26
Aisa꞉ke Kita daoni pa꞉ta꞉ hayekeeki
1 Koto kenke pa꞉ta꞉ta꞉ mo hande amba꞉ titina꞉ Eipoloha꞉ma꞉ hayeke dina꞉ epeeke tea꞉ kima꞉ handekeeki paa epeekeme. Kota꞉ Aisa꞉keta꞉ mo Kita daoni nane mo Pilisidaini wanda꞉halina꞉ kini Abimeleke hayeke nane peekeme. A̱i̱ na peeke haena꞉ta꞉
2 mo Tekehalima꞉ Aisa꞉ke pa꞉ta꞉ peneme yao hata꞉ alota꞉ Idiepi kenke nane na peke do I̱ma꞉ hae alo kenkena꞉ kone hapeke.
3 I̱ma꞉ neke yaapo hata꞉ neke epealuekema꞉ do pate hapeke. I̱ma꞉ta꞉ do kenke paeyaota꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. Kutupa I̱ma꞉ta꞉ naka꞉ apa꞉ Eipoloha꞉ma꞉ yaapo la꞉ upa꞉ pita꞉ paa wilieke.
4 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉manu hala꞉ tupa꞉ haena꞉ kulueke. Kutupa iki pa꞉ta꞉ta꞉ do kenke paeyao halueke. I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke.
5 Kota꞉ Eipoloha꞉ma꞉ma꞉ta꞉ yaka pi make yaka lo pimanu make opua miniki haya꞉ ekina꞉ta꞉ I̱ma꞉ta꞉ neke epealueke laa leekeme.
6 Koto ekina꞉ Aisa꞉keta꞉ Kita daoni pa꞉ta꞉ hao hayekeme.
7 Kutupa koto pa꞉ta꞉ haemeke haliwekima꞉ alota꞉ Mo wanda꞉ta꞉ epi yaka꞉ta꞉pe lemeke handaata꞉ ipika꞉ ana꞉e leekeme. Ipikana꞉ma꞉ ipika꞉ wanda꞉e pi na leeke ekita꞉ Lepekata꞉ wanda꞉ seliapo yalo hata꞉ koto pate haemeke haliwekima꞉ Lepeka muluekema꞉ ipiki liaama꞉na꞉ laa paala꞉ma꞉ homolo hata꞉ leekeme.
8 Kutupa Aisa꞉ke koto kenke pa꞉ta꞉ natemanu hosiki haena꞉ laa mo kini hali Abimeleketa꞉ ipika꞉ winido pa꞉ta꞉ handa꞉niayekepate Aisa꞉kema꞉ta꞉ Lepeka telepo la꞉tiaaso pitipekeeki handeekeme.
9 Kutupa Abimelekema꞉ Aisa꞉ke handa꞉ mulu pena꞉ la alota꞉ Kota꞉ naka꞉ wanda꞉ ya꞉ka꞉ta꞉me. Pa ekipeke naka꞉ ana꞉e la pelepe leekeme. Aisa꞉kema꞉ hombo peaaso alota꞉ Yaka honema꞉ta꞉ Yaka wanda꞉e loa꞉ka꞉na꞉ta꞉ kota꞉ I̱ limikie hone ua꞉me leekeme.
10 Abimelekema꞉ alota꞉ Nakana꞉ma꞉ niki pa꞉ta꞉ eki hau pea pelepe. Mo yaka hali ma꞉nda꞉ma꞉ naka꞉ wanda꞉ yaapo ana꞉na꞉ polu pia꞉me. Nikana꞉ma꞉ koto hoke hau puma꞉ka꞉na꞉ yoluta꞉ kota꞉ teketa꞉ neke kone yolo pia꞉me leekeme.
11 Kutupa Abimelekema꞉ ipika꞉ wanda꞉hali paeyao pa꞉ta꞉ pi la꞉ witolo alota꞉ Ma꞉nda꞉ epima꞉ do hali o ipika꞉ wanda꞉ hoke tupa꞉ handeteke haya꞉ka꞉na꞉ta꞉ kota꞉ koto someta꞉ lu homaena꞉e leekeme.
