1 ಫಸ್ಕ ಸನ್ನ ಯಕ್ಕ ದಿನ್ನ ಪೈಲಾನು ದಿನ್ನ ಐಯುತು. ತೆ ಎ ಜಗತ ಛೊಡಿನ ಬಾ ಕನ ಜಾ಼ವಾನೊ ಟೈಮ ನಜಿಕ ಆಯುಸ ಕವಾನು ಯೆಸುನೆ ಗ್ವತ್ತ ಥಯು. ಎ ಲೊಕಮಾ ರ‍್ಹಯಲ ತಿನಾ ಮನಕ್ಹೊನೆ ತೆ ಹಮೆಶಾಬಿ ಮಯಾ ಕರ್ತೊತೊ. ವರಿ ತೆ ತ್ಯುನೊನೊಪರ ರ‍್ಹಯಲ ಘನ್ನಿ ಮಯಾ ದೆಕಾಡ್ಯೊ. 2 ಯೆಸು ವರಿ ತಿನಾ ಶಿಷ್ಯಾ ರಾತೆ ಖಾವಾನಾ ಹುತಿ ಬೈಟ್ಯಾತಾ. ಯೆಸುನೆ ಮೊಸ ಕರು ಕೈನ ಸೈತಾನ ಇಸ್ಕರಿಯುತ ಯುದನೆ ವಿಚಾರ ಘಾಲ್ಯು. ಯುದ ಸಿಮೊನನೊ ದಿಕ್ರೊ ವ್ಹೈ. 3 ಬಾ ಹರ ಯಕ್ಕಪರ ತಿನೆ ಅದಿಕಾರ ದಿದ್ಯೊಸ ಕವಾನು ಯೆಸುನೆ ಗ್ವತ್ತ ವ್ಹತ್ತು. ತೆನೈಸೊ ತೆ ಕ್ಹುದಾ ಕಂತೊ ಆಯಲ ವರಿ ಹಮ್ನಾ ಕ್ಹುದಾ ಕನ ಫರಿನ ಜಾ಼ವಾನಾ ಹುತಿ ತಿನೆ ಗ್ವತ್ತ ವ್ಹತ್ತು. 4 ತ್ಯುನೆ ಅನ್ನ ಖಾತಾಮಾ ಯೆಸು ಉಟಿನ ತಿನು ಉಪ್ಪರಲ್ಯು ಅಂಗ್ಡು ಕಾಡಿನ ಮ್ಹೆಲ್ಯೊ; ವರಿ ಯಕ್ಕ ಟುವಾಲ ಲಿನ ತಿನಾ ಕಂಬರೆ ಭಾಂದಿಲಿದ್ಯೊ. 5 ಪಾಚಲ್ತೊ ಯಕ್ಕ ತಾಂಬ್ಯಾಮಾ ಪಾನಿ ಭರ‍್ಯೊ. ಶಿಷ್ಯಾವೊನಾ ಪಗೊ ಧ್ವಯಿನ ತೆ ಭಾಂದಿಲಿದಲ ತೆ ಫೆರ್ಲಿದಲ ಟುವಾಲಕ್ಹು ತ್ಯುನಾ ಪಗೊ ನುಚ್ಯೊ. 6 ತೆ ಸಿಮೊನ ಪೆತ್ರಾಕನ ಆಯಲ ಪರ ಪೆತ್ರಾ"ಪ್ರಭು, ಹಮಾರಾ ಪಗೊ ತು ಧ್ವೌ ನೈ" ಕದ್ಯೊ. 7 ಯೆಸು"ಹಮ್ನಾ ಮಿ ಸು ಕರಾಡ್ಯೊಸ ಕವಾನು ತುಮೊನೆ ಗ್ವತ್ತ ನತ್ತಿ. ತೆನೈಸೊ ಅಗು ತುನೆ ಗ್ವತ್ತ ಥಾವಸ" ಕೈನ ಉತ್ತರ ದಿದ್ಯೊ. 