6
परमप्रभु पाप आ पर्बम गाइश्शो
1 परमप्रभु यावेमी मार देंबा, इन नोफा दाइश्शा नेनीन “बोक्कीन। मिनु पहाड आन ङोंइती इन देंचा माल्शो लोव़ शोव़ङीन। मिनु डांडापुकीमी इन लोव़ नेन्मेक्ल। इजीकीएल ६:२
2 गे डांडापुकी नु गेना हना यो लीब रागी ङा जग, परमप्रभु यावेमी दोपा निसाफ पाइबा, मेको नेनीन। मारदे हना मेकोमी आ मुर आन कली निसाफ पचा चिक्शो बाक्ब। आ दोस गेशो नोफा दाइश्शा नेनीन। मारदे हना आ मुर आन कली मेको के लोव़ बाक्ब। मेकोम इस्राएल कली निसाफ पाइब।
3 आं मुरपुकी गो इन कली मार पङा? गो इन कली मार श्येत गेङा? आं कली देनीन। येरमीया २:५
4 गो इन कली इजीप्त रे एक चाक्तन्नी। मिनु इन वाइलीम वाइल दुम्शो रागी रे प्रोंइतन्नी। इन कली लां कोंइचा कली मोसा, हारून नु मिरयाम आन कली सोइक्ताक्ङमी। प्रस्थान १५:२०
5 आं मुरपुकी, मोआब ङा पिप बालाकम मार सल्ला पशो बाक्मे, मेको मिम्तीन। बेओर आ तौ बालाममी मेको कली मार लोव़ लेत्ता, मेको मिम्तीन। शित्तीम रे गिल्गाल सम्म ङा लांमी गाक्शोनु, मार मार दुम्मे, मेको मिम्तीन। मिनु परमप्रभु यावेमी इन कली दोपा प्रोंइशो बाक्मे, मेको तुइक्नीनी” देंत। गन्ती २२:-२४:-; यहोसु २:१; यहोसु ४:१९
6 गो मार कुरशा परमप्रभु यावे आ ङोंइती जाक्ङा? मार चाक्शा, इर ङा परमप्रभु आ ङोंइती बाम्ङा? मार चोशा चढ़ेतीक चाक्शा, आ ङोंइती जाक्ङा? मेको आ ङोंइती बर्स का दुम्शो ब्यफ चाक्शा, जाक्ङा? भजन संग्रह ५०:८-१३; आमोस ५:२२
7 परमप्रभु यावे हजार हजार सांड तशा ग्येरबा? मार १० हजार तेल के खोला तशा ग्येरबा ङा? गो आं पाप आ पर्बम आं ङोंइती जरमेशो तौ गेचा माल्नुङा? मिनु आं थुं ङा पाप आ पर्बम आं आल गेचा माल्नुङा?
8 परमप्रभु यावेमी इन कली, गे बेक्शा लाइब मुर, इन कली मार रिम्शो बाक्मे नु मार पचा माल्नीनी, मेको देंशो बाक्ब। मार देंशो बाक्ब देंशा हना, गे ठीक निसाफ पने, शिशी पतीक कली दाक्तीन। मिनु इन परमप्रभु आ ङोंइती ब्रेम्शो दुम्शा गाक्कीन। ब्यवस्था १०:१२; १सामुएल १५:२२
यरूसलेम कली दोस गेशो
9 परमप्रभु यावेमी सहर कली “आं कली मान पा हिंचा इन कली श्येत रे प्रोंइतीक दुम्ब। गे थर ङा मुर नु सहर ङा ग्रुम्तीक ङा मुर आन लोव़ नेनीन।
10 गो मेको आ अरेशो मटीब आ खिं ङा मरिम्शो पा चेम्शो शोंप प्रेंदु? इन आइक्च सेल्शो सराप रशो पुक्तीक प्रेंदु? लेवी १९:३५
11 मार गो इन मरिम्शो नाक्तीक नु जोल पा नाक्तीक ढक के थैलो वोइक्ब कली दोस मताइब सेलु? हितोपदेस २०:१०
12 मेको आ शोंप पाइश्शो मुरपुकी हुश ख्राक्श पोक्तीकेम ब्रीशो बाक्नीम। मेको सहर ङा मुरपुकी जोल पाइनीम। मेको आन शोव़ जोल पतीकेमी ब्रीशो बाक्ब।
13 मोपतीके गो इ कली खतम पोक्चा गोशो बाक्नुङ। गो इ कली इ पाप आ पर्बम श्येत्थ पोक्नुङ।
14 गे जचा थोव़क जाइनेवे, तन्न मरूनेवे। मिनु इ कोव़ज शोव़लु बेक्शोन बाक्ब। गे खेक्चा दा खेक्नेवे, तन्न उप्शा वोइक्ने मचाप्नेवे। गे मार खेक्नेवे, मेको नेल्ल लडाइम खतम दुम्ब।
15 गे मार मार शोक्चा दा शोक्नेवे। तन्न खुप्चा मताइनेवे। तेल रवा आ फल ख्राक्चा दा ख्राक्नेवे, तन्न इ रांम तेल ख्रेक्चा मताइनेवे। गे अङगुर ख्राक्चा दा ख्राक्नेवे, तन्न अङगुर शांबु तूचा मताइनेवे। ब्यवस्था २८:३८-४०; आमोस ५:११
16 गे ओम्री आ अरेशो लोव़ पाप्तीवी। मिनु आहाब आ खिं ङा मुर आन पशो नेल्ल पाप्तीवी। मिनु मेको आन गेशो अर्ती टिप्तीवी। मोपतीके गो इ कली खतम पोक्नुङ। मिनु इ मुर आन कली शुक्शी पतीक सेल्नुङ। गे आं मुर आन गाइश्शो ताइनेवे” दे ब्रेन्न ब्रेन्न बाक्ब। १राजा १६:२९-३३