Ebaruwa esookere eya Paulo yajojera
AWAKORINTHO
Amangʼana ku owuimpi
Ebaruwa eya Awakorintho osookere, yajojwa no *Omutumwa Paulo ku Awakorintho awaganyire ku *Kristo. Yajojwa omwaka ogwa 55 ni Paulo yawanga ku omugizi ogwa Efeeso oguri mu ekitemo ekia *Eesia Ekitono. Ni Paulo yawanga ku olugendo lwae olwa okuwiri olwa okulanzia *injiili, yatanika ekaniisa Korintho, omugizi omunene ino mu ekialo ekia Ewugiriiki kandi ogwamanyika ki ansi aa ekiniiwo.
Ni Paulo yamala okuema Korintho, okuikululana agati ya awantu ne eminyako-nyaako gindi giaingira mu ekaniisa kandi Paulo yatumrwa amangʼana mu ebaruwa eyawanga ne embuuzia enyingi ku amangʼana agagawukane-gawukaane. Kutio, yajoja ebaruwa eno okuwalaga amaingirizio gaae ne ewintu ewia waawanga ni wasugaane wakole. Eminyako-nyaako giawangao ni giemera ku okutawurizania okwa *Awayaudi na Awagiriiki mu enkola ziawu eziwanga ni zigawukaane. Awayaudi waagalanga mbwe awakazi Awagiriiki waikale enyima kandi wasiwe ewitambaaya ku emitwe ne ewieni wiawu kiomo enkola yaawu yaagalanga. Awagiriiki woona ngawakawonanga ekiwiiwi no okuwa na awakazi awasoodani mu ekaniisa kiomo ediini ziawu zindi ziakolanga. Lwona, Awagiriiki waagawulanga owulamu owua mu omwoyo no owua omuwiri kandi waawonanga owuoni ki ekintu ekiambre mala owulamu owua mu omwoyo wuengʼene. Kutio, waatoolanga owulamu owua mu omuwiri ki owuri ale ne ekikaetwa owuoni. Paulo yawajojera ku ekiwiiwi ne enkola ziawu kandi yawasikirra ku ekia wasugaane wamanye kandi wakole mu owulamu wuawu owua Owukristo. Mu amiiso amakate-kaate 13, yawajojera ku olugonzi, oluri ekintu ekinene mu owulamu owua Awakristo.
1
Amakeezio agasookere
1 Ni inze Paulo, owaetwa okuwa *omutumwa owa Yesu *Kristo ku okuagala okwa Katonda, ni ndi alala ni wamwifu Sositheneesi.
2 Mbajojera ebaruwa eno inywe awantu awa ekaniisa eya Katonda ekiri ku omugizi ogwa Korintho, awantu awamiire okueruyiwua ku Yesu Kristo kandi awaeterwe okumenya owulamu owutengeekwe emberi wa Katonda, alala na awantu woona asi-uasi aa wari, awaeta eriina aria *Omwami Yesu Kristo ori Omwami waawu no Omwami iifu twona.
3 Muwe no owusiza no owuolu owuema ku Soifu Katonda alala no Omwami iifu Yesu Kristo.
Paulo aikazia Katonda ku Awakorintho
4 Nyiranizia Katonda otioo enyinga ziona ku inywe aeniki amiire okuwa-aa owusiza wuae ni kuwitra ku Yesu Kristo.
5 Aeniki mu okuwa kwinyu mu owulala ni Yesu Kristo, Katonda amiire okuwa-aa ensereki mu engira ziona, mu okugamba-gamba kwinyu kugia mu okumanya okwa mumanyire nakwo ewintu ewia omwoyo.
6 Ensereki zino ziri ekilago mbwe amangʼana aga twawalaga ku Yesu Kristo gari ne ensimbiiro ku inywe.
7 Kutio ewulao empanwa eya mu omwoyo namba endala eya mutakaaye ni murindirra okusasulwa okwa Omwami iifu Yesu Kristo.
8 Kristo omwene aaza okuwarinda ni muri awakalangufu mu amiire goona aga owulamu wuinyu, kugere muwe aweeru awawulako embala, *Owuire owua Omwami Yesu Kristo arikengra awantu ekiina.
9 Katonda owawaeta muwe mu owulala no Omuzia waae Yesu Kristo Omwami iifu, arindre endagano yaae.
Okugawukana kuweere mu ekaniisa
10 Waamwifu, mbisasaamre mwona ku eriina eria Omwami iifu Yesu Kristo mbwe omuntu ki omuntu awe ne empurizanio no omwina waae kugere engawuzi zitaaza ziawa agati iinyu, kandi mbwe muwe awantu awa-ambaane ti mu amaingirizio no okuagala kwinyu.
