28
Jesu dɨmə daa munɨ lə!
(Markɨ 16.1-8; Luk 24.1-12; Jã 20.1-10)
1 Wála gaba bwaa gwayni di tarɨwə da, i dɨmas. Gɨ jomni cor̰ər̰ə da, Mari dɨ Magdala me Mari dɨ ɗang di me, borgɨ hargɨ dara yara gɨ munɨ gɨnə Jesu di.
2 Mana gɨ ta lə dog, jisgɨ yande da, sɨn̰a gɨgdər daa gɨ dwana! Paja gɨ daa gɨnə Aba ciri gɨ Mãr̰ĩ duwa mɨn swaa daa chə́ə hára nongr̰ɨ kur̰a dɨ gɨ ɗesɨ gɨ munɨ bɨw di àsɨdɨ bam tulɨn̰yə, me dam lə diiyə me.
3 Sɨw ꞌyogdɨ le ya Mãr̰ĩ wur̰ɨn̰ə duwa de, me barge duwa kaw, wusɨ le kəng ya duru de me ca.
4 Asɨngar woni gama munɨ di, lán̰a àlgɨ nan̰e me, sɨdəgɨ sadɨgɨ tag tag me, cendi bor dodə wun ya nare nə mare de.
5 Ɨr̰ɨ, paja gɨ daa di waygɨ namde di ba da: «ꞌYeni da, àlna lán̰a bədə! Nə ꞌwocn̰ dara anə kan̰jɨ i Jesu, an̰ju gɨ gɨ ɓengɨw ɓabɨr̰ɨw daa habda gɨ dagɨla sɨwə di.
6 An̰ji ilə ka bədə, dara an̰ji dɨm daa munɨ lə ya ba a wayang nɨm pii ta de. Hane, yarna mana gɨ tanga gɨ àsɨ gɨ kumbɨ duwa lə di.
7 Me hana kaláng waynagɨ woni gɨrsə gwale duwa di, an̰ji ba dɨm daa nare nə mare dwar̰agɨ lə me, an̰ji ba yá gamagɨ lə alə wama gɨ Galileyə. Cendi ba gɨrnə alə ta da, ba ha yaraw. Ta di me i gwale gɨ nə wayang di.»
8 Mwom da, namde di borgɨ kaláng yalgɨ kal munɨ di bam. Lán̰a àlgɨ nan̰e me sɨdəgɨ kaw, ꞌyolgɨ nan̰e me ca. Cendi wagɨ gɨ gidi dara hára cɨməgɨ gɨ woni gɨrsə gwale gɨnə Jesu duwa di.
9 Mana gɨ ta lə dog jisgɨ yande da, Jesu hára sawa namde di dɨrəgɨ daa me waygɨ ba da: «Nə àlang labiya!» Ɨr̰ɨ cendi chidɨbə hára piy gubɨrəgɨ dodə dɨrəwə, yɨbɨ gɨdaw me mɨlawdɨw nɨm.
10 Ɨr̰ɨ an̰ji waygɨ ba da: «Lán̰ɨna bədə! Hana waynagɨ chamran di kalgɨ gɨ hana mana gɨ wama gɨ Galileyə, cendi ba ha yaran i alə ta.»
11 Mana gɨ namde di ilə hára lə bɨrmə lə mwom da, asɨngar woni gama munɨ di, nə yab háragɨ dara cɨməgɨ woni bwasa Mãr̰ĩ gechide day mani pad nə àlal ta di daa.
12 Mwom da, woni bwasa Mãr̰ĩ gechide day di ꞌwaga gechide nə ɗang nənə nare nə Juwib day me dayar gandagɨ maa gwale me ꞌyàgɨ́ asɨngar di gursɨ nan̰
13 me gɨsɨgɨ dodə ba kal cendi ba hana wayna ba gɨ changa ba gɨ i nuni da, woni gɨrsə gwale duwa ba gɨra mĩy kumbɨ duwa di u yá nɨm.
14 Me cendi waygɨ ɗang ba da: «Ɗan̰ dole gɨ Pilat di dwayna gwale gɨ ta di kaw, nə hananin ꞌwacn̰a bɨrmə gaba biyəw gwale gɨ lade dara kal anə ꞌywana gwale bədə.»
15 Mwom da, asɨngar di yɨ gursɨ di me, àl mani nə gɨ waygɨ cendi ba àlnagɨ di. I ta di me, laba laba kaw, gwale gɨ woni gɨrsə gwale gɨnə Jesu duwa ba mĩy kumbɨ duwa bam ta di, nare nə Juwib ilə wayawə sɨn̰.
Jesu kɨjɨ woni gɨrsə gwale duwa sɨn̰a gɨndɨdɨ lə pad
(Markɨ 16.14-18; Luk 24.36-49; Jã 20.19-23; Paja nənə Jesu duwa 1.6-8)
16 Woni gɨrsə gwale gɨnə Jesu duwa nə mwaj dii mɨn di hargɨ gɨr mana gɨ wama gɨ Galileyə kur̰a dɨ tanga Jesu waygɨ ba hana lə di dɨdə.
17 Mana gɨ ba gɨ yərɨw mwom da, cendi piy gubɨrəgɨ dodə dɨrəwə me mɨlawdɨw, me nə yab da, ilə gaga gwaleyə dusɨrəgɨ lə.
18 Mwom da, Jesu chidɨ sɨdəgɨ lə me waygɨ ba da: «Dwana pad dɨ daa me dɨ dodə me da, Mãr̰ĩ ꞌyàn gandɨdɨ i ɨsənnə ɨndi.
19 Yande da, hana sɨn̰a gɨndɨdɨ lə pad: Cwana nare nə gɨndəgɨ jiga jiga pad kalgɨ gɨ kɨdɨnə woni gɨrsə gwale ni, me àlnagɨ batem gɨ Aban gɨ Mãr̰ĩ sumɨw me ɨndi gɨ Gorndɨw sumɨn me gɨ Dúndi duwa sumdɨ me ca.
20 Gɨlnəgɨ kalgɨ gɨ àlna bɨn gɨ nə wayang gandɨw di bá bá. Me dwayna: Ɨndi da, nə ilə gandang gɨ wála wála bɨraa dɨr̰ɨn̰a ꞌyan̰a dɨra lə bá.»