17
Mikɑɑ dɔ̀ɔ̀mɛ̀ sitenkɑɑnìi kɛ nsì bɑ́ɑ́
1 Onìtì mɔù weè do bo Efɑdɑimmu tempɛ̃ nditɑ̃rì ĩ́nkɛ̀, kòo yètìrì tu Mikɑɑ.
2 Diyiè mɑrì kòo nɑ́kɛ́ o yɔ̃ kɛ dɔ̀: N yɔ̃ ɑ kpɑɑ́ yɛ̃́ bɛ̀ sòò dɑ yùúkúmɛ̀ mɛdítíbii tɛkɔupípíítɛ̀ nɛ̀ tɛpíítɛ̀ (1010) kɑ̀ɑ ntú dɛ yiɛ̀ mbo yɑ̀, yɑ́ɑ bɑ? Míì do ì tùótɛ́ n kpɑɑ́ ì tɔmu.
Dɛ mɔ̀nnì kòo yɔ̃ dɔ̀: M birɛ ti Yiɛ̀ nKuyie ndɑ́ dɔɔ̀ mɛsɑ̀ɑ̀.
3 Kòo ò tɛ̃̀ńnɛ́ o díítí kòo yɔ̃ dɔ̀: N do pɑ̃ dɛ kó idíítí ti Yiɛ̀ nKuyie nku kɛ ì dɔú nhɑ kpɛ́í nkɛ bo dɑ dɔɔ̀ tɛtenkɑɑnìtɛ̀. Bɛ̀ yóó ì yìɛ̀mmu kɛ́utɛ́ kɛ̀ ìì nɑɑ́ ntɛtenkɑɑnìtɛ̀, n yì ndɑ duɔ́mmu, nto i.
4 Mɛm̀mɛ ò wɛ̃̀tɛmɛ̀ kɛ́ ì tɛ̃̀ńnɛ́ o yɔ̃ kòo dɛitɛ mɛdítíbii nsikɔusìdɛ́ (200) kɛ́duɔ́ nhomɑ́ɑ́tì, kòo ò dɔ̀ɔ̀nɛ̀ tɛtenkɑɑnìtɛ̀ kɛ́ tɛ̀ dɑ̀ri timɑ́tì, kɛ́ tɛ̀ còńnɛ́ Mikɑɑ cĩ́ɛ̃̀tɛ̀.
5 Kɛ sɔ̃́ nweè Mikɑɑ mɔ̀kɛ ò kɔ̀rì dɛ̀ kɛ bɑ́ɑ́ nti Yiɛ̀ nKuyie nnɛ̀ sitenkɑɑnìi kɛ́yíɛ́ kɛ́dɔɔ̀ tɛtenkɑɑnìtɛ̀ tɛtɛ̀ nɛ̀ sitenkɑɑnìi sɑ́m̀pɔ́sì, kɛ́túótɛ́ o birɛ kɛ́dɔɔ̀ ikuɔ́ nìùtì.
6 Dɛ kó dimɔ̀nnì Isidɑyɛɛribɛ do í mɔkɛ okpɑ̀ɑ̀tì, bɑ́ wè kòo ndɔɔri ò dɔ́mɛ̀.
7 Dɛ mɔ̀nnì dɛ̀ do sɔ̃́ nDefiibɛ botí kóo dɑpɑ̀ɑ̀ mmɔù weè bo Bɛtideɛmmu Sudɑɑ kɔbɛ ciɛ kɛ tú opɔ̀ɔ̀ bɛ cuokɛ̀.
8 Kòo ítɛ́ dɛborɛ̀ kɛ́nwɑnti dikɑrì kupíkù tɛkù, kɛ́nkérí kɛ́tuɔkɛ Mikɑɑ cĩ́ɛ̃̀tɛ̀ Efɑdɑimmu tempɛ̃ nyɛtɑ̃rɛ̀ ĩ́nkɛ̀.
9 Kɛ̀ Mikɑɑ ò bekɛ kɛ dɔ̀: A yɛ̀nní dɛ? Kòò dɔ̀: N tú Defii wuɔ nkou nwe, kɛ ìtɛ́ní Bɛtideɛmmu Sudɑɑ tempɛ̃. N wɑnti m bo mborɛ̀ ndɛ.
10 Kɛ̀ Mikɑɑ ò nɑ̀kɛ́ kɛ dɔ̀: Mbo m borɛ̀ kɛ́nɑɑ́ n cĩ́ɛ̃̀tɛ̀ kó ikuɔ́ nìùtì kɛ̀ n níí dɑ duɔ́ ndibenni kṹṹ mmɛdítíbii ntɛpíítɛ̀, kɛ́ ndɑ duɔ̀nnɛ̀ tiyɑ̀ɑ̀tì nɛ̀ tidiitì dɛ̀ dɑ békú mɛ̀ɛ̀ botí.
Kɛ̀ Defiibɛ botí kou tɑroo,
11 kɛ́yie nkɛ́mbo Mikɑɑ cĩ́ɛ̃̀tɛ̀, kòo ò dɔ̀ɔ̀ o birɛ.
12 Kóò dɔ̀ɔ̀ ikuɔ́ nìùtì, kòo mbo o cĩ́ɛ̃̀tɛ̀.
13 Kɛ̀ Mikɑɑ dɔ̀: Di mmɔ̀nnì n yɛ̃́mu kɛ dò nti Yiɛ̀ nKuyie mbo n dɔɔ̀ mɛsɑ̀ɑ̀ nDefii wuɔ nkou mɛ̀ nnɑɑ́mmɛ̀ n cĩ́ɛ̃̀tɛ̀ ikuɔ́ nìùtì.