ಪೆತ್ರಾನು ಬರೆದ ಮೊದಲನೆಯ ಪತ್ರಿಕೆ
1 ಪೆತ್ರಾ ಬರ್ದಲ ಪೈಲಾ ಪತ್ರ
ವಳಕ
ಪೆತ್ರಾ ಬರ್ಪಲ ಪೈಲಾ. ಪತ್ರ ಅಪೊಸ್ತಲ ಥಯಲ ಪೆತ್ರಾ ಲಿಕ್ಯೊಸ. ಪೆತ್ರಾ ಆ ಪತ್ರ ಬರದತಾ ಕ್ಹು ಕುನ್ನ ವ್ಹೈ ವರಿ ಕಿನೆ ಲಿಕ್ಕಾಡೊಸ ಕೈನ ಕವಸ. ತೆ ಆ ಪತ್ರ ವಳಕ ನೈಸೊ ವಾಲಾವೊನೆ ಕೈನ ತೆ ಲಿಕ್ಕಾನು ಕ್ಹಾರಾ ಕ್ರಿಸ್ತ ವಿಸ್ವಾಸಿಯೊನೆ ಬರ್ದ್ಯೊಸ. 1:11-17—2:11 ತೆ ತಿನು ಪತ್ರ ಕುನ್ನ ಓದಸ ತ್ಯುನೊನೆ ಘನ್ನಿ ಸಲಾ ಅಮ್ಮ ಲಿಕ್ಯೊಸ ಕಾಕದ್ಯಾಮ ತ್ಯುನೊನೆ ಬಿಜಾ-ಬಿಜಾ ದೆಶೊಮಾ ಫೈಲಿ ಗಯಾತಾ. ಕಾಕದ್ಯಾಮ ಆ ಪತ್ರ ಪೌಲಾ ಎಫೆಸನಾ ಸಬೆವಾಲಾವೊನೆ ಬರ್ದಲ ಪತ್ರಾನಾ ಲಿಂಗತ ಘನ್ನಾ ವಿಷಯ ಅಮಾ ಛೆ. ಘನ್ನಾ ಮನಕ್ಹೊ ಪತ್ರಾ ಬರ್ದಲ ಪೈಲಾ ಪತ್ರ ಎಫೆಸ ಸಭೆನೆ ಬರ್ದಲ ಪತ್ರ ಥಯಲ್ಪರ ಕದ್ಯಾಮ ಕ್ರಿಸ್ತ ಹುಟಲ್ಪರ ಜಾಸ್ತ ಕಮ್ಮ ಕದ್ಯಾಮ 65 ವರಕ್ಹ ಮಾ ಬರ್ದ್ಯಾಸ ಕೈನ ಬರೊಕ್ಹೊ ಕರಸ ಪೆತ್ರಾ ಆ ಪತ್ರ ತೆ ಬಾಬಿಲೊನ ಕವಾನಾ ರೊಮಾ ಗಾಮಮಾ ಬರ್ದ್ಯೊಸ. ಪೆತ್ರಾ ತುಮೊನೆ ಪ್ರೊತ್ಸಾಹ ಕರಾನೆ ವರಿ ಆ ಕ್ಹರಿನು ಕ್ಹುದಾನಾ ಕೃಪಾ ಕೈನ ಸಾಕ್ಷಿ ದಿವಾನೆ ವ್ಹೈ ಕೈನ ಕವಾನಾ ಮುಲಕ ತೆ ಲಿಕ್ಕಲ ಪತ್ರನು ಉದ್ದೆಶ ದೆಕಾಡಿನ ದಿವಸ
ಪಿಠಿಕೆ
1) ಪೆತ್ರಾ ತೆ ಕುನ್ನ ವ್ಹೈ ವರಿ ತೆ ಕಿನಾಹುತಿ ಆ ಪತ್ರ ಬರ್ದಾಡ್ಯೊಸ ಕೈನ ಕವಸ 1:1-2
