11
Tai Pefine ma'e au te'eyei su, nomo piye te'esiya awere?
(Matyu 6:9-15; 7:7-11)
1 Nowe mo'o su Jisas Mata lo wesi arunatiyewe fi su, le lu disaipel lo aiwawe a'i omo pani ta Owane Sitewi ma'e au te'eyei ne fi. Le Owane Sitewi ma'e au te'e tepa'asiye su, meni disaipel lo ta Jisas ma'e eirai. “Meni Owane, meni Jon sa'i au hu siye meni lu feni lo Owane Sitewi ma'e au te'eyei ne au atuatuwe. Ne nomo aiwawe a'i Owane Sitewi ma'e au te'eyei ne atuature.”
2-4 Jisas lowe ma'e eiye,
“Fene Owane Sitewi ma'e au te'eyei su, fene peri eito eite apou au umasi te'ere, ‘Tai Pefine, iyape no wara'i a'i ne. Nowe ape se ne lu taune werese, au noweinoweitorowa ape, witane a'i fa itora. Ne mi mi werese nomo ma'e ayei etiri tamo aure. Ne yo seni luwaru a'i werese nomo lo au ta'ane sasari pamowere. Lu taune ta nomo ma'e au luwaruweyei su, serai nomo yo seni luwaru werese a'i lowe lo fa tote i'anerowa. Nomo yo seni luwaru a'i irowei ne totesiya su, ne nomo ma'e au tei kairefiyere. Serai nomo yo seni luwaru a'i ape awera'iyenatiyei.’ ”
5 Sosu a'i pe le lowe ma'e eiye, “Nowe pasiyeyei su meni ta wesi no sewiyeyei ne fai. Ayei werese no ariye. Serai pasi ponei se, ne kaiyemo no lo wesi ma'e iyei su, le ma'e ei toweriyei, ‘Ne fara'u ene nau hesi heta ausaiyei awere? Nowe me'iye su ane ne ma'e itiya'u auwei.
6 Meni ta pasi a'i se ane ma'e sewiyeyei ne fai. Le pani eyeri erasi ma'e fai. Ane ayei werese le ma'e au ayei ne po'uteye.’
7 Meni ape, wesi papu iroteye ape, le ma'e itiya'u eiye, ‘Ne peri no ane ma'e owe ape au te'e oreseyere. Wesi yo ano ti tawesi tepa'asiye. Nomo awaripi nihe teisiya. Ane etiri ta ne ma'e auwei ne sinerowata. Ne arunatirowawe ire!’
8 Weiya, ane fene ma'e eisiya, meni ape kaiyemo no iroteye ape, etiri ta ne ma'e auwei ne sine te ta'ame su, ne iyape lo ei uteteye, ei uteteye. Serai meni ape sineyei su, ne ma'e etiri ayei ta auwei.
9 Sosu ane fene ma'e eisiya, fene Owane Sitewi ma'e etiri ta ne te'e toweriyei su, le fene ma'e aurowa. Fene Owane Sitewi lo marepi siye so'oruweyei ne toteyei su, le a'i lai fene ma'e marepi lo ne au atuatu areiyerowa. Ne Owane Sitewi lo yo tewiye sahe ereti se aineyei su, le ne ne yo ape au ani tosorowa.
10 Lu taune werese Owane Sitewi ma'e ei toweriteyei su, le a'i lai lowe ma'e etiri ape auwei. Lowe Owane Sitewi ma'e siye nehi etiteyei su, le lai lowe ma'e au atuatu areiyeyei. Lowe Owane Sitewi lo yo tewiye sahe ereti se aineteyei su, le a'i lai yo ape lo lowe ne ani tosowei.
11 Ane fene, aite werese ne, eisiya. Meni eime no, ne ma'e hare ta'i ei toweriraiyei su, ne haru aimesi le ma'e aurowa awere? Ahowa!
12 Meni eime no ne ma'e irowe hote ei toweriraiyei su, ne heripahari ta'i le ma'e aurowa awere? Piyete tene!
13 Serai fene, yo seni luwaru a'i ironamiteye ape, etiri wisere a'i ta eimane werese fene lo aunamisiya su, fene Owane Sitewi ne totere. Owane Sitewi lai fene ma'e etiri luwaru a'i aurowa awere? Piyete tene! Fene Owane Sitewi hire ma'e ironamisiya ape, ei toweriyei su, le a'i lai fene ma'e Hepene Wara'i a'i lo aurowa.”
Lu tamo Jisas ne toteye, le Belsebul se ta'aneteye.
