ಯೊಹಾನನು ಬರೆದ ಪ್ರಕಟಣೆ
ಯೊಹಾನ ಬರ್ದಲ ಪ್ರಕಟಣೆ
ವ
ಪ್ರಕಟಣೆ ಬುಕ್ಕ ನವಾ ವಡಂಬಡಿಕೆನೊ ಲಾಸ್ಟ ಬುಕ್ಕ ವ್ಹೈ. ಎ ಬುಕ್ಕ ಯೆಸು ಕ್ರಿಸ್ತ ಹುಟ್ಟಿನ ನೌವದಪರ ಪಾಂಚ಼ ವರಕ್ಹ ಥಯಲ್ಪರ ಎ ಬುಕ್ಕನೆ ಅಪೊಸ್ತಲ ಥಯಲ ಯೊಹಾನ ಬರ್ದ್ಯೊಸ. 1:1 ಯೊಹಾನ ಬರ್ದಲ ಯೊಹಾನ ಸುವಾರ್ತೆ ವರಿ ತನ್ನ ಬುಕ್ಕೊ 1 ಯೊಹಾನ, 2 ಯೊಹಾನ, 3 ಯೊಹಾನ ತೆಜ಼ ಬರ್ದ್ಯೊಸ. ಯೊಹಾನ ಯೆಸುನೆ ಘನ್ನೊ ಮಯಾ ರ‍್ಹಯಲವಾಲೊ ವ್ಹೈ. ಕೈನ ಗ್ವತ್ತ ಛೆ. ಯೊಹಾನ ಯೆಸು ಕ್ರಿಸ್ತನಿ ಸುವಾರ್ತೆನಾ ಹುತಿ ತಡಿಪಾರ ಥಯಲ್ಪರ ಪದ್ಮಸ ದ್ವಿಪಮಾ ಎ ಪ್ರಕಟಣೆ ಬುಕ್ಕ ಬರ್ದ್ಯೊಸ.
ಯೊಹಾನ ಎ ಪ್ರಕಟನೆನು ಬುಕ್ಕ ಬರದಾನೆ ಖಾಸ ಗುರಿ ಸುವೈ ಕದ್ಯಾಮ, ಒದಾಲಾ ಯೆಸು ಕ್ರಿಸ್ತನೆ ಬರೊಕ್ಹಾಮಾ ರ‍್ಹವಸ ಕೈನ ಪ್ರೊತ್ಸಾಹ ವರಿ ಯೆಸು ಕ್ರಿಸ್ತ ಆವಾನಾ ಟೈಮ ನಜಿಕ ಛೆ ಕೈನ ಆಸ ದಿದ್ಯೊಸ. 1:3—22:7; ತೆ ಸಾಮಾನ್ಯ ಥೈನ ಕ್ಹಾರಾ ಕ್ರೈಸ್ತೊನೆ ವರಿ ಅಕ್ಲಾಸ ಕೈನ ಕ್ಹಾತ ಸಬೆನೆ ಬರ್ದ್ಯೊಸ. 2—3 ಯೊಹಾನ ತಿನಾ ಸ್ವಂತ ಅಕ್ಷರೊ ಪ್ರವಾದನೆ ವ್ಹೈ ಕೈ ವಳಕ್ಯೊಸ. 1—3 ವರಿ ತೆ ದೆಕಲ ಕ್ಹಾರುಜ಼ ದೆಕಾಡಿನ ದಿದ್ಯೊಸ. ಎ ಬುಕ್ಕ ಜು಼ನ್ನಾ ವಡಂಬಡಿಕೆನಾ ದಕ್ಹಾ ಭಾಗೊನೆ ಸೆಮ ಛೆ. ವರಿ ಖಾಸ 2:5—6:1-8ವರಿ ಕ್ಹಾತ ತುತ್ತೊರಿ, ಕ್ಹಾತ ಜ಼ತ್ರಾ ಎ ಕ್ಹಾರು ಕ್ಹುದಾ ಐಗುಪ್ತ ದೆಶನೆ ವಳಾಯಲ ಶಿಕ್ಷಾನೆ ಘನ್ನು ಹೊಲಿಕೆ ಥಯುಸ. ವಿಮೊಚನಕಾಂಡ 7—9 ಪ್ರಕಟಣೆನು ಬುಕ್ಕ ಲಾಸ್ಟನಾ ದಿನ್ನೊಮಾ ಯೆಸು ಕ್ರಿಸ್ತ ಝಿತ್ತಾಲೊ ವ್ಹೈ ಕೈನ ಕವಸ. ವರಿ ಕುನ ತಿಪರ ಬರೊಕ್ಹೊ ಜರಸ ತ್ಯುನೆ ಕೆಳಾಮಾಬಿ ತಿನಾ ಕ್ಹಾತೆ ರ‍್ಹವಸ. ಎ ಬುಕ್ಕ ಹುಶಾರಕಿಕ್ಹು ವರಿ ಯೆಸು ಕ್ರಿಸ್ತ ಭೆಗಿನ ಆವಾಡ್ಯೊಸ ಕೈನ ಆಸ ದಿವಾದೆ.
