12
Mo wanda꞉ pita꞉ popake itiki hake si handeke ale tieke yaapo
1 Kutupa ta꞉ta꞉ ma꞉nda꞉ pea hone mateke hau tieke oli yana꞉ opolo epea꞉me. Wanda꞉ homeke koto pa꞉ta꞉ pitia꞉me. Ipika꞉ dauta꞉ mo nate yamea꞉me. Kutupa mo kaisepota꞉ ipika꞉ anke oto pa꞉ta꞉ wia kutupa ipika꞉ you aka꞉ta꞉ kiki yaapona꞉ ankena꞉ yaapo hombulanka꞉ pambaeya꞉me.
2 Ipikita꞉ teke pa꞉ta꞉ weki mulu pua꞉peke yata꞉ mo weki hoki nea꞉ ekima꞉ tanda tieke pitolo hata꞉ e̱ wi lea꞉me.
3 Kutupa ma꞉nda꞉ ta꞉ta꞉piki ale ma꞉nda꞉ oli ya manda opolo epea꞉me. Handeta꞉ we pupapeke popake itiki hake sima꞉ handeke ale tieke hombeleke ipika꞉ amboketa꞉ paeyao watake hata꞉ hao kutupa kiki yaapo ekeke haya꞉me. Kutupa mo ambokemanu yalaota꞉ kinina꞉ you aka꞉ pamba pamba pia꞉me.
4 Ipika꞉ mendekema꞉ta꞉ mo hombulanka꞉manu tepo tekilipa homeke ma꞉nda꞉ta꞉ mo ya mina꞉pa꞉lao yola yopua do kenkena꞉ wekila꞉ lopaeya꞉me. Mo aleta꞉ mo wanda꞉ma꞉ weki mondu lopaeya꞉ka꞉na꞉ mea nolueke alo puki tikitiki pua haya꞉me.
5 Kutupa mo wanda꞉ma꞉ta꞉ hali weki mondu wia꞉me. Ipiki daeyaata꞉ do kenke paeyao ayeni dopitama꞉ handeteke halo pa꞉la꞉ wekie. Pate mo wekita꞉ pa꞉ta꞉la꞉ mea Koda꞉ pa꞉ta꞉ ipika꞉ kini seana꞉ hala꞉ alena꞉ mea pea꞉me.
6 Mo wanda꞉ta꞉ Koda꞉ma꞉ ipika꞉ amu pea wia꞉yeke hapupapeke alena꞉ pindipa pea꞉me. Koto alena꞉ta꞉ mo wanda꞉ daoseni homeke kutupa 260 natena꞉ handeteke halo pia꞉ alena꞉e.
7 Kutupa oli hepeni nane a꞉nda꞉ kini pia꞉me. Maikolo ipika꞉ enisolo ame̱le̱ mo popake itiki hake si ipika꞉ enisolo ame̱le̱ a꞉nda꞉ pimime.
8 Pate Maikolo tapakema꞉ mo popake itiki hake sita꞉ bepolao ipika꞉ enisolomanu tonka꞉na꞉ hepeni na haena꞉ lememe.
9 Mo popake itiki hake si tieke hombeleketa꞉ tolu lopaeya꞉me. Ipikita꞉ mo hande amba꞉ kiake hayeke keto biki Sadani la꞉la꞉ alee. Ipikana꞉ma꞉ta꞉ mo kenke wanda꞉hali paeyao makeaeyeke halie. Ipikita꞉ ipika꞉ enisolo titi ame̱le̱ oni kenkena꞉ tolu lopaeya꞉me.
10 Kutupa oli hepeni nane pi ho̱la̱꞉make tiekema꞉ alota꞉ Ameta꞉ niki da꞉ta꞉monoyeke Koda꞉na꞉ pa꞉ta꞉la꞉la꞉eki ta a꞉pa꞉la꞉ handa꞉e. Ameta꞉ Koda꞉ ipiki kini hata꞉ ipika꞉ weleta꞉ peneme yaasa꞉ handa꞉e. Ameta꞉ ipika꞉ ma̱leke lila꞉ Ketisoma꞉ ipika꞉ handeteke hala꞉eki peneme yao wala꞉la꞉ handa꞉e. Pa ekipeke nika꞉ Koda꞉na꞉ puki tikitikina꞉ hata꞉ peliolo da kelepolo nika꞉ kamemanu ma̱leke lia hokeeki pa꞉la꞉me lo haya꞉ halita꞉ oli hepeni mina꞉pa꞉lao tolu lopaala꞉me.
11 Ipikita꞉ nika꞉ kame tonuma꞉ mo Sipisipi Ma꞉na꞉ Ikikina꞉ wema꞉ make mo ota꞉ ekie laa waleme ekima꞉ make bepolaya꞉me. Kutupa make ikana꞉ma꞉ ika꞉ da꞉ta꞉la꞉ ekita꞉ pina꞉ pa hoeyao homa꞉la꞉ ekita꞉ pa pulumeke laa lememe.
12 Koto ekina꞉ta꞉ oli hepeni make koto pa꞉ta꞉ haleme wanda꞉halio paeyao ta꞉na꞉ma꞉ homa꞉pee. Pate oni dawala pita꞉ kenke yaapota꞉ paala꞉e. Pa ekipeke hande Sadanita꞉ iki pa꞉ta꞉ a꞉pa꞉la꞉me. Kutupa ipikita꞉ hosiki nate lekesiki homeke ula꞉me hone witolo hata꞉ ota꞉ hoke mineke panka꞉la꞉me.
13 Mo popake itiki hake si tieke hombelekema꞉ ipikita꞉ mo kenke nane tolu lopaala꞉me hone wiaata꞉ mo hande weki mondu wia꞉ wanda꞉ minuluekema꞉yeke teliolo ombu haya꞉me.
14 Mo wanda꞉ta꞉ ipika꞉ da mo hapupapeke alena꞉ pena꞉yeketa꞉ ida tiekena꞉ popake yaapo halea꞉me. Koto pa꞉ta꞉ta꞉ mo popake itiki hake sima꞉ hoeyaapa꞉na꞉ bapi tepona꞉ yunki mindiki hata꞉ kaisepona꞉ handeteke halo pia꞉ pa꞉ta꞉e.
15 Kutupa mo popake itiki hake sima꞉ta꞉ ipika꞉ kake pa꞉ta꞉ yama꞉ epea꞉ ikali wopuma꞉ mo wanda꞉ telia꞉ mea pena꞉ lea꞉me. Handeta꞉ mo wanda꞉ ikali naa homena꞉yeke pia꞉me.
16 Kutu pia꞉pate kenkema꞉ mo wanda꞉ tamba꞉ minolo hata꞉ ipika꞉ kake a̱a̱ laa mo popake itiki hake sina꞉ kake pa꞉ta꞉ epea꞉ ikali mea neliaya꞉me.
17 Kutu pia꞉ ekina꞉ mo popake itiki hake si tieke hombelekema꞉ta꞉ mo wanda꞉ pa꞉ta꞉ mineke tieke pankolo hata꞉ ipika꞉ wekiwandiki ame̱le̱ a꞉nda꞉ pulu pea꞉me. Koto tapaketa꞉ mo Koda꞉na꞉ pi ula꞉ ekimanu opua Yesuma꞉ peneme yaasa꞉ ota꞉eki pa꞉ta꞉ kima꞉ na homeke hone tu laeme wanda꞉halie.
18 Kutupa mo popake itiki hake sita꞉ dawala houna꞉ tiao haya꞉me.