16
Isɔbu tɛ̃̀ńnɛ́ tì Edifɑsi
1 Kɛ̀ Isɔbuu bɛ́i nkɛ dɔ̀:
2 N kèè kɛ kèèmu di nɑ́ɑ́ ntì kucɛ mɛ̀pɛ́u,
di tú bɛbɑ́ɑ̀mbɛ̀ yɛibɛ mbɛ dimɔu mɛmmɛ.
3 Dɛ kó tinɑ́ɑǹtì dɛtetìrɛ̀ kpɛti bo mɔɔtɛ kumɑ̀nkɑɑ̀?
Yɑ́ɑ̀ ɔ̃̀nti dɑ yonkɛ kɑ̀ɑ n tɛ̃́nnìnko miɛ?
4 M múnkɛ nɑ nnɑmu kɛ́nnɑ́ɑ́ ndi nɑ́ɑ́mmɛ̀,
kɛ̀ di do mbo n kó difɔ̃̀tìrì,
n nɑ nnɑ́ɑ́ m mɛ̀ ndɔ́mɛ̀ kɛ éùròo.
5 N nɑ nyɑ́úkùnnɛ di kɔ̃̀ǹtì nɛ̀ n nɑ́ɑǹtì.
N sɑ́útìi nɑ n di teennɛ̀mu.
6 Kɛ̀ n nɑ̀ɑ́ kuyonku kùù m bo kù í yóó yɑɑtɛ,
kɛ̀ m mɛ ncĩ̀ɛ̃́kɛ́ kù bɑɑ í iti.
7 Ntɛ Kuyie nkɛ deu n wɛ̃rímú,
bɛ̀ɛ̀ kó dimɑ̀ɑ̀ do nh ɔrí òmɔù tɛ̃́nkɛ í kpɑɑ́ kɛ fòù.
8 N kũɔ̃ntì tiì nɑ̀kɛ́ n kpɛ́í,
n cĩ̀toomu kɛ̀ dɛ̀ bɛnkú n túmɛ̀ oyɛiwe.
9 Kuyie mmiɛkɛ kɛɛ̀ ǹ tɑ̃ kɛ tũ,
kù m bɛ̀tìmu kɛ cɑ́ɑ́ nku bɛ̀nnì.
Kù tu n dootitɔù nwe kɛ n tɑ̃ fɛnɔ̀nfɛ̀.
10 Bɛ̀ ɑ̀ɑ̀tɛ tinùùtì nti kɛ n wetí,
kɛ m bemmù, kɛ n sɑ̃́ɑ̃́,
kɛ mbɛti kɛ nfɛ̃mmú.
11 Kuyie nkuù m pĩ nkɛ duɔ́ mbɛdɑpùnyɛibɛ,
kuù nhɑ̃nnɛ́ bɛyonkubɛ nɔu miɛkɛ.
12 N do bo diwɛ̀ì miɛkɛ nkɛ kɛ̀ kù m pɔ̀ntɛ,
kɛ̀ kù pĩ n fɔ̃̀níí kɛ bɔ nkɛ m pɛ̀ítɛ́ pɛ́ítɛ́,
ku pie nwetí mí nwe.
13 Ku pie nyiì tu níɛ́ɛ́ kɛ́ n kɔ́nnì,
kɛ n tɑ̃ kɛ tùɔ̀ti n ceumbɛ̀ bɑ́ mɛsémmɛ̀ í kù bo.
Kɛ̀ n nɑutì yɛ̀nní kɛ cóú kɛtenkɛ̀.
14 Kɛ n kɔùrì kɛ n kɔùrì yɛmuɔ,
kɛ n fɛ̃mmú okpɑ̀rìnuɔnti kɔ̃mɛ.
15 N dɑ́ɑ́tí kufɔ̀ɔ̀tɔ̃̀nkù nku sɑ̃́ɑ̃̀,
kɛ̀ Kuyie nni nnɑ kɛ̀ n sɑ̃nni dèè kɛ̀ n duɔ́ mutɑ̃́ɑ̃́ mmiɛkɛ.
16 N kɔmmú kɛ kɔmmúmu kɛ̀ n nuɔ nwũɔ̃tɛ́,
kɛ̀ n nɔmpòòtì cɛ̃ɛ̃kɛ kɛ̀ n yììkɛ̀ kɔɔrɛnɛ̀ mukṹṹ.
17 N nɔu í tɛí mɛnitiyĩ̀ĩ̀,
m bɑ́ɑ́mmu dò mpɑ́íí nwe.
18 Fɔ̃́ nkɛtenkɛ̀ ɑ bɑ́ɑ́ dɑ́tínnɛ́ n yĩ̀ĩ̀,
dɛ̀mɑrɛ̀ bɑ́ɑ́ pénnɛ́ n dɑbònnì.
19 Wèè nɑ́ɑ́ n kpɛ́í nhò bo kɛĩ́nkɛ̀ nkɛ,
wèè kpɑ n kpɛ́í nhò bo tiwɛtì nti.
20 N nɛ́pobɛ̀ n dɑúmu,
n kuɔ̀ nkɛ búɔ́ Kuyie nku.
21 Wèe nɑ̀ɑ́ n kpɛ́í, wèe ti pútɛ́ mí nnɛ̀ ku,
bɛ̀ ɔ̃ɔ̃ pútɛ́mɛ̀ onìtì nɛ̀ o nɛ́po.
22 Kɛ yɛ̃́ n we tɔ̀ɔ́mmɛ̀ kɛ bo deèmu,
kɛ̀ n tũ nkucɛ bɛ̀ keri kù kɛ í wĩɛ̃tiní.