11 Waamwifu, wario awantu awa mu enyumba eya Kloe, awandetiire amangʼana mbwe zirio ensoolo agati iinyu.
12 Ekia mboola kiri kitino: Wario awandi ku inywe awawoola mbwe, “Inze ndonda Paulo,” na awandi mbwe, “Inze ndonda Apolo,” na awandi mbwe, “Inze ndonda *Keefa” na awandi woona wawoola mbwe, “Inze ndonda Kristo.”
13 Mbawuuzia, Kristo ono mumugawuule kameka? Paulo yoona *yawambwa ku omusalaaba ku amawi giinyu? Kusi mwabatiiswa ku eriina eria Paulo?
14 Ndi no owusangaavu mbwe awulao-uwula omuntu ku inywe owanyabatiisa ogawuuke ni Krispaasi ni Gaayo.
15 Kutio awulao omuntu oesa okuwoola mbwe mwabatiiswa ku eriina riange.
16 (Ee, nganyire mbwe lwona ni inze owabatiisa awantu awa mu enyumba eya Stefaano. No owugawuuke nawo, nampingirizia mbwe ario omuntu wundi owanyabatiisa kandi.)
17 Aeniki Kristo ngakantuma okugia okubatiisa awantu yaaya, ni yantuma okugia okulanzia *injiili. Kandi ngʼankola otio na amaganga aga omuntu yaaya, aeniki okwo kukagera *omusalaaba ogwa Kristo guwule na amaani.
Amaganga aga Katonda gagawuuke na aga ekialo
18 Amangʼana aga okufwa okwa Yesu ku omusalaaba, no owumaya ku awantu awateeka, ni ku ifwe awanunulwa gari amaani aga Katonda.
19 Kuri mala kiomo kwajojwa mu endagano otino:
“Nyiza okuona amagezi aga awantu awaingirizia mbwe wari wagezi,
kandi amaganga aga awaganga nyiza okugera gawule ne emirimo.”
20 Katonda nio omiire okugera amagezi aga ku ekialo kuno goona gawa owumaya. Kutio awagezi wari? Nakuwa *awagerezi awa endagirra wariai? Kusi awagambageeza wari?
21 Aeniki Katonda, ku amaganga gaae omwene, yagera awantu awa ekialo okumumanya na amaganga gaawu aweene kiwa ekintu ekitaesekana. Ni kwamuomerezia okukola na amangʼana agatulanzia aga awantu waeta mbwe owumaya gano, okununula awantu awaganyire ku Yesu.
22 *Awayaudi iwo waagalanga mbwe wawone amankono, na awantu awatari Awayaudi iwo waagalanga amaganga,
23 ni ifwe tulanzia Kristo owawambwa ku omusalaaba. Ku Awayaudi amangʼana agatulanzia gano gafwana iwaale eriwaguunya, ni ku awantu awatari Awayaudi gari owumaya.
24 Ni ku Awayaudi alala na awatari Awayaudi awa Katonda yaeta, Kristo ari amaani kandi amaganga aga Katonda.
25 Aeniki owumaya owua Katonda wukirre amaganga aga omuntu ale kandi owugata owua Katonda, wukirre owukalangufu owua omuntu ale.
26 Waamwifu, muingirizieko kiomo mwawanga olwa mwaetwa. Mberi mumanyire mbwe nikulondokana ni kiomo awantu wawona ewintu, owungi wuinyu ngamukawanga awantu awagezi yaaya, lwona ngamukawanga awantu awari na amaani namba awaaiwulwa mu emigizi eminyazi.
27 Ni Katonda yalowola ewintu ewia awantu waeta mbwe owumaya ewio, okusuusia awantu awaieta mbwe wari awaganga. Lwona yalowola ewintu ewia awantu waeta mbwe wigata kandi ewiwula amaani, okusuusia awantu awaieta mbwe wari awakalangufu kandi awari na amaani.
28 Katonda alowola okukola ne ewintu ewiri ansi kandi ewia awantu awa ekialo waregere ki ewintu ewiwula emirimo, okusuusia ewintu ewia awantu watoorre ki ewintu ewinene,
29 kugere omuntu-umuntu ataaza yaitumbula emberi wa Katonda.
30 Katonda nio owagera ni muwa ku Kristo, Kristo ori amagezi giifu agaemere ku Katonda kuwuene. Ee, ni iye owuigolovu wuifu, okumenya kwifu owulamu owutengeekwe kandi nio awatuoloorra omusango kugere tuwe awantu awa Katonda.
31 Kutio kuri mala kiomo endagano ewoola mbwe, “No omuntu aagala okuitumbula, asugaane aitumbule ku Omwami Katonda.”