8 ಪೆತ್ರಾ ತಿನೆ"ನೈ! ಮಾರಾ ಪಗೊ ತು ಕೆಳಾಮಾಜ ಧ್ವೌ ನೈ" ಕೈನ ಕದ್ಯೊ. ಯೆಸು "ತಾರಾ ಪಗೊ ಮಿ ನೈ ಧ್ವಯೊಮ ತು ಮಾರೊ ಶಿಷ್ಯೊ ಕೆಳಾಮಾಜ ಥಾತೊ ನೈ" ಕದ್ಯೊ. 9 ತೆಳಾಮಾ ಸಿಮೊನ ಪೆತ್ರಾ, ಪ್ರಭು, ಮಾರಾ ಪಗೊ ಯಕ್ಕಜ಼ ನೈಸೊ ಮಾರಾ ಹತೊ ವರಿ ಮಾತು ಧೊ" ಕೈನ ಮಾಂಗಿಲಿದ್ಯೊ. 10 ಯೆಸು ತಿನೆ "ಅಂಗ ಧ್ವಯಲವಾಲಾನು ಅಂಗ ಕ್ಹಾರು ಶುದ್ಧ ರ‍್ಹವಸ. ತೆ ತಿನಾ ಪಗೊ ಧ್ವೈಲಿದ್ಯಮ ಬಸ್ಸ. ತುಮೆಬಿ ಶುದ್ಧ ಥಯಾಸ, ತೆನೈಸೊ ತುಮೊಮಾ ಹರ ಯಕ್ಲೊ ಶುದ್ಧ ನತ್ತಿ. 11 ತಿನೆ ಮೊಸ ಕರಾಲೊ ಕುನ್ನ ವ್ಹೈ ಕೈನ ತಿನೆ ಗ್ವತ್ತ ವ್ಹತ್ತು. ತಿನಾಹುತಿ ತೆ"ತುಮಾರಾಮಾ ಹರ ಯಕ್ಲೊ ಶುದ್ಧ ನತ್ತಿ" ಕೈನ ಕದ್ಯೊ. 12 ಯೆಸು ತ್ಯುನಾ ಪಗೊ ಧ್ವಯಲ ಪರ ತಿನು ಉಪ್ಪರಲ್ಯು ಅಂಗ್ಡು ಘಾಲಿನ ವರಿ ತಿನಿ ಜ಼ಗಾಪರ ಬೈಟ್ಯೊ. ವರಿ ಅಮ್ಮ ಕದ್ಯೊ; "ಹಮ್ನಾ ಮಿ ಸು ಕರ‍್ಯೊ ತೆ ತುಮೊನೆ ಗ್ವತ್ತ ಥಯು ಸು? 13 ತುಮೆ ಮನೆ"ಗುರು ವರಿ ಪ್ರಭು ಕೈನ ಬಲಾವೊಸಿ. ತುಮೆ ಇಮ್ಮ ಬಲಾವಾನು ಕರೆಟ್ಟ ವ್ಹೈ. ಕಾಕದ್ಯಾಮ ಮಿ ತೆಜ಼ ವ್ಹೈ. 14 ತಿನಾಹುತಿ ಪ್ರಭು ವರಿ ಗುರು ಥಯಲ ಮಿ ತುಮಾರಾ ಪಗೊ ಸೆವಕ ಲಿಂಗತ ಧ್ವಯೊಸ. ಕಾಕದ್ಯಾಮ ತುಮೆಬಿ ಬಿಜಾ಼ವೊನಾ ಪಗೊ ಧೌ. 