4
Paꞌali sog kopoksiningkotoy nog ain sinumolabuk dia ni Kristu
1 Dadi akon, og kikolobusuan ku koni sabap sog kopokokunut u dia sog Pogbayaꞌ. Bu pongonion ku dianiu nog og kotubuꞌ niu dini sog dunya modopot niu inangoy og polomotadon kituꞌ nog glegan nog Mikpongon dianiu dangan mionggat non amu sumolabuk dianon.
2 Sumboy kobon non ombabaꞌ tokodoy og bolotabat niu, bu pogbinotadoy amu, bu popayat niu og ponutus niu dianilan, bu poginompunoy amu bianan sog glolaman niu.
3 Bu pogopasoy niu og kopoksolabuk niu sabap sog Bolakat nog Mikpongon. Poꞌ piksolabuk non amu bianan sog kopoglogomigus niu.
4 Poꞌ og pigotowan ni Kristu pinonggiꞌ sog solabuk glawas. Bu og Bolakat nog Mikpongon solabuk da. Bu solabuk da og dodomaan niu dia sog gonggat nog Mikpongon dianiu.
5 Bu solabuk da og Kounutan ta. Bu solabuk da og piktonudan ta. Bu solabuk da og bunyag dianita.
6 Bu solabuk da og Mikpongon nog ion og Gamaꞌ nog glam nog gotow, bu ion dosop Pogbayaꞌ sog glam non. Bu ion dia sog glam non. Bu og poginangon non siꞌoy, dia non dosop pibian sog glam nog gotow.
7 Dadi, pigatulatul ni Kristu sog monala kotow dianita og kotoan.
8 Poꞌ maꞌ nini og sinulat sog Kitab,
“Dangan minangoy ion sog ditas, modakol ginoit non nog mikaum non mangka non bogoyoy sog gotowanan og popia non.”
9 Dadi, olo ma gidoy og pogolongon non koyon nog minangoy ion dituꞌ sog ditas? Og maꞌana non, minonog ion dini poguna sog glupaꞌan.
10 Dadi, ion og pogolongon koyon nog minonog sog glupaꞌan koni, ion non dosop ion og miktolabang kituꞌ asta sog bubunglangit bagun da ion moglop sog gliwag nog glangit bu glupaꞌan.
11 Ion dili og migbogoy nog popia dia sog pigotowan non. Og duma inimung non nog sosuguꞌonanan, bu og duma inimung non nog polomolatasanan, bu og duma inimung non nog polongustalanan, bu ngon dosop og polongipatanan nog miktamuy dianon, bu ngon dosop og polopanadanan.
12 Saꞌan binogayan og pigotowan nog Mikpongon nog maꞌ nituꞌ poꞌ bagun ilan mosimpan moktinobangoy bagun da posisayaꞌ kopagon ain og pigotowan non nog
13 boyaꞌan modopot nog glam ta og kopoksolabuk ta kituꞌ dia sog kopongandol bu sog kosabut ta paꞌali dia ni Kristu, nog ion non og Bataꞌ nog Mikpongon. Poꞌ bila maꞌ nituꞌ ita na, mimung posisayaꞌ og kosukup ta maꞌ da nog kohurup ni Kristu.
14 Dadi bila maꞌ nituꞌ ita na, diꞌ ita na mosobuꞌ maꞌ nog gombataꞌanan. Poꞌ og tud ta ondiꞌ na mogduaꞌduaꞌ. Otawaka, diꞌ ita na moit nog gininisan nog pomali bu gustalan. Poꞌ modakol og mokpanad nog sagya glimbung otawaka bigyak bagun moit og gotowanan dun.
15 Sugaꞌid non, bianan sog kopoktaluꞌ ta nog ain og motud sabap sog glolaman ta, og glam ta, mimung nog mamaꞌ non sog glam non, nog ion non si Kristu. Poꞌ ion pinonggiꞌ sog gulu bu ita sop pinonggiꞌ sog glawas non.
16 Dadi sabap dianon, og glawas non miksolabuk. Bu glam nog glangkapanan nog glawas non miksiningkotoy. Dadi og maꞌana non, bila monala kotow dianita, gomiton ta og kotoan kituꞌ nog binogoy dianita, bianan sog pokilolamoy ta mimung pododungag og pagon ta sog kosolabuk ta dia ni Kristu.
