Maktubu dɨnə Mãr̰ĩ duwa Luk 3

Berni dɨnə Jã Batis duwa

(Matiyə 3.1-12; Markɨ 1.1-8; Jã 1.19-28)

1-2 Wála mɨn, Mãr̰ĩ wayɨw Jã gɨnə Jakari gorndɨw gwale bam dɨn dwar̰ɨ lə. I aliya gɨ mwaj bii jii gɨ dole gɨ geche gɨ Rom gɨ gɨ ꞌwogɨw Tiber lam gɨ dwãr̰ĩ duwa me, Pons Pilat lam duwa dwãr̰ĩ mana gɨ wama gɨ Judeyə, me Erod lam duwa dwãr̰ĩ mana gɨ wama gɨ Galileyə me, chendɨw gɨ Pilip lam duwa dwãr̰ĩ mana gɨ wama gɨ Iture me Tɨrakoni me, Lisanas lam duwa dwãr̰ĩ mana gɨ wama gɨ Abilennə me ca. Aliya gɨ ta lə di da, i Han day gɨ Kayip me i woni bwasa Mãr̰ĩ gechide day cendi.

3 Mana gɨ Mãr̰ĩ wayɨw Jã yande mwom da, an̰ji kɨdɨbər mana gɨ kuray gɨ Jurde dugdɨw dɨ alə ta lə me, dɨ ka lə me, an̰ji waygɨ nare, cendi ba àlna batem dara ba gɨlnə cendi ba kal i àcn̰a day bam me ba ùr ba gɨ ꞌyo i Mãr̰ĩ. I yande do me Mãr̰ĩ ba ha kala dusɨw hɨlala àcn̰a day dɨwə sɨn̰. 4 Mani nə Jã àlgɨ́ di da, i mani nə tanga aba cɨmə Mãr̰ĩ bɨw gɨ Esayi jangɨ gwale day mana gɨ Maktubu dɨnə Mãr̰ĩ duwa lə ɓɨg di. An̰ji way ba da:

«Gun soy berni mana gɨ dɨn dwar̰ɨ lə ba da:

“Aba ciri gɨ Mãr̰ĩ hára lə!

Ɗangr̰ɨnaw bɨrmə, kalɨw a inə i tɨba!”

5 Mana gɨ chɨ́gɨde dodə da, gɨ ha twagdaw daa me,

gɨ hogde da, gɨ ha dɨrsəw dodə me,

bɨrmə gɨ dogde da, gɨ ha jagdaw ɗɨbdɨ tɨba tɨba me,

bɨrmə gɨ àcn̰e kur̰ɨjam kur̰ɨjam kaw,

gɨ ha ywagdaw dodə ledede ledede me ca.

6 Me nare pad ha yara Aba bɨlə mana gɨ swaa Mãr̰ĩ sɨwə gɨ dɨrəgɨ me ca.»*

7 Nare nan̰ nə ciri dɨdə hára ꞌyo Jã dara ba àlnagɨ́ batem. Ɨr̰ɨ Jã di waygɨ ba da: «Mɨgay dɨndadɨ nə gá! Anə ɨrɨm dara anə ba ha bɨlə sɨdəng daa sariya dɨnə Mãr̰ĩyə di le ɓa? I wi wayang yande mo? 8 Anə ùrnə dara sariya ba yɨbɨnəng bədə da, àlna mani nə lade. Gɨlnə dara anə banə kal àcn̰a dan di bam ɗɨm. Yande da, anə ha wunə i ya habde nə ladɨbe ba gɨ bo gɨ yàa day de. Kalna ɨrmə dusɨrəngə anə banə ꞌyo i bɨlə ɗɨm dara anə banə i Abɨraham mwàgɨraw ɗi. Dwayna, nə wayang: Kur̰a dɨ ɓolbəre dɨ ta di, Mãr̰ĩ nem cwadɨ Abɨraham mwàgɨraw. 9 Caga kaw, bɨgame ilə habde gɨndəgɨ lə ib ib ɗɨm dara sabagɨ bam led led. Habda gɨ we we gɨ yàna ladɨna bədə da, gɨ ha sawaw bam dodə gɨndɨwə led àsaw dùwa lə.»

10 Mana gɨ ta lə da, nare nə gɨr̰e ùr Jã ba da: «Ina yande da, nə hanin àla i man mo?» 11 An̰ji cogɨ lə diiyə waygɨ da: «Gun gɨ gumaj duwa ina sɨr da, a ɓɨr̰ɨn̰ə mɨn ꞌyànáw jaw gɨ duwa ilə bədə. Gun gɨ mani duwa nə wama ina lə da, a unə hin̰e ꞌyànáw jaw gɨ duwa ilə bədə me ca.»

