6
ङोंइती शेंशो लोव़ लेंशा मशेंचा
1 मोपतीके ख्रीस्त आ पर्बम शेंचा माल्शो लोव़ लेंशा मशेंचा। में क्येङा लाक्शा पाको दुम्य। ङोंइती शेंचा माल्शो लोव़ चहिं मार बाक्ब देंशा हना, मरिम्शो गेय पचा प्रोंइशा, आन थुं परमप्रभु यावे गे लेत्चा, परमप्रभु यावे कली थमा सुइक्चा, ब्वाक्कुम ख्रुम्शा ग्रुंइपांइसीचा,
2 मार मार चिक्चा शेंतीके, मुर आन तारी गुइ वोइक्चा, बेक्शो रे सेंसीशा ब्रोंइचा नु गेना हना यो निसाफ पचा आ पर्बम लोव़ बाक्ब।
3 परमप्रभु यावेमी आंइ कली मोदेंशो शेंचा गेप्तु हना, गो शेंनीकी।
4 मारदे हना ङोंइती शेंतीक लोव़ रुप्शा, परमप्रभु यावे आ छेङछेङ तशा, आ सक्ति तशा, परमप्रभु यावे आ सोक्तीम ब्रीशा,
5 परमप्रभु यावे आ लोव़ ङा शिशी रुप्शा नु मेको जाक्चशो आ राज्य ङा सक्ति आन कली लेंशा शेंचा शोर गाक्शो बाक्ब। मारदे हना सुम मेको नेल्ल तशा यो, हिब्रू १०:२६-२९; २पत्रुस २:२०
6 मुल मेको नेल्ल ताइक्ताक्म हना, मेको आन कली ङोंइती खोदेंशो पा लेंशा नक पा वोइक्ने मचाम्सीब। मारदे हना आन पशोमी परमप्रभु यावे आ तौ कली लेंशा शीम केप्शा कांटी थोक्शा क्याइश्शा मुने तोक्नीम।
7 माल्शो रेउ यिमेनु, ख्रुम्ब आ माल्शो बाली नाली ताप्तु हना, परमप्रभु यावेमी मेको रू कली आसीक गेब।
8 माल्शो रेउ यिशा यो चू नु सुवा ला वात हना, मेको रू शोर गाक्शा, सराप राइब। मिनु मी सुइश्शा क्रोइक्चा पुंइसीब।
परमप्रभुमी आ लोव़ खाप्ब
9 आंइ दाक्शो लोक्बपुकी, गोपुकीमी ओदेंशो लोव़ पाइतक हना यो, इन कली तशा, गे पाप रे ब्रोंइचा तशो ननी, दे थमा सुइक्नीकी।
10 मारदे हना परमप्रभु यावे आ नेंमी अरु थमा सुइक्ब आन कली वारच पा रिम्शो पाइतीनी। मुल यो रिम्शो पाइनीनी। मिनु मेकोमी इन रिम्शो पशो गेनायो मप्रेंब। हिब्रू १०:३२-३४
11 गे नेल्लेमी नेल्ल क्येङा नोले सम्म “परमप्रभु यावे आ देंशो नेल्ल जाक्दीप्ब” दे थमा सुइक्चा मप्रोंइतीक सक्ति तने, दे मिम्नीकी। हिब्रू ३:१४; फिलिप्पी १:६
12 मचाप्नुङ देंब मदुमीने। “आ देंशो जाक्दीप्ब” दे आ थोक्शा पशो लोव़ थमा सुइक्ब खोदेंशो पने। मेकोपुकीमी फाल्शा, थमा सुइश्शा, परमप्रभु यावे आ देंशो जाक्दीश्शो ताइनीम।
13 परमप्रभु यावेमी अब्राहाम कली लोव़ गेवानु, आ क्येङा ठेयब सुइ मबाक्तीके आंम आ नें थिशा कसम जशा
14 “इ कली थमा पा आसीक गेनन। इ खिं ङा मुर सोशा बोशा, शुश दुम्शा नेल्ल रागीम ब्रीपाइक्नुङमी” देंशो बाक्त। उत्पत्ती २२:१६-१७
15 मिनु अब्राहाममी शुश बर्स सम्म रिम्शा बाक्शा, परमप्रभु यावे आ देंशो नेल्ल लोव़ गाप्शो ताप्तु।
16 मुरपुकीमी यो कसम जामेनु, आन क्येङा ठेयब आ नें थिशा कसम जाइनीम। कसम जशोमी आन लोव़ थमान सेल्नीम। प्रस्थान २२:१०
17 मोपतीके परमप्रभु यावेमी “आं गेशो लोव़ गेनायो मफाइक्नुङ” दे आ गेशो लोव़ ताइब आन कली रुप्पाइक्चा, दे कसम जशा, आ लोव़ थोक्ता बाक्त।
18 मिनु परमप्रभु यावेमी गेनायो जोल मपाइब, आ गेशो लोव़ नु आ कसम जशो, एको निक्शी गेनायो मफांइसीनीस दे तुइश्शा, गो सजाइ तचा रे प्रोंइचा पुंइसीबपुकी इं ङोंइती वोइश्शो आस तचा कली इं थुं बारपाइक्चा ताइनय।
19 मेको आस चहिं इं थुं ग्येत्थ लुक्च पचा मगेब ग्याइक्तीके खोदेंशो बाक्ब। मेको आस नेल्ल क्येङा आगा ङा चोव़खो कोठा ङा फारतीक वा आगा बाक्ब। लेवी १६:२,१२
20 येसु मेल्कीसेदेक आ खाल ङा ठेयब चढ़ेब नु इं कली लां कोंइब दुम्शा, नेल्ल क्येङा ङोंइती मेकेर ओव़दीश्शो बाक्ब। हिब्रू ५:६