Kitab a
Malosu Ktela
ana kidi ti nekre
Tun a khatu nekre klyosu kitab ne kralake
Kitab neke kihes ktela nekre ma lema soso bonyo ana kdi ti (Why. 1:1-2). Ode Yesuske byu ti Yohanes ma kyesy kitab ne, ma iry mabacaare ramorif ne mo, rtohak ti Yesuske, ode rakita I, biar ma irire roban de rtaba sir dakun. Nam ribun mabetik ti kitab ne, neke tal ma talalau kyor nam tamatakitare. Ktela kitabke krala ne kihesare, neke lema kbyetik a klatsam bo, de kbyetik a kdi a kla-telw ma tatos, neke kolnye:
1. Mahareta mamin ti lasmyerke khaha ne, rala atyat iry matohak ti Yesuske, ma roban de rtaba sir nini rmaty.
2. Yesus Kristus neke ity Ebut Maharetake, ma ana yala yal iry ribun mamnisik Hulasokwe ne.
3. Eras ribun Hulasokwe isosan nekre, syosan kita wasi irire, neke iry a matohak ti I nekre, ode iry a matotomolu tel nekre, ode iry a marekan erasare ne, ode iry a lema ma-la toha tun rahatetakare ne, ode iry a ratabahunw a sir ti khyali ratoha ity Ebut Hulasokwe ne.
Kyoat Yohanes ikesy kitab ne, desikeo raja lan Romake, neke Kaisarke, ma yal haretke ti iry a iharetanare, ma musti mo rsakitil o rou ti i. Keskyede iry a Kristen-are rabrai ma rsakitil ode rou ti Kaisar Roma desy. De rtanuk ma rbohe, cuma mo rhe ity Ebut Yesuske bo. Khyali desy mane Kaisarke yaso ma rluk iry a Kristen desikre dum ei sey metmetke kralake, ode rtabahunw a dum dakun. Keskyede iry a Kristen-are dum a rabu a ratuli Yesuske ma lema rtohak ti I, kali ramtaut Kaisarke. Lemade Yohanes lyosu nam ana kidi ti nekre kbuanare, ma yal ma tyenauk iry a Kristen-are ralatare, ma kete rsanyetat wait tohtohakke ti Yesuske, de tetap ma ral ralat a kralanare ti ity Ebut Hulasokwe wasi tnyetakare bo.
Ode ti pasal enaruke ma ti kyait enatelkwe ne (Why. 2–3), Yesuske wasi atyahkye itw ne Yohanes a kyesy, ma yosa ti ribun matohakare ti nuske itw. Atyahy nekre klyosu ti iry matohak desikre ti nam musti mo raalanare, ti kyoat raoban de rataba sir ne.
Maktei bonyo nam ribun Yohanes iatos nekre, kyaklol ktela Hulasokwe ti ihareta ode iukun irkye ne. Neke kolnye: kader mahareta mamin ti wen sra eras Hulasokwe itaklulw tike (pasal 4ke), ode kitab ralulukke, ode Dombake Ananke, neke Kristuske (pasal 5ke), ma I ne itenuk nam ribun mamin ti wen sra eraske ne, ode nam mamin ti lasmyerke khaha ne dakun. Ode nam Yohanes iatos nekre dum ne huruk, neke klyosu nam ana kidi ti ne, ti kyoat Dombake Ananke isisik metrai deitw desy toha kitab ralulukke ne (6:1–8:5), ode nam ana kidi ti ne, ti kyoat raohw strompet deitw ne ma kidudu ne (8:6–11:19), ode nam ana kidi ti ne, ti kyoat rahodi Hulasokwe keyera mamin ti taw deitw desy ei lasmyerke khaha ne (pasal 16ke).
Ode kyoat Hulasokwe yukun nuske ktem ne ma ktei, desikeo yala lait harharkwe, ode lasmyerke khaha harharkwe (21:1-8). Desikeo iry matohak ti Yesuske ana ratot eraske lan toha Hulasokwe, ode ana ramin ti nus Yerusalem harharkwe (21:27). Ode ity Ebut Hulasokwe ana imin ma yor wasi irire ti desy, ode kyur iry desikre suatare ma lema rser de (21:2-4).
