4
Gwale gɨ diri gɨnə aba chìgdə swagə
(Matiyə 13.1-9; Luk 8.4-8)
1 Targɨn̰ ɗang da, Jesu so ilə gɨləgɨ nare gwale gɨnə Mãr̰ĩ duwa lə ɗang bi kuray gɨ ɓɨle gɨ Galile bɨwə. Nare ꞌyarbar nan̰e mana gɨ tulɨwə. Yande mwom da, an̰ji kal sɨw nagɨ ha bɨrwa dalawə dama lə me ɗɨbə nɨm nimiyə. Me nare nə pad da, dam day kuray di bɨwə wayniyə.
2 Me Jesu di gɨlgɨ nare mani nan̰ i gɨ gwale gɨ diri. Me mana gɨ gɨlə duwa gɨ ka lə da, an̰ji waygɨ ba da:
3 «Dwayna ladɨ! Abe mɨn so ba a ha chìgdə swagə yiga lə.
4 Mana gɨ an̰ji ilə chìgdə lə da, swagə dɨrəgɨ nə yab wujabar bor mana gɨ bɨrmə lə me, dirbi gɨra tɨgɨgɨ chə́gdɨgɨ bam car.
5-6 Swagə dɨrəgɨ nə mɨn da, wujabar day bor mana gɨ gɨndara lə. Cendi gandɨ daa kaláng mɨ̀ndagɨ, me ꞌyo bɨrmə gaba bwaa sabɨragɨ hára dodə cog bədə, dara sɨn̰a dɨ lade di yengɨ le. Yande da, mana gɨ dawa gɨra ən dɨdəgɨ lə da, swagə nə ta di woy bam.
7 Swagə dɨrəgɨ nə mɨn ɗang bi bor day mana gɨ chemde woni jimdi dwar̰agɨ lə. Cendi dɨm daa, me chemde woni jimdi di so yɨgɨ daa swamama ɨmgɨ jwara bam me cendi gandɨ dɨdəgɨ bədə.
8 Me swagə dɨrəgɨ nə mɨn bor day mana gɨ sɨn̰a dɨ ladeyə. Cendi gandɨ jor ladɨ me naa dɨrəgɨ me ca. Swagə nə ta di dɨdəgɨ lə mɨn da, dɨrəgɨ ꞌyarbar nan̰e. Nə mɨn àl dɨrəgɨ nem gɨnɨn̰ subu, nə mɨn ɗang àl dɨrəgɨ nem gɨnɨn̰ kubi, nə mɨn ɗang bi àl dɨrəgɨ nem aru.»
9 Me Jesu waygɨ ɗang bi ba da: «Gun gɨ sumdəw woni dwaya gwale ina lə da, kal a dwayna.»
10 Ɨr̰ɨ Jesu day gɨ nə woni gɨrsə gwale duwa nə mwaj dii sɨr di me, nare nə yab nə ilə hára gandɨwə sɨn̰ di me gɨrgɨ bam tulɨn̰yə ched da, cendi so ùr Jesu gwale duwa gɨ an̰ji wayɨw gɨ diri di gɨndɨw.
11 Me Jesu cogɨ lə diiyə waygɨ ba da: «ꞌYeni da, Mãr̰ĩ gɨləng gwale sɨw gɨ budə lə dara lama duwa gɨ dwãr̰ĩ di ɗɨm, me nare nə iche da, nə gɨlgɨ mani pad di i gɨ gwale gɨ diri.
12 Ta di me i mani nə aba cɨmə Mãr̰ĩ bɨw jangɨ nɨm gɨ gwale day pii mana gɨ Maktubu dɨnə Mãr̰ĩyə, me yala àlal nɨm. An̰ji way ba da:
“Cendi un̰bɨ me yər bədə,
domən̰dɨ me doy bədə,
me ꞌwocn̰ gwale di gɨndɨw bədə me ca.
I yande me cendi ha ꞌywaa gɨ bɨrmə
gaba cwara nɨm Mãr̰ĩ sɨwə bədə,
me Mãr̰ĩ kaw, ha kala dusɨw hɨlala
àcn̰a day dɨwə bədə me ca.”»
Gwale gɨ diri gɨnə aba chìgdə swagə di gɨndɨw
(Matiyə 13.18-23; Luk 8.11-15)
13 Me Jesu waygɨ ɗang bi ba da: «Gwale gɨ diri gɨ nə wayang gandɨw dara aba chìgdə swagə di da, anə ꞌwacn̰ana gɨndɨw bədə sɨn̰ da, gwale gɨ diri gɨ ɗang gɨ nə ha wayang gandɨw da, anə ha ꞌwacn̰aw mɨnang kaw mo?
