ಪೆತ್ರಾನು ಬರೆದ ಎರಡನೆಯ ಪತ್ರಿಕೆ
2 ಪೆತ್ರಾ ಬರ್ದಲ ಬೆವಾ ಪತ್ರ
ವಳಕ
ಪೆತ್ರಾ ಬರ್ದಲ 2 ವಾ ಪತ್ರ ಅಪೊಸ್ತಲ ಪೆತ್ರಾ ಬರ್ದ್ಯೊಸ ಕೈನ ದಿಕ್ಹಸ ಮಾತರ ಘನ್ನಾ ಜ಼ನಾ ವಿದ್ವಾಂಸೊ ಆಜ ಲಕ್ಕಾಬಿ ಆ ವಾತ ವಪ್ಪಿಲೆತಾ ನೈ ಪೆತ್ರಾನೆ ಬದಲಿ ಕುನ್ನಯಕ್ಕ ಬಿಜೊ ಮನಕ್ಹ ಆಪತ್ರ ಬರ್ದ್ಯೊಸ ಕೈನ ಕವಸ. ಆ ಪತ್ರ ಬರ್ದಲವಾಲೊ ಯೆಸು ಸ್ವಾಮಿನು ಜಿವನ ವರಿ ತೆ ಥಯಲ ರುಪಾಂತನೆ ತೆ ಡೊಳಾಕ್ಹು ದೆಕ್ಯೊಸ ಮಿಜ಼ ತಿನೆ ಸಾಕ್ಷಿ ವ್ಹೈ. ಕೈನ ಕವಸ 1:17-18 ಅಕಸ್ಮಾತ ಪೆತ್ರಾ ಆ ಪತ್ರ ಬರ್ದ್ಯೊಸ ಕದ್ಯಾಮ ತೆ ರೊಮಮಾ ರ‍್ಹತಾಮಾಜ಼ ಆಪತ್ರ ಬರ್ದ್ಯೊಸುಕ್ಕ ವರಿ ಆ ಪತ್ರ ಯೆಸು ಸ್ವಾಮಿಹುಟ್ಟಲ್ಪರ 65 ವರಿ 69 ನಾ ವರಕ್ಹನಾ ವಚ್ಮಾ ಬರ್ದಲ ವ್ಹೈ ಆಪತ್ರ ತೆ ಮರಾತಿ ಪೈಲಾಜ ಪೆತ್ರಾ 2 ಪತ್ರಿಕೆ ಬರ್ದ್ಯೊಸ 3:1 ತೆ ಅಮ್ಮ ಬರ್ದಲ ಪತ್ರನೊ ದಿನ್ನ ಪೆತ್ರಾ ಬರ್ದಲ 1 ವಾ ಪತ್ರ ಥಯಲ್ಪರ ಮುಕ್ಕಸ ತೆ ಆಪತ್ರ ಕ್ಹಾರಾ ಕ್ರಿಸ್ತ ವಿಶ್ವಾಸಿಯೊನೆ ಬರ್ದ್ಯೊಸ. ಪೆತ್ರಾ ವಿಶ್ವಾಸಿಯೊನೆ ಚೊ಼ಕಿ ಜಿವ್ನಾ ಜಿವಸಾನಾ ಹುತಿ ವರಿ ತ್ಯುನೊನೆ ಮಾಂಡ್ಯಾ ತಪ್ಪ ವಾಟಮಾ ಚಲಾಡಸ ತೆ ಭೊಧಕ ಗುರುನಾ ವಿಷಯ ಹುಶಾರ ರ‍್ಹವೊ ಕೈನ ಆ ಪತ್ರ ಲಿಕ್ಕಸ (2) ತೆ ಯೆಸು ಸ್ವಾಮಿ ಆವಾನು ಘನ್ನು ದುರ ಶೆ ಕೈನ ಕವಾನಾ ಮನಕ್ಹೊಕನ ತುಮೆ ಧ್ಯಾನ ದಿವೊ ನಕೊ ಕೈ ಕವಸ. ಅನಾ ಬದಲ ಕ್ಹುದಾ ಹಲ್ಲು ಜವಾಲೊ ನವೈ ಮಾತ್ರಾ ಹರಿಯಕ್ಲೊ ರಕ್ಷಣೆ ಹೊಂದು ಕೈನ ಲಿಕ್ಯೊಸ 2 ಪೆತ್ರಾ 3:8-9 ತೆ ಕಾರಣನಾ ಹುತಿ ಯಕ್ಕ ಚೊ಼ಕಿ ಜಿವ್ನಾಕರಾನು ಶೆ.
