20
Mosiva Kotira uva raqa kora
1 Avuhainaa toraqaa Isareri vaiinti nahenti qumina aahara vata Seni Vata Kadesini oru vaura. Mini vauvaro ˻Mosika Eronika nakaava˼ Miriaamiva qutu vumanta quntama tora.
2 Vi vataraqaa kia namarivata vaumanta vira kaara vaiinti nahenti Mosika Eronika vaunaini oru ruvaaqumavi vaiha
3 vitantara nuntu nauntu tiha Mosira atiha tiha, Mpo, koqemama Kotira Seri Naavu tataaqa tentanavu navunaaka hampata tenavu qutu vuataarave.
4 Nana kaarae netanta tinavu tivita vare qumina aahara vataini viri kaavo? Tenavu tentanavu quara vairi hampata maini qutu vuate tie, netanta tinavu tivita vare aniavo?
5 Netanta nantihae Isipihai tinavu tivita vare qora vata maini tenavu kia ho karavata utuke naainanaini viri kaavo? Kia maini uitivata koqe katari tavavata vaivaro, kia uainivata pomigranetivata vaivo. Mpo, tenavu namarivata naarirava kiama vaivo, ti.
6 Vika minti tumanta Mosika Eronika vi uvara iri, vaiinti nahenti mini ke, oru Kotira Seri Naavu qentiana vaiha, vataini hiqintivi náitanta viri vataini vate vaura. Vitanta mintimake vauvaro Noravano Kotiva viraqi vau ovava, voqama kero takuqi vauva qovarama viro ite vaura.
7 Noravano Kotiva Mosirara tiharo,
8 Oru ti Vokise tataaqa vai kaurura varera, arevata Eronivavata ekaa vaiinti nahenti vohaaraqaa ruvaaquma kera, vika nivuqaa vaihara nora ori vitini vairara uva tiraro namarivano viraqihairo tuvuarire. Are mintima kairaro vi oriraqihairo namari aquvi aquvi iharo tuviramanta vaiinti nahentivata vika purumakauvata sipisipivata vo quaravata vi namarira naate, tiro.
9 Noravano minti tuvaro Mosiva viva tunte iro oru vi kaurura varora.
10 Mosika Eronika ekaa vaiinti nahenti vi orira tataaqa ruvaaqumake, Mosiva vaiinti nahenti nitiharo tiharo, Ne Kotira qoririma amite variaka, iriate. Tetanta maa oriraqihaie namari ni kaqa nimiainarave? tiro.
11 Minti tivakero ˻Mosiva kiama Kotiva tunte iro ori virara uva tiraitiro˼, viva nai kauru tuahera kero taara tataama kauruqohairo vi orira ruqutiro.
Ruqutu kovaro ori viraqihairo nora namari aquvi aquvi iharo tuvimanta ekaa vaiinti nahentivata, ekaa purumakauve sipisipive vo quarave vika vika, vi namarira nora.
12 Mintuvaro Noravano Kotiva Mosika Eronika nitiharo tiharo, Vate maa entara netanta kia tiriara kempukaiqamake iriraiti, netanta Isareri vaiinti nahenti nivuqaa vaiha kia ti hutu tuaherakeha, ti mpeqa okara takuqi vaira vika numiqaavo. Netanta mintiara kaara kia netanta te nimirera tuna vataraqaa Isareri ntita vare vivarave, tiro. Kotiva minti tura.
13 Isareri vi namarira autu nteha, Meribave – Nuntu Naunturave tura. Vika mini vaiha Kotirara nuntu nauntu tuvaro Noravano Kotiva nai takuqiro vai okarara vika numiqora.
Idomu avuhainaava Isareriara kia tinavu vataqaa aitare vuate tura
14 Isareri Kadesini vau entara Mosiva vaiinti vonavu nititomanta vinavuka Mosira uva vare Idomuni avuhainaa vaiintivano vaunaini vura. Mosiva mintima tiro:
Tenavu Isareri ai navunaakama maa uvara qara ntuva tauro. Airi maaravano tinavuqi qovaraiqimanta ani vaunarara are irianarave.
15 Haaru tinavu naaqukavara katu vare Isipini otu airi ihiara mini vaurave. Mini vaumanta vi entara Isipi vika tinavu naaqukavata, tinavuvata qoraiqama timite vaurave.
16 Mintumanta tenavu Nora Kotirara tinavu kahaqiane tiavauraro viva tenavu vira aarauna uvara iriro enseli vo varakovaro viva tuvuntero tinavu Isipiqihairo tivita varero viri kaimanta vate tenavu Kadesi maini vauro. Vi vatava ai vata auvahini vaivo.
17 Tenavu ai ireha tiha, Hoe are tinavu qaqi kairaqe tenavu ai vata tavaarana vitare vuare? Tenavu tentanavu purumakau hampata kiama ni uiti naahoqive, uaini naahoqive, aiqu ntavaqi viraiti, ne namariara quvitaaraqi kia kaqake naraiti, tenavu qaqi nora aaraqaa avata vare vitare virarave, tiro.
18 Mosiva minti tivakero uva vara komanta Idomu vika nai tiva ami tiha, Aqao, ne kia tinavu vataqaa ho aitarevarave. Ne kia tinavu uva iriraiti anivera, tenavu ni hampata raquainarave, ti.
19 Tumanta Isareri vika nái tiva nimi tiha, Tenavu nora aaraqai avata vare virerave. Tenavu tentanavu quara vairi hampata ni namari naarera, tenavu ni koqaa nimirarave. Tenavu ni vataqaa qaqi vitare vuairava, vivaqaima vaivo, ti.
20 Isareri mintimake Idomu iromanta vika qaiqaa qaqiqai kempukaiqaake tiha, Ne kia ho tinavu vataqaa aitare vivarave, tivake nái iqoka vaiinti airitahaa ntita vare Isareri hampata raqirera anura.
21 Idomu nái vataini Isareri qioqama tomantara ti, Isareri qaqirake vo aaraqaa rante vura.
Eroniva qutu vura
22 Ekaa Isareri Kadesi mini ke vivi
23 Horu Aiqinaqaa Idomu vata auvahini oruntovaro Noravano Kotiva Mosika Eronikara tiharo,
24 Netanta Meribaini vaiha ti uva raqakaara kaara Eroniva kiama ho te Isareri nimirera tuna vataraqaa viraitiro, viva qutuma vuanarove.
25 Mosio, are Eroniravata vira maaqu Eleasaaravata ntita varera Horu Aiqinaqaa vuane.
26 Vitanta mini vuru kerama Eroniva ti Kotika Naavuqi kaiqa vareharo nonkutai utavaaqara viqu kerama, vira maaqu Eleasaarama nonku amitaane. Eroniva vi aiqinaraqaama qutu vuanarove, tiro.
27 Minti tuvaro Mosiva Noravano tunte iro Eronika Eleasaaka ntita varomanta ekaa Isareri tave vaumanta vinavuka aiqinaqaa vurama.
28 Mosiva Eroniva Kotira kaiqa vara amiteharo nonkuto utavaaqara viraqaahairo viqukero, vira maaqu Eleasaara nonku amitovaro Eroniva aiqina viraqaa vaiharo qutu vura. Qutu vumanta Mosika Eleasaaka ˻vira quntama te˼, aiqina ke tuvura.
29 Tuvunte vitanta ekaa vaiinti nahenti tiva nimi tiha, Eroniva qutuma vivo, tumanta ekaa vaiinti nahenti vika virara iriha 30 entanavuara vaiha iqi rata amitora.