Kitab ne kisike kolnye
1. Salamke (1:1-8)
2. Yohanes nam iatos a kmunake (1:9–3:22):
2a. Irkye Ananke lyakut ti wen a rasadiri damar a kwena deitw desikre tike kditlalanke (1:9-20).
2b. Yohanes wasi atyahy deitw ikesy ma iosa ba ti iry matohakare ti nuske itw (2:1–3:22).
3. Yohanes nam iatos a kla-ruake (4:1–16:21):
3a. Wen a rasakitil o raou ti ity Ebut Hulasokwe o wen sra eraske (4:1-11)
3b. Kitab ralulukke ode Dombake Ananke (5:1-14).
3c. Dombake Ananke syisik meteraike itw toha kitab ralulukke (6:1–8:5).
3d. Nyaso manosy laitke itw rohw a strompetare (8:6–11:19).
3e. Nyatos masunw deitw madi ti ne (12:1–16:21).
4. Yohanes nam iatos kla-teluke (17:1–21:8):
4a. Wamfwet marakye it ma ani Babel (17:1-18).
4b. Babel a klyily ma kiskyui-kiskyay (18:1–19:10).
4c. Yesuske syai kuda bokbokke, ode I ne Hulasokwe Tunanare, ode mya ma hyareta kola Rajake (19:11–20:10).
4d. Ukun manosy lyaw a Hulasokwe inal ti irire (20:11-15).
4e. Lait harharkwe ode lasmyerke khaha harharkwe (21:1-8)
5. Yohanes nam iatos a kla-atke:
Wamfwet masaa kyor Dombake Ananke neke rahliak ti nus Yerusalem harharkwe (21:9–22:5).
6. Snurat manosy lyakwe (22:6-21).
1
Hulasokwe yal eraske ti Yohanes
1 Kitab neke kihes ktela nekre ma ana lema soso bonyo kdi ti. Ktela nekre, ne Hulasokwe itanuk ti Yesus Kristuske ne, ma lyosu ti wasi makaryaare ti nam a musti mo madi ti nekre. Lemade Yesuske yaso wasi nyaso manosy laitke ma ti lyosu ti Yesus Kristuske wasi makarya yaw ne, neke Yohanes.
2 Dendye yaw ne Yohanes, ma kuhes nam Hulasokwe itanukare, ode kuhes nam Yesus Kristuske itanuk ma yaw nekre, neke ktela kuatos nekre mumu.
3 Lemade eraske ti iry a mabacaare, ode eraske ti iry ratomolu tun a rabaca nekre, ode rtoha nam Hulasokwe iaso yaw ma kukesy ti kitabke krala ne, kali sekwe kyait mane.
Yohanes yosa wasi salamke ti ribun matohakare ti nuske itw
4 Waikw o hatnimakw ribun matohak mamin ti nus deitw a mamin ti propinsi Asia Kakanke, yaw neke Yohanes, ma kuten ma lemamo eras manosy Hulasokwe kimin a e, ktyabal inaka eras manosy Hulasokwe neke kyor miktemtem mumu. Eras neke kyosy a Hulasokwe. Ode senweke I neke imin de, ode I neke imin kyala kyosy khyehyeike de, ma ti kiba knaru ne imin a nggora dakun. Ode eras ne kyosy Hulasokwe Memean a rahliak ma rbohe, rohke itw ne, ma kimin ti kader Hulasokwe ihareta tike wasi lulululw ne.
5 Ode eras ne kyosy Yesus Kristuske ma tyanuk nam a mlay manosy Hulasokwe. Yesus neke iry mamunmunake, ma myaty maktei o myorif toha iry mamatire, ode hyareta raja-nare mumu ti lasmyerke khaha ne. Ode I neke lyobak ity, dendye myaty ma larake kyaditi ity toha lim o sal, ma lim o sal lema khyareta ity de.
6 Ode yilik ity ma ttoha Hulasokwe wasi haretke, kali ika Raja ma ity. Ode yilik ity ma tbaa klen ti irkye yor Hulasokwe. Hulasow neke Yesuske Ama. Ma haretke kimin a I nini nam, ode musti mo tleru I nini nam dakun! Amin!