2) ವರಿ ತೆ ತಿಮ್ಮ ಮಳಿನ ರ‍್ಹವಾನಾ ಹುತಿ ವರಿ ರಕ್ಷಣೆನಾ ಹುತಿ ಕ್ಹುದಾನೆ ಧನ್ಯವಾದ ಕರಸ 1:3—2:10
3) ತೆ ಥಯಲ್ಪರ ಆ ಲೊಕಮಾ ವಿಶ್ವಾಸಿಯೊ ಕಿಮ್ಮ ರ‍್ಹೌ ವರಿ ಅಪ್ನಾ ಸಂಬದೊನಾ ವಿಷಯಮಾ ಕದ್ಯಾಮ ಮ್ಹೊಟಿ ಬೈಕೊ ಕಾಮವಾಲೊ ಮಾಲಕನಾ ವಿಷಯಮಾ ಕವಸ 2:11—4:11
4) ತೆ ಥಯಲ್ಪರ ಪೆತ್ರಾ ಕಷ್ಟ ಆತಾಮಾ ಕಿಮ ತಡದಿಲಿನ ರ‍್ಹವೊ ಕೈನ ಕವಸ 4:125:11)
5) ತೆಳಾಮಾ ತೆ ತಿನು ಪತ್ರ ಕ್ಹರಾವಸ 5:12
1
1 ಯೆಸು ಕ್ರಿಸ್ತನೊ ಅಪೊಸ್ತಲ ಥಯಲ ಪೆತ್ರಾ, ಪೊಂತ ಗಲಾತ್ಯ, ಕಪ್ಪದೊಕ್ಯ, ಎಶ್ಯಾ, ಬಿಥುನಿಯ ಕವಾನಾ ಭಾರಲ್ಯಾ ಗಾಮೊಮಾ ಜು಼ದಾ ಥೈಗೈಯಲ ಕ್ಹುದಾನಾ ಮನಕ್ಹೊನೆ ಬರ್ದಾನು ಪತ್ರ.
2 ಕ್ಹುದಾ ತುಮೊನೆ ಪರಿಶುದ್ಧ ಕರಾನಾ ಹುತಿ ಘನ್ನಾ ದಿನ್ನ ಪಾಚೊ಼ ವಿಚಾರ ಕರಲಿದ್ಯೊತೊ. ತುಮೊನೆ ಪರಿಶುದ್ದ ಕರಾನೆ ಪರಿಶುದ್ದ ಆತ್ಮಾನು ತುಮೆ ಯೆಸು ಕ್ರಿಸ್ತನಾ ರಗತಕ್ಹು ಪರಿಶುದ್ದ ಥೈನ ತಿನೆ ವಧೆಯ ಥೌ ಕೈನ ಕ್ಹುದಾನಿ ವಿಚಾರ ವ್ಹತಿ. ಮರ್ಗಾ ವರಿ ಶಾಂತಿ ತುಮೊನೆ ಜಾಸ್ತಿ ಥಾವಾದೆ.
ಜಿವ್ತಿ ನಿರಿಕ್ಷೆ
3 ಅಪ್ನೊ ಪ್ರಭು ಥಯಲ ಯೆಸು ಬಾ ಥಯಲ ಕ್ಹುದಾನೆ ಸ್ತೊತ್ರಾ. ಕ್ಹುದಾ ಮ್ಹೊಟೊ ಮರಗಾಲೊ ವ್ಹೈ. ತೆ ತಿನಿ ಮರಗಾ ಕ್ಹು ಅಪೊನೆ ನವೊ ಜ಼ಲಮ ದಿದ್ಯೊಸ. ಮರಲವಾಲಾವೊಮಾತೊ ಉಟಿನ ಆಯಲ ಯೆಸು ಕ್ರಿಸ್ತನಾ ಮುಕಾಂತರ ತೆ ಅಪೊನೆ ವಾಚಾ಼ನೊ ಜ಼ಲಮ ದೆಕಾಡಿನ ದಿವಸ.