15 ಎ ಕಾಮೊನೆ ಮಿಜ಼ ಸಾಕ್ಷಿ ಥಯೊಸ. ಕಾಕದ್ಯಾಮ ಮಿ ತುಮೊನೆ ಕರಲ ತಿಮ್ಮಜ಼ ತುಮೆಬಿ ಬಿಜಾ಼ವೊನಾ ಕ್ಹಾತೆ ಕರು. 16 ಮಿ ತುಮೊನೆ ಕ್ಹರಿಜ ಕೌಸ. ಸೆವಕ ಮಾಲಕ್ತಿ ಮ್ಹೊಟೊ ನ್ಹವೈ. ತಿನಾಹುತಿ ಸಂದೆಶ ಹುತಿ ಆಯಲವಾಲೊ ಮೊಕ್ಲಲವಾಲಾತಿ ಮ್ಹೊಟೊ ನ್ಹವೈ. 17 ತುಮೆ ಎ ಸಂಗತಿಯೊ ತಿಳದಿಲಿನ ಇನಾಲಿಂಗತ ಚಾ಼ಲಿಲಿನ ಗಯಾಮ ಖುಶಿಕ್ಹು ರ‍್ಹವೊಸಿ. 18 "ಮಿ ತುಮಾರಾ ಕ್ಹಾರಾವೊನಾ ಹುತಿ ಬೊಲಾಡ್ಯೊ ನತ್ತಿ. ಮಿ ಇನಿಲಿದಲ ಮನಕ್ಹೊನಾ ಹುತಿ ಮನೆ ಗ್ವತ್ತ ಛೆ. ತೆನೈಸೊ "ಮಾರಾ ಕ್ಹಾತೆ ಖಾದಲವಾಲೊ ಮನೆ ಮೊಸ ಕರ‍್ಯೊ "ಕವಾನಿ ಎ ಪವಿತ್ರ ಗ್ರಂಥಮಾನಿ ವಾತ ಪುರಾ ಥೌ. 19 ತೆ ಪುರಾ ಥಾತಾಮಾ ಮಿಜ಼ ಕ್ರಿಸ್ತ ವ್ಹೈ ಕೈನ ತುಮೆ ಬರೊಕ್ಹೊ ಕರು ಕೈನ, ತೆ ಪುರಾ ಥಾವಾತಿ ಪೈಲಾಜ ಎ ತುಮೊನೆ ಕವಾಡ್ಯೊಸ. 20 ಮಿ ತುಮೊನೆ ಕ್ಹರಿಜ ಕೌಸ ಮಿ ಮೊಕ್ಲಲ ಕಿನೆಬಿ ವಪ್ಪಿಲಿವಾಲೊ ತೆ ಮನೆ ವಪ್ಪಿಲಿವಾಲೊ ಥಯೊಸ. ಮನೆ ವಪ್ಪಿಲಿದಲವಾಲೊ ಮನೆ ಮೊಕ್ಲಲವಾಲಾನೆ ವಪ್ಪಿಲಿದವಾಲೊ ಥಯೊಸ"

21 ಯೆಸು ಎ ಸಂಗತಿಯೊ ಕದಲ್ಪರ ಮನಸ್ಮಾ ದುಖ ಥೈನ"ಮಿ ತುಮೊನೆ ಕ್ಹರಿಜ ಕೌಸ ತುಮೊಮಾನೊ ಯಕ್ಲೊ ಮೊಸ ಕರಾನೆ ಚಾಲ್ಯೊಸ" ಕೈನ ಖುಲ್ಲಾಜ ಕದ್ಯೊ. 22 ಯೆಸುನಾ ಶಿಷ್ಯಾ ಕ್ಹಾರಾ ಯಕ್ಲಾನೆ ಯಕ್ಲೊ ದೆಕಾನು ಚಾಲು ಕರ‍್ಯಾ. ತೆ ಕಿನಾ ಹುತಿ ಕವಾಡ್ಯೊಸ ಕವಾನು ತ್ಯುನೊನೆ ಗ್ವತ್ತ ಥಯು ನೈ. 