(Matyu 12:22-30; Mak 3:20-27)
14 Nowe ta me'iye su meni ta ahi tomo'ute tawesiyei se Jisas lai sepei luwaru a'i au sasarisawi. Sepei luwaru a'i au sasariye su, meni ape ahi lo au ta'ane fara'uweyewe, peri te'eteye. Lu taune werese etiri ta ape siyeye su, lowe hepene se su'ariye.
15 Lu tamo le ne apou eiye, “Ahowa, meni ape, Jisas, le sepei luwaru werese a'i au sasarisawi su, le sepei Belsebul lo kairefi se au sasarisawi.” Sepei Belsebul, sepei luwaru a'i owane pefine a'i ne. Belsebul lo iyape tere'e sepei Satan. [Mt 9:34; 10:25]
16 Lu tere'e tamo lowe le ne au areareyei ne toteteye. Lowe le ma'e peri kairefiyeyei se te'e toweriye, “Ne nomo ma'e yaru hire ma'e itoraiyei ape au atuatu areiyere. Nomo yaru erasi a'i ta, hire ma'e itoraiyei ape, siyeyei su, nomo peri no wanu umasiyei.” [Mt 12:38]
17 Jisas marepi lowe lo siye so'oruweye su, serai le lowe ma'e eiye, “Omo pani tewi pa tewi ta ai atu tiyatirowa su, omo pani ape kairefiyeyei se ta'ama. Ai atu siye lu tamo omo pani tere'e ma'e fai ape, lowe fara'u omo pani ape ai atu se hi ani ararorowa. Aiwawe a'i nairipi lo lu tewi, marepi ta'i a'i toteye ape, kairefi a'i teinamiteye. Lu tewi feni ape ne lowe ta'u, ai marepi ironamiteye ape, lu tewi feni ape kairefi se ta'ama. Lu tewi tere'e lowe ma'e aine tera'erowa.
18 Serai sepei Satan lai sepei luwaru a'i tere'e ta au sasarisawiyei su, le kairefi a'i teinamirowata. Serai fene ane ne apou eirowata. ‘Jisas lai sepei Belsebul lo kairefi se sepei luwaru a'i tere'e au sasarisawi. Piyete tene!
19 Sepei Belsebul lo kairefi a'i ne totere. Ane lai Belsebul lo kairefiyeyei se sepei luwaru a'i tere'e ta au sasarisawiyei su, lu tewi fene lo ne, eiwerou lo kairefiyeyei se lowe sepei luwaru a'i au sasarisawiyei awere? Lowe lai marepi fene lo au hese ereiyei. Lowe peri fene lo ne meremereye a'i te'erowa.
20 Ahowa, ane lai sepei luwaru werese a'i Owane Sitewi lo kairefiyeyei se au sasarisawiyei su, fene werese etiri erasi a'i ta, hire ma'e itoraiyei ape, siye so'oruwe tepa'asiyei. Owane Sitewi lo kairefiyeyei fene mase ironamitorowa. Fene werese etiri ape so'oru ta'ama. Ane lai sepei luwaru a'i ta Satan lo kairefi se au sasarisawirowata.
21 Meni kairefi a'i ta eine inapi se wesi lo au noweinoweiyei su, ta'arei meni ta etiri werese lo ta'arei aniyei ne wirowata.
22 Ahowa, meni owane kairefi erasi a'i ta lai meni kairefi a'i ape lo wesi aine towesi wiyei ne totesiya su, le meni kairefi a'i lo eine inapi ani towesi fusawiyei. Serai le lai meni kairefi a'i lo wesi wirowawe, etiri werese ta'arei anirowa. Etiri werese ta'arei anirowa ape, le lu tewi lo ani nonetirowa. [Kl 2:15]
23 Meni ta yo seni ano umasi ta'ame su, le a'i lai ane ma'e ai atu tiyatiyei. Meni ta wiyawi ano ta'ane ta'ame su, le a'i lai wiyawi ano au ta'ane luwaruwe fiyarisawirowa. [Lu 9:50]
Sepei luwaru a'i lai meni ta papu si tame wiye.
(Matyu 12:43-45)
24-26 Sepei luwaru a'i meni lo marepi hepene nowe ma'e heneraiyei su, le omo omo pani werese tei fetaneyeyei ne siye nehi etiyei. Le etiri ta papu siye wi ta'ame su, le marepi apou toteyei, ‘Ane meni lo marepi hepene papu si tame wiyei.’ Serai le meni ape si tame wiyei su, le marepi hepene lo wara'i a'i siyeyei. Serai le sepei luwaru a'i ereti feni werese feni hesi a'i ei aniyei. Lowe werese meni ape papu wiyei. Tu sepei luwaru a'i ta'i se meni ape lo marepi luwaru a'i ne. Sosu sepei luwaru a'i ereti feni werese feni hesi a'i papu wiyei su, meni ape lo marepi luwaru hepene pefine a'i tene!”
