಪಾಪ ಕರತೊಜ಼ ರ‍್ಹತೊ ನೈ. ಪಾಪ ಕರತೊಜ಼ ರ‍್ಹವಾಲೊ ತಿನೆ ಕೆಳಾಮಾಜ಼ ಕಳೈಲಿದಲವಾಲೊ ನ್ಹವೈ ವರಿ ಕೆಳಾಮಾಜ಼ ತಿಳದಿಲಿದವಾಲೊ ನ್ಹವೈ.
7 ಮಯಾನಾ ಬಚ್ಚಾ಼ವೊ, ತುಮೊನೆ ಕುನ್ನಜ಼ ತಪ್ಪ ವಾಟ್ಮಾ ನಿಂಜಾ಼ಯೆ ನೈಸೊ ತುಮೆ ದೆಕಿಲಿವೊ. ಕ್ರಿಸ್ತ ನಿತಿವಂತವಾಲೊ ವ್ಹೈ. ತಿನಾ ಲಿಂಗತಜ಼ ನಿತಿವಂತವಾಲಾ ಥೌಸ ಕೈನ ಕವಾಲಾ ಚೊ಼ಕುಜ಼ ಕಾಮ ಕರು.
8 ಸೈತಾನ ಪೈಲಾತೊಬಿ ಪಾಪೊ ಕರಾಡ್ಯೊಸ. ಪಾಪೊ ಕರಾಲೊ ಸೈತಾನಾ ಕ್ಹಾತೆ ಮಳಲವಾಲೊ ವ್ಹೈ. ಕ್ಹುದಾನೊ ದಿಕ್ರೊ ಕ್ರಿಸ್ತ ಸೈತಾನ್ನಾ ಕಾಮೊ ಹಾಳ ಕರಾನೆಜ಼ ಆಯೊಸ.
9 ಕ್ಹುದಾಕಂತೊ ನವೊ ಜ಼ಲಮಲಿನ ಹುಟ್ಟಿನ ಆಯಲವಾಲೊ ಪಾಪಮಾ ರ‍್ಹತೊಜ಼ ನೈ ಕಾಕದ್ಯಾಮ ತೆ ದಿದಲ ನವೊ ಜ಼ಲಮ ಕ್ಹುದಾನೊ ರ‍್ಹಯಲ ರ‍್ಹವಸ. ತೆ ಕ್ಹುದಾಕಂತೊ ನವೊ ಜ಼ಲಮ ಲಿನ ಹುಟ್ಟಲ ಹುತಿ ತೆ ಅಗೊಬಿ ಪಾಪ ಕರಾನೆ ಥಾತು ನೈ.
10 ತಿನಾ ಹುತಿ ಕ್ಹುದಾನಾ ಬಚ್ಚಾ಼ ವರಿ ಸೈತಾನನಾ ಕುನ ವ್ಹೈ ಕೈನ ತಿಳದಿಲಿಯ್ಯೆಸ. ಯೊಗ್ಯ ರ‍್ಹಯಲ ನೈ ಕರಾಲಾ ಮನಕ್ಹೊ ಕ್ಹುದಾನಾ ಬಚ್ಚಾ಼ ನ್ಹವೈ. ತಿನಾ ಭೈನೆ ನೈ ಮಯಾ ಕರಾಲೊ ಕ್ಹುದಾನೊ ದಿಕ್ರೊ ನ್ಹವೈ.
ಯಕ್ಲಾನೆ ಯಕ್ಲೊ ಮಯಾ ಕರೊ
11 ಅಪೆ ಯಕ್ನಾ ಯಕ್ಕ ಮಯಾ ಕರು ಕವಾನು ತುಮೆ ಪೈಲಾತಾಬಿ ಐಕಲ ವಾಕ್ಯಾ.
12 ತುಮೆ ಕಾಯಿನ ಲಿಂಗತ ರ‍್ಹವೊ ನಕೊ. ತೆ ಕೆಟ್ಟನಾ ಕ್ಹಾತೆ ರ‍್ಹಯಲವಾಲೊ ವ್ಹತ್ತೊ. ತೆ ತಿನಾ ಭೈನೆ (ಹೆಬಲ) ಖಲಾಸ ಕರಿಪಾಡ್ಯೊ. ತೆ ತಿನಾ ಭೈನೆ ಖಲಾಸ ಕರಲ ಶಾನಾ ಹುತಿ ವ್ಹೈ? ತಿನಾ ಕಾಮೊ ಕೆಟ್ಟಜ಼ ವ್ಹೈ. ತಿನಾ ಭೈನಾ ಕಾಮೊ ಚೊ಼ಕಾ ರ‍್ಹಯಲ ಹುತಿ ವ್ಹೈ.
13 ಭಾಯೊ ಭೆನೊ, ಎ ದುನಿಯಾಮಾನಾ ಮನಕ್ಹೊ ತುಮೊನೆ ದುಶ್ಮನಿ ಕರ್ತಾಮಾ ಘಾಬ್ರಾಥಾವೊನಕೊ.
14 ಅಪೆ ಮರಣನೆ ದುರ ಕರಿನ ಜಿವ್ತಾ ರ‍್ಹವಾನೆ ಆಯಾಸ ಕವಾನು ಅಪೊನೆ ಗ್ವತ್ತ ಛೆ. ಕ್ರಿಸ್ತಮಾ ಮಾರಾ ಭಾಯೊ ಭೆನೊನೆ ಅಪೆ ಮಯಾ ಕಾರಿಕ್ಹು ಎ ಕ್ಹಾರು ವಳಕ್ಯೊಸ.