12 Kutupa Koda꞉ma꞉ Aisa꞉ke epeayeke ekiyalo hata꞉ ipikana꞉ma꞉ koto kenke pa꞉ta꞉ wae alemanu nokopeeketa꞉ mo nokopeeke bapina꞉ta꞉ ota꞉ anekema꞉ haka꞉ta꞉pake napeke tieke mia꞉tiki piekeme.
13 Kutupa ala꞉ta꞉ ala꞉ta꞉ wopu mutia pea꞉eki yalo hata꞉ ota꞉ hamoko hali hayekeme.
14 Aisa꞉keta꞉ sipisipi wopu make kaomanu wopu make e pokaasa꞉ haliweki wopu make yalo hata꞉ mo Pilisidaini tapakema꞉ta꞉ we pambemekeme.
15 Koto ekina꞉ Ikana꞉ma꞉ta꞉ mo hande ipika꞉ ateke Eipoloha꞉ma꞉ pa hata꞉ ipika꞉ e pokaemeke haliwekima꞉ awemeke naku ikalimanu pa kenke ao tumbaemekeme.
16 Kutupa Abimelekema꞉ Aisa꞉ke pa꞉ta꞉ alota꞉ Neketa꞉ niki ankulake wele ula꞉ma꞉ nika꞉ kenke mina꞉pa꞉lae leekeme.
17 Koto ekina꞉ Aisa꞉kema꞉ta꞉ mina꞉pa꞉lao mo Kita hadipina꞉ palai da pua a꞉eyekeme. Koto pa꞉ta꞉ta꞉ nate mandane ekina꞉
18 Koto pateta꞉ mo hande Eipoloha꞉ma꞉ hayeke natena꞉ naku ikalimanu aweekepate Eipoloha꞉ma꞉ homeeke dina꞉ta꞉ mo Pilisidaini tapakema꞉ta꞉ ao tumbaemekeme. Koto naku ikali manuta꞉ Aisa꞉kema꞉ pa aweekeme. Ipikana꞉ma꞉ mo naku ikali biki manuta꞉ atekema꞉ leekeeki kone paa leekeme.
19 Aisa꞉kena꞉ e pokaemeke haliwekima꞉ta꞉ mo hadipina꞉ panake naku ikali awa ikali handa꞉ wimikime.
20 Kutupa mo Kita kenke pa꞉ta꞉ sipisipi handeteke haemeke haliwekima꞉ mo Aisa꞉kena꞉ sipisipi handeteke haemeke haliweki ame̱le̱ hankiliki yololo hata꞉ alota꞉ Do ikalita꞉ nika꞉ ekie lemeke handaa Aisa꞉kema꞉ mo naku ikalina꞉ bikita꞉ Hankilikie leekeme.
21 Kutupa Aisa꞉kena꞉ e pokaemeke haliwekima꞉ naku ikali ma꞉nda꞉ awemekepate koto ekina꞉ make ape hankiliki ombu yolemeke handaa mo naku ikalina꞉ bikita꞉ A꞉nda꞉ Pita꞉la꞉ekie leekeme.
22 Kutupa Aisa꞉kema꞉ta꞉ koto pate mina꞉pa꞉lao pua naku ikali ma꞉nda꞉ aweekeme. Koto ekina꞉ta꞉ hankiliki na yolemeke handaa ipika꞉ bikita꞉ Lihobodi (nika꞉ da pita꞉ Ka꞉la꞉pa꞉ Tapaala꞉me) leekeme. Kutupa ipikana꞉ma꞉ alota꞉ Niki do kenkena꞉ hamono Tekehalima꞉ niki ka꞉la꞉pa꞉ tapaala꞉me. Koto ekina꞉ ameta꞉ do pateta꞉ ala꞉ta꞉ ala꞉ta꞉manu ana꞉na꞉ kone wia halumeke leekeme.