14 Dwayna! Aba chìgdə swagə di da, i aba waya gwale gɨnə Mãr̰ĩ duwa.
15 Swagə dɨrəgɨ nə bor mana gɨ bɨrmə lə da, wun i ya nare nə doy gwale gɨnə Mãr̰ĩ duwa mɨ̀ndagɨ, me ɨr̰ɨ Sidan hára kaláng biy gwale gɨ cendi dwayaw di bam dusɨrəgɨ lə.
16 Swagə dɨrəgɨ nə bor mana gɨ gɨndara lə di da, i nare nə doy gwale gɨnə Mãr̰ĩ duwa, cendi yɨw gɨ sii ꞌywala kaláng mɨ̀ndagɨ,
17 me kal gwale di bo sabɨraw dusɨrəgɨ lə bədə. Cendi i nare nə yɨ sɨdəgɨ woy bədə. Mana gɨ wamani ꞌywanagɨ, labaa nare gɨlnəgɨ dɨrəgɨ dara gwale gɨnə Mãr̰ĩ duwa mwom da, cendi so kaláng gɨn̰ gwale gɨnə Mãr̰ĩ duwa di bam.
18 Swagə dɨrəgɨ nə bor mana gɨ chemde woni jimdi dwar̰agɨ lə di da, i nare nə doy gwale gɨnə Mãr̰ĩ duwa di me,
19 ɨr̰ɨ cendi ɨrɨm mana gɨ wamani gɨ jiga jiga gɨ sɨn̰a dɨdə ka dɨwə, cendi kan̰jɨ ꞌywaa gɨ sɨn̰a dɨdə ka gɨ i mani nə pəgɨn̰ yag, me cendi kal ɨrmə day mana gɨ mani nə ɗang ɗang dɨdəgɨ lə me ca. I yande me ɨrmə gɨ pad gɨ cendi ɨrmɨw di da, yɨ gwale gɨnə Mãr̰ĩ gɨ dusɨrəgɨ lə di daa swamama ɨmgɨ àla gandɨw giyə bam.
20 Swagə nə bor sɨn̰a dɨ ladeyə da, i nare nə doy gwale gɨnə Mãr̰ĩ duwa me yɨw gɨ ɨsɨragɨ sɨr me àl gandɨw giyə me ca. Cendi da, wun ya swagə dɨdəgɨ nə mɨn nə àl dɨrəgɨ nem gɨnɨn̰ subu de, labaa nə ɗang nə àl dɨrəgɨ nem gɨnɨn̰ kubi de, labaa nə ɗang bi nə àl dɨrəgɨ nem aru de me ca.»
Gwale gɨ diri gɨnə lamba dɨra
(Luk 8.16-18)
21 Jesu waygɨ nare ɗang bi ba da: «Gun unə lamba dɨ dùwa gɨrər lə da, i dara ɨbədɨ mani dɨdə bədə, labaa i dara chə́dɨ mana gɨ solbə gɨndəgɨ lə mo? Bədə. Me ɓag da, i dara chə́dɨ mani dɨdəgɨ lə daa dara kal ba ácn̰ana mana bam.
22 I ya ta de di me mani pad nə i budɨ lə caga ka da, ɗan̰ gɨ ha yaragɨ daa pɨden̰yə, me mani nə nare ùr kwandagɨ ba ꞌwacn̰ana bədə kaw, ɗan̰ Mãr̰ĩ ha gɨləgɨ daa pɨden̰yə me ca.
23 Gun gɨ sumdəw woni dwaya gwale ina lə da, kal a dwayna.»
24 Me Jesu waygɨ gwale ɗang bi ba da: «Àsɨna angal dan ladɨ le mana gɨ mani pad nə nə wayang gwale day di dɨdəgɨ lə: I mani nə anə ɨrɨm gɨ mani ꞌyàgɨ́ gɨ kwandang ta di gang me, sanga Mãr̰ĩ ha ɨrməng nɨm lə yande di me, an̰ji ha ꞌyàng lə diiyə ɗang bi me ca.
25 Dara gun gɨ mani duwa ina lə da, gɨ ha ꞌyàw lə diiyə bi. Me gun gɨ mani duwa ina lə bədə da, nə hin̰e nə ilə ɨsəwə ta di kaw, gɨ ha ꞌwogɨ i bam ɨsəwə.»
Dwãr̰ĩ dɨnə Mãr̰ĩ duwa wun i ya na de mo?
26 Jesu waygɨ nare gwale ɗang bi ba da: «Dwãr̰ĩ dɨnə Mãr̰ĩ duwa da, wun i ya gun mɨn ba a gɨsɨ gɨ swagə mana gɨ daga duwa lə ta de.
