Maktubu dɨnə Mãr̰ĩ duwa Epes 4

Ɓama gɨ sii daa gɨnə nare nə Mãr̰ĩ duwa day

1 Ɨndi gɨ Pol gɨ gɨ yɨn dange dara giyə gɨnə àlɨw Aba ciri di da, nə ùrəng ajɨmar nɨm lə, kalna hára dan bwarna ya Mãr̰ĩ ꞌwaga duwa gɨ an̰ji ꞌwagang dɨ de. 2 Àsɨna dɨdəng dodə me, ina i nare nə hɨlale me, unə dɨdəng bam me ca. Gun gɨ we we dwar̰angə àlnang mani nə àcn̰e kaw, yɨnə gɨ dwani me ca. 3 Jarna dara gama ɓama gɨ sii daa gɨ dúndi dɨnə Mãr̰ĩ duwa dɨ ꞌyàng gandɨdɨ ta di me gamna ɓama dan gɨ sii daa di mana gɨ hɨlala jwammə. 4 Nare nənə Mãr̰ĩ duwa nə dayar mana mɨn dɨ i Kris sɨw gɨ gɨdɨ gun sɨw mɨn tenene di me dúndi dɨ wuse kaw, i mɨn tenene me mani nə Mãr̰ĩ ꞌwagang nə anə kal ɨrmə dan dɨdəgɨ lə dɨ kaw, i mɨn tenene me ca. 5 Aba ciri ɨnda kaw, i mɨn tenene me dusi ɨnda dɨ kala Mãr̰ĩ dɨwə kaw, i mɨn tenene me batem ɨnda kaw, i mɨn tenene me ca. 6 Mãr̰ĩ kaw, i mɨn tenene, an̰ji me i nare abɨragɨ pad, an̰ji lam dwãr̰ĩ nare dɨdəgɨ lə pad me, àl giyə nare sɨdəgɨ lə pad me dam lə nare sɨdəgɨ lə pad me ca.

7 Ɗɨm da, Mãr̰ĩ ꞌyàw wi wi kaw dusi duwa dɨ lade dɨ ꞌyan̰a dɨra lə bədə di ya Kris ba u sɨw ꞌyàdɨ gɨ made dara darandɨ ta de. 8 Ta dɨ me i gwale gɨ Maktubu dɨ Diri way da:

«An̰ji hagɨ mana gɨ daa cog me,

yɨbə nare bwagɨ tarɨwə hára nɨm me,

ɨsəgɨ nare mani nə lade me ca.»*

9 Ɗɨm da, gwale gɨ gɨ wayɨw ba: «An̰ji hagɨ mana gɨ daa cog» dɨ da, gɨndɨw i na mo? Gɨndɨw da: Ɓag da, mana gɨ Kris wor haga yala daa sɨn̰ da, an̰ji chə́ə gɨra dodə sɨn̰a dɨdə do. 10 Aba chə́ə gɨra dodə ta di i gɨ hagɨ ya daa cog siyaya dɨdə dara kal ba dam lə mani lə pad. 11 I an̰ji me ɨsɨgɨ nare mani nə lade mani nə di i giyə duwa gɨ jiga jiga di: nə mɨn i nare nə Jesu kɨjɨgɨ me, nə mɨn i woni waya Mãr̰ĩ bɨw me, nə mɨn i woni wayagɨ nare Nõ dɨ lade me, nə ɗang da, i woni ɗɨbə Egɨlis dɨrədɨ lə gɨləgɨ nare gwale gɨnə Mãr̰ĩ duwa me ca. 12 An̰ji ɨsɨgɨ nare nə ta di giyə gɨ ta di yande dara cendi ba ɗangr̰ɨna nare nənə Mãr̰ĩ duwa ba àlna giyə duwa dara kal nare nənə Mãr̰ĩ duwa nə dayar mana mɨn dɨ i ya Kris sɨw de di ba jwarna hana pii pii. 13 Ya ta de me, nare nənə Mãr̰ĩ duwa nə dayar mana mɨn di ha ꞌywaa dwana me ha hára pii pii bɨ̀ra dayara daa mɨn pad mana gɨ dusi dɨ kala Mãr̰ĩ gorndɨw dɨwə me də ꞌwacn̰ang gandɨw me ca. Yande da, də ha kɨdəng nare nə gechide nə aliya ɨnda nem ɗɨm me də ha kɨdəng nare nə ladɨbe nan̰ bɨr̰ɨn̰ ya Kris de me ca.

14 Yande da, də ha wunəng ya dine nə ꞌyəng de bədə ɗɨm. Nare woni lama mana ha nyama lamandɨ gɨ gwale gɨ kulagɨ bədə ɗɨm. Me cendi ha gɨləndɨ mani nə àcn̰e woni cwagdandɨ ya gale ba ugɨ mani cogdɨgɨ nɨm ka me ka me bədə ɗɨm. 15 Ɗɨm da, kal wi kaw waynaw jaw gwale sɨw gɨ dwani me, də hárang jwarba mana gɨ mani lə pad bɨraa hára ɨjə Kris gɨ i doni gɨ sii di dɨw. 16 I an̰ju di me dáy doni gɨ sii daa mana mɨn dara cendi ba ɓamarna daa mɨn ya gun sarbəw duwa yɨ gɨ doni gɨ sɨw ɓamɨw nɨm daa mɨn gɨdɨw gɨ gun mɨn sɨw ta de. De gun sɨw gɨ jiga jiga di àlna giyə ladɨ mwom da, Kris sɨw gɨ mɨn di ha jwara me ha ɨr̰in̰ara nan̰ mana gɨ dwaniyə me ca.