27 Sosu a'i pe Jisas lu taune ma'e au te'eye su, menitani ta le ma'e peri morose a'i hare uteye, “Menitani ape, ne auteiye ape, sosu ne ma'e mo'u au aye ape, menitani ape le wisere a'i ironamisiya.” [Lu 1:28,42,48]
28 Sosu Jisas itiya'u eiye, “Ahowa, lu taune werese Owane Sitewi lo peri wanu tote umasisiya ape, lowe lai marepi wisere a'i ironamisiya.”
Jisas Jona lo yaru ne au te'e atuatuwe.
(Matyu 12:38-42; Mak 8:12)
29 Jisas Owane Sitewi lo peri au te'e fiyari areiyeteye su, lu taune tomu ne'ese peri lo wanuwei ne ta'uwerai. Serai le lowe ma'e au te'eye, “Lu taune werese, nowe ape se irosiya ape, lowe yo seni luwaru a'i ironamisiya. Fene apou totesiya, ‘Owane Sitewi lai yaru erasi a'i nomo ma'e pei atuatu areiyere.’ Ahowa Owane Sitewi lai tu naifa weriyei meni Jona ma'e yaru erasi a'i au atuatu areiyeye. Serai yaru erasi a'i ape le Jona ma'e au atuatuwe ape, le lai fene ma'e tame au atuatuwei. Yaru erasi a'i tamo tere'e le lai fene ma'e au atuaturowata. [Mt 16:4]
30 Owane Sitewi lai Jona ma'e yaru erasi pefine a'i ta au atuatu areiyeye. Lu taune werese, omo Niniva sahe iroteye ape, lowe yaru ape siye areiye tepa'asiye. Owane Sitewi lai meni Jona omo Ninive ma'e peri lo au te'e fiyariyei ne eimawesawi. Sosu aiwawe a'i ane ne, meni ape, Owane Sitewi hi awei ma'e eimawe arosai ape, Owane Sitewi lai ane ma'e yaru erasi pefine a'i ta au ta'anerowa. Sosu fene werese yaru ape aiwawe a'i siye areiyerowa. Le a'i lai ane lu taune werese ma'e nowe ape se peri lo au te'eyei ne eimawesai. Fene werese ane ne tote tawesi se ta'ama.
31 Tu naifa weriyei Owane Sitewi lai meni owane Solomon ma'e marepi wisere erasi a'i le ma'e auwe. Menitani owane tutawe omo pani, eyeri erasi a'i ma'e fai ape, le meni owane Solomon lo marepi wisere a'i wanuwei ne fai. Nowe ye'ewi su, menitani owane tutawe ape, lu taune werese pereye irosiya ape, aiwawe a'i Owane Sitewi lai lowe werese si tame hene anirowa. Menitani owane tutawe ape le fene ne peri werese tu au te'e eti ereirowa. Menitani owane tutawe fene ne apou au te'e eti ereirowa, ‘Fene werese peri ano wanure! Ane omo pani eyeri erasi ma'e Solomon lo peri wisere a'i wanuwei ne fai. Fene peri lo arisinamiteye.’ ” Sosu Jisas lu taune ma'e tame te'eye, “Ane a'i lai meni owane Solomon hi ani ararowe. Ahowa, fene werese ane ne tote tawesi se ta'ama. [1 Kin 10:1-10]
32 Nowe ye'ewi su, Owane Sitewi lai omo Ninive lo lu si tame hene anirowa su, lowe aiwawe a'i fene werese ne, pereye nowe irosiya ape, peri ta au te'e hese ereirowa. Lowe peri ta apou au te'e hese ereirowa, ‘Fene werese peri nomo lo wanure! Meni Jona omo Ninive Owane Sitewi lo peri au te'e fiyariyei ne fai su, nomo werese Owane Sitewi lo peri werese wanu umasiteye. Nomo yo seni luwaru werese a'i nomo lo me'iyeni ma'e atati arunati.’ ” Serai Jisas lowe ma'e eiye, “Ane meni Jona hi ani araronamisiya. Fene werese peri ano arisinamisiya.” [Jna 3:5-10]
Nihe fene lo yehe erei wou a'i ne.