ಪಿಠಿಕೆ
1) ಪೆತ್ರಾ ತೆ ಕುನ್ನ ವ್ಹೈ ವರಿ ತಿನೆ ಆ ಪತ್ರ ಕಿನಾಹುತಿ ಲಿಕ್ಕಾಡೊಸ ಕೈನ ದೆಕಾಡಿನ ದಿವಸ. 1:1-2
2) ತೆ ಥಯಲ್ಪರ ಕ್ಹುದಾ ಅಪೊನೆ ದಿದಲ ಜಿವ್ನಾ ಅಪೆ ಚೊ಼ಕಿ ತರಾ ಜಿವಸು ಕೈನ ಶೆ ಕರಿನ ದಿವಸ 1:1-2
3) ತೆ ಥಯಲ್ಪರ ತೆ ತಪ್ಪ ವಾಟ್ಮಾ ನಿಂಜಾ಼ವಾನಾ ಭೊಧಕೊಕ್ಹು ವರಿ ಗುರುವೊಕ್ಹು ಬಿ ಹುಶಾರ ರ‍್ಹವೊ ವರಿ ಲಾಸ್ಟನಾ ದಿನೊಮಾ ತ್ಯುನಿ ಹಾಲತ ಕಿಮ್ಮ ಥಾವಸ ಕೈನ ಕವಸ 2:1-22
4) ವರಿ ಆಗೊ ವಿಶ್ವಾಸಿಯೊನೆ ಯೆಸು ಬೆವಾ ಸಲಾ ಆತಾ ಟೈಮಮಾ ತುಮೆ ತಯಾರ ರ‍್ಹವೊ ಕೈನ ಆ ಪತ್ರ ಮುಗ್ಸಾವಸ 3:1-17
1
1 ಯೆಸು ಕ್ರಿಸ್ತನೊ ಸೆವಕ ಥಯಲ ಸಿಮೆಯೊನ ಪೆತ್ರಾ ಅಪ್ನಾ ಕ್ಹಾತೆ ಘನ್ನಾ ಮ್ಹೊಟಾ ಬರೊಕ್ಹಾಮಾ ರ‍್ಹಯಲ ಮನಕ್ಹೊನೆ ಬರ್ದಾನು ಪತ್ರ. ಅಪ್ನೊ ಕ್ಹುದಾ ವರಿ ರಕ್ಷಕ ಥಯಲ ಯೆಸು ಕ್ರಿಸ್ತ ಕ್ಹರಿನೊ ರ‍್ಹಯಲ ಹುತಿ ತೆ ಬರೊಕ್ಹೊ ತುಮೊನೆ ಮಳ್ಯೊಸ. ತೆ ಯೊಗ್ಯ ರ‍್ಹಯಲಜ಼ ಕರಸ.
2 ತುಮೊನೆ ಮರಗಾ ವರಿ ಶಾಂತಿ ಹೆಚ್ಕಿ಼ ಮಳಾದೆ. ಕ್ಹುದಾನೆ ವರಿ ಅಪೊನೊಯ ಪ್ರಭು ಥಯಲ ಯೆಸುನೆ ತುಮೆ ಕ್ಹರಿಕ್ಹು ತಿಳ್ದಲಹುತಿ ತುಮೊನೆ ಕೃಪಾ ಶಾಂತಿ ಮಳಾದೆ.