Àla gɨ mani nə dɨrway nə Mãr̰ĩ ùrgɨ

17 Yande da, nə wayang gɨ dwana dɨ Aba ciri wun gandɨdɨ me nə ajɨmar lə diiyə di. Kalna ꞌwoo bɨrmə gɨnə nare woni ꞌwacn̰a Mãr̰ĩ gɨ ɓag bədə day ɗi, dara cendi ɨrmə day da, gɨndɨw ilə bədə. 18 Cendi dɨrəgɨ ɗesər daa mana gɨ gwale sɨw gɨ Mãr̰ĩ wayɨw di dɨwə. Bɨlə gɨ Mãr̰ĩ ꞌyàw dɨ da, cendi ilə dwalɨn̰yə bədə. Cendi ꞌwocn̰ mani nənə Mãr̰ĩ duwa bədə dara dɨdəgɨ woye me. 19 Cendi nol bam, ꞌwocn̰ mani nə lade me nə àcn̰e me bədə, cendi hurə sɨdəgɨ mani nə àcn̰eyə wála gɨ wála me hurə sɨdəgɨ mani woni àla jaweyə ha nɨm gɨ dɨrəgɨ pii pii me ca.

20 Ɗɨm da, ꞌyeni da, gwale gɨ gɨ gɨləng dara Kris da, i yande bədə. 21 Ɓag da, ꞌyeni nə anə ɓamar daa gɨ Jesu mɨn di, anə doy gwale gɨ gɨ wayɨw ɨrɨm dara dɨw me gɨ gɨləng gandɨw ꞌyeni nə anə i duwa me da, gɨ gɨlə i gwale sɨw gɨnə Jesu duwa. 22 Ina yande da, kalna mani dan nə anə àlagɨ̀ pii wála gɨ anə ꞌwocn̰ gɨ Kris bədə sɨn̰ di bam. Cende dɨ idɨ àla mani nə àcn̰e ha gandang anə àla gɨ mani nə ta di, cende dɨ ta di lamang myandang bam. 23 Kalna dúndi dɨnə Mãr̰ĩ duwa kɨlangɨnang ɨrmə dan bam me ꞌyànang ɨrmə gɨ dɨrway dusɨrəngə me ca. 24 Caga da, àlna mani nə dɨrway nə Mãr̰ĩ ùrgɨ nə bor gɨ mani nə ꞌyolɨw, yande da, mani dan nə anə ha àla ha ꞌya nə tɨba me, nə lade bɨr̰ɨn̰ me, dara mani nə ta di swaa gwale sɨw lə.

25 Ina yande da, kalna kulagɨ bam. Ina wi wi kaw waynaw jaw gwale sɨw, dara pad ɨnda lə də ɓamarang daa gɨdɨ gun mɨn. 26 Wála gɨ dusɨrəng swana kaw, kalna àla àcn̰a dara dusɨrəng dɨ so di ɗi me, kalna dusɨrəng dɨ swaa di chɨ́nə dodə do me dawa ɗwandɨna sɨn̰. 27 Kalnaw Sidan bɨrmə dɨ ɗwayna dɨdəng bam bədə. 28 Kal gun gɨ ina mẽ pii da, a kalna mĩyni di ɗi ɗɨm, kalɨw a àlna giyə gɨ mana ur̰e duwa gɨ bɨrmə gɨ tɨba me ꞌywana gɨ mani duwa nə wama me, yande da, an̰ji ha nyama ꞌwoo hin̰e ꞌyàgɨ́ woni ꞌywaa bədə me ca. 29 Kal gwale gɨ àcn̰e dɨmnə bɨdəngə bədə, wayna gwale gɨ ꞌyole gɨ aba ꞌyàgɨ́ nare dwana dara kalgɨ gɨ jwarbɨna nɨm mana gɨ dusi day dɨ kala lə. Yande da, anə ha àlagɨ́ nare woni dwaya gwale mani nə lade.

30 Ɨr̰ɨ ꞌyeni da, àsɨna angal dan dara àla mani nə ha àla dúndi dɨ wuse dɨ Mãr̰ĩ ꞌyàng gandɨdɨ n̰agɨni bədə, an̰ji ꞌyàdɨ wun ya lamba dɨ gun biyəng sɨdəngə dara ba anə i nare duwa, nə ɗan̰ wála mɨn ba kɨdəng daa wamaniyə gɨ dɨrɨn̰ bɨr̰ɨn̰ an̰ju. 31 Gama gɨ gwale dusiyə me, dusi dɨ idɨ swaa man̰a me, jarba gɨ nare me, nasɨba gɨ mar̰ɨje daa pəng pəng gɨ nare me, cadɨba gɨ nare me ca da, ꞌywarna mani nə ta di bam hən̰ dwar̰angə me dusi dɨ àcn̰e dɨ we we kaw, kalnadɨ bam. 32 Ɗɨm da, àlna dusi dɨ lade me ina nare nə hɨlale me gɨ kwandang me, kalna dusɨrəng hɨlalna kwandang dɨdəgɨ lə ya Mãr̰ĩ ba kal gɨ dusɨw hɨlal nɨm dɨdəngə dara ba anə i nare nənə Kris duwa di.