Ebaruwa eya okuwiri eya Paulo yajojera
AWAKORINTHO
Amangʼana ku owuimpi
Ebaruwa eya Awakorintho eya okuwiri yajojwa no *Omutumwa Paulo na ari Makedoonia, emienzi emitono ni yamala okujoja ebaruwa eya kuluweri. Korintho nigwo ogwawanga omugizi omunene ogukirre giona mu ekitemo ekia Akaaya, ekiri emilambo owa ekialo ekia Ewugiriiki. Paulo yajoja na awalaga ku okugia kwae Korintho okuwawona okwazanga okuwa owugeni wuae owua okusatu. Owugeni wuae owua okuwiri owuri mu ebuuki eya Emirimo egia Awatumwa 19, aa awoola mbwe wuawa owua owululu aeniki kwamunigirizia okugaania ekaniisa wukalu. Okugia Korintho no oema Efeeso ngakukawanga ekintu ekikalu aeniki amaato gaawangao agaawungulanga agati ao.
Kuwonekana mbwe ebaruwa eya Paulo esookere no olugendo lwae olwa okuwiri ngalukamala eminyako-nyaako giona egiawanga mu ekaniisa. Awandi mu ekaniisa eyo ngawakamuagalanga kandi waalowa okuwa kwae omutumwa ne emirimo giae giona. Waamugamba-gambako mbwe ngakakolanga geeza na amasendi kandi Paulo aitatirra mu ebaruwa eno na awalaga kiomo engira ziae ziri enzeru nyaluwega olwo. Awaizurizia mbwe wagie emberi okukunza amasendi agagiira awataka awari Yerusaleemu. Lwona alaga awakangasi awa ekaniisa mbwe waingizie awareeta erioga wawareete ampi kugere na ariiza okuwawona, awe ne emirimo eminyoowu egia okuwakalangusia, kugere ataaza yawa no owululu nawo. Ebaruwa eno ewoola geeza na amaani goona mbwe okurekerana owuoni kulootu. Lwona egamba-gamba ku owunene owua *endagano empia eya *Omwoyo Omweru, okukirre endagano enkulu eya *Ensikirra.
1
Amakeezio agasookere
Ni inze Paulo *omutumwa owa Yesu *Kristo mu okuagala okwa Katonda, ni ndi alala ni wamwifu Timotheeo.
Mbajojera ebaruwa eno inywe awantu awa ekaniisa eya Katonda eri ku omugizi ogwa Korintho, alala na awantu awa Katonda awari mu ekialo ekia Akaaya kiona.+ Muwe no owusiza no owuolu owuema ku Soifu Katonda alala no *Omwami iifu Yesu Kristo.
Paulo aikaziizie Katonda
Katonda ori Swawu Omwami iifu Yesu Kristo atondowolwe. Ni iye Ise ori na amagongi kandi Katonda owa owuorezi owua omwoyo wuona wuemako.+ Atuorezia emioyo mu emidambo giifu giona, kugere twona tuese okuorezia emioyo egia awantu awari mu emidambo egigawukane-gawukaane, ni turi no owuorezi owua omwoyo owua ifwe aweene tutuukiire okuema ku Katonda. Aeniki kiomo emidambo emingi gituuzra ku okuwa kwifu mu owulala ni Kristo, nintio lwona tuuza okutuukra owuorezi owua omwoyo owungi owukirre ni kuwitra ku Kristo.+ Ifwe ni tuwona eminyako-nyaako, inywe mutuukra owuorezi owua omwoyo alala no owuinunuzi. Ni tuoreziwua omwoyo, kugera mwona ni muwa no owuoreevu owua omwoyo owugera ni musikia emioyo mu emidambo emifwanani ne egia ifwe twona tuwitamo. Tuteere omwoyo oguisimbiire aeniki tumanyire mbwe kiomo muwa ni ifwe alala mu eminyako-nyaako, nintio lwona muuza okuwa ni ifwe alala mu okutuukra owuoreevu owua omwoyo.+