(Matyu 5:15; 6:22-23)
33 “Meni ta lam ta taiso fu mitaiyeyei su, le awei yo papu fu fareyare ta'ame. Aiwawe a'i le lam ape wahu erasi unahi fu fareyareye ta'ame. Ahowa, le wesi papu metei hire sahe au onu tewi mitaiyeyei. Lu taune werese wesi papu wiyei su, lowe fara'u mitaiyeyei erasi siyeyei. [Mk 4:21; Lu 8:16]
34 Nihe fene lo tahe pa'are lo mi wou a'i ne. Nihe fene lo amerame a'i su, tahe pa'are werese fene lo mi erasi teme'eriyeyei. Sosu nihe fene lo pasiyeyei su, tahe pa'are werese fene lo aiwawe a'i pasiye teme'eriyeyei.
35 Fene peri ano wanure! Weiyai, mi fene lo owe ape noroweyei su, fene pasi a'i saro ironamitorowata.
36 Sosu serai marepi werese fene lo aseyaro ironamisiya. Marepi tewi fene lo papu etiri luwaru a'i iro ta'ame su, tahe pa'are werese fene lo aseyaro ironamisiya. Lu taune werese yo seni aseyaro fene lo siyeyei. Tahe pa'are fene lo yehe erei lo mitaiyeyei wou a'i ne.”
Jisas etiri orese a'i tamo (6) au te'e wirepuweye.
(Matyu 23:1-36; Mak 12:38-40; Luk 20:45-47)
37 Sosu a'i pe Jisas peri tepa'asiye su, meni Farisi ta le ma'e apou ei toweriye, “Ne poweiye ponei se wesi ano ma'e aiwawe ene ayei ne aiya.” Sosu Jisas le mase wesi lo papu wiyewe, metei sahe ene ayei ne onuwe.
38 Sosu meni Farisi ape Jisas metei sahe onuwei siyeye su, le le ne hepene se su'ariye. Le marepi apou toteye, “Piyene Jisas ereti lo sa'i se au hu ta'ame awere? Nomo werese tu ereti nomo lo sa'i se au huwei. Sosu mo'o nomo fara'u ene ayei. Yo seni lo ape ne amouwesiya tene!”
39 Ahowa, Meni Owane Jisas le ma'e eiye, “Ne peri ano wanure! Lu weneri Farisi werese, fene siye auwe, wahu aiwawe a'i nowe ma'e sa'i se au huteye. Ahowa, marepi fene lo papu unou a'i teme'eriyenamisiya. Fene yo seni ta'arei tamo seni luwaru tere'e tere'e ironamisiya.
40 Fene marepi meremereye a'i ne! Owane Sitewi lai tahe fene lo au ta'aneye. Le a'i lai marepi fene lo aiwawe a'i au ta'aneye. Serai fene marepi aiwawe aseyaro au hu aseyarowete.
41 Ahowa, fene marepi aseyaro se etiri ma'aru ta lu feni ma'e, ma'aru ariyeye ape, au isafiye noneyei su, fene marepi fene lo aseyaro a'i henerairowa.
42 Fene Farisi werese weiyai! Fene haiye werese, one werese ani loto ta'uwe ereiyei su,
fene ereti feni hesi (10) au ani ta'uwe ani lotowei. Fene tewi ta'i a'i (1) Owane Sitewi ma'e si tame auwei. Fene tewi tere'e werese fene ta'u ene ayei. Wisere a'i ne. Ahowa, fene etiri tere'e tamo awera'iyenati. Meni ta etiri luwaru a'i meni tere'e ma'e yahowa'i a'i se au luwaruweyei su, fene lai yo seni luwaru a'i ne me'iyeni ma'e atati aruwei. Aiwawe a'i fene meni ta marepi orese a'i se siyeyei su, fene Owane Sitewi lo marepi erasi a'i arisiyei. Serai fene meni ape ne au pati ta'aneyei ta'ama. Etiri ape fene werese awera'iyenati. Sosu fene etiri yahowa'i a'i umasi etinamisiya.
43 Fene Farisi weiyai! Fene ta'uweyei wesi wiyei su, fene me tuto'u tutawe wisere a'i tu wiyei ne onuri. Fene ta'uwe pani tewi a'i ma'e ta'uweraiyei su, fene iyape towafi fene lo, ei ani arowe ape, wanuwei ne totesiya.