4 ಕ್ಹುದಾ ತಿನಾ ಬಚ್ಚಾವೊನೆ ದಿವಾನೊ ಆಶಿರ್ವಾದಮಾ ಆಸ ಛೆ. ತೆ ತುಮಾರಾ ಹುತಿ ಪರಲೊಕಮಾ ಮುಕ್ಕಲ ಛೆ. ತೆ ಹಾಳ ನೈ ಥಾತು ವರಿ ನಾಶ ಥಾತು ನೈ. ತಿನಿ ಸುಂದರ್ತಾ ಜವೈಲೆತು ನೈ.
5 ಕ್ಹುದಾನಿ ತಾಕತ ತುಮಾರಾ ಬರೊಕ್ಹಾನಾ ಹುತಿ ಕೈದಸ. ತುಮೊನೆ ರಕ್ಷಣೆ ಥಾಯೆ ಲಕ್ಕಾ ತುಮೊನೆ ಚೊ಼ಕಿತರಾ ಮುಕ್ಕಸ. ತಯ್ಯಾರ ರ‍್ಹಯಲ ಲಾಸ್ಟನಾ ದಿನ್ಮಾ ತುಮೊನೆ ಮಳಸ.
6 ಎ ತುಮೊನೆ ಘನ್ನಿ ಖುಶಿ ದಿವಸ. ತೆನೈಸೊ ತುಮೊನೆ ದಕ್ಹಾದಿನ್ನ ಘನ್ನಿತರಾನಿಯೊ ತ್ರಾಸೊ ಆವಸ ವರಿ ತೆ ತುಮೊನೆ ಘನ್ನು ದುಖ ದಿವಸ.
7 ತುಮಾರೊ ಬರೊಕ್ಹೊ ಘನ್ನೊ ಶುದ್ಧ ಛೆ ಕೈನ ದೆಕಾಡಾನಾ ಹುತಿ ತೆ ತ್ರಾಸ ಆವಸ. ತುಮಾರೊ ಬರೊಕ್ಹೊ ಚೊ಼ಕಾ ಕ್ಹೊನಾತಿ ಘನ್ನು ಮೊಗು ವ್ಹೈ. ಕ್ಹೊನು ಹಾಳ ಥೈ ಜಾ಼ವಸ ರ‍್ಹೈತಬಿ ತಿನೆ ಆಗ್ಮಾ ಕರಗೈನ ತಿನೆ ಸುಂದರತಾ ದೆಕಾಡಸ. ಯೆಸು ಕ್ರಿಸ್ತ ಅಪೊನೆ ದಿಖ್ತಾಮಾ, ತುಮಾರೊ ಬರೊಕ್ಹೊ ತುಮೊನೆ ಮರ್ಯಾದಿ ದಿಲಾವಸ.
8 ತುಮೆ ಕ್ರಿಸ್ತನೆ ನೈ ದೆಕ್ಯಾತಬಿ ತುಮೆ ತಿನೆ ಮಯಾ ಕರೊಶಿ. ಹಮ್ನಾ ತುಮೆ ತಿನೆ ನೈ ದೆಕ್ಯಾತಬಿ ತಿಪರ ಬರೊಕ್ಹೊ ಮ್ಹೆಲ್ಯಾಸ. ತುಮೊಮಾ ನೈ ಕವಾನಾ ಯಕ್ಕಲಿ ಖುಶಿ ಛೆ. ತೆ ಖುಶಿ ದೆಕಾಡಾನೆ ವ್ಹೈ.
9 ಯಾಕೆಂದರೆ ತುಮರಾ ಬರೊಕ್ಹೊನಾಹುತಿ ತುಮಾರಾ ಬರೊಕ್ಹಾನೆ ಯಕ್ಕ ಗುರಿ ಛೆ. ತಮಾರಿ ಆತ್ಮಾ ವಚಾ಼ಡು ಕವಾನಿ ತೆ ಗುರಿ ವ್ಹೈ. ತುಮಾರಿ ಗುರಿ ಥಯಲ ರಕ್ಷಣೆ ಹೊಂದಿಲಿವೊಸಿ.
