Ebaruwa eya
YUUDA
Amangʼana ku owuimpi
Kiomo awoola omwene mu ebaruwa eno, omujoji ni Yuuda wamwawu Yakoobo. Yuuda ono nio okawa wamwawu Yesu omutono ku waamwawu waae wane (Math 13:55). Yajoja ebaruwa eno ku Awakristo wandi awatawoorrwe muno mu emiaka egia 65–70. Okufwanana okwa amangʼana agari mu ebaruwa eno (4–18) ne ebaruwa eya 2 Petro ekika ekia 2, kulagana mbwe andi omujoji yamala okusoma ebaruwa eya 2 Petro. Amangʼana gandi aga mu ebaruwa eya Yuuda eno (14–15) gaasimuka okuema mu ebuuki eya Enooka eyawanga ebuuki emanyiike agati eya *Awayaudi na Awakristo Awayaudi.
Yuuda a-ambia awantu awaganyire ku *Kristo amaani mbwe wawe ale na awagerezi awa owuweeyi awanyola mpoola waaingira mu ekaniisa ni wagerera awantu owuweeyi kandi wamenyere owulamu owuta-aa Katonda owunene. Awantu wano waagereranga mbwe okununulwa ku owusiza kuwata owuyanga okugia emberi okukola owuoni, aeniki ngawaaza okuwalrwa owuoni owuo. Waagalusianga engerera eya owusiza owua Katonda amagarikira. Yuuda awasiagizi mbwe Katonda aaza okuwakengera ekiina ekiwiiwi ni watarekere okuteesia awantu awa nikwo wakalanguka mu owulamu owua okuganya.
1
Ni inze Yuuda owemirimo owa Yesu *Kristo kandi wamwawu Yakoobo. Mbajojera inywe awantu awaeterwe ni Katonda Ise, awa agonziizie kandi awarindrwe ni Yesu Kristo.+
Mutuukre amagongi, owuolu no olugonzi okuema ku Katonda kuwungi.+
Awagerezi awa owuweeyi
Awiiko wange awa ngonziizie, nyaweerenga no okuagala okwa okuwajojera amangʼana ku owuinunuzi owua turimo twona alala wuno. Ni katio kunnigirizia mbwe nyingeeno mbajojere ni mba-ambia amaani mbwe muambe wukalu okulwanra okuganya okutasongwako okundi okwa Katonda ya-aa awantu waae.+ Mboola otio aeniki wario awantu, awaamala okujojerwa ekiina ekia olumbe kale, awamiire okuwaingiramo owuiwisi ni mutamanyire. Wari awantu awatatiire Katonda, awawoola mbwe aeniki Katonda ari omusiza, awantu wari iwaga okukola-ukola owusondo kiomo wawuine. Okulowa kwona walowa Yesu Kristo, owa engʼene nio Omukangasi kandi Omwami iifu.+
Kukawa mbwe mumanyire wino wiona, ni nyagala okuwaizurizia kiomo *Omwami Katonda yanunula awantu waae — awaana awa Israeli, mala awatoola mu ekialo ekia Misiri. Ni kukawa kutio, lunyima yaita awantu woona ku iwo, awataamuganyako.+ Lwona, muingirizieko kiomo *enyankoi awataarinda emigawo eminene egia Katonda yawa-aa, ni aa okukola otio waafuma wareka omugizi gwawu aweene. Okwo okwagera Katonda awasiwa ne eminyororo egitakiriiya amiire goona mu ekierema ekimwamu ti-ti-ti, aa warindirramo Owuire owunene owua ekiina.
Nintio kwaweera awantu awa emigizi egia Sodooma ni Gomoora, alala ne emigizi egiawanga ampi nagio, awaaita mu owusoodani no okuitala. Katonda yawaswawuka, kiwe ekilago ku awantu awarigizwa mu omurro ogutafwa amiire goona.
