27
Kotiva Iosuaara noraiqama kovaro Mosira vatuka varora
12 Noravano Mosira tiva amiro tiharo, Are Abarimi Aiqinaqaa vaarintera te Isareri nimirera iaina vatara vuavu tavaane.
13-14 Are tavama kera, vira naantiara are nina vakaava Eroniva qutintema kera qutinarave. Haaru Isareri aahara vata Senini vau entara, vika Meribaini nuntu nauntu ti vaumanta netanta vika nivuqaa vaiha kia ti hutu tuaherake ti mpeqa okara takuqi vaira vika numiqaanara kaara are vi vataraqaa kia viraitira, nina vakaava Eroniva qutintema kera qutinarave, tiro. Meriba ruvu namarivano Kadesini aahara vata Senini vaura. (20:1-13)
15 Noravano Kotiva minti tuvaro Mosiva tiharo,
16 Noravauvo, are Variqavano ekaa vaiinti nahenti maraquraqaa raqiki variaravama variaro. Mpo, are vo vaiinti noraiqama kairaro vi vaiintiva Isareriqaa raqikiarire.
17 Iqoka raqi entara vi vaiintiva vika ntita varero vi aniarire. Hauri sipisipi qova kia vaintemake, ai vaiinti nahenti hampi vaivorave, tiro.
18-19 Mosiva minti tuvaro Noravano Mosirara tiharo, Nunira maaqu Iosuaava, viva homa ti kaiqa varaarira vaiintivama vaivo. Are vira vita varera vuru Eleasaava ti kaiqa vara timite vai vaiintivavata, ekaa Isarerivata, varianaini kera, vika nivuqaa vaihara nena kauqu vira qiataqaa vatera, vaiinti nahenti tiva nimira mintima tiane: Iosuaava ti vatuka varaariravama vaivo, tiane.
20 Minti tivakera are vaiinti nahenti nivuqaa vaihara nena varena kaiqara hini Iosuaara amira, vira noraiqama kairamanta ekaa vaiinti nahenti Iosuaava tina uvara iriha vira avataate.
21 Iosuaava ti hantuqa vaina okarara maantima kero irianarove: Iosuaava Eleasaava ti kaiqa vara timite vai vaiintiva vainanaini viraro Eleasaava Urimi Tumimi okara tave vaiva, viva vi haikaraqohairo ti hantuqa vaina okarara kankoma kero tavero, Iosuaara tiva amiraro viva iriarire. Iosuaava ni Isareriara minti minti iate tirama ne Isareri viva tintema iate, tiro.
22 Noravano Kotiva minti tuvaro Mosiva Noravano tunte ura. Viva Iosuaara vita varero Eleasaava Kotira kaiqa vara amite vau vaiintivavata ekaa vaiinti nahentivata vaunaini vuru kovaro
23 Iosuaava vika nivuqaa himpitero vauvaro Mosiva nai kauqu Iosuaara qiataqaa vatero vaiinti nahenti Iosuaarara tiva nimiro tiharo, Maa vaiintiva ti vatuka varaarira vaiintivama vaivo, tiro. Mosiva Noravano tiva amuntema kero tura.