15
Sɑ̃nsɔ̃ɔ̃ kpɑnnɛ̀mɛ̀ Fidisitɛ̃ɛ̃bɛ
1 Kɛ̀ dɛ̀ɛ yíɛ́o sɑ́m̀pɔ́ mudidɛ̀ì mɔ̀nnì kɛ̀ Sɑ̃nsɔ̃ɔ̃ kɔtɛ kɛ bo yɑ̀ o pokù, kɛ tɔnɛ̀ dibɔsɛrì kɛ bo bɛ̀ pɑ̃, kɛ dɔ̀ ò bo tɑ o pokù dieku nkòo cɔ̀kù yetɛ.
2 Kɛ dɔ̀: N yɛ̀mmɛ̀ do dò nhɑ tɛ̃́nkɛ í ò dɔ́mu, koò tùótɛ́ kɛ duɔ́ nhodɑpɑ̀ɑ̀ nwèè sòò ni dibɑnni kó ikuɔ́. O nɑntɛ̀ mɛ nhò wenninɛ̀mu, tɛ ntúótɛ́.
3 Kɛ̀ Sɑ̃nsɔ̃ɔ̃ dɔ̀: Di mmɔ̀nnì kɛ̀ n dɔ̀ɔ̀ Fidisitɛ̃ɛ̃bɛ mɛyɛi nhòmɔù tɛ̃́nkɛ bɑ́ nsɛi.
4 Mɛm̀mɛ ò ìtɛ́mɛ̀ kɛ́kɔtɛ kɛ́pĩ́ nyiɑ̃nkɛ́ sikɔusìtɑ̃ɑ̃ti (300), kɛ níí wɛ̃nnɛ́ ìdɛ́ì kó iyéí kɛ́cĩnnɛ́ kɛ́wɛ̃nnɛ́ kɛ́boúnnɛ̀ timútì.
5 Kɛ mɛ nyĩ́ imɔu kɛ́deè kɛ́cɔ́u mmuhɑ̃ɑ̃́ nkɛ́fĩ́ĩ́nko kɛ̀ ìì tɑ dɛpɑɑ nkɛ̀ tidiitì cɔ́útɛ́, tìì kɛ̃ĩ́ kɛ cóú nɛ̀ tìì kpɑɑ́ cómmú, kɛ́tɑunnɛ̀ dɛtie mbɛ̀ tu dɛ̀ fínyĩ̀ nɛ̀ odìfíè kɛ́cɔ́útɛ́.
6 Kɛ̀ Fidisitɛ̃ɛ̃bɛɛ bekɛ wèè dɔ̀ɔ̀ mɛmmɛ, kɛ̀ bɛ̀ dɔ̀: Sɑ̃nsɔ̃ɔ̃ nwe. O cɔ̀kù Timunɑ ɛì kou weè ò yetɛnɛ̀ o pokù, koò duɔ́ nhodɑpɑ̀ɑ̀ nwèè sòò ni dibɑnni kó ikuɔ́.
Dɛ mɔ̀nnì kɛ̀ Fidisitɛ̃ɛ̃bɛɛ kɔtɛ kɛ́cɔ́u ndɛ kóo nitipòkù nɛ̀ o cicɛ.
7 Kɛ̀ Sɑ̃nsɔ̃ɔ̃ bɛ̀ nɑ̀kɛ́ kɛ dɔ̀: Di mɛ̀ ndɔ̀ɔ̀ dɛ̀, kɛ̀ n yí pɛ̀ìtɛ dɛ kó dipɛ̀ì, m bɑ́ɑ́ om̀pɛ̀!
8 Mɛm̀mɛ ò bɛ̀ potɛ́mɛ̀ kɛ́ bɛ nɑ, kɛ́ bɛ̀ ɑutɛ́ mɛdiɛ̀. Dɛ kó difɔ̃nkúò kɛ́kɔtɛ kɛ́mbo Etɑmmu tɑ̃dènkù.
Sɑ̃nsɔ̃ɔ̃ kùɔmɛ̀ bɛnìtìbɛ̀ nɛ̀ sɑ̃mmɑrímú kó muyɛ̀ì
9 Dɛ mɔ̀nnì kɛ̀ Fidisitɛ̃ɛ̃bɛɛ kɔtɛní kɛ́bɑ́tɛ́ Sudɑɑ tenkɛ̀ kɛ́pitɛ́ kɛ́tuɔkɛnɛ̀ Deii.
10 Kɛ̀ Sudɑɑ kɔbɛɛ bɛ̀ bekɛ kɛ dɔ̀: Dɛ̀ dòmmɛ kɛ̀ di kɔ̀tɛní kɛ bo ti kpɑnnɛ̀? Kɛ̀ Fidisitɛ̃ɛ̃bɛ dɔ̀: Ti kɔ̀tɛní kɛ bo pĩ́ nSɑ̃nsɔ̃ɔ̃ nwe kóò dɔ̀ɔ̀ ò ti dɔ̀ɔ̀mɛ̀.