7 Ode myatos! Yesuske mya o yor owanke,
ode irire mumu neke ana ratos a I,
ma ti kyal iry masimban o matabahunw a I nekre ana ratos I dakun.
Ode kyoat mya, desikeo iry mamin ti lasmyerke khaha ne mumu ne ana rser.
Oo mlay ksyalik, nam nekre ana kdi ti! Amin.
8 Ity Ebut Hulasokwe tyanuk ma byohe, “Yaw neke Kmuna ode Kosy Lyakwe, ma Hulasow Mahareta Lan Lahuk Yaw. Ode senweke, Yaw neke kumin, ode ti khyehyeike kumin, ode ana kumin ma ti kyal nini nam dakun.”
Yohanes myey o yatos Yesus Kristuske o nus Patmoske
9 Waikw o hatnimakw e, yaw neke Yohanes, ma taktemtem neke ttohak ti Yesus Kristuske. I neke ika Raja ma hyareta ity. Ode ity neke tety ti de tety ma ti masunkwe, keskye talkyaw ity ralatare ma takita Yesuske bo. Ode yaw ne rkumak yaw, ma rotuk yaw bai nuske khatuke it ma kani Patmos, kali kabrita Hulasokwe tunanare, ode kuhes a Yesuske nam ialanare.
10 Lemade kyoat sew Inamreske bonyo, Hulasokwe Memeanke kkyarya ti ralakkwe kralake, ma ktwomolu teltelke it ma kyosy lyakwe mo kdududuke lan kola strompetke ne,
11 ma ktyanuk de kbyohe, “Nam sai matos, desikeo mkwesy ti kitabke it a krala, ode mosa ti iry ribun matohak mamin ti nus deitw ne, neke nus Efesuske, Smirnake, Pergamuske, Tiatirake, Sardiske, Filadelfiake, ode Laodikiake.”
12 Lemade kulak matakkwe ma katos ei lyakwe ohe, esei ne itun a yor yaw ne de? Dendye kulak matakkwe ei lyakwe bonyo, katos damarke kwenake itw, ma rsadiri ti wen desy. Ode damar a kwena desikre, neke rala toha blyawan kunkunkye.
13 Ode katos irkye it ma yola Irkye Ananke, ma hyonak rabit bokbok narnarw ne, ma ktyutw lwau-na khahanare. Ode isalkat lelel smwelke, neke rala toha blyawan kunkunkye. Ode imdiry ti wen a rasadiri damar a kwena blyawan deitw desikre tike kditlalanke.
14 Ode hukake dakun o bokbokbok kola dombake husinare. Ode mata-na khatunare kdyelah kola akye kamdirike.
15 Lwaunare khyitik kola solkye ranal ti akye ma kiharhar ne, klala telake kduduke kola ne besanare kioban iskye ne.
16 Ode sima wanke kkyumak a ftunke itw. Ode soribke it a kbyetik kyosy hahake, neke mnas ti serit-serit. Ode uno matake knyely kola dene sekwe idutw mais-mais ma iran ne.
17 Lemade kyoat kuatos I bonyo, klwily ma kubobob ti wasi lulululw ne, kola dene iry a mamatkye ne. Keskyede syaa sima wanke ma yaw ode tyanuk ma byohe, “Kete mumtaut! Kali Yaw neke Iry Mamuna Yaw, ode Iry Manosy Lyaw a Yaw,
18 ode Iry Mamorif Yaw. Biar ma Yaw ne kmwaty de, keskyede matos, kmworif huruk de, ma ana kmworif nini nam ti kiba knaru ne. Ode kkwumak haretke, kola dene kkwumak kuskuske ti matmyatkye, ode ti wen mamatire ramin tike dakun.
19 Lemadendye mkwesy ktela muatos nekre, neke ktela ana madi ti senwe, ode ktela ana madi ti sew mama nekre dakun.
20 Ode ftun deitw muatos ti simakw wanke kikumak ne, ode damar a kwena blyawan deitw rasadiri nekre, neke wasi kbuan mahunik ike kolnye: ftun deitw neke klyosu ohe, nyaso manosy laitke itw, neke rajaga ribun matohakare ti nus deitw desikre. Ode damar a kwena blyawan deitw rasadiri nekre klyosu ohe, iry ribun matohak mamin nus deitw neke sir desy.”