Waamwifu, ngatuagala mbwe muwe ni mutamanyire eminyako-nyaako egia twawa nagio mu ekialo ekia *Eesia, yaaya. Ee twawona emidambo eminene egitukirre ale-ale, egiagera ni tutoolao omwoyo mbwe ngatuuza okuwaao awalamu.+ Kuwuene, mu emioyo giifu ifwe aweene twaikengera ekiina mbwe tufwire chee. Na ago gaaikola kugere tutaaza twata emioyo giifu ku ifwe aweene yaaya, ni tute emioyo giifu ku Katonda oziusia awafu.+ 10 Katonda yatununula mu emidambo emiwiiwi egifwana ne egio kandi akiaza okutununula. Iye nio owa tuteereko emioyo giifu mbwe aaza okugia emberi okutununula,+ 11 mwona ni mututunzia mu okusawa, kugere awantu awangi wairanizie Katonda otioo ku owusiza owungi owua atulagre ku okuirania okusawa okwa awantu awangi.+
Ekiagera Paulo na agalusia olugendo lwae
12 Ekintu ekia tuesa okuitumbula nakio, ni mbwe emioyo giifu giganya ni ifwe mbwe owulamu wuifu ku ekialo kuno, ni ino-ino agati iinyu, wumiire okuwa no owuigolovu no owuene owuema ku Katonda. Tumiire okukola otio ngʼani na amaganga aga ekialo yaaya, ni no owusiza owuema ku Katonda.+ 13 Aeniki ngatuwajojera amangʼana aga mutaesa okusoma namba okuwurra yaaya. Ndi no okuganya mbwe 14 kiomo mumiire okutuwurra wutono otio, muuza okumanya geeza ino mbwe muri iwaga okuitumbula ni ifwe mala kiomo twona tuuza okuitumbula ni inywe olwa Owuire owua Omwami Yesu wurituuka.+
15 Aeniki nyawanga no owusiani ku okuwurizania okurio agati yange ni inywe, nyawanga no omupango ogwa okuuza okuwa omugeni iinyu owusookere kandi nyize mbe omugeni iinyu olwa okuwiri. 16 Nyagalanga okuuza okuwagenia ni mbita ni ngia Makedoonia, kandi ni nyirana ni nyema Makedoonia. Nyagala muuze muntunzie mu olugendo lwange olwa okugia Yudeea.+ 17 Ngʼanyakakola omupango guno ni ntaingiriizie geeza yaaya. Lwona ngʼankola emipango giange kiomo awantu awa ekialo awaganya mbwe “Ee-ee” kandi wuangu wagaluka wawoola mbwe “Yaaya-yaaya” wakola.+ 18 Ni mala kiomo Katonda arindre amangʼana gaae, amangʼana giifu aga tuwalaga gano ngʼana amangʼana aga okuzogaania eminwa iwiri, okuganya mbwe “Ee” kandi okulowa mbwe “Yaaya.” 19 Aeniki Yesu Kristo Omuzia owa Katonda, owa inze ni Siila ni Timotheeo twalanzia agati iinyu ngazogaania eminwa iwiri, mbwe “Ee” kandi “Yaaya,” ni ku iye amangʼana agaifuuwre goona gawa mala “Ee” engʼene.+ 20 Kuri kutio aeniki ewintu ewia Katonda yaifuuwa okukola wiona, wikawa wimeka, wituuka kuwuene ku Kristo kandi wiri “Ee.” Kutio ni kuwitra ku Yesu, tuwoola mbwe “*Amin” oku-aa Katonda owunene.+
21 Katonda amiire *okutuwaka na amavuta kugere ifwe alala ni inywe tuimerre owuisimbiriire ku Kristo. 22 Atuteereko ekilago ekia okuwa awantu waae kandi atueere *Omwoyo gwae Omweru ki empanwa esookere etumanyisia mbwe kuwuene Katonda atuwikiire ensereki emberi.+
23 Katonda omwene ari omuwoni wange mbwe okuamba okwa nyawa-ambra amagongi nikwo okwagera ni ndeka okuuza Korintho kiomo nyaagalanga.+ 24 Ngʼani mbwe tuwanigirizia okuta okuganya kwinyu ku ewia tuwalaga, yaaya. Ifwe turi awemirimo alala ni inywe kugere muwe no owusangaavu, kandi tumanyire mbwe okuganya okwa muri nakwo nikwo okugera ni muisimbiriire wukalu.+
+ 1:1 1Kori 4:17 + 1:3 Efee 1:3; 1Pet 1:3 + 1:5 Zabu 34:19; 2Kori 4:10 + 1:7 2Kori 4:15, 17 + 1:8 Awat 19:23; 1Kori 15:32; 2Kori 4:8 + 1:9 Awaru 4:17 + 1:10 2Timo 4:18 + 1:11 Awaru 15:30 + 1:12 Awat 24:16; 1Kori 1:17, 19, 31; 2:13; 2Kori 2:17; Awaib 13:18 + 1:14 Filiip 2:16 + 1:16 1Kori 16:5–6 + 1:17 1Kori 4:18–19 + 1:19 Awat 18:5 + 1:20 1Kori 14:16; Owus 3:14 + 1:22 Awaru 8:11, 23; 2Kori 5:5; Efee 1:13–14; 4:30 + 1:23 2Kori 13:2 + 1:24 2Kori 4:5; 1Pet 5:3