119
Kuyie nkuɔ́ túmɛ̀ isɑ̀ɑ̀yì
1 Dɛ̀ nnɑɑti bɛ̀ɛ̀ borimɛ wenni,
bɛ̀ɛ̀ tũ nti Yiɛ̀ nKuyie nkó ikuɔ́.
2 Dɛ̀ nnɑɑti bɛ̀ɛ̀ yie nkɛ tũ nku tié,
bɛ̀ɛ̀ kù wɑnti nɛ̀ bɛ yɛ̀mmɛ̀ mɛmɔu.
3 Dɛ̀ nnɑɑti bɛ̀ɛ̀ í dɔɔri mɛyɛi,
bɛ̀ɛ̀ tũ nku kó kucɛ.
4 Ti Yiɛ̀ nKuyie nkuù duɔ́ nku kuɔ́.
Kɛ̀ ti bo nyi tũ nweti weti.
5 N dɔ́ kɛ́ntũmmu ɑ kó kucɛ weti weti,
kɛ́ndɔɔri ɑ kuɔ́ yɛ̃ mmù.
6 Kɛ̀ dɛ̀ɛ yie nkɛ̀ n níí bɑ́ɑ́ wéntɛ́ ɑ tɑnnɔ̀ kɛ̀ ifɛi m pĩ́.
7 N yó ndɑ sɑ̃ntímu nɛ̀ mɛyɛ̀mmɛ̀ mɛ̀mɑ́ɑ̀.
N yó nhɑ̃ɑ̃̀mu ɑ tɑnnɔ̀ n yɛ̀mmɛ̀ miɛkɛ.
8 N yó ndɔɔrimu ɑ tié nyɛ̃mmɛ̀.
A bɑ́ m bɔntóo yúó.
9 O bíɛ́ mbo yĩ́mɛ̀ kòo borimɛ nwenni?
Ò bo ndɔɔri ɑ nɑ́ɑǹtì yɛ̃mmɛ̀ mmɛ.
10 N dɑ wɑɑ̀mmu nɛ̀ n yɛ̀mmɛ̀ mɛmɔu,
ɑ bɑ́ɑ́ yóu kɛ̀ n dɛ́tɛ́nɛ̀ ɑ tɑnnɔ̀.
11 N sɔrìmu ɑ nɑ́ɑǹtì n yɛ̀mmɛ̀ miɛkɛ,
kɛ̀ dɛ̀ bo yie nkɛ̀ m bɑ́ɑ́ dɑ yetɛ́nɛ̀.
12 N Yiɛ̀ Kuyie nhɑ yètìrì dɛumu,
m bɛnkɛ ɑ tié.
13 Nɛ̀ n nùù ndi mbɑɑ̀tìmɛ̀ ɑ tɑnnɔ̀.
14 M bo ntũmmɛ̀ ɑ tɑnnɔ̀ dɛ̀ n nɑɑtimu,
kɛ dònnɛ̀ m bo mmɔkɛmɛ̀ tikpɑ̀tì mɛdiɛ̀.
15 N totímu n yɛ̀mmɛ̀ ɑ tié nyĩ́nkɛ̀ kɛ wéí ɑ kó icɛ.
16 Dɛ̀ n nɑɑtimu m bo ntũmmɛ̀ ɑ kuɔ́,
n yí yóó yɛ̃̀ nhɑ nɑ́ɑǹtì.
17 Dɔɔ̀ mí nhɑ kóo tɔ̃ntì mɛsɑ̀ɑ̀.
Kɛ̀ nní nfòù kɛ dɔɔri ɑ nɑ́ɑǹtì yɛ̃mmɛ̀.
18 Wéi n nuɔ nkɛ̀ n nɑ kɛ́yɑ̀,
ɑ kuɔ́ wennimu mɛdiɛ̀.
19 N tú opɔ̀ɔ̀ nwe kɛtenkɛ̀ ĩ́nkɛ̀,
bɑ́ n sɔnnɛ ɑ tɑnnɔ̀.
20 N dɔ́mu nɛ̀ n yɛ̀mmɛ̀ mɛmɔu
kɛ́nyɛ̃́ ɑ tɑnnɔ̀ sɑ̃́ɑ̃̀.
21 A kpɑnnɛ̀mu sifeí yɛmbɛ̀, kusĩ̀nkù do bɛ̀,
bɛ̀ɛ dɛ́tɛ́nɛ̀ ɑ tɑnnɔ̀.
22 N yɑ̃ɑ̃tɛ yɛsɑ̃́ɑ̃̀mbɛ̀ nɛ̀ mɛsenkùmɛ̀,
kɛ yɛ̃́ m pĩ̀ḿmɛ̀mu ɑ tɑnnɔ̀.
23 Bɑ́ kɛ̀ sikpɑ̀ɑ̀tìbìí tìí nkɛ nɑ́ɑ́ n kpɛ́í,
mí n tú ɑ kóo tɔ̃ntì nwe, kɛ tũ nhɑ kuɔ́ yɛ̃ mmù.
24 A tié nni nnɑɑtimu
iì n tiè.
25 N duɔ́ mutɑ̃́ɑ̃́ mmiɛkɛ nkɛ,
n fòùkùnnɛ kɛ́ndò nhɑ bɛ́immɛ̀.
26 N dɑ bɑ̀tɛmu n kó icɛ imɔu, kɑ̀ɑ kèè.
Á m bɛnkɛ ɑ tié.
27 M bɛnkɛ ɑ kó kucɛ kó yɛtɑnnɔ̀,
kɛ̀ n nɑ kɛ́totí n yɛ̀mmɛ̀ ɑ kó mɛsɑ̀ɑ̀ nyĩ́nkɛ̀.
28 Mɛyɛǹcɑɑ̀rìmɛ̀ mɛɛ̀ n dɛutɛ́ kɛ̀ n kuɔ̀,
n yíi nkɛ́ndò nhɑ nɑ́ɑǹtì bɛ́immɛ̀.
29 A n dɛ́tinnɛnɛ̀ siyɑ́ɑ̀bìsí kó kucɛ.
N