☰ Lepelesin 15
15
Ensel anep kugul oŋɨd, kɨli tap tɨmel yɨbɨl keke anep kugul ak dɨlak
1  + Pen tap ke kɨdeyɨl nɨb nɨŋɨd wal agep tek olap sek, God man ne alaŋ gek nɨgɨnek. God nop mɨlɨk yɨbɨl yapek, tap tɨmel yɨbɨl anep kugul ak gɨl, mɨlɨk yɨp yowup ak pɨsnep kelɨgɨnɨgayn agɨl, ensel ne anep kugul ak kɨlop agek, tap tɨmel anɨb okok dɨ yelak.
2  + Pen anɨb sɨŋak nɨgɨnek, tap olap ñɨg solwala tek, mab mɨŋɨlaŋ sek jɨmñɨl glas tek kɨd yɨbɨl agɨl yek. Binɨb ogɨnap jakɨl yelak, ñɨg solwala tek yek gol anɨb sɨŋak. Kɨli pen tap ladek ak sek, kawnan nop tek gɨlɨlak ak sek, yɨb nop namba ak sek, kɨlop asɨk tep gɨl taw jɨsɨpuk gɨlak. God kɨlop tap gita tek keke ñek dɨlak. 3  + Dɨl, bɨ Mosis God nop wog gɨñeb ak takaw ne ak sek, Chag Sipsip Ñɨluk takaw ne ak sek agɨlɨg, kɨmep agɨl agɨlak,
Nad God Bɨawl yɨbɨl, tap okok mɨdupsek gɨnɨmuŋ tek nep mɨdeb ak agɨlak. Wog nad ke kɨdeyɨl nɨb nɨŋɨd wal agep tek gɨpan agɨlak.
Nad Bɨawl man okok mɨdupsek kod mɨdeban ak nɨm, yɨpɨd gɨl adek ak nep gɨpan agɨlak.
4  + Nad nokom bɨawl suŋtep yɨbɨl mɨdeban agɨlak. Anɨb ak pen, binɨb mɨdupsek nep nɨŋɨd, ñawl dɨnɨgabal agɨlak.
Nep Bɨawl agɨl, yɨb dad aplanɨgabal agɨlak.
Yɨpɨd gɨl adek ak nep gɨpan ak nɨŋɨd, man okok mɨdupsek apɨl, nep gos lɨlɨg bɨawl yɨbɨl agɨnɨgabal agɨlak.
5  + Kɨdek pen nɨgɨnek, God agnɨgep kal awl man ne alaŋ yek ak kanɨb yɨkɨl, sel kal God nop gos nɨgɨnɨgel ak mɨseŋ yek. 6  + Ensel anep kugul ak, tap tɨmel yɨbɨl anep kugul ak dɨl, God agnɨgep kal awl mɨgan nɨb seŋ owlak. Ensel anɨb okok, chech kayɨg tep ñɨñakol yɨbɨl gak okok lɨdɨl, gol dɨl gɨlak sɨbnag ak nab awl sɨŋak pal tɨbɨkɨl owlak. 7  + Tap kɨm mɨdep omɨŋal omɨŋal okok, olap apɨl ensel anep kugul ak kɨlop, gol dɨl kɨnag gɨlak okok anep kugul ak nokom nokom ñak. Kɨnag mɨgan anɨb okok, Bɨawl pelpel yenɨgab ak ne binɨb mɨdtep ma gel mɨlɨk nɨgup takaw awl ak aplan jakɨl yek. 8  + God Bɨawl kɨles tɨmel gup ak nɨm, mɨlek awl ne anɨb ak mɨdaknɨŋ, agnɨgep kal awl mɨgan ak sɨkom aplan jakɨl yek. Anɨb ak tek binɨb olap mɨgan anɨb ak amnɨgel tek ma lak. Ensel anep kugul tap tɨmel yɨbɨl anep kugul ak, kɨli binɨb kɨlop ñɨnɨg gelak okok ñɨ dɨpal, ñɨn anɨb ak binɨb okok kɨli kal mɨgan anɨb ak amnɨgel tek lak.
+ 15:1 Wkp 26.21, Lep 12.1-3, 14.10, 15.6-7, 21.9 + 15:2 Lep 4.6, 5.8, 13.15-17, 14.2, 21.18 + 15:3 Kis 15.1, Lo 31.30, Sng 92.5, 111.2, 139.14, 145.17, Lep 11.17, 14.3, 16.7 + 15:4 Sng 86.9, Ais 66.23, Jer 10.7 + 15:5 Kis 38.21 + 15:6 Lep 15.1 + 15:7 2 Te 1.9, Lep 4.6, 4.9, 10.6, 14.10 + 15:8 Kis 40.34, 1 Kin 8.10-11, 2 Sto 5.13-14, Ais 6.4, Ese 44.4, 2 Te 1.9
☰