1 "ಮಿ ಎ ಸಂಗತಿಯೊ ಕ್ಹಾರಾ ತುಮೊನೆ ಕದ್ಯೊಸ. ಕಾಕದ್ಯಾಮ ತುಮೆ ಬರೊಕ್ಹೊ ಛೊಡು ನೈ ಕೈನ ಕದ್ಯೊ. 2 ತ್ಯುನೆ ತುಮೊನೆ ಸಭಾಮಂದಿರೊಮಾತಾ ಭಾರಾ ಘಾಲಸ. ವರಿ ಯಕ್ಕ ಟೈಮ ಆವಾಡೊಸ ತ್ಯುನೆ ತುಮೊನೆ ಮಾರಸ ವರಿ ತ್ಯುನೆ ಅಮ್ಮ ವಿಚಾರ ಕರಸ ತ್ಯುನೆ ಕ್ಹುದಾನಿ ಸೆವಾ ಕರ‍್ಯಾಸ ಕೈನ. 3 ಮನಕ್ಹೊ ಬಾನೆ ವರಿ ಮನೆ ನೈ ತಿಳ್ದಿಲಿದಲ ಹುತಿ ಎ ಕ್ಹಾರು ಕರಸ. 4 ತೆನೈಸೊ ಹಮ್ನಾ ಮಿ ತುಮೊನೆ ಎ ಕ್ಹಾರಾ ಸಂಗತಿ ಕದ್ಯೊಸ. ಇಮ್ಮ ರ‍್ಹತಾಮಾ, ಎ ಕ್ಹಾರಾ ಸಂಗತಿಯೊ ಪುರಾ ಥಾವಾನೊ ಟೈಮ ಆಯಲ ಪರ ತೆಳಾಮಾ ತ್ಯುನಾ ಹುತಿ ತುಮೊನೆ ಪೈಲಾಜ ಕದಲ ಶೆ ಮ್ಹೆಲೊ" ಮಿ ಎ ಸಂಗತಿಯೊ ಕ್ಹಾರಾ ತುಮೊನೆ ಪೈಲಾತೊ ತಿಳ್ಸಾಯೊ ನೈ. ಕಾಕದ್ಯಾಮ, ತೆಳಾಮಾ ಮಿ ತುಮಾರಾ ಕ್ಹಾತೆ ವ್ಹತ್ತೊ. 5 ಹಮ್ನಾ ತುಬಿ, ಮನೆ ವಳಾಯಲವಾಲಾ ಕನ ಮಿ ಚಾಲ್ಯೊಸ. ತೆನೈಸೊ ತುಮೊಮಾ ಯಕ್ಲೊ ತುಬಿ"ತು ಕಿಜಾ಼ ಚಾಲ್ಯೊಸ? ಕೈನ ಮನೆ ಪುಚ್ಯಾ ನೈ. 6 ಮಿ ತುಮೊನೆ ಎ ಸಂಗತಿಯೊ ಕ್ಹಾರಾ ಕದಲ ಹುತಿ ತುಮಾರಾ ಮನಸೊ ದುಖಕ್ಹು ಭರಿ ಗಯಾಸ. 7 ತೆನೈಸೊ ಮಿ ತುಮೊನೆ ಕ್ಹರಿಜ ಕೌಸ. ಮಿ ಜಾ಼ವಾನು ತುಮಾರಾ ಚೊ಼ಕಾನಾ ಹುತಿಜ ವ್ಹೈ ಕಾಕದ್ಯಾಮ ಮಿ ಗೈನ ಸಹಾಯಕನೆ ತುಮೊಕನ ವಳೌಸ. ಮಿ ನೈ ಗಯೊಮ, ಸಹಾಯಕ ತುಮೊಕನ ನೈ ಆತೊ. 