12 Nare woni salaw dole gɨ geche gɨ Rom mani kaw, hára ꞌyo Jã ba àlnagɨ́ batem di me ca. Cendi kaw ùrɨw da: «Aba gɨlənin mani, nə ha àlanin i man mo?» 13 Jã cogɨ waygɨ da: «Dawa dɨ anə salna mani da, kalna sala ɗwaya ɨrmə gɨ gɨ ɨrməng di bam ɗi.»

14 Asɨngar kaw ùrɨw da: «Me nenin da, nə ha àlanin i man mo?» Jã cogɨ waygɨ da: «Kalna chaba gɨ gun mani duwa ɗi me, sawnaw gun gwale dɨwə dara kudəw nɨm bədə me ca, me gamna gursɨ dan dɨ gɨ ꞌywagang duru lə mɨra.»

15 Nare woni dwaya gwale gɨnə Jã di da, dam ɓedɨ mani nə geche ba hára lə, me cendi ɨrɨmdɨ gwale dusɨrəgɨ lə, gaa Jã di, ba i Dole gɨ Mãr̰ĩ biyəw gɨ Kris di som? 16 Jã cor waygɨ pad dayyə ba da: «Ɨndi da, nə àlang batem i gɨ nimi mɨra. Me gun gɨ ɗan̰ hára lə, dwana duwa ɗoy dɨ ni bam. Gun gɨ ta di i gɨ geche gɨ ɨndi da, nə nem àsa dɨgɨlan mana gɨ dɨgɨlaw duwa dɨ an̰ji àsɨdɨ dodə dɨdə bədə.† An̰ji duwa da, ha àlang batem gɨ dúndi dɨnə Mãr̰ĩ duwa me, gɨ dùwa me ca. 17 An̰ji yəə ɗagɨna dɨ idɨ huyə swagə di ɨsəwə dara huyə gɨ chìmi bam me kala gɨ swagə dɨrəgɨ. An̰ji ha laya swagə dɨrəgɨ di bwagɨ ɓeche duwa lə, me ha ulə chìmi bam mana gɨ dùwa dɨ budə dɨra gɨ bam ilə bədə bɨr̰ɨn̰yə di me ca.»

18 Ɨr̰ɨ, Jã gɨsɨ nare gɨ gwale gɨ ɗang nan̰ me an̰ji waygɨ Nõ dɨ lade me ca.

Erod day gɨ Jã Batis

(Matiyə 14.3-4; Markɨ 6.17-18)

19 Me dole gɨ Erod chəbɨ chendɨw dyaməw dɨ Erodiyad me, àl mani nə ɗang nə àcn̰e nan̰ me, mwom da, Jã wayɨw an̰ju ba àl mani nə ta di da, ba ꞌyolɨw Mãr̰ĩ bədə. 20 Ɨr̰ɨ, mana gɨ Erod doy gwale gɨ ta di da, àl àcn̰a gɨ geche lə diiyə ɗang bi: yɨ Jã àsɨw dangeyə.

Batem dɨnə Jesu duwa

(Matiyə 3.13-17; Markɨ 1.9-11)

21 Wála gɨ gɨ wor yəə Jã dange sɨn̰ da, nare nan̰ gɨra àl batem me, Jesu kaw, Jã àlɨ́w batem me ca. Mana gɨ Jesu wor nimi dwar̰agɨ lə sɨn̰ me amsɨ Mãr̰ĩ me ca da, daa tɨn̰ər bam, 22 me dúndi dɨnə Mãr̰ĩ duwa chə́ə gɨ sɨdɨ dɨra wun ya kogəl de, gɨra chɨ́ dɨwə. Mana gɨ ta lə di dog da, gwale nɨmə daa siyaya dalawə ba da: «Ɨjɨm da, mə i gorndɨn. Dusɨn ùrɨm nan̰e, me sɨn kaw, ꞌyolɨn dɨmmə me ca.»