ಕ್ಹುದಾ ಬಲಾವಾನು ವರಿ ಇನಿಲಿವಾನು
3 ಯೆಸುನೆ ಕ್ಹುದಾನಿ ತಾಕತ ಛೆ. ಜಿವ್ನಾ ಕರಾನೆ ವರಿ ಕ್ಹುದಾನಿ ಸೆವೆ ಕರಾನೆ ಚಾ಼ಯೆ ಥಯಲ ಹರಿ ಯಕ್ಕ ತಿನಿ ತಾಕತ ಅಪೊನೆ ದಿದ್ಯೊಸ. ಅಪೆ ತಿನೆ ತಿಳದಲ ಹುತಿಜ಼ ತೆ ಕ್ಹಾರು ಪಡ್ದಿಲಿದ್ಯಾಸ. ಯೆಸು ತಿನಿ ಪ್ರಭಾವಕ್ಹು ವರಿ ತಿನಿ ಗುಣಾಕ್ಹು ಅಪೊನೆ ಬಲಾಯೊ.
4 ಯೆಸು ತೆ ಕರಲ ವಾಗ್ದಾನಕ್ಹು, ತಿನಾ ಪ್ರಭಾವಕ್ಹು ವರಿ ಗುಣಾವೊಕ್ಹು ಅಪೊನೆ ಮ್ಹೊಟು ರ‍್ಹಯಲ ವರಿ ಚೊ಼ಕು ರ‍್ಹಯಲ ವರಾ ದಿದ್ಯೊಸ. ತೆ ವರಾಕ್ಹು ತುಮೆ ಕ್ಹುದಾನಿ ಗುಣಾವೊಮಾ ಹಿಸ್ಸೊ ಲಿವಾಲಾಥಾವಾನೆ ಸಾದ್ಯ ಛೆ. ಇಮ್ಮ ರ‍್ಹತಾಮಾ ತುಮೆ ಎ ಲೊಕಮಾ ಕೆಟ್ಟ ಆಸಕ್ಹು ಆವಾನು ಕೆಟ್ಟಕ್ಹು ಚು಼ಕೈಲಿದಲವಾಲ ಥಯಾಸ.
5 ತುಮೆ ಎ ಆಶಿರ್ವಾದ ಹೊಂದಲ ಹುತಿ ತೆ ಕ್ಹಾರು ತುಮಾರಿ ಜಿವಿತ್ಮಾ ಉಪಯೊಗ ಕರಲಿವೊ ತುಮೊನೆ ಥಯಲ ತೆಕ್ಲು ಕೊಶಿಶ ಕರೊ. ತುಮಾರಾ ಬರೊಕ್ಹಾನೆ ಸದ್ಗುಣ ಸದ್ಗುಣನೆ ಗ್ಯಾನ
6 ಗ್ಯಾನನೆ ದಮೆ ದಮೆನೆ ತಾಳ್ಮೆ ತಾಳ್ಮೆನೆ ಕ್ಹುದಾನೆ ಸೆವಾ
7 ಕ್ಹುದಾನಿ ಸೆವೆನೆ ಭಾಯೊನಿ ದೊಸ್ತಿನಿ ಮಯಾ ಕುಡ್ಸೊ
8 ಎ ಕ್ಹಾರು ತುಮೊಮಾ ರ‍್ಹೈನ ಬೆಳತ್ತು ರ‍್ಹಯುಮ, ತುಮೆ ಕೆಳಾಮಾಜ಼ ತಾಕತ ಕಮ ರ‍್ಹಯಲವಾಲಾ ಥಾತಾ ನೈ. ಎ ತುಮೊನೆ ಬೆಳ್ದಾನೆ ಆಸ್ರೊ ಕರಸ. ಹಮಾರೊ ಪ್ರಭು ಥಯಲ ಯೆಸು ಕ್ರಿಸ್ತನಿ ಗ್ಯಾನಮಾ ಕೆಳಾಮಾಜ಼ ಗ್ಯಾನ ನೈಸೊವಾಲಾ ಕವೈ ಲೆತಾನೈ. ಆ ಕ್ಹಾರು ತುಮೊನೆ ಆಸ್ರೊ ಕರಸ.