11 Kɛ̀ Sudɑɑ kɔbɛ sikɔupísìtɑ̃ɑ̃tii (3000) kɔtɛ Etɑmmu tɑ̃dènkù Sɑ̃nsɔ̃ɔ̃ borɛ̀, kóò nɑ̀kɛ́ kɛ dɔ̀: A í yɛ̃́ kɛ dò nFidisitɛ̃ɛ̃bɛ bɛɛ̀ ti bɑkɑ́ɑ̀? A ti dɔ̀ɔ̀ bɑ mɛmmɛ nɑ́kɛ? Kòo bɛ̀ nɑ̀kɛ́ kɛ dɔ̀: Bɛ̀ n dɔ̀ɔ̀mɛ̀, m mɛ mbɛ̀ dɔ̀ɔ̀.
12 Kɛ̀ bɛ̀ɛ ò nɑ̀kɛ́ kɛ dɔ̀: Ti kɔ̀tɛní kɛ bo dɑ boúmu kɛ́kɔtɛ kɛ́ bɛ̀ duɔ́. Kɛ̀ Sɑ̃nsɔ̃ɔ̃ dɔ̀: Pɑrìkɛ̀nɛ̀ kɛ dɔ̀ di í yó n kuɔ di mɔ́mmɔmbɛ.
13 Kɛ̀ bɛ̀ dɔ̀: Áɑ̀ ti í yóó dɑ kuɔ, ti dɔ́ kɛ dɑ́ boúmu kɛ́kɔtɛ kɛ́ bɛ̀ duɔ́.
Mɛm̀mɛ bɛ̀ ò boúmɛ̀ iwɛ̃ĩ pɑ̀nyì ìdɛ́ì kóò dènnɛní kutɑ̃dènkù miɛkɛ.
14 Bɛ̀ tùɔ̀kɛní dìì mɔ̀nnì Deii kɛ̀ Fidisitɛ̃ɛ̃bɛɛ kɔtɛní kóò co kɛ íútí. Kɛ̀ ti Yiɛ̀ nKuyie nYɑɑ́ cútɛ́ní o ĩ́nkɛ̀ kɛ̀ iwɛ̃ĩ bɛ̀ do ò boú ìì nɑɑ́ mmutɑ́pɛí nkɛ́yotɛ.
15 Kòo yɑ̀ sɑ̃mmɑrímú bɛ̀ kùɔ wè bɑ̀mbɑ̀ nho kó muyɛ̀ì kɛ́túótɛ́ kɛ́kuɔnɛ̀ bɛnìtìbɛ̀ tɛkɔupíítɛ̀ (1000).
16 Ò mɛ ndèè kɛ́bɛ́i nkɛ dɔ̀:
Nɛ̀ sɑ̃mmɑrímú kó muyɛ̀ì mmu n kùɔnɛ̀mɛ̀ bɛnìtìbɛ̀ tɛkɔupíítɛ̀ (1000).
Nɛ̀ sɑ̃mmɑrímú kó muyɛ̀ì mmu m bɛ̀ mɛ̀nnɛ̀ mɛ̀nnɛ̀mɛ̀.
17 Dɛ kó difɔ̃nkúò kɛ́dootóo musɑ̃mmɑrínyɛ̀ì mmɛdɛ́timɛ̀. Kɛ̀ bɛ̀ɛ yú dɛborɛ̀ kɛ dɔ̀ Dɑmɑti-Deii (dɛ̀ɛ̀ tu Muyɛ̀ì kó ditɑ̃rì).
18 Kɛ sɔ̃́ nsinɛ́yɛ̃ĩ ò potɛ́ mɛdiɛ̀ nkòo kuɔ́nnɛ̀ ti Yiɛ̀ nKuyie nkɛ dɔ̀: Áú! Ti Yiɛ̀ nKuyie nfɔ̃́ɔ̃̀ duɔ́ nkɛ̀ n nɑ n dootitɔ̀bɛ̀, kɛ bɛ̀ ɑutɛ́ kɛ̀ sinɛ́yɛ̃ĩ nɛ́ bo wɛ̃tɛ kɛ́ m bɔ nkɛ̀ itɑyéí yɛmbɛ̀ n nɑɑ̀?
19 Dɛ mɔ̀nnì kɛ̀ ti Yiɛ̀ nKuyie nduɔ́ nkɛ̀ Deii tɑ̃rìi yɑtɛ́ kɛ̀ mɛniɛ nyɛnní kɛ̀ Sɑ̃nsɔ̃ɔ̃ pɛ́tɛ́ kɛ́yɑ̃̀, kɛ́pɛ́tɛ́ muwɛ̃rímú. Mɛm̀mɛ kɛ̀ bɛ̀ɛ yú dɛ kó tɛbintɛ kɛ dɔ̀: Ãɑ̃-Koodee, kɛ̀ tɛ̀ kpɑɑ́ bo nɛ̀ yíenní.
20 Kɛ̀ Sɑ̃nsɔ̃ɔ̃ mbɑkɛ́ Isidɑyɛɛribɛ dokùnɛ̀ dìì mɔ̀nnì Fidisitɛ̃ɛ̃bɛ kɛ dɔ̀ yɛbie nsipísìdɛ́.