23 Kotoeki hoki naneta꞉ Aisa꞉keta꞉ pao mo Biasiba nane peekeme.
24 Koto timba Tekehalima꞉ ipiki pa꞉ta꞉ peneme yao alota꞉ I̱ta꞉ naka꞉ apa꞉ Eipoloha꞉ma꞉na꞉ Koda꞉e. Koto ekina꞉ paala꞉ma꞉ na homa꞉pee. I̱ta꞉ neke yaapo halome. Kutupa I̱ma꞉ mo yaka e pokaeya꞉ hali Eipoloha꞉ma꞉ pa꞉ta꞉ pi la꞉ ua꞉ ekina꞉ta꞉ neke epeaaso hata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ tieke kulueke leekeme.
25 Koto pateta꞉ Aisa꞉kema꞉ oloda wepia Tekehali pa꞉ta꞉ yeni hau piekeme. Kutupa ipikana꞉ma꞉ ipika꞉ palai da koto pate a꞉eyeketa꞉ ipika꞉ e pokaemeke haliwekima꞉ta꞉ koto pate naku ikali ma꞉nda꞉ awemekeme.
Aisa꞉ke pita꞉ Abimeleke yaapoma꞉ pi tonkaepekeeki
26 Abimeleketa꞉ ipika꞉ hone u tiao hayeke hali Ahusa꞉de make ipika꞉ amina꞉ you hali Pikolo ame̱le̱ Aisa꞉ke handulueke alo Kita nanema꞉ epemekeme.
27 Koto ekina꞉ Aisa꞉kema꞉ lota꞉ pitolo alota꞉ Amba꞉ta꞉ I̱ pa꞉ta꞉ a꞉nda꞉ lia naka꞉ kenke mina꞉pa꞉lao pue le ale pa ameta꞉ ekipeke I̱ handolo a꞉pa pelemepe leekeme.
28 Ikana꞉ma꞉ hombo peaaso alota꞉ Ameta꞉ Tekehalita꞉ neke ame̱le̱ hala꞉eki handolo hata꞉ nika꞉ honema꞉ta꞉ neke niki ame̱le̱ pi tonkao umana꞉e. Nika꞉ honema꞉ta꞉ niki pa꞉ta꞉ pi dupa la꞉ uelena꞉e.
29 Mo nikana꞉ma꞉ neke na hoeyaoma꞉ tupa꞉ nakana꞉ma꞉ niki make na hoeyalena꞉ pi la꞉ uelena꞉ loa꞉me. Nikana꞉ma꞉ta꞉ neke pa꞉ta꞉ a꞉ta꞉ma꞉ homolo hata꞉ yopu kone mina꞉pa꞉lao poelena꞉ loma꞉me. Koto ekina꞉ ameta꞉ mo Koda꞉ma꞉ neke epeala꞉ ekita꞉ peneme yala꞉me lemekeme.
30 Kutupa Aisa꞉kema꞉ta꞉ ika꞉ ne pambaeyeke handaa ne ikali nemekeme.
31 Da kelepeeketa꞉ hali homeke homekema꞉ ika꞉ la wimiki pita꞉ keke pima꞉ tonkao wimikime. Kutupa Aisa꞉kema꞉ mo haliweki pa꞉ta꞉ a꞉taloe leeketa꞉ yankeke tonu au laa pemekeme.
32 Koto natena꞉ kone Aisa꞉kena꞉ e pokaemeke haliwekima꞉ naku ikali ma꞉nda꞉ awemekeeki a꞉pa la halolo hata꞉ alota꞉ Ikali handa꞉ uluma꞉me lemekeme.
33 Ipikana꞉ma꞉ koto naku ikalina꞉ bikita꞉ Pi La꞉ Wita꞉la꞉ Ekie leekeme. Kotota꞉ mo hande Biasiba daoni ipika꞉ biki mieke tupa꞉e.
Isoma꞉ kenke ma꞉nda꞉ wanda꞉ yaapo miekeeki
34 Iso ipiki 40 bapi mieketa꞉ Hidi wanda꞉ yaapo miekeme. Ipilikita꞉ Bitina꞉ waneke Diudi make Elonina꞉ waneke Basema꞉de yekeme.
35 Mo wanda꞉ yaapoma꞉ta꞉ Aisa꞉ke pita꞉ Lepeka yaapo ka꞉nda꞉ma꞉ homaepekeme.