27 Mwom da, an̰ji ina i nuni gɨ changa, labaa damna bɨ̀ra gɨ dawa kaw, swagə dɨrəgɨ di gandɨ daa me jor me dɨban ꞌwacn̰a duwa.
28 I sɨn̰a me àl giyə dɨra gaba ganda swagə dɨrəgɨ di daa, me jor nɨm di me tandi. Me swagə di gandɨ gɨ dɨdəgɨ naa nɨm gɨ dɨrəgɨ mana gɨ dɨdəgɨ lə.
29 Me mana gɨ swagə di dɨrəgɨ naa ɗɨm da, gun gaba gɨsə swagə di u kur̰ang kaláng me ha dara n̰iləgɨ ɗɨm, dara wála day gaba n̰ilə di nemme ɗɨm.»
Gwale gɨ diri gɨnə mutardɨ dɨrəw
(Matiyə 13.31-32; Luk 13.18-19)
30 Jesu waygɨ nare gwale ɗang bi ba da: «Dwãr̰ĩ dɨnə Mãr̰ĩ duwa da, də ɨrməng gandɨdɨ ya na de mo? Labaa, ba də wayang gwale dɨra də ɨrmɨw gɨ gwale gɨ diri gɨ we mo?
31 Dwãr̰ĩ dɨnə Mãr̰ĩ duwa da, wun i ya habda gɨ mutardɨ dɨrəw de. Dɨrəw di i ɓani hin̰e hin̰e ɗoy kwandaw habde nə caga ka dɨrəgɨ bam pad.
32 Me mana gɨ gɨ gɨsɨnə dɨrəw dodə da, gandɨ daa me jor gɨdɨ ɗoy habde nə gɨndəgɨ wor nə gɨ ɗɨlbɨgɨ dara hangda gɨ bɨ̀ra di bam pad. An̰ji agdɨ gangr̰aw nan̰ me ꞌya dun nan̰ dɨ dirbi nə daa kaw, ɗangr̰ɨ ciri day dam lə me ca.»
33 Jesu waygɨ nare gwale gɨnə Mãr̰ĩ duwa gɨ gwale gɨ diri nan̰ yande. An̰ji waygɨ gwale di yande bor gɨ dwana day dɨ idɨ ꞌwacn̰a gwale gɨndɨw.
34 Inam i nare nə gɨr̰e da, dɨban gwale gɨ diri da, Jesu tɨn̰ bɨw waygɨ gwale bədə bɨr̰ɨn̰, me mana gɨ an̰ji inə mɨ́ndagɨ gɨ woni gɨrsə gwale duwa da, an̰ji biygɨ gwale gɨ diri di gɨndɨw daa.
Jesu dwana duwa ɗoy gale gɨ geche bam
(Matiyə 8.23-27; Luk 8.22-25)
35 Wála gɨ ta lə dog, gɨ turgɨ pɨram da, Jesu waygɨ woni gɨrsə gwale duwa ba da: «Cilangɨnandɨ kuray gɨ ɓɨle, hanandɨ dugdɨw dɨ alə ta lə!»
36 Mana gɨ cendi so kal nare nə gɨr̰e di dodə ɗɨm da, woni gɨrsə gwale duwa di ꞌwoy bɨrwa gɨ Jesu dam lə di ha gandɨw. Bɨrwa nə ɗang kaw, ilə hára lə gandagɨ me ca.
37 Ɓam da, gale gɨ geche biyara kaláng, u nimi bo bɨrwa dalawə, wor hin̰e dara ꞌwanaw daa.
38 Me Jesu di da, i duwa i nuni bɨrwa widɨwə cilangɨ dɨw daa. Nɨma woni gɨrsə Jesu gwale duwa di nuw daa me wayɨw da: «Aba gɨlənin mani, də ilə marangə da, nam dusɨm bədə mo?»
39 Mwom da, Jesu so daa, ɨr̰ɨn̰ gale di me waygɨ nimi nə kurayyə di me ba da: «Hwayna le! Ɗɨbɨnə dodə!» Mana gɨ ta lə da, gale ɗɨbɨ dodə ɗeg, me mana hɨlal kajaj.
40 Jesu waygɨ woni gɨrsə gwale duwa da: «Anə lán̰ yande dana mo? Anə kal dusɨrəng dɨnnə bədə sɨn̰ mo?»
41 Cendi lán̰a àlgɨ nan̰, me cor ùrbɨ sɨdəgɨ: «Gun gɨ ta di i wi ɓag me, gale day gɨ nimi nə kurayyə kaw, doy gwale bɨwə mo?»