9
Yunki peao enisolona꞉ bu kanake
1 Kutupa mo yunki peao enisoloma꞉ ipika꞉ bu kanake lia꞉me. Hombulanka꞉ homeke oni kenkena꞉ honda꞉pa lopeekeeki pa꞉ta꞉ mo honiki na wiki naku tieke kiakena꞉ pota꞉ ki halea꞉eki handoa꞉me.
2 Mo hombulanka꞉ma꞉ mo naku tieke kiakena꞉ pota꞉ lombea꞉ dina꞉ta꞉ ti tieke yanka꞉leke opa꞉la꞉ lumuma꞉ handeke lumu hola꞉lu baeya꞉me. Mo lumuma꞉ta꞉ nate make ya make timba꞉la꞉ pamba haya꞉me.
3 Hombuta꞉ta꞉ mo lumu pa꞉ta꞉ yama꞉ a꞉pa oni kenkena꞉ lopememe. Kutupa ikita꞉ teihali manuma꞉ haleme honkopuma꞉ handeke honkopu halea꞉me.
4 Iki pa꞉ta꞉ta꞉ mo e alemanu pa꞉ta꞉ ambu make timanu make mandane ambumanu paeyao na hoeyaapa꞉peke laata꞉ hoeyaapeke ale homeketa꞉ mo Koda꞉na꞉ tomboma꞉ maka ika꞉ wenokona꞉ na ula꞉ wanda꞉hali homeke hoeyaapa꞉peke lea꞉me.
5 Mo hombuta꞉ma꞉ handeke ale manuma꞉ta꞉ mo wanda꞉hali homena꞉yeke lina꞉ dia꞉ya꞉la꞉pate pa kaisepo yunki hata꞉ natena꞉ homeke tanda tieke halolo ombu haena꞉ lea꞉me. Mo tanda tieketa꞉ mo teihalima꞉ poka꞉leke mina꞉la꞉ tanda tupa꞉e.
6 Koto yunki hata꞉ kaisepo tukiki pa꞉ta꞉ta꞉ mo wanda꞉halima꞉ homa꞉la꞉eki weilimipate na handa꞉ wilimikie. Homawee hone wilimipate homa꞉la꞉ ekita꞉ iki mina꞉pa꞉lao pindipa pelieke.
7 Mo hombuta꞉ titita꞉ mo a꞉nda꞉na꞉ poluekema꞉ tikitiki yao hala꞉ hosi ma꞉na꞉ manuma꞉ handememe. Ika꞉ ambokena꞉ta꞉ koloma꞉ wepiki you aka꞉ma꞉ handeke ale pambao ika꞉ leke popeleketa꞉ halina꞉ leke popelekema꞉ handea꞉me.
8 Ika꞉ itikita꞉ wanda꞉wekina꞉ hokulupiki itikima꞉ handaa ika꞉ kaketa꞉ laeonona꞉ kakema꞉ handea꞉me.
9 Ika꞉ hakokota꞉ ayenima꞉ wepiki hakokona꞉ yama꞉la꞉ alema꞉ handeke ekima꞉ tote pea kutupa ika꞉ popakema꞉ laeme e̱ma꞉ta꞉ mo a꞉nda꞉na꞉ polukuma꞉ ipupula yopula꞉ hosi ma꞉na꞉na꞉ aiela꞉ da꞉ta꞉ka mendekemanu yopulu leke nono pia꞉me.
10 Ikita꞉ mendeke hao teihalina꞉ pa꞉la꞉ tupa꞉ tekeke haememe. Kutupa mo wanda꞉halita꞉ kaisepo yunki hata꞉na꞉ ika꞉ mendekema꞉ tanda halo pa꞉la꞉ honkopu haememe.
11 Kini homeke ma꞉nda꞉ma꞉ iki handeteke hala꞉me. Ipikita꞉ mo honiki na wiki naku tieke kiakena꞉ handeteke hala꞉ enisoloe. Hibulu pima꞉ ipika꞉ bikita꞉ A꞉ba꞉dono. Kitiki pima꞉ta꞉ A꞉poliyono Koto bikita꞉ Hoeyaasa꞉ halie laa ala꞉me.