10 ಪ್ರವಾದಿ ಎ ರಕ್ಷಣೆನಾ ಹುತಿ ಚೊ಼ಕಿ ತರಾ ಹುಡ್ಕಿನ ಪರಿಕ್ಷಾ ಕರಾನೆ ಕೊಶಿಶ ಕರ‍್ಯಾ. ತುಮೊನೆ ಅಗಿ ಮಳಾನಿ ಮರಗಾನೆ ಹುತಿ ತ್ಯುನೆ ಬೊಲ್ಯಾ.
11 ಕ್ರಿಸ್ತನಿ ಆತ್ಮಾ ತ್ಯುನೊಕನ ವ್ಹತಿ. ತೆ ಆತ್ಮಾ ಕ್ರಿಸ್ತನೆ ಥಾವಾನಿ ಕಷ್ಟ ವರಿ ತೆ ಥಯಲಪರ ತಿನೆ ತಿನಿ ಥಾವಾನಿ ಮಹಿಮಾನಾ ಹುತಿ ಕತಿತಿ. ತೆ ಪ್ರವಾದಿಯೊ ಆತ್ಮಾ ದೆಕಾಡಾನು ತಿಳ್ದಿಲಿವಾನೆ ಕೊಶಿಶಿ ಕರತಾತಾ. ತೆ ಕ್ಹಾರು ಕೆಳಾಮಾ ಥಾವಸ ವರಿ ತೆ ಟೈಮ್ಮಾ ಜಗತ್ತ ಕಿಮ ರ‍್ಹವಸ ಕೈನ ತಿಳ್ದಿಲಿವಾನೆ ಕೊಶಿಶ ಕರ‍್ಯಾತಾ.
12 ತೆ ಪ್ರವಾದಿಯೊ ಕರಲ ಸೆವಾ ತುಮಾರಾ ಹೊರತಾಗಿ ತಿವ್ನಾ ಹುತಿ ನ್ಹವೈ. ತ್ಯುನೊನೆ ಗ್ವತ್ತ ಥಯು. ಹಮ್ನಾ ತುಮೆ ಐಕಲ ಸಂಗತಿಯೊ ತ್ಯುನೆ ಕತಾಮಾ ತ್ಯುನೆ ತುಮಾರಿ ಸೆವೆ ಕರಾಡಾತಾ. ಸ್ವರಗಾತಾ ಮೊಕ್ಲಲ ಪವಿತ್ರ ಆತ್ಮಾ ಆಸ್ರಾಕ್ಹು ಸುವಾರ್ತೆ ಕದಲ ವಾಲಾಜ಼ ಎ ಸಂಗತಿಯೊ ಕದ್ಯಾ. ತ್ಯುನೊನೆ ತೀಳಸಲ ಸಂಗತಿಯೊನಾ ಹುತಿ ತಿಳದಿಲಿವಾಹುತಿ ದೆವ ದುತೊ ಕೈದಾಡ್ಯಾಸ.
ಪರಿಶುದ್ದ ಜಿವಿತನೆ ಬಲಾವಾನು
13 ತಿನಾಹುತಿ ತುಮೆ ತುಮಾರು ಮನಸ ಸೆವೆನಾ ಹುತಿ ತಯ್ಯಾರ ಕರಿಲಿವೊ. ತೆನೈಸೊ ತುಮೊನೆ ತುಮಾರಿ ಹತೊಟಿಮಾ ಮ್ಹೆಲ್ಲಿವೊ. ಯೆಸು ಕ್ರಿಸ್ತ ಅಪೊನೆ ದಿಕ್ಹಾನಾ ಟೈಮ್ಮಾ ತುಮೊನೆ ಮಳಾನಿ ಮರಗಾ ವರಿ ಮಳಾನಿ ವರಾ ಪರ ತುಮಾರಿ ಆಸ ಪುರಾ ರ‍್ಹೌ.
