26
मुर आन दाते ङा मरिम्शो गेय
1 हुप्शो महिनाम फुं नु अन्न रुप्ची ना रेउ यिशो खोदेंशो पा मूर्ख आन कली मान पशो मगारचा ङा बाक्ब।
2 फुर फुर पा बेरब भङगेरा नु हुरुर पा बेरब बेल्लुम खोदेंशो पा मगारचा ङा सराप शोर गाक्शो बाक्ब।
3 शारा कली सिरकाना, गधा कली करेली नु मूर्ख आ ची कली कोक्के माल्ब। हितोपदेस १९:२९
4 मूर्ख कली मूर्ख खोदेंशो पा लोव़ मलेत्तो। मो पाप्तीवी हना, गे यो मूर्ख दुम्नेवे।
5 मूर्ख कली आ मूर्खे खोदेंशो पा लोव़ मपाप्तीवी हना, मेकोमी आंम कली निप्स पाइश्शो मिम्सीब।
6 सुम मूर्ख कली लोव़ चोव़थ सोइक्बा, मेकोमी आंम खोइली ख्रोइश्शो नु हुश ख्राक्श पोक्शा श्येत जशो खोदेंशो बाक्ब।
7 मूर्ख आन देंतीके लोव़ खोरन्डे मुर आ खोइल खोदेंशो पा शोर गाक्शो बाक्ब।
8 मूर्ख कली मान पचा, फुल्लु कली श्येलेमी फ्रेंशा आप्चा माल्शो खोदेंशो बाक्ब।
9 शांबु दुक्शो मुर आ गुइमी चू ओव़शो खोदेंशो पा मूर्ख कली देंतीक लोव़ बाक्ब।
10 मूर्ख मुर नु लां गाक्ब मुर आन कली गेय पपाइक्चा, हेंथे लिब्रा आप्शा गार सेल्ब मुर खोदेंशो बाक्ब।
11 कुचुममी मेशा लेंशा जशो खोदेंशो पा, मूर्ख मुरुमी मूर्खे गेय लेंशा पना पन बाक्ब। २ पत्रुस २:२२
12 आंम कली “जोक्ब तुइक्ब मुर नङ” दे मिम्ब मुर क्येङा मूर्खन रिम्शो बाक्ब। हितोपदेस ३:७
13 अल्से मुरुमी “लाङगामी गुप्स का बाक्ब। लां मेर गुप्स हिरशो बाक्ब” देंब। हितोपदेस २२:१३
14 लाप्चो रोक्शो चोक्शो खोदेंशो पा, अल्से मुर आ ब्राख्येमी एर ओंथ लोक्सीशा इप्ब। हितोपदेस ६:९-११
15 अल्से मुरुमी आ गुइ खमेम ख्रुम्ब। मिनु मेको गुइ आ शोव़ सम्म लाइक्चा यो अल्सी पाइब। हितोपदेस १९:२४
16 शुश रुप्शा लोव़ लेप्ब ७ जना मुर क्येङा मूर्खमी आंम कली “रुप्ब जोक्ब नङ” दे मिम्सीब।
17 सु मुर आन जितीक खेतीकेम ओव़बा, मेको लांम गाक्शो कुचुम आ नोफा ग्याइश्शा कीशो खोदेंशो बाक्ब।
18 दोपा निप्स ग्यशो मुरुमी ब्रशो लिब्रा हेंथे पा आप्बा,
19 मोपा आ नेक्था ङा मुर कली जोल पशा नोले “गो इ कली शाक्ता ला” देंब।
20 शी मबाक्त हना, मी काप्ब। मोदेंशो पा नोफा मुइक्ब मुर मबाक्त हना, जिचा खेचा मबोक्ब। हितोपदेस २२:१०
21 दोपा मी मुइक्चा कली कोइला नु ब्रचा कली शी माल्बा, मोपा रीब पा गाइक्ब मुर जिचा पोक्ब बाक्ब। हितोपदेस १५:१८
22 नोफा मुइक्ब आन लोव़ शुश ब्रोव़शो जचा थोव़क खोदेंशो बाक्ब। मेको मुर आन थुं सम्म जाक्दीप्ब। हितोपदेस १८:८
23 मरिम्शो थुं ङा ब्रोव़शो लोव़ खप के बोसुम चांदी ख्रेक्शो खोदेंशो बाक्ब।
24 जोरी सत्रुमी शोव़मी रिम्शो लोव़ पाइनीम। तन्न आन थुंमी मरिम्शो मिम्नीम। मत्ती १२:४५
25 इ जोरी सत्रुमी गे नु ब्रोव़शो लोव़ पाप्तु हना यो, मेको कली थमा मसुतो। मारदे हना मेको आ थुंमी ७ ओटा ग्रांग्रा दिचा ङा लोव़ ख्रुइश्शा बाक्नीम।
26 सुमी काइ मदाक्शो मुर कली “गो इ कली दाक्नुङ” देंखु पाइबा, मेको आ देंखु पतीके मुर आन ग्रुम्तीकेमी ग्रूब।
27 सुमी मुर पिक्चा, दे खाल्टा दोइबा, मेको आंमान बिक्ब। सुमी मुर कली चिप्पाइक्चा, दे फुल्लु लोक्बा, मेको आंमा लोक्सीशा थिश्शा लाइब। भजन संग्रह ६:१६; उपदेसक १०:८
28 जोल पाइबमी सु कली जोल पवा, मेको कली काइ मदाक्ब। मिलो शिलो लोव़ पाइब मुरुमी नेल्ल खतम सेल्ब।