9 ತೆನೈಸೊ ಎ ಕ್ಹಾರು ಕಿನಾಮಾ ರ‍್ಹತುನೈ ತೆ ಚೊ಼ಕಿತರಾ ದೆಕ್ತೊ ನೈ. ತೆ ಕುಡ್ಡೊ ಥೈನ ರ‍್ಹವಸ; ತೆ ಚೊ಼ಕೊ ಥಯಲ ಇಕ್ಹರಲ ಲಿಂಗತ ರ‍್ಹವಸ.
10 ಮಾರಾ ಭಾಯೊ ಭೆನೊ, ಕ್ಹುದಾಕಂತಾ ಕ್ಹರಿಮಾಜ಼ ಇನಿಲಿದಲವಾಲಾ ವರಿ ಬಲಾಯಲವಾಲಾ ವ್ಹೈ ಕೈನ ದೆಕಾಡಾನಾ ಹುತಿ ಘನ್ನಾ ಕೊಶಿಶ ಕರೊ. ಇಮ್ಮ ತುಮೆ ಕರ‍್ಯಾಮ ಕೆಳಾಮಾಜ಼ ತುಮೆ ಪಡ್ತಾ ನೈ.
11 ಅಪ್ನೊ ಪ್ರಭು ಥಯಲ ವರಿ ರಕ್ಷಕ ಥಯಲ ಯೆಸು ಕ್ರಿಸ್ತನಾ ರಾಜ್ಯಮಾ ತುಮೊನೆ ಮ್ಹೊಟಿ ಸ್ವಾಗತ ದಿವಸ. ತೆ ರಾಜ್ಯ ಹಮೆಶಾ ರ‍್ಹಯಲ ವ್ಹೈ.
12 ಎ ಕ್ಹಾರು ತುಮೊನೆ ಗ್ವತ್ತ ಛೆ. ತುಮೊನೆ ರ‍್ಹಯಲ ಕ್ಹರಿಮಾ ಘಟ್ಟ್ಟ ಥೈನ ರ‍್ಹವೊ. ತೆನೈಸೊ ಎ ಕ್ಹಾರು ಶೆ ಕರಲಿವಾನೆ ಮಿ ತುಮೊನೆ ಹಮೆಶಾ ಮದತ ಕರುಸ.
13 ಮಿ ಎ ಜಗತ್ಮಾ ಹಜು಼ನ ಜಿವ್ತೊ ರ‍್ಹತಾಮಾಜ಼ ಎ ಕ್ಹಾರು ತುಮೊನೆ ಶೆ ಲಾವಾನೆ ಚೊ಼ಕು ವ್ಹೈಕೈನ ಮಾರಿ ವಿಚಾರ ವ್ಹೈ.
14 ಮಿ ಘನ್ನೊ ಭೆಗಿನ ಎ ಅಂಗನೆ ಛೊಡುಕೈನ ಮನೆ ಗ್ವತ್ತ ಛೆ ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತ ತೆ ದೆಕಾಡಿನ ದಿದ್ಯೊಸ.
15 ತು ಎ ಕ್ಹಾರು ಹಮೆಶಾಬಿ ಶೆ ಕರಲಿವಾನೆ ಮಿ ತುನೆ ಥಯಲ ತೆಕ್ಲು ಸಹಾಯಾ ಕರಾನೆ ಕೊಶಿಶ ಕರುಸ. ಮಿ ಆ ಜಗತ ಛೊಡಿನ ಗಯಲ್ಪರ ಬಿ ತು ಎ ಕ್ಹಾರಿಯೊ ಸಂಗತಿಯೊಬಿ ಶೆ ಕರಲ್ಯು ಕೈ ಮಾರಿ ಆಸ ವ್ಹೈ.