14 ತುಮೆ ಪೈಲಾ ಎ ಸಂಗತಿಯೊನಾ ಹುತಿ ನೈ ತಿಳದಿಲಿದಲ ಹುತಿ, ತುಮೆ ತುಮಾರಾ ಮನಸೆ ಆಯಲ ತಿಮ್ಮಜ಼ ಕೆಟ್ಟ ಕಾಮೊ ಕರ‍್ಯಾ. ಹಮ್ನಾ ತುಮೆ ವಿಧೆಯ ಥಯಲ ಕ್ಹುದಾನಾ ಬಚ್ಚಾ಼ ವ್ಹೈ. ತಿನಾಹುತಿ ತುಮೆ ಪೈಲಾ ಜಿವ್ನಾ ಕರಲ ತಿಮ್ಮಜ಼ ಹಮ್ನಾ ಕರೊ ನಕೊ.
15 ಕ್ಹುದಾ ಪರಿಶುದ್ಧ ರ‍್ಹಯಲಹುತಿ ತುಮೆ ಬೊಲಾನು ವರಿ ರ‍್ಹವಾನೊ ತರಿಕೊ ಶುದ್ಧ ರ‍್ಹವಾದೆ. ತುಮೊನೆ ಬಲಾಯಲವಾಲೊ ಕ್ಹುದಾಜ಼ ವ್ಹೈ.
16 "ಮಿ ಪರಿಶುದ್ಧ ರ‍್ಹಯಲಕ್ಹು ತುಮೆಬಿ ಪರಿಶುದ್ಧ ಥೈನ ರ‍್ಹೌ "ಕವಾನು ಪವಿತ್ರ ಬುಕ್ಕ ಕವಸ.
17 ತುಮೆ ಕ್ಹುದಾಕನ ಪ್ರಾಥನಾ ಕರತಾಮಾ ತಿನೆ ಬಾ ಕೈನ ಬಲಾವೊಶಿ. ಕ್ಹುದಾ ಹರಯಕ್ಲಾವೊನೆ ತ್ಯುನಾ-ತ್ಯುನಾ ಕಾಮೊಲಿಂಗತ ಪೈಸ್ಲೊ ಕರಸ. ತುಮೆ ಎ ದುನಿಯಾಮಾ ರ‍್ಹವಾಲಾ ವ್ಹೈ ಕೈನ ಕ್ಹುದಾನೆ ಭುಚಿ಼ಕಿನ ಜಿ಼ವ್ಸೊ.
18 ಪೈಲಾ ತುಮೆ ತುಮಾರಾ ಮನಸೆ ಆಯಲ ತಿಮ್ಮ ಜಿವ್ನಾ ಕರ‍್ಯಾತಾ ಕರತಾ ವ್ಹತ್ತಾ ತುಮೊನೆ ಗ್ವತ್ತ ಛೆ. ತುಮೊತೆ ಪೈಲಾ ಜಿವ್ನಾ ಕರಲವಾಲಾ ತ್ಯುನೊಕ್ಹು ತುಮೆ ಸಿಕ್ಯಾ. ತಿನಾಹುತಿ ತುಮೊನೆ ಬಿಡುಗಡೆ ಥಾವಾನು ಹಾಳಥಾವಾನು ಕ್ಹೊನಾ ರುಪ್ಪಕ್ಹು ನ್ಹವೈ.
19 ಪುರಾ ಅಂಗಥಯಲ ವರಿ ಪರಿಶುದ್ಧ ಥಯಲ ಬಕ್ರಾನು ಬಚ್ಚು಼ಥಯಲ ಯೆಸುನಾ ರಗತಕ್ಹು ತುಮೊನೆ ಮುಕ್ತಿ ಮಳಿ.