23 ಶಿಷ್ಯಾವೊಮಾನೊ ಯಕ್ಲೊ ಯೆಸುನಾ ಬಾಜು಼ಮಾ ವ್ಹತ್ತೊ. ತಿನೆ ಯೆಸು ಘನ್ನೊ ಮಯಾ ಕರ್ತೊತೊ. 24 ಸಿಮೊನ ಪೆತ್ರಾ ಎ ಶಿಷ್ಯಾನೆ "ಕಿನಾ ಹುತಿ ಕವಾಡ್ಯೊಸ ಕೈನ ಪುಚ್ಚಿನ ತಿಳ್ದಿಲಿವಾನೆ ಇಶಾರೊ ಕರ‍್ಯೊ. 25 ತೆ ಶಿಷ್ಯೊ ಯೆಸುನಾ ಬಗಲ ಡ್ವಗ್ಗಿನ"ಪ್ರಭು, ತೆ ಕುನ್ನ ವ್ಹೈ? ಕೈನ ಪುಚ್ಯೊ. 26 ಯೆಸು"ಮಿ ಎ ರೊಕ್ಲೊ ಥಾಳಾಮಾ ಡುಬೈನ ಕಿನೆ ದ್ಯುಸ ತೆಜ಼ ಮನೆ ಮೊಸ ಕರಸ ಕೈನ ರೊಕ್ಲಾನೊ ತುಕ್ಡೊ ಲಿನ ತೆ ಥಾಳಾಮಾ ಡುಬೈನ ಇಸ್ಕರಿಯೊತ ಸಿಮೊನನೊ ದಿಕ್ರೊ ಥಯಲ ಯುದನೆ ದಿದ್ಯೊ. 27 ಯುದ ತೆ ರೊಕ್ಲಾನೊ ತುಕ್ಡೊ ಲೆತಾಮಾಜ಼ ಸೈತಾನ ತಿನಾಮಾ ವ್ಹಕ್ಯೊ. ಯೆಸು ಯುದನೆ"ತು ಸು ಕರಾನು ಛೆ ತೆ ಭೆಗಿನ ಕರ" ಕೈನ ಕದ್ಯೊ. 28 ತೆನೈಸೊ ಯೆಸು ಯುದನೆ ತೆ ಇಮ್ಮ ಕಾ ಕದ್ಯೊ ಕೈನ ಖಾವಾನೆ ಬೈಟಲವಾಲವೊಮಾನಾ ಕಿನೆ ಕಳ್ಯು ನೈ. 29 ಶಿಷ್ಯಾನಿ ಸಮುದಾಯನಿ ದೊಕ್ಡಾನಿ ಪಿಶಿನಿ ಜವಾಬ್ದಾರಿ ಯುದನಾ ಹತ್ಮಾ ವ್ಹತ್ತಿ. ತಿನಾಹುತಿ ಸನ್ನನೆ ಚಾ಼ಯೆ ಥಯಲ ದಕ್ಹಾ ಸಾಮನೊ ಲಿನ ಆವಾನಾ ಹುತಿ ಗರಿಬ ಮನಕ್ಹೊನೆ ದಿವಾನಾ ಹುತಿ ಯೆಸು ತಿನೆ ಕದ್ಯೊ ವಸೆ ಕೈನ ದಕ್ಹಾ ಶಿಷ್ಯಾ ತಿಳದಿಲಿದ್ಯಾ. 30 ಯೆಸು ದಿದಲ ರೊಕ್ಲೊ ಲಿದಲ ಬರೊಬ್ಬರ ಯುದ ತ್ಯಾಂತೊ ಗೈಪಡ್ಯೊ. ತೆಳಾಮಾ ರಾತ ಥೈ ಗೈತಿ.