8 "ತೆ ಕೆಳಾಮಾ ಆವಸ ಪಾಪ, ನಿತಿ, ನ್ಯಾಯನೊ ಫೈಸಲೊ ಎ ವಿಷಯನಾ ಹುತಿ ದುನಿಯಾನಿ ಶಕ್ಕ ದುರ ಕರಸ. 9 ಮನೆ ನೈ ಬರೊಕ್ಹೊ ಕರಾಕ್ಹು ಮನಕ್ಹೊಮಾ ಪಾಪ ಛೆ ಕೈನ ತೆ ಸಹಾಯಕ ದೆಕಾಡಿನ ದಿವಸ. 10 ಮಿ ಬಾಕನ ಜಾ಼ವಾನು ನಿತಿನಾ ಹುತಿ ತೆ ಮನಕ್ಹೊನೆ ದೆಕಾಡಿನ ದಿವಸ. ಇತ್ತಿ ಉಪ್ಪರ ಮನೆ ತುಮೆ ದೆಕ್ತಾ ನೈ 11 ಕ್ಹರಿನಾ ಫೈಸಲಾನಾ ಹುತಿ ಕ್ಹರಿನೊ ತೆ ಸಹಾಯಕ ಎ ಜಗತ್ನೆ ದೆಕಾಡಿನ ದಿವಸ, ಕಾಕದ್ಯಾಮ ಎ ಜಗತ್ನಾ ಅದಿಪತಿನೆ ಫೈಸಲೊ ಥೈಗಯೊಸ. 12 ಮಿ ತುಮೊನೆ ಕವಾನಿಯೊ ಸಂಗತಿಯೊ ಹಜು಼ನ ಘನಿಯೊ ಛೆ. ವರಿಬಿ ತೆ ಸಂಗತಿಯೊ ತುಮೆ ಸಹಿಸಿ ನೈ ಲೆತಾ. 13 ವರಿ ತೆ ಸತ್ಯನಿ ಆತ್ಮಾ ಆತಾಮಾ, ತುಮೊನೆ ತೆ ಹರಿ ಯಕ್ಕ ಟೈಮ್ಮಾ ಕ್ಹರಿಕ್ಹು ಅಗೊ ಚ಼ಲಾವಸ. ಸತ್ಯನಿ ಆತ್ಮಾ ಬೊಲಾನು ತಿನು ನ್ಹವೈ. ತೆ ಐಕಲಜ ತೆ ಕವಸ. ಥಾವಾನಿಯೊ ಸಂಗತಿಯೊಜ ತುಮೊನೆ ಕವಸ. 14 ಕ್ಹರಿನಿ ಆತ್ಮಾ ಮಾರಿಯೊಜ ವಾತೊ ಐಕಿನ ತುಮೊನೆ ಕವಾನಾ ಮುಲಕ ಮನೆ ಮಹಿಮಾ ಕರಸ. 15 ಮಾರಾ ಬಾನೆ ರ‍್ಹಯಲ ಕ್ಹಾರುಜ ಮಾರು ವ್ಹೈ. ತಿನಾಹುತಿ, ಪವಿತ್ರ ಆತ್ಮಾ ಮಾರಿಯೊಜ ವಾತೊ ಐಕಿನ, ತುಮೊಕನ ಕವಸ ಕೈನ ಕದ್ಯೊ.

16 ದಕ್ಹಿಯೆಳ ಥಯಲ್ಪರ ತುಮೆ ಮನೆ ದೆಕ್ತಾ ನೈ. ತೆ ಥಯಲ್ಪರ ದಕ್ಹು ಟೈಮ ಥಯಲ್ಪರ ತುಮೆ ಮನೆ ವರಿ ದೆಕೊಶಿ" 17 ಶಿಷ್ಯಾವೊನಾ ದಕ್ಹಾ ಜ಼ನಾ"ದಕ್ಹಿಯೆಳ ಪರ ತುಮೆ ಮನೆ ನೈ ದೆಕ್ತಾ. ತೆನೈಸೊ ಪಾಚಾ಼ತಾ ದಕ್ಹು ಟೈಮ ಥಯಲ್ಪರ ಮನೆ ವರಿ ದೆಕೊಶಿ. ಕಾಕದ್ಯಾಮ ಮಿ ಬಾಕನ ಚಾಲ್ಯೊಸ "ಕೈನ ತೆ ಕದಲನು ಮತ್ಲಬ ಸು ವ್ಹೈ? ಕೈನ ಯಕ್ನೆ ಯಕ್ಕ ಬೊಲಿ ಲಿವಾನು ಶುರು ಕರ‍್ಯಾ. 