Og bogu kotubuꞌ ta dia ni Kristu
17 Dadi, sog bayaꞌ nog Kounutan ta, toluꞌon ku dianiu nog naꞌ niu na tokodoy unuton og polomotadon nog gotowanan koyon nog ain diꞌ mokokunut sog Mikpongon, poꞌ og dialom pikilan nilan koyon daꞌ doksuꞌ non.
18 Poꞌ og pikilan nilan koyon dia sog kodoloman. Daꞌ ilan kolakit sog kotubuꞌ kituꞌ nog miktidu sog Mikpongon poꞌ sabap sog kulang og sabut nilan paꞌali dianon bu sabap sog kopongmungyas nilan.
19 Dadi, sabap sog kiowaꞌan ilan nog sipog, inuakil nilan na og glawas nilan moginang nog glam nog gininisan nog diꞌ pia bu mogapas ilan tanan moginang dun.
20 Tibua amu, diꞌ maꞌ nituꞌ og bianan dun og sabut niu paꞌali dia ni Kristu.
21 Poꞌ midongog niu nododaꞌ paꞌali dianon, bu sabap sog kosolabuk niu dianon, kiponadan amu nog motud nog mitongow ta dia ni Isus.
22 Dadi, awaꞌ niu na og dan pikilan niu kituꞌ nog pigboyaꞌan nog dusa. Poꞌ sabap sog glegan nog dan pikilan niu kituꞌ nog molimbung, mioit amu sog polomotadon kituꞌ nog doksuꞌan non og glaꞌat.
23 Sugaꞌid non, sumboy kopongimboguan og dialom pikilan niu.
24 Bu suklioy niu na og dan pikilan niu nog pikilan kituꞌ nog diꞌ na pogboyaꞌan nog dusa. Poꞌ kituꞌ piongon nog Mikpongon dianiu nog mondom mimung amu dun mamaꞌ non bu dia ion kotongow sog polomotadon niu kituꞌ nog modulus bu pikilan nog molonuꞌ.
25 Dadi, naꞌ amu mogloput. Sugaꞌid non, monala kotow dianiu sumboy moktaluꞌ nog motud dia sog pakasi non poꞌ glam ta miksiningkotoy ita na sog kosolabuk ta dia ni Kristu.
26 Bu moglolingit amu siꞌoy, sumboy mongmayaꞌ amu da bagun amu ondiꞌ mokodusa. Bu og glolingit niu koyon, naꞌ niu podopotan nog sumindop gondow.
27 Naꞌ amu mogbogoy nog dalan nog boyaꞌan koyubaꞌan amu ni Kindagow dun.
28 Bu bila ngon og polonakow, sumboy lumotaꞌ na monakow bu mogusaha na ion mahatul bagun da ombaꞌis og kopoglokotubuꞌ non. Bu doma, bagun dosop ion mokotabang dia sog ain miskinan.
29 Bu takpil sog ponoluꞌon niu, naꞌ amu na tokodoy moktaluꞌ nog sosuku og mokolaton nog ponoluꞌon. Sugaꞌid non, taluꞌ niu ain tibua kopondoloꞌisogan dun og pakasi niu bila ombaꞌis toluꞌon sog tang koyon nog boyaꞌan kolongasan ain mokinongog dun.
30 Poꞌ bila poktoluꞌon niu og diꞌ kituꞌ pia, kosokitan og Bolakat nog Mikpongon dun. Poꞌ ion og tandaꞌ nog Mikpongon dianita nog ngon gondow non poluason non glam nog pigotowan non tidu sog bayaꞌ nog dusa.
31 Dadi, sumboy awaꞌ niu na glam nog kopoktaguꞌtaguꞌ niu bu og glolingit nog pikilan niu, bu og pokangit niu. Bu sumboy daꞌidun moginopisoy otawaka monompolaꞌ otawaka mogbolotibot.
32 Sugaꞌid non, kololat amu nog pakasi niu bu poktinobangoy amu. Bu sumboy sop moginompunoy amu maꞌ da nog kopongampun nog Mikpongon dianiu sabap sog kosolabuk niu dia ni Kristu.