Mu engira emfwanani eyo, awantu awafwa okuloota-loota wano waona emiwiri giawu. Ngawatiire amangʼana aga awakangasi waawu, lwona wagamba-gamba uwiiwi ku ewintu ewiri ku igulu. Ni namba omukangasi owa enyankoi oetwa mbwe *Mikaeli, ni yalwananga ne *Ekikeeno ku omuwiri ogwa Muusa, ngakaitulumula mbwe aki-ingirra na akirigizra amangʼana aga amanyego yaaya. Ni yakilaga mala mbwe, “Omwami Katonda omwene akugaanie!”+ 10 Na awantu wano, iwo wafwa okunyega-nyega unyega-nyega kugia ewintu ewia watamanyire alala ne ewia watoola mbwe wamanyire namba ni wakiari okuingirizia geeza. Wafwana ne entiangʼi ezitaingirizia amangʼana — kandi ewia wakola wino niwio ewigera Katonda na awamala. 11 Katonda ariswawuka awantu awalondere olunyaafwa olwa Kaini awo ino. Waazakana okuagala okufuna amasendi mu engira etasugaane eya Balaamu. Kandi Katonda awamala kiomo yaita awantu awaaizoga ni Koora mu okulwania owukangasi.+ 12 Awantu wano ni awaizogaane ni inywe enyinga ezia muria isawo eria okuingirizia olugonzi olwa Omwami, wawafwanako egaasi emuamia enguwo. Wari awantu awawula-uwula ensuuko namba wutono — awaayi awairiisia mala iwo aweene. Wawula emirimo ki amare aga emiyaga giira eno ne eno, ni ngagareeta emvula. Lwona wafwana emiti egita-ama ensaafu namba mu entwigo. Emiti egisugre no okuiiywa na amasina, gifwe toko-toko.+ 13 Ee, wafumia enze ewintu ewia ensuuko ewia wakola, mala kiomo amasiira amakate-kaate gafumia ifulo, enyanza ne ewiiyire. Wari mala kiomo engʼeni-ngʼeni ezirumuka, Katonda awawikiire ekierema ekimwamu ti-ti-ti, amiire goona.++
14 Enooka ekiichimbiriiri owa Adaamu owa musamvu, yagamba-gamba ku awantu wano kale otino, “Awiifu muwoneko, Omwami na aaza no omurima omukaate ogwa enyankoi waae aweeru.+ 15 Aaza okukengera awantu woona ekiina, kandi okugera awantu awatatiire Katonda waganye ne enkola ziawu embiiwi ezia wamiire okumukorra alala na amangʼana amawiiwi goona aga wamiire okumuwoolako!”+
16 Awantu wano na awangʼongʼooni kandi enyinga ziona waagala mala engira ezia waka-ambramo awandi owuoni. Walonda okuagala okuwiiwi okwa wari nakwo kandi waitumbula. Wawoorra awantu mala ewintu ewiwasangaazia, kugere watuusie okuagala kwawu iwo aweene.
Ekia Awakristo wasugaane wakole
17 Ni inywe awiiko wange awa ngonziizie, mutaaza mwalawira ewintu ewia *awatumwa awa Yesu Kristo waawoola mbwe wiazanga okuikola. 18 Waawalaga watino, “Mu amiire aga owutuuko, wariwaao awantu awariwatoola wutono ku okuganya okwa muri nakwo ku Katonda, iwo aweene ni walonda okuagala kwawu okutasugaane emberi wa Katonda.” 19 Wano niwo awantu awareeta engawuzi agati iinyu. Wakola mala ewintu ewia emiwiri giawu giwaira okukola kandi wawula no *Omwoyo Omweru ogwa Katonda.++
20 Ni inywe awiiko wange awa ngonziizie, muiyomboke mu okuganya okweru kandi okulamu okwa muri nakwo, kandi musawe na amaani aga Omwoyo Omweru ogwa Katonda aesana.+ 21 Muwe mu olugonzi olwa Katonda awagonziizie nalwo, ni murindirra Omwami iifu Yesu Kristo owa amasaasra, aaze awa-ee owulamu owutariwua. 22 Muwe na amasaasra na awantu awakiari no okui-ingirizia mu emioyo giawu. 23 Mutunzie awandi ni muwamizula mu omurro; na awandi muambre amasaasra kandi muwatie. Murege kugia enguwo ziawu ezimwamiziiwue ne enkola emwamu ezia wakola ne emiwiri giawu.+
Okusawa okutuukre
24 Katonda engʼene, nio oesa okuwarinda kugere mutairana enyima kandi awareete emberi waae aa owunene wuae wuri, ni muri awasangaavu kandi awawula ni itone.+ 25 Iye, Katonda Omununuzi iifu omulala engʼene, aeewue owunene, owukangasi, owuesani, na amaani ni kuwitra ku Omwami iifu Yesu Kristo, emiigo giona egiawita ne egiiza, reero kandi amiire goona agawula ne entuuko. *Amin.
+ 1:1 Math 13:55 + 1:2 2Pet 1:2 + 1:3 1Timo 6:12 + 1:4 Gala 5:13 + 1:5 Okuf 12:51; Emba 14:29–30; 1Kori 10:5 + 1:9 Dani 10:13, 21; Zaka 3:2 + 1:11 Owut 4:3–8; Emba 22:7, 17; 16:1–34; Awaib 11:4; 1Yow 3:12 + 1:12 Ezek 34:8 + 1:13 2Pet 2:1–22 + 1:13 Isaa 57:20 + 1:14 Math 25:31; Awaib 11:5 + 1:15 Awaru 2:6 + 1:19 2Pet 3:2–3 + 1:19 Gala 5:22–25; 2Timo 3:1–8 + 1:20 Kolo 2:7; 1Kori 14:14–15 + 1:23 Zaka 3:2 + 1:24 Filiip 1:10; 1Thes 5:23; 2Pet 3:14