ಕ್ರಿಸ್ತನಿ ಮಹಿಮಾ ಡೊಳೆ ದೆಕಲ ಸಾಕ್ಷಿ
16 ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನಿ ತಾಕತನಾ ಹುತಿ ವರಿ ತೆ ಆವಾನಾ ಹುತಿ ತುಮೊನೆ ಕದ್ಯಾಸ. ತೆ ಸಂಗತಿಯೊ ಮನಕ್ಹೊ ತ್ಯುನಿ ಶಾಣೆತನಾ ಕ್ಹು ಕದಲ ಕಾನಿಯೊ ನ್ಹವೈ. ಯೆಸುನಿ ಮಹಿಮಾ ಹಮೆ ಡೊಳೆ ದೆಕ್ಯಾಸ.
17 ತೆ ಕ್ಹಾರಾವೊತಿ ಘನ್ನೊ ತಾಕತ ರ‍್ಹಯಲ ಕ್ಹುದಾನು ಅವಾಜ಼ ಐಕ್ಯೊ. ತೆಳಮಾಜ಼ ತೆ ತಿನೊ ಬಾ ಥಯಲ ಕ್ಹುದಾ ಕಂತೊ ತಾಕತ ವರಿ ಮಯಾಕ್ಹು ಮರ್ಯಾದಿ ವ್ಹಂದಿಲಿದ್ಯೊ "ಕೈನ ಕದ್ಯೊ. ತೆ ಅವಾಜ಼ ಆ ಮಾರೊ ಮಯಾನೊ ದಿಕ್ರೊ ವ್ಹೈ. ಇನೆ ಮಿ ಘನ್ನು ಪಸಂದ ಕರ‍್ಯೊಸ.
18 ಅಪೆ ಯೆಸುನಾ ಕ್ಹಾತೆ ಪರಿಶುದ್ಧ ಡೊಂಗರಪರ ರ‍್ಹತಾಮಾ ಸ್ವರಗತೊ ಆಯಲ ತೆ ಅವಾಜ಼ ಹಮೆ ಐಕ್ಯಾ.
19 ಪ್ರವಾದಿಯೊ ಕದಲ ಎ ಸಂಗತಿಯೊ ಐಕಿನ ವರಿ ಘನ್ನು ಕ್ಹರಿ ಲಾಗ್ಯು. ತ್ಯುನೆ ಕದಲ ಕ್ಹಾರುಜ಼ ಐಕಿನ ವರಿ ತಿನಾನಿಂಗ ಚಾ಼ಲಾನು ಚೊ಼ಕು ವ್ಹೈ. ತ್ಯುನೆ ಕದಲ ಸಂಗತಿಯೊ ಅಂದಾರಾಮಾ ಉಜಾಲು ದಿವಸ. ತುಮಾರಾ ಮನಸ್ಮಾ ದಿನ್ನ ನಿಕ್ಹಳಿನ, ಪಾಟ್ಲ್ಯೊ ಉಜಾಲು ಥಾಯೆಲಕ್ಕಾ ತೆ ಉಜಾಲು ರ‍್ಹವಸ.
20 ತುಮೆ ಪೈಲಾ ತಿಳ್ದಿಲ್ಯು ಕದ್ಯಾಮ ತೆ ಸು ವ್ಹೈ ಕದ್ಯಾಮ, ಪವಿತ್ರ ಗ್ರಂಥಮಾ ರ‍್ಹಯಲ ಕೈ ಮ್ಹೊಟಿ ವಾಕ್ಯಾ ಯಕ್ಕಜ಼ ಮನಕ್ಹನಾ ಹುತಿ ನತ್ತಿ ಐ.
21 ಕೈಜ಼ ಪ್ರಾವಾದನೆ ರ‍್ಹವಾದೆ ಮನಕ್ಹನಾ ಚಿತ್ತತಿ ನತ್ತಿ ಐ. ತೆನೈಸೊ ಮನಕ್ಹೊನೆ ಪವಿತ್ರ ಆತ್ಮಾಕ್ಹು ಚ಼ಲೈನ ಕ್ಹುದಾ ಕದಲಜ಼ ಬೊಲ್ಯಾ.