118
Ti bo nsɑ̃ntímɛ̀ ti Yiɛ̀ nKuyie nku dɔ̀ɔ̀ dɛ̀ kpɛ́í
1 Nsɑ̃ntínɛ̀ ti Yiɛ̀ nKuyie nkù nìtimu,
kù sɑ̀ɑ̀ mbomu sɑ̃́ɑ̃̀.
2 Isidɑyɛɛribɛ kó kuwuɔ nkɛ̀ di dɔ̀:
Ku sɑ̀ɑ̀ mbomu sɑ̃́ɑ̃̀.
3 Díndi Anɔɔ kó kuwuɔ nkɛ̀ di yĩ́:
Ku sɑ̀ɑ̀ mbomu nsɑ̃́ɑ̃̀
4 Díndi bɛ̀ɛ̀ dé ti Yiɛ̀ nKuyie nkɛ̀ di dɔ̀:
Ku sɑ̀ɑ̀ mbomu nsɑ̃́ɑ̃̀.
5 M bo mɛyɛǹcɑɑ̀rìmɛ̀ miɛkɛ nkɛ kɛ kuɔ́nnɛ̀ ti Yiɛ̀ nKuyie,
kɛ̀ kù kèè kɛ cɑ́tinnɛ n yɛ̀mmɛ̀.
6 N Yiɛ̀ nKuyie nni nkómmúmu,
n yí dé dɛ̀mɑrɛ̀.
Onìtì bo nɑ kɛ́ n dɔ̀ɔ̀ bɑ?
7 N Yiɛ̀ nKuyie nni mbonɛ̀mu kɛ n teénnɛ̀,
dɛɛ̀ te kɛ̀ n wùó n níím̀bɛ̀ duòmɛ̀.
8 A bo nsɔrimɛ̀ ti Yiɛ̀ nKuyie mborɛ̀,
dɛ̀ wenninɛ̀mu ɑ bo mbuɔ́mɛ̀ onìtì.
9 A bo n sɔrimɛ̀ ti Yiɛ̀ nKuyie mborɛ̀,
dɛ̀ wenninɛ̀mu ɑ bo mbuɔ́mɛ̀ sikpɑ̀ɑ̀tìbìí.
10 Iwuɔ ntɛì kɔbɛ do n cɛ̃̀ɛ̃̀tɛmu,
kɛ̀ n yú n Yiɛ̀ nKuyie nyètìrì kɛ́ bɛ̀ bìɛ́.
11 Bɛ̀ do n cɛ̃̀ɛ̃̀tɛmu kɛ́ nh ɛ̃́ṹtɛ́,
kɛ̀ n yú n Yiɛ̀ nKuyie nyètìrì kɛ́ bɛ̀ bìɛ́.
12 Bɛ̀ do n cɛ̃̀ɛ̃̀tɛmu kɛ́ m munnɛ́ ice kɔ̃mɛ,
kɛ́kú dɛndɛ bɑ̀mbɑ̀ tipotì kó muhɑ̃ɑ̃́ ntɛ̃mɛ̀,
n yú n Yiɛ̀ nKuyie nyètìrì ndi kɛ bɛ̀ bìɛ́.
13 Bɛ̀ do n tèntoomu kɛ́ndɔ́ kɛ́ m bɔ,
kɛ̀ n Yiɛ̀ nKuyie mmɛ nni nteennɛ̀.
14 N Yiɛ̀ nKuyie nkuù tu n wɛ̃rímú,
n diè nkɛ ku nsɑ̃ntí, kuù tu ndɛɛtíwè.
15 Ti yo bɛ̀ɛ̀ dɔ̀ɔ̀ri timɔ́mmɔnti bɛ̀ nɑmɛ̀ mmɛ kɛ íúní bɛ touti
kɛ yɛ̃́ Kuyie mpĩ̀ḿmɛ̀ ku tɔ̃mmú nɛ̀ ku wɛ̃rímú.
16 Ti Yiɛ̀ nKuyie nnɔmmu dɛmɔu,
ku pĩ nku tɔ̃mmú nɛ̀ muwɛ̃rímú mmu.
17 N yí yóó kú, n yó nfòùmu,
kɛ nɑ́ɑ́ nKuyie mpĩ́ mmùù tɔ̃mmú.
18 N Yiɛ̀ nKuyie nyũ̀ɔ̃́mmu n to,
kù mɛ n yí yóu kɛ̀ m bo kú.
19 N kpetɛ́nɛ̀ yɛbòrɛ̀ bɛ̀ɛ̀ tũ̀ ntimɔ́mmɔnti bɛ̀ tɑɑ̀ yɛ̀,
kɛ̀ n tɑ kɛ́sɑ̃ntɛ n Yiɛ̀ nKuyie.
20 Kɛ̀ bɛ̀ dɔ̀: Ntɛ ti Yiɛ̀ nKuyie ncĩ́ɛ̃̀tɛ̀ kó dibòrì.
Bɛ̀ɛ̀ tũ̀ ntimɔ́mmɔnti bɛ̀ di ntɑɑ̀.
21 N yó ndɑ dɛ́úkùnkomu nYiɛ̀ nKuyie
nkɛ yɛ̃́ ɑ kèèmɛ̀ n dɑbònnì kɛ n dɛɛtɛ́.
22 Bɛ̀ɛ̀ mɑɑ̀ bɛ̀ dootóo dìì tɑ̃́rì,
diì nɑɑ́ ndipũũ kó ditɑ̃́rì mɔ́mmɔnni.
23 Ti Yiɛ̀ nKuyie nkuù pĩ ndɛ kó mutɔ̃mmú,
kɛ̀ mù tu tidiɛtì kɔ̃mu, kɛ̀ ti mu yɑ̀.
24 Ti Yiɛ̀ nKuyie nkó diyiè tu dii,
kɛ̀ ti dò nkɛ́yɑ̃nku nɛ̀ diwɛ̀ì.
25 Áú, ti Yiɛ̀ nKuyie! Nyɑ̀ɑ tí dɛɛtɛ́!
Áú Ti Yiɛ̀ nKuyie nhɑ́ ti pɑ̃ muwɛ̃rímú kɛ̀ ti nɑ.
26 Mɛsɑ̀ɑ̀ nní mbonɛ̀ wèè kèríní nɛ̀ ti Yiɛ̀ nKuyie nkó diyètìrì,
ti bo Kuyie ncĩ́ɛ̃̀tɛ̀ ntɛ, kɛ kù mɔ̀ú mɛsɑ̀ɑ̀ ndi kpɛ́í.
27 Ti Yiɛ̀ nKuyie ntú Kuyie nku,
kuù ti mí ku kó kuwenniku, ti dɔ́ɔ́tɛ́nɛ̀ dibɑnni kɛ́ntɔ tipuonti,
kɛ́tuɔkɛ ku wũɔ̃tɔ̀nnì bɑ̀kɛ̀ borɛ̀.
28 A tú Kuyie nku kɛ n te, n yó ndɑ dɛ́úkùnkomu.
Kuyie fɔ̃́ nwèè n te n yó ndɑ sɑ̃ntímu.
29 Ndɛ́úkùnkonɛ̀ ti Yiɛ̀ nKuyie, kù nìtimu.
Ku sɑ̀ɑ̀ mbomu nsɑ̃́ɑ̃̀.