18 ಶಿಷ್ಯಾ"ದಕ್ಹಿಯೆಳ ಕದ್ಯಾಮ ಸು ವ್ಹೈ? ತಿನಿ ವಾತ ಅಪೊನೆ ಗ್ವತ್ತ ನತ್ತಿ ಥಾವಾಡು" 19 ಶಿಷ್ಯಾ ಇನಾಹುತಿ ತಿನೆ ಪುಚ್ಚಸ ಕೈನ ಯೆಸುನೆ ಗ್ವತ್ತ ವ್ಹತ್ತು. ತಿನಾಹುತಿ ತೆ"ದಕ್ಹಿಯೆಳ ಥಯಲ್ಪರ ತುಮೆ ಮನೆ ನೈ ದೆಕ್ತಾ. ತೆನೈಸೊ? ಪಾಚಾ಼ತಾ ದಕ್ಹು ಟೈಮ ಥಯಲ್ಪರ ಮನೆ ದೆಕೊಶಿ "ಕೈನ ಮಿ ಕದಲನು ಮತ್ಲಬ ಸು ವ್ಹೈ ಕೈನ ತುಮೆ ಯಕ್ನೆ ಯಕ್ಕ ಪುಚ್ಚಾಡ್ಯಾಸ ಸು? 20 ತುಮೊನೆ ಕ್ಹರಿಜ ಕೌಸ. ತುಮೆ ರವೊಶಿ, ಗೊಳಾಡೊಶಿ. ತೆನೈಸೊ ದುನಿಯಾ ಖುಶಿ ಥಾವಸ. ತುಮೆ ದುಖಿ ಥಾವೊಶಿ, ತೆನೈಸೊ ತುಮಾರು ದುಖ ಖುಶಿ ಥಾವಸ. 21 ಪೆಟೆ ರ‍್ಹಯಲ ಬಾಕ್ಡಿ ಜನ್ನಾನೊ ಟೈಮ ಆತಾಮಾ ತ್ರಾಸ ಖಾವಸ. ಬಚ್ಚು಼ ಹುಟ್ಟಲ ಪರ, ದುನಿಯಾಮಾ ಯಕ್ಕ ಬಚ್ಚು಼ ಹುಟ್ಯು ಕೈನ ಖುಶಿಕ್ಹು ತೆ ತಿನೆ ಥಯಲ ತ್ರಾಸ ಇಕ್ಹರಿ ಪಾಡಸ. 22 ಎ ತುಮೊನೆಬಿ ಲಾಗು ಥಾವಸ. ಹಮ್ನಾ ತುಮೆ ದುಖಮಾ ಛೆ. ತೆನೈಸೊ ತುಮೆ ನೆ ವರಿ ದೆಕಲ್ಪರ ಖುಶಿ ಥಾವೊಶಿ. ತೆ ಖುಶಿನೆ ಕುನ್ನಜ ತುಮೊ ಕಂತು ನೈ ಕಾಳೆತು. 23 ತೆ ದಿನೊಮಾ ತುಮೆ ಮನೆ ಸುಜ಼ ಪುಚತಾ ನೈ. ಮಿ ತುಮೊನೆ ಕ್ಹರಿಜ ಕೌಸ. ತುಮೆ ಮಾರಾ ನಾಮಪರ ಸು ಪುಚ್ಯಾ ತಬಿ ಬಾ ತುಮೊನೆ ದಿವಸ. 24 ಹಜು಼ನ ಲಕ್ಕಾ ತುಮೆ ಮಾರಾ ನಾಮಪರ ಸು ಮಾಂಗಿಲಿದ್ಯಾ ನೈ, ಮಾಂಗೊ ವರಿ ತೆಳಾಮಾ ತುಮೊನೆ ಮಳಸ. ವರಿ ತುಮಾರಿ ಖುಶಿ ಪುರಾ ಥಾವಸ.