12 Titina꞉ paala꞉piki ka꞉nda꞉ tieketa꞉ koto paela꞉ handa꞉e. Doeki hoki naneta꞉ paala꞉piki ka꞉nda꞉ tieke yaapo epolo pa꞉la꞉eki pa ula꞉me.
Yunki mindiki peao enisolona꞉ bu kanake
13 Kutupa mo yunki mindiki peao enisoloma꞉ ipika꞉ bu kanake lia꞉me. Mo Koda꞉na꞉ puki tikitiki haya꞉ koloma꞉ wepiki olodana꞉ nepoko tonkopu nanema꞉ pi ho̱la̱꞉make epea꞉eki opua꞉me.
14 Mo pi ho̱la̱꞉makema꞉ mo yunki mindiki peao enisolo pa꞉ta꞉ alota꞉ Mo Yupoteitisi ikali tieke pa꞉ta꞉ tonkaala꞉ enisolo tonkopu ka꞉la꞉pa꞉ tapae lea꞉me.
15 Mo enisolomanu ka꞉la꞉pa꞉ tapaeya꞉me. Ikana꞉ma꞉ta꞉ mo kenke wanda꞉hali paeyao tepo tekilipa homeke ma꞉nda꞉ta꞉ ota꞉ do awa siki make ota꞉ do nate siki make ota꞉ do kaisepo siki make ota꞉ do bapi siki make epena꞉yeke wiala꞉ natena꞉ lina꞉yeke tikitiki yao haena꞉ lea꞉me.
16 Mo wanda꞉hali lulu polo pieke hosi hokina꞉ pitieke ami tapakena꞉ nambata꞉ I̱ pa꞉ta꞉ alota꞉ 200 milioni haliweki lea꞉me.
17 Kutupa yaka upama꞉ leke handoa꞉ ekina꞉ta꞉ mo hosi ma꞉na꞉ make ika꞉ hokina꞉ pitimi haliweki handoa꞉me. Kutupa mo haliwekina꞉ hakokona꞉ yameleme alena꞉ au la꞉la꞉eki manuta꞉ mo ti lankakema꞉ handa we pupa pua make oli ya punupa꞉la꞉ ekima꞉ handeke toopi sa꞉paeyana꞉ au lekeeki make mo hami pupapeke toopi solopana꞉ au lekeeki make au lea꞉me. Mo hosi ma꞉na꞉ manuna꞉ amboketa꞉ laeonona꞉ ambokema꞉ handaa ika꞉ kake pa꞉ta꞉ta꞉ ti uleke make lumu make ti na honi papeke lankake biki solopa opolu baeya꞉me.
18 Do ki yeni leke lita꞉la꞉ hau tepoma꞉ta꞉ mo wanda꞉hali tepo tekilipa homeke ma꞉nda꞉ta꞉ homo paeya꞉me. Mo hosina꞉ kake pa꞉ta꞉ opolu baeya꞉ ekima꞉ loa꞉me.
19 Mo hosi ma꞉na꞉ manuna꞉ honkoputa꞉ ika꞉ kake pa꞉ta꞉ make mendeke pa꞉ta꞉manu ula꞉me. Ika꞉ mendeke manuta꞉ amboke hake ketoma꞉ handea꞉me. Koto ekima꞉ta꞉ wanda꞉hali tanda peao haememe.
20 Do hau tepoma꞉ na lia꞉ wanda꞉halita꞉ ika꞉ wepia wia yeni pu haeme ale pa꞉ta꞉manu hoki na walememe. Ikita꞉ mo hoke temoko titi pa꞉ta꞉ make mo koloma꞉ make silipama꞉ make toopima꞉ make tima꞉ make toopi ti wepia wimiki alemanu pa꞉ta꞉ yeni pita꞉la꞉eki hoki na walememe. Mo handa꞉peke na yeke make pi na opua꞉peke make pi na lapeke ale manuna꞉ loa꞉me.
21 Kutupa make ika꞉ hali homena꞉ lilimieki make ika꞉ ti̱o̱ haumanu make ika꞉ loke hoeyaasa꞉ haumanu make pake nala꞉ ekimanu kone ota꞉ na kiaememe.