15 ತಿನಾ ಖುದ್ದನಾ ಭೈನೆ ದ್ವೆಶ ಕರಾಲೊ ಹರಿ ಯಕ್ಲೊ ಖಲಾಸ ಕರಾಲೊ ಥಯಾಸ. ಕಯಾಜ಼ ಖಲಾಸ ಕರಾಲಾಮಾ ಹಮೆಶಾನೊ ಜ಼ಲಮ ರ‍್ಹತೊ ನೈ. ಕೈನ ಮನೆ ಗ್ವತ್ತ ಥಯುಸ.
16 ಯೆಸು ತಿನೊ ಜ಼ಲಮಜ಼ ದಿದಲ ಹುತಿ ಕ್ಹರಿನಿ ಮಯಾ ಛೆ ಕವಾನು ಹಮೆ ವಳಕಿಲಿದ್ಯಾ ತಿನಾಹುತಿ ಭಾಯೊ ಭೆನೊನಾ ಹುತಿ ಅಪೆ ಜ಼ಲಮ ದ್ಯು.
17 ಎ ದುನಿಯಾಮಾ ಸೌಕಾರ ರ‍್ಹಯಲ ಕುನಬಿ ಕೊರೆತೆಮಾ ರ‍್ಹಯಲ ತಿನಾ ಭೈನೆ ದೆಕಿನಬಿ ಮದತ ನೈ ಕರ‍್ಯಮ ತಿಮಾ ಕ್ಹುದಾನಿ ಮಯಾ ರ‍್ಹವಾನೆ ಸಾದ್ಯ ಛೆ ಸು?
18 ಮಾರಾ ಬಚ್ಚಾ಼ವೊ ಮಾರಿ ಮಯಾ ಖಾಲಿ ವಾತೊಮಾ ವರಿ ಶಬ್ದುಮಾ ರ‍್ಹೌ ನೈ ಮಾರಿ ಮಯಾ ಕ್ಹರಿನಿ ಮಯಾ ರ‍್ಹೌ ಅಪೆ ಕರಾನಾ ಕಾಮಾಮಾಜ಼ ಆಪನಿ ಮಯಾ ದೆಕಾಡಿನ ದ್ಯು.
ಕ್ಹುದಾನಾ ಕ್ಹಾಮಾ ಧೈರ್ಯಕ್ಹು ರ‍್ಹವಾನು
19 ಅಪೆ ಕ್ಹರಿನಿವಾಟಮಾ ರ‍್ಹಯಲಿವಾಲಾ ವ್ಹೈ ಕೈನ ಇನಾ ಮುಲಕಜ಼ ತಿಳದಿಲಿಯೆಸ.
20 ಅಪನಿ ಮನಸಾಕ್ಷಿ ಅಪೆ ತಪ್ಪಿಸ್ಥ ವ್ಹೈ ಕೈನ ಕದ್ಯಾ ತಬಿ ಅಪೆ ಕ್ಹುದಾನಾ ಕ್ಹಾಮಾ ಸಮಾಧಾನ ಕ್ಹು ರ‍್ಹವಾನೆ ಸಾಧ್ಯ. ಕಾಕದ್ಯಾಮ ಅಪನಿ ಮನಸ್ಸನಿ ತಿಬಿ ಕ್ಹುದಾ ಮ್ಹೊಟೊ ವ್ಹೈ.
21 ಮಾರೊ ಮಯಾನೊ ದೊಸ್ತತೊ, ಅಪೆ ತಪ್ಪ ಕರಾಡಾನತಿ ಕೆಲಾಮಾಬಿ ತುಮೊನೆ ಕಲಿಮ, ಅಪೆ ಕ್ಹುದಾನೆ ಕ್ಹಾತೆ ದೈರೆಕ್ಹು ಆವಾನು ಸಾದ್ಯ.
22 ವರಿ ಅಪೆ ತಿನಿ ಕದಲ ತಿಮ್ಮ ರ‍್ಹೈನ ತಿನಿ ಎಣಿಕೆಮಾ ರ‍್ಹೈನ ತಿನೆ ಪಸಂದ ರ‍್ಹಯಲ ಕಾಮೊ ಕರಾಲಾ ರ‍್ಹಯಲ ಹುತಿ ಅಪೆ ಸು ಮಾಂಗಿಲಿದ್ಯಾ ತುಬಿ ತಿಕ್ಹು ವ್ಹಂದಿಲಿಯೆಸ.
23 ಕ್ಹುದಾನಾ ಆಗನ್ಯೆ ಸು ವ್ಹೈ ಕದ್ಯಾಮ ತಿನೊ ದಿಕ್ರೊ ಥಯಲ ಯೆಸು ಕ್ರಿಸ್ತಮಾ ಅಪೆ ಬರೊಕ್ಹೊ ಮ್ಹೆಲಿನ ಯಕ್ನೆ ಯಕ್ಕ ಮಯಾ ಕರು ಕವಾನುಜ಼ ವ್ಹೈ.
24 ಕ್ಹುದಾನಿ ಆಗನ್ಯಾನೆ ವಿಧೆಯ ರ‍್ಹಯಲವಾಲೊ ಕ್ಹುದಾಮಾ ಛೆ ಕವಾನು ಅಪ್ನೊನೆ ಕಿಮ ಗ್ವತ್ತ ಛೆ ಕ್ಹುದಾ ಅಪ್ನೊನೆ ದಿದಲ ಪವಿತ್ರ ಆತ್ಮಾ ಕ್ಹುಜ಼ ಅಪೊನೆ ಗ್ವತ್ತ ಛೆ.