25 "ಮಿ ತುಮೊನೆ ಎ ಸಂಗತಿಯೊ ಕಾನಿಯೊನಾ ಮುಕಾಂತರ ಕದ್ಯೊ. ವರಿ ಟೈಮ ಆವಸ. ತೆಳಾಮಾ ಮಿ ಕಾನಿ ಕದ್ಯಾವಾಚಿ ಮಾರಾ ಬಾನಾ ಹುತಿ ಸಿದಾ ವಾತೊಮಾ ಕೌಸ. 26 ತೆಳಾಮಾ ತುಮೆ ಮಾರಾ ನಾಮಪರ ಬಾಕನ ಮಾಂಗಿಲಿವೊಸಿ. ತೆಳಾಮಾ ಮಿ ತುಮಾರಾ ಹುತಿ ಬಾನೆ ಮಾಂಗಿಲಿವಾನು ಜರುರತ್ತಜ ರ‍್ಹತಿ ನೈ. 27 ಹೊ, ಬಾಜ ಕ್ಹುದ್ದ ತುಮೊನೆ ಮಯಾ ಕರಸ. ತುಮೆ ಮನೆ ಕಯಾ ಕರಲ ಹುತಿ ವರಿ ಮಿ ಕ್ಹುದಾ ಕಂತೊ ಆಯೊಸ ಕೈನ ತುಮೆ ಬರೊಕ್ಹೊ ಕರಲ ಹುತಿ ತೆ ತುಮೊನೆ ಮಯಾ ಕರಸ. 28 ಮಿ ಬಾಕಂತೊ ಎ ದುನಿಯಾಮಾ ಆಯೊ. ಹಮ್ನಾ ಮಿ ಎ ದುನಿಯಾ ಛೊಡಿನ ಬಾಕನ ವರಿ ಚಾಲ್ಯೊಸ "ಕೈನ ಕದ್ಯೊ. 29 ತೆಳಾಮಾ ಶಿಷ್ಯಾ"ಹಮ್ನಾ ತು ಮಾರಾ ಕ್ಹಾತೆ ಕರೆಟ್ಟ ಬೊಲಾಡೊಸ. ನೈ ಕಳಾನು ಕಠಿನ ವಾತೊ ತು ಉಪಯೊಗ ನತ್ತಿ ಕರಾಡ್ಯೊ ನತ್ತಿ. 30 ತುನೆ ಕ್ಹಾರಿಯೊ ಸಂಗತಿಯೊ ಕಳಿಯೊಸ ಕೈನ ಹಮೊನೆ ಹಮ್ನಾ ಕಳಿಯೊ. ಯಕ್ಲೊ ಪ್ರಶ್ನೆ ಪುಚ್ಚಾತಿ ಪೈಲಾಜ ತು ತಿನಾ ಪ್ರಶ್ನೆನೆ ಜವಾಬ ದೆಶಿ. ಇನಾಹುತಿ, ತು ಕ್ಹುದಾಕಂತೊ ಆಯೊಸ ಕೈನ ಹಮೆ ಬರೊಕ್ಹೊ ಕರಿಯೆಸ" ಕೈನ ಕದ್ಯಾ. 31 ಯೆಸು ತ್ಯುನೊನೆ"ಸು ತುಮೆ ಹಮ್ನಾ ಬರೊಕ್ಹೊ ಕರೊಶಿ? 32 ಮನೆ ಐಕೊ ತುಮೆ ಜುದಾ ಥಾವಾನೊ ಟೈಮ ಆಯೊಸ. ತುಮೊಮಾ ಹರಿ ಯಕ್ಲೊ ತಿನಾ ಸ್ವಂತ ಘರೆ ಜಾ಼ವಸ. ತುಮೆ ಮನೆ ಯಕ್ಲಾನೆಜ ಛೊಡಿನ ಜಾವೊಸಿ. ತೆನೈಸೊ ಕ್ಹರಿಮಾಜ಼ ಮಿ ಕೆಳಾಮಾಜ ಯಕ್ಲೊ ನತ್ತಿ. ಕಾಕದ್ಯಾಮ ಬಾ ಮಾರಾ ಕ್ಹಾತೆ ಛೆ. 33 "ತುಮೊನೆ ಮಾರಾಮಾ ಶಾಂತಿ ಮಳಾದೆ ಕೈನ ಮಿ ತುಮೊನೆ ಎ ಕ್ಹಾರಿಯೊ ಸಂಗತಿಯೊ ಕದ್ಯೊಸ. ಎ ದುನಿಯಾಮಾ ತುಮೊನೆ ತ್ರಾಸ ದಿವಸ. ವರಿಬಿ ಧೈರ್ಯಕ್ಹು ರ‍್ಹವೊ! ಕಾಕದ್ಯಾಮ ಮಿ ಎ ದುನಿಯಾನೆ ಝಿತ್ಯೊಸ" ಕೈನ ಕದ್ಯೊ.