Jesu mwágɨraw sumdəgɨ

(Matiyə 1.1-17)

23 Jesu di, mana gɨ diy giyə duwa gɨndɨw da, aliya duwa nem ya gɨnɨn̰ subu de. An̰ji, nare ɨrmɨw ba i Josep gorndɨw.

Josep di i Eli gorndɨw,

24 Eli i Matat gorndɨw,

Matat Lebi gorndɨw,

Lebi i Melki gorndɨw,

Melki i Yanay gorndɨw,

Yanay i Josep gorndɨw,

25 Josep i Matatiyas gorndɨw,

Matatiyas i Amos gorndɨw,

Amos i Nawum gorndɨw,

Nawum i Esɨli gorndɨw,

Esɨli i Nagay gorndɨw,

26 Nagay i Mat gorndɨw,

Mat i Matatiyas gorndɨw,

Matatiyas i Semeyin gorndɨw,

Semeyin i Yosek gorndɨw,

Yosek i Yoda gorndɨw,

27 Yoda i Yowanan gorndɨw,

Yowanan i Resa gorndɨw,

Resa i Jorobabel gorndɨw,

Jorobabel i Salatiyel gorndɨw,

Salatiyel i Neri gorndɨw,

28 Neri i Melki gorndɨw,

Melki i Adi gorndɨw,

Adi i Kosam gorndɨw,

Kosam i Elmadam gorndɨw,

Elmadam i Er gorndɨw,

29 Er i Jesu gorndɨw,

Jesu‡ i Elijer gorndɨw,

Elijer i Yorim gorndɨw,

Yorim i Matat gorndɨw,

Matat i Lebi gorndɨw,

30 Lebi i Simiyõ gorndɨw,

Simiyõ i Juda gorndɨw,

Juda i Josep gorndɨw,

Josep i Yonam gorndɨw,

Yonam i Eliyakim gorndɨw,

31 Eliyakim i Meleya gorndɨw,

Meleya i Mena gorndɨw,

Mena i Matata gorndɨw,

Matata i Natam gorndɨw,

Natam i Dabid gorndɨw,

32 Dabid i Jese gorndɨw,

Jese i Obed gorndɨw,

Obed i Boos gorndɨw,

Boos i Sala gorndɨw,

Sala i Nason gorndɨw,

33 Naso i Aminadab gorndɨw,

Aminadab i Adɨmin gorndɨw,

Adɨmin i Arni gorndɨw,

Arni i Esɨrom gorndɨw,

Esɨrom i Peres gorndɨw,

Peres i Juda gorndɨw,

34 Juda i Jakob gorndɨw,

Jakob i Isak gorndɨw,

Isak i Abɨraham gorndɨw,

Abɨraham i Tera gorndɨw,

Tera i Nawor gorndɨw,

35 Nawor i Seruk gorndɨw,

Seruk i Rewu gorndɨw,

Rewu i Peleg gorndɨw,

Peleg i Eber gorndɨw,

Eber i Sala gorndɨw,

36 Sala i Kaynam gorndɨw,

Kaynam i Arpasad gorndɨw,

Arpasad i Sem gorndɨw,

Sem i Nuwe gorndɨw,

Nuwe i Lemek gorndɨw,

37 Lemek i Matusalem gorndɨw,

Matusalem i Enok gorndɨw,

Enok i Yered gorndɨw,

Yered i Malalel gorndɨw,

Malalel i Kaynam gorndɨw,

38 Kaynam i Enoch gorndɨw,

Enoch i Set gorndɨw,

Set i Adam gorndɨw,

Adam i Mãr̰ĩ gorndɨw§ me ca.

* 3:6 Esayi 40.3-5 † 3:16 nə nem àsa dɨgɨlan mana gɨ dɨgɨlaw duwa dɨ an̰ji àsɨdɨ dodə dɨdə bədəMana gɨ maktubu dɨnə Mãr̰ĩ duwa dɨ gɨ jangɨdɨ pii gɨ bii gɨ gɨrek da, gɨ jangɨw i Gun gɨ ta di i gɨ geche gɨ ɨndi da, nə nem n̰ir̰ɨbəw gɨ gɨbande duwa bam gɨdawə bədə mana gɨ ka lə. Wála gɨ nare nə Juwib dayyə da, n̰ir̰ɨbəw gɨ gun gɨbande bam gɨdawə da, i giyə gɨnə kwaya duwa. ‡ 3:29 Jesu gɨ i Elijer gorndɨw Jesu gɨ i Elijer gorndɨw di, i gɨ jiga. I Jesu Kris gɨnə Mãr̰ĩ gorndɨw bədə. Nare nə Juwib da, ùr ꞌwagagɨ dɨndɨragɨ nə abje Jesu nan̰e. Sumi gɨ ta di ꞌyolgɨ nan̰e. Gɨndɨw dɨ biyə da, i Mãr̰ĩ bɨl nare. § 3:38 Adam i Mãr̰ĩ gorndɨw Gɨndɨw dɨ biyə way ba Adam i gun gɨ Mãr̰ĩ àsaw dodə dɨrɨn̰ nə piiyə gɨ wunəw ya an̰ju de dige dige di. Yarna mana gɨ maktubu dɨ Diyə gɨ mani gɨndəgɨ (Genèse) 1.26-27 me 2.7 me.