20 ಎ ಜಗತ್ತ ರಡಿ ಥಾವಾತಿ ಅಗ್ದುರಜ಼ ಯೆಸು ಇನೈಲಿದ್ಯೊ. ತೆನೈಸೊ ಎ ಜಗತ ಅಂತೆ ಥಾವಾನಾ ಟೈಮ್ಮಾ ತುಮೊನೆ ದಿಕ್ಹ್ಯೊಯೊ.
21 ತುಮೆ ಕ್ರಿಸ್ತನಾ ಮುಲಕ ಕ್ಹುದಾನೆ ವಳಕ್ಯಾ. ಕ್ಹುದಾ ಕ್ರಿಸ್ತನೆ ಮರಲವಾಲಾವೊಮಾತೊ ಜಿವ್ತೊ ಕರಿನ ಉಟಾಡ್ಯೊ. ಪಾಚಲ್ತೊ ಕ್ಹುದಾ ತಿನೆ ತಾಕತ ದಿದ್ಯೊ. ತಿನಾಹುತಿ ತುಮಾರೊ ಬರೊಕ್ಹೊ ವರಿ ಆಸ ಕ್ಹುಹುದಾಪರ ರ‍್ಹವಾದೆ.
22 ತುಮೆ ಕ್ಹರಿನೆ ವಿಧೆಯ ಥಾವಾನಾ ಮುಲಕ ತುಮೊನೆ ಪರಿಶುದ್ಧ ಕರಲಿದ್ಯಾ. ಹಮ್ನಾ ತುಮೆ ತುಮಾರಾ ಭಾಯೊ ಭೆನೊನೆ ಕ್ಹರಿಮಾಜ಼ ಮಯಾ ಕರಾಲಾ ಥಯಾಸ. ತಿನಾಹುತಿ ಯಕ್ಲಾಪರ ಯಕ್ಲೊ ಮನಸೆ ಮಯಾ ಕರೊ.
23 ತುಮೆ ನವೊ ಜ಼ಲಮ ಲಿನ ಹುಟ್ಟಲ ಲಿಂಗತ ವ್ಹೈ. ಎ ನವೊ ಜ಼ಲಮ ಹಾಳಥಾವಾನೊ ಜ಼ಲಮಕ್ಹು ನತ್ತಿ ಲಿದ್ಯಾ. ತೆ ಜ಼ಲಮ ಹಾಳ ನೈ ಥಾವಾನು ಜ಼ಲಮಕ್ಹು ಲಿದ್ಯಾಸ. ಜ಼ಲಮ ರ‍್ಹಯಲ ಹಮೆಶಾ ರ‍್ಹಯಲ ಕ್ಹುದಾನಿಯೊ ವಾತೊಕ್ಹು ತುಮೆ ನವೊ ಜ಼ಲಮ ಲಿದ್ಯಾಸ.
24 ಕ್ಹುದಾನು ಬುಕ್ಕ ಸು ಕವಸ ಕದ್ಯಾಮ ಕ್ಹಾರಾ ಮನಕ್ಹೊ ಚಾ಼ರಾ ಲಿಂಗತ ಛೆ. ತ್ಯುನೆ ಕರಾನು ಕ್ಹಾರು ಶೊಕ ಚಾ಼ರಾನಾ ಪ್ಹುಲ್ಲೊ ಲಿಂಗತ ಛೆ. ಚಾ಼ರೊ ವರೈಜಾ಼ವಸ. ಪ್ಹುಲ್ಲೊ ಉದ್ರಿ ಜಾ಼ವಸ.
25 ತೆನೈಸೊ ಕ್ಹುದಾನಿಯೊ ವಾತೊ ಹಮೆಶಾ ಜಿವ್ತಿಯೊ ರ‍್ಹವಸ. ತೆ ವಾತೊ ಸುವೈ ಕದ್ಯಾಮ ತಮನೊನೆ ಕದಲ ಸುವಾರ್ತಾನಿ ವಾಕ್ಯ ವ್ಹೈ. ಯೆಶಾಯ 40:6-8