3
জমাতর চালকদার আর খাদিম
1 হুনো, আসল হক কথা অইলো, কেউ যুদি জমাতর চালকদার অইতা চাইন, তে তাইন তো নেক কাম করার খিয়ালি অইছইন।
2 জমাতর চালকদার মানষর চখুত নিখুত অইতে অইবো। তান খালি এক বউ অইবো। তাইন নিজরে সামলাইয়া রাখবা, তান ভালা আখল-বুদ্ধি রইবো, স্বভাব অইবো ভদ্র, আর মেহমানদারি করতে ভালা পাইবা। মানষরে তালিম দেওয়ার খেমতা থাকতে অইবো।
3 তাইন যানু মদখুর আর বদ-মিজাজি না অইন, বরং তান স্বভাব অইবো নরম, তাইন যানু মাইর-দাংগা কররা বা টেকা-পয়সার লালছি না অইন।
4 তাইন যানু সঠিক ভাবে তান নিজর পরিবারর হক্কলতা চালাইন, তান হুরুতাইন অইবা বাইধ্য আর আদব-কায়দা মানরা।
5 যে মানষে তার নিজর ঘর সামলাইতো পারে না, হে আল্লার জমাতরে কিলা দেখা-হুনা করবো?
6 কুনু নয়া ইমানদার ভাই জমাতর চালকদার অওয়া ঠিক নায়, ইলা অইলে তাইন হয়তো বড়াই-বেটাগিরিয়ে বাহাদুরি করবা, আর ইবলিছর লাগি ঠিক করা সাজার ভাগি অইবা।
7 জমাতর বাইরর মানষর গেছে তান সুনাম থাকা দরকার, যাতে আখতা কুনু বদনামর ভাগি না অইন আর ইবলিছর ফান্দো না পড়ইন।
8 অউলা জমাতর খাদিম অকলও ইজ্জতি আর এক কথার মানুষ অওয়া জরুরি। এরা যাতে মদখুর আর হারাম লোভ-লালছি না অইন।
9 তারা যানু হক বিবেকে ইছায়ী ইমানর বাতুনি বেয়াপাররে মজবুত করি দিলো রাখইন।
10 এরলাগি পয়লা তারারে যাচাই করি দেখা জরুর, যাচাইত যুদি তারা নিখুত অইন, তে জমাতর খাদিম অইতা পারবা।
11 ঠিক অলাখান বেটি মানুষও যানু ইজ্জতি অইন। এরা মানষর বদনাম না গাইন, নিজরে সামলাইয়া রাখইন, আর হকল বেয়াপারে বিশ্বাসি অইন।
12 খাদিম ছাব খালি এক বউ আলা মানুষ অইবা। তাইন যানু ভালামন্তে তান বউ পুয়া-পুড়িন আর সংসারর দেখা-হুনা করইন।
13 যে খাদিমে ভালামন্তে খেজমত করইন, এইন সুনাম পাইন, আর হজরত ইছা আল-মসীর উপরে ইমান থাকায় তান দিল সাওসে ভরা রয়।
ইছায়ী ইমানর বাতুনি বেয়াপার
14 ও তিমথি, আমি আশা কররাম খুব জলদিউ তুমার গেছে আইতাম। অখান মনো করিয়া তুমারে ইতা লেখরাম।
15 যুদি কুনু কারনে আমার আইতে দেরি অইযায়, তে ই লেখা পড়লে তুমি বুজবায়, আল্লার পরিবারর মানষর চাল-চলন কিলা অইতো। ই পরিবার তো জিন্দা আল্লার জমাত, আল্লাই হকিকতর ভীত আর ইয়ান খুটি।
16 ইছায়ী ইমানর মারিফতি কত মহান, ইতা তো অস্বীকার করা যায় না। অউ মারিফতি অউলা জাইর অইলো,
তাইন মানুষ ছুরতে জাইর অইলা,
পাক রুহে পরমান অইলা বে-কছুর,
ফিরিস্তা অকলে তান দরশন পাইলা।
তান বেয়াপারে হক্কল জাতির গেছে তবলিগ করা অইলো,
আস্তা দুনিয়ার মানষে তান উপরে ইমান আনলা,
গৌরব-মহিমায় তানরে উপরে তুলি নেওয়া অইলো।