31 ಯುದ ಗಯಲ್ಪರ ಯೆಸು"ಹಮ್ನಾ ಮನಕ್ಹನಾ ದಿಕ್ರಾನೆ ಮಹಿಮಾ ಥೈ. ವರಿ ತಿನಾ ಮುಲಕ ಕ್ಹುದಾನೆ ಮಹಿಮಾ ಥೈಸ. 32 ಯಕ್ಕೆಳೆ ತಿನಾ ಮುಲಕ ಕ್ಹುದಾನಿ ಮಹಿಮಾನಾ ಹುತಿ ಥಾವಾನಿ ರ‍್ಹಯುಮ ಕ್ಹುದಾ ತಿನಾಮಾಜ಼ ದಿಕ್ರಾನೆ ಮಹಿಮಾ ಕರಸ. ವರಿ ತೆ ತೆಕ್ಲಾಮಾಜ಼ ತಿನೆ ಮಹಿಮಾ ಕರಸ ಕದ್ಯೊ. 33 ಯೆಸು "ಮಾರಾ ದಿಕ್ರಾವೊ, ಹಜು಼ನ ದಕ್ಹೊ ಟೈಮ ಮಿ ತುಮಾರಾ ಕ್ಹಾತೆ ರ‍್ಹೌಸ. ತುಮೆ ಮನೆ ಹುಡ್ಕೊಶಿ. ವರಿ ಮಿ ಯಹುದಿಯೊನೆ ಕದಲಜ಼ ತುಮೊನೆ ಕೌಸ. ಮಿ ಕಿಜಾ಼ ಚಾಲ್ಯೊಸ ತುಮೊನೆ ತ್ಯಾ ಆವಾನೆ ಥಾತು" 34 ಮಿ ತುಮೊನೆ ಯಕ್ಕ ನಯಿ ಆಗನ್ಯಾ ದ್ಯುಸ" ತುಮೆ ಯಕ್ಕನೆ ಯಕ್ಕ ಮಯಾ ಕರೊ. ಮಿ ತುಮೊನೆ ಕಿಮ್ಮ ಮಯಾ ಕರು ತುಮೆಬಿ ತಿನಾ ಲಿಂಗತ ಮಯಾ ಕರುಜ. 35 ಯಕ್ಕೆಳೆ ತುಮೆ ಯಕ್ನಾ ಯಕ್ಕ ಮಯಾ ಕರ‍್ಯಾಮ, ತುಮೆ ಮಾರಾ ಶಿಷ್ಯಾ ವ್ಹೈ ಕವಾನು ಕ್ಹಾರಾವೊನೆ ಗ್ವತ್ತ ಥಾವಸ ಕೈನ ಕದ್ಯೊ.

36 ಸಿಮೊನ ಪೆತ್ರಾ ಯೆಸುನೆ "ಪ್ರಭು, ತು ಕಿಜಾ಼ ಚಾಲ್ಯೊಸ? ಕೈನ ಪುಚ್ಯೊ. ಯೆಸು "ಮಿ ಜಾ಼ವಾನಿ ಜ಼ಗಾ ಹಮ್ನಾ ತು ಮಾರಾ ಪಾಚ಼ೊ ನೈ ಆಸಕ್ತೊ. ತೆನೈಸೊ ತು ಅಗೊ ಮಾರಾ ಪಾಚೊ಼ ಆಶಿ" ಕೈನ ಕದ್ಯೊ. 37 ಪೆತ್ರಾ"ಪ್ರಭು, ಹಮ್ನಾ ಮಿ ತಾರಾ ಪಾಚೊ಼ ಆವಾನೆ ಕಾ ನೈ ಥಾತು? ಮಿ ತಾರಾ ಹುತಿ ಮರಾನೆಬಿ ತಯ್ಯಾರ ಛೆ" ಕೈನ ಕದ್ಯೊ. 38 ಯೆಸು"ತು ಮಾರಾಹುತಿ ಕ್ಹರಿಮಾಜ಼ ಮರಾನೆ ತಯ್ಯಾರ ಛೆ ಸು? ಮಿ ತುನೆ ಕ್ಹರಿಜ ಕೌಸ. ಕುಕ್ಡೊ ಬಾಂಗ ದಿವಾತಿ ಪೈಲಾಜ ತು ತನ್ನ ಸಲಾ ಮಾರಾ ಹುತಿ ಮಿ ತುನೆ ವಳಕ ನತ್ತಿ ಕೈನ ಕಶಿ" ಕದ್ಯೊ.