44 Fene werese weiyai! Fene werese apou a'i ne. Lu tamo meni ta temeniyeye ape awei fisiye yo ma'e horuse asi arowei su, lu taune werese yaro eiwerou ma'e horuse asi arowei awere? Serai lowe werese fisiye yo ape hire ma'e uweiteyei. Fene Farisi apou wou a'i ne. Lu taune werese yo seni werese fene lo siyeyei su, lowe apou a'i toteyei, ‘Yo seni werese lowe lo wisere a'i ne.’ Ahowa, marepi fene lo luwaru a'i tene! Fene weiyai! Owane Sitewi lai etiri luwaru a'i fene ma'e itiya'u aurowa.”
45 Yo peri siye so'oru siye meni ta Jisas ma'e itiya'u eiye, “Meni Owane, ne lu Farisi ne peri ape au te'eye su, ne nomo ma'e peri luwaru a'i au te'eye.”
46 Sosu Jisas le ma'e itiya'u eiye,
“Ane fene yo peri wanu so'oru siye lu ma'e aiwawe au te'esiya. Fene werese weiyai! Fene lu taune tomu ne'ese ma'e etiri orese a'i funamiteye. Ahowa, fene ta'u lu werese lo orese a'i ne me'iyeni fene lo ma'e atati arunati. Fene werese onota'ano a'i ne. Fene lu lo orese a'i au pati ta'anerowata.
47 Fene werese weiyai! Ya'ariyei fene lo Owane Sitewi lo peri au te'e siye lu aine tera'eye. Sosu awei fisiye yo ma'e funariteye. Fene werese marepi ta'i a'i lowe aiwawe totesiya. Fene Owane Sitewi lo peri au te'e siye lu lo awei fisiye yo ma'e au lesesiya.
48 Fene awei fisiye yo ma'e au leseyei su, fene marepi apou totesiya, ‘Ya'ariyei nomo lo yo seni nomo lai au wisereyesiya. Serai nomo fara'u awei fisiye yo ma'e au lesesiya. Serai Owane Sitewi lo nihe se fene yo seni luwaru a'i iroteye.’
49 Serai Owane Sitewi fene ne toteyei su, Owane Sitewi lo marepi wisere a'i apou eiye, ‘Ane peri ano au te'e siye lu lowe ma'e eimawesawiyei. Aiwawe a'i ane lu tamo peri ano au te'eyei ne ariariyerowawe, lowe ma'e eimawesawiyei. Serai lowe iyei su, lu tamo lowe tewi a'i tamo aine tera'eyei. Lu tewi tamo ma'e lowe lai au luwaruweyei. Owane Sitewi lai fene ma'e fofowei erasi a'i itiya'u aurowa.
50 Tu naifa weriyei weriyei Owane Sitewi etiri werese ta'aneye su, lu tamo Owane Sitewi lo au te'e siye lu tomu ne'ese aine tera'eteye. Serai Owane Sitewi lai lowe lo lu tewi ma'e, pereye irosiya ape, fofowei erasi itiya'u aurowa.
51 Meni ta tu naifa meni Abel aine tera'eye. Nowe me'iye su lu tamo tere'e Owane Sitewi lo au te'e siye lu tomu ne'ese aine tera'eye. Nowe me'iye su, lu tere'e Owane Sitewi lo au te'e siye meni iyape Sekaraia aine tera'eye. Lowe meni ape Owane Sitewi lo wesi tewi atahe ma'e tapiye wari potu a'i ponei sahe aine tera'eye. Ei, wanure! Ane lai fisa'i lowe lo ne lu tewi, pereye irosiya ape, ma'e itiya'u aurowa.’
52 Fene yo peri wanu so'oru siye lu werese weiyai! Owane Sitewi lai etiri luwaru a'i fene ma'e aurowa! Fene peri wisere a'i ne au fareyaresiya. Serai lu taune werese peri wisere a'i ape wanu se ta'ame. Fene ta'u peri wisere a'i ape ani so'oru ta'ama. Aiwawe a'i lu taune tamo peri ape wanuwei ne totesiya su, fene lai marepi lowe lo einamiteye.”
53 Sosu a'i pe Jisas lowe arunatiyewe fi su, lu Farisi, Owane Sitewi lo yo peri wanu so'oru siye lu tamo, lowe Jisas ne ai marepi erasi a'i totenamiye. Lowe Jisas lo yo seni werese ne ei toweri etiteye.
54 Lowe Jisas ne aine tera'eyei ne toteye. Lowe yo seni lo siye etiyei ne toteteye. “Jisas peri ta yo peri nomo lo hi ani ararowei awere? Le yo peri nomo lo au ani arisiyei su, nomo le pei aine tera'ere.”