ಪಿಠಿಕೆ
1. ಯೊಹಾನ ಮಿ ಕುನ ವ್ಹೈ ವರಿ ಕೈತರಾಮಾ ಎ ಪ್ರವಾದನೆನು ದರ್ಶನ ಥಯು ಕೈನ ಕತೊ ಶುರು ಕರ‍್ಯೊಸ. 1:1—1:20
2. ಯೆಸುನಾ ಮುಕಾಂತರ ಸಿದಾ ಕ್ಹಾತ ಸಬೆವಾಲಾವೊನೆ ಸಂದೆಶ ದಿವಸ. 1:1—3:22
3. ತೆ ಥಯಲ್ಪರ ಕ್ಹಾತ ಮುದ್ರೆ 4:1-8
4 ವರಿ ಕ್ಹಾತ ತುತ್ತುರಿಯೊನಾ ಹುತಿ ಕದಲ ಛೆ. 8:6—11:19
5. ತೆ ಥಯಲ್ಪರ ಯಕ್ಕ ಪಟ್ಟೊ ವರಿ ಕ್ಹಾತೆ ಮಾತಾ ರ‍್ಹಯಲ ಮ್ಹೊಟೊಕ್ಹಾಪರ ಥಾವಾನಿ ಯೊದ್ದನಾ ಹುತಿ ಕದಲ ಛೆ. 12:1—14:20
6. ವರಿ ಕ್ಹಾತ ಶಿಟ್ಟನಿ ಜ಼ತ್ರಾವೊನಾ ಹುತಿ ಬರ್ದ್ಯೊಸ. 15:1—16:18
7. ವರಿ ಕ್ಹುದಾ ಕಯಾ ತರಾಮಾ ಸ್ವರ್ಗಮಾ ಸೈತಾನಪರ ಕಿಮ ಝಿತ್ತಸ ಕವಾನು ಕೈನ ದಿವಸ. 17:1
8. ಲಾಸ್ಟನಾ ಟೈಮಾ ಆವಾನಾ ನೈ ಜಿಮಿನ ವರಿ ನವು ಸ್ವರ್ಗನಾ ಹುತಿ ಕದಲ ಛೆ. 20:1—22:21
1
1 ಎಜ಼ ಯೆಸು ಕ್ರಿಸ್ತನಿ ಪ್ರಕಟನೆ ವ್ಹೈ. ಕ್ಹುದಾ ಭೆಗಿನಜ಼ ಅಗು ಥಾವಾನು ತಿನಾ ಸೆವಕೊನೆ ದೆಕಾಡಾನಾ ಹುತಿ ಎ ಕ್ಹಾರು ಯೆಸುನೆ ದೆಕಾಡಿನ ದಿದ್ಯೊ. ಕ್ರಿಸ್ತ ತಿನೊ ಸೆವಕ ಥಯಲ ಯೊಹಾನನೆ ದೆಕಾಡಾನಾ ಹುತಿ ತಿನಾ ದುತನೆ ಮೊಕಲ್ಯೊ.
2 ಯೊಹಾನ ತೆ ದೆಕಲ ತೆಕ್ಲು ತೆ ತಿಳಶ್ಯೊ. ಎ ಕ್ಹಾರು ಕ್ರಿಸ್ತ ಕದಲ ಕ್ಹರಿಜ಼ ವ್ಹೈ. ಕ್ಹುದಾಕಂತು ಆಯಲ ಸಂದೆಶ ವ್ಹೈ.
3 ಕ್ಹುದಾಕಂತು ಆಯಲ ಎ ಸಂದೆಶನಿ ವಾಕ್ಯಾ ಒದಾಲಾ ಎ ಸಂದೆಶ ಐಕಿನ ಎ ಕ್ಹಾರು ಕೈಕೊಂಡಿಲಿನ ಚಾ಼ಲಾಲ ನಸಿಬವಾಲಾ ವ್ಹೈ. ಕಾಕದ್ಯಾಮ ಪುರಾ ಥಾವಾನು ಕಾಲ ನಜಿಕ ಆಯೊಸ.
ಎಶ್ಯಾಮಾ ರ‍್ಹಯಲ ಕ್ಹಾತ ಸಬೆವಾಲಾನೆ ಯೊಹಾನನು ಸಂದೆಶ
4 ಎಶ್ಯಾ ಪ್ರದೆಶಮಾ ರ‍್ಹಯಲ ಕ್ಹಾತ ಸಭೆನೆ ಯೊಹಾನ ಸು ಬರದಸ ಕದ್ಯಾಮ; ವರ್ತಮಾನ, ಭುತ, ಭವಿಷ್ಯತ ಕಾಲಮಾ ರ‍್ಹವಾಲಾನಾ ಹತೆ ವರಿ ತಿನಿ ಸಿಂಹಾಸನ್ನಾ ಕ್ಹಾಮೊ ಕ್ಹಾತ ಆತ್ಮಾವೊಕ್ಹು ವರಿ
5 ಯೆಸು ಕ್ರಿಸ್ತಕ್ಹು ತುಮೊನೆ ಕೃಪಾ ಶಾಂತಿ ಮಳಾದೆ. ಯೆಸು ಬರೊಕ್ಹಾನಿ ಸಾಕ್ಷಿ ಥಯೊಸ. ಮರಲವಾಲಾವೊಮಾತೊ ಜಿವ್ತೊ ಥೈನ ಉಟಿನ ಆಯಲವಾಲಾವೊಮಾ ಎಜ಼ ಪೈಲಾ ವ್ಹೈ. ತೆ ಜಗತ್ನಾ ರಾಜಾ಼ ರ‍್ಹಯಲವಾಲಾವೊನೆ ಅಧಿಪತಿ ಥಯೊಸ. ಯೆಸು ಅಪೊನೆ ಮಯಾ ಕರಸ. ತೆ ತಿನಾ ರಗತ ಕ್ಹು ಅಪ್ನಾ ಪಾಪೊ ಧ್ವಯಿನ ಬಿಡುಗಡೆ ಕರ‍್ಯೊ;
6 ಅಪೊನೆ ಯಕ್ಕ ರಾಜ್ಯ ಕರಿನ ಅಪೊನೆ ತಿನೊ ಬಾ ಥಯಲ ಕ್ಹುದಾನೆ ಸೆವೆ ಕರಾಲಾ ಯಾಜಕೊ ಕರ‍್ಯೊ. ಯೆಸುನೆ ಹಮೆಶಾಬಿ ಮಹಿಮಾ ವರಿ ಅದಿಕಾರ ರ‍್ಹವಾದೆ! ತಿಮ್ಮ ಥಾವಾದೆ.
7 ದೆಕೊ, ಯೆಸು ಮ್ಹಾಡನಾ ಕ್ಹಾತೆ ಆವಾಡ್ಯೊಸ" ಹರಿ ಯಕ್ಲೊ ತಿನೆ ದೆಕಸ, ತಿನೆ ವಿರುದ ಕರಾಲಾ ಬಿ ದೆಕಸ" ತಿನೆ ದೆಕಿನ ದುನಿಯಾಮಾನಾ ಮನಕ್ಹೊ ಛಾತಿ ಬಡೈಲಿನ ಅಡ್ಡಸ ಹೊ, ಎ ಕ್ಹಾರು ಥಾವಸ! ತಿಮ್ಮ ಥಾವಾದೆ"
8 ಪ್ರಭು ಥಯಲ ಕ್ಹುದಾ ಸು ಕವಸ ಕದ್ಯಾಮ" ಮಿಜ಼ ಆದಿ ವರಿ ಅಂತ್ಯ ವ್ಹೈ. ಮಿ ವರತಮಾನ ಕಾಲ, ಭುತಕಾಲ ವರಿ ಭವಿಷ್ಯತ ಕಾಲಮಾ ರ‍್ಹವಾಲೊ ವ್ಹೈ. ಮಿಜ಼ ತಾಕತವರ ವ್ಹೈ.
ಕ್ರಿಸ್ತನು ದರ್ಶನ
9 ಯೊಹಾನ ಕವಾಲೊ ಮಿ ಕ್ರಿಸ್ತಮಾ ತುಮಾರೊ ಭೈ ವ್ಹೈ. ಅಪೆ ಕ್ಹಾರಾ ಮಳಿನ ಯೆಸುನಾ ಹುತಿ ತ್ರಾಸಮಾ ರಾಜ್ಯಮಾ ತಡ್ದಿಲಿವಾಮಾ ವಾಟೊಲಿವಾಲಾ ಥಯಾಸ. ಮಿ ಕ್ಹುದಾನಿ ವಾಕ್ಯಾಮಾ ಯೆಸುನಿ ಸಾಕ್ಷಿಮಾ ರ‍್ಹಯಲ ಹುತಿ ಪತ್ಮೊಸ ಕವಾನಿ ಜ಼ಗಾಮಾ ವ್ಹತ್ತೊ.
10 ಪ್ರಭುನಾ ದಿನ್ಮಾ ಪವಿತ್ರಮಾ ಆತ್ಮಾ ಮನೆ ಹತೊಟಿಮಾ ಲಿದ್ಯೊ. ತೆಳಾಮಾ ತಿನಾ ಪಾಚೊ಼ ಯಕ್ಕ ಮ್ಹೊಟಿ ಅವಾಜ಼ ಐಕ್ಯೊ. ತೆ ಅವಾಜ಼ ಬೊಂಗಾವೊನೆ ಅವಾಜ಼ ಲಿಂಗತ ವ್ಹತ್ತು.
11 ತೆ ಅವಾಜ಼"ತು ದೆಕಾನು ಕ್ಹಾರು ಯಕ್ಕ ಬುಕ್ಮಾ ಬರ್ದಿನ ಎಫೆಸೆ ಸ್ಮುರನ ಪೆರಗಮ ಥವತೈರ ಸಾರದಿಸ ಫಿಲಿದೆಲ್ಫಿಯಾ ವರಿ ಲವೊದಿಕಿಯಾ ಕವಾನಾ ಕ್ಹಾತ ಸಭೆನೆ ಮೊಕಲ" ಕೈನ ಕದ್ಯು.
12 ಮಾರಾ ಕ್ಹಾತೆ ಕುನ ಬೊಲಾಡ್ಯುಸ ಕೈನ ದೆಕಾನೆ ಮಿ ಪಾಚೊ಼ ಫರತಾಮಾ, ಕ್ಹಾತ ಕ್ಹೊನಾನಾ ದಿವ್ವಾನಾ ಖಾಮೊ ದೆಕ್ಯೊ.
13 ತೆ ದಿವ್ವಾನಾ ಖಾಮೊನಾ ವಚ್ಮಾ಼" ಮನಕ್ಹನಾ ದಿಕ್ರಾನಾ ಲಿಂಗತ ರ‍್ಹಯಲವಾಲಾನೆ ದೆಕ್ಯೊ. ತೆ ಮ್ಹೊಟು ಅಂಗ್ಡು ಘಾಲ್ಲಿದ್ಯೊತೊ, ಕ್ಹೊನಾನಿ ಪಟ್ಟಿ ಛಾತಿನೆ ಭಾಂದಿಲಿದ್ಯೊತೊ.
14 ತಿನಾ ಮಾತಾನಾ ಬಾಲೊ ಬಕ್ರಾಲಿಂಗತ ಕಾಫುಕ ಲಿಂಗತ ಧೊಳಾ ವ್ಹತ್ತಾ, ಡೊಳಾ ಆಗನಿ ಜ್ವಾಲಾ ಲಿಂಗತ ವ್ಹತ್ತಾ.
15 ತಿನಾ ಪಗೊ ಆಗ್ಮಾ ಲಾಲ ಕರಲ ತಾಂಬಾ ಲಿಂಗತ ವ್ಹತ್ತಾ. ಗಳೊ ವೈನ ಜಾ಼ವಾನು ಪಾನಿನು ಅವಾಜ಼ ಲಿಂಗತ ವ್ಹತ್ತು.
16 ತೆ ತಿನಾ ಸಿದಾ ಹತ್ಮಾ ಕ್ಹಾತ ಚಿಕ್ಕಿಯೊ ವ್ಹತ್ತಿಯೊ. ತಿನಾ ಮ್ಹೊಡಾಮಾತು ಧಾರ ರ‍್ಹಯಲ ತಲ್ವಾರ ಭಾರು ಆವಾಡ್ಯುತು ತಿನು ಮ್ಹೊಡು ದುಪಾರನಾ ಸುರ‍್ಯಾ ಲಿಂಗತ ಮಿಂಚಾ಼ಡ್ಯುತು.
17 ಮಿ ತಿನೆ ದೆಕ್ತಾಮಾ, ತಿನಾ ಪಗೊಕನ ಮರಲವಾಲಾ ಲಿಂಗತ ಪಡಿಗಯೊ. ತೆ ತಿನೊ ಸಿದಾ ಹತ ಮಪರ ಮ್ಹೆಲಿನ"ಭುಚ಼ಕು ನಕೊ ಮಿಜ಼ ಆದಿ ವರಿ ಅಂತ್ಯ ವ್ಹೈ.
18 ಮಿಜ಼ ಜಿವ್ತೊ ರ‍್ಹವಾಲೊ ವ್ಹೈ. ಮಿ ಮರ‍್ಯೊ. ತೆನೈಸೊ ಹಮ್ನಾ ದೆಕ ಮಿ ಯುಗ ಯುಗಾಂತರಮಾ ಜಿವ್ತೊ ರ‍್ಹವಾಲೊ ಥಯೊಸ. ಮರಣ ವರಿ ಪಾತಳನಿ ಅದಿಕಾರ ಮಕನ ಛೆ"
19 "ತಿನಾಹುತಿ ತು ದೆಕಲ ಸಂಗತಿಯೊ ಬರದ ಹಮ್ನಾ ಥಾವಾನಿಯೊ ಸಂಗತಿಯೊ ವರಿ ಅಗಿಯೊ ಥಾವಾನಿ ಸಂಗತಿಯೊ ಬರದ.
20 ಮಾರಾ ಸಿದಾ ಹತ್ಮಾ ತು ದೆಕಲ ಕ್ಹಾತ ಚಿಕ್ಕಿಯೊ ವರಿ ತು ದೆಕಲ ಕ್ಹಾತ ಕ್ಹೊನಾನಾ ದಿವ್ವಾನಾ ಖಾಮೊ ದಡಿರ‍್ಹಯಲ ಅಮ್ಮ ಛೆ ಕ್ಹಾತ ಚಿಕ್ಕಿಯೊ ಕದ್ಯಾಮ ಕ್ಹಾತ ಸಭೆನಾ ದುತೊ ಕ್ಹಾತ ದಿವ್ವಾನಾ ಖಾಮೊ ಕದ್ಯಾಮ ಕ್ಹಾತ ಸಭೆ ವ್ಹೈ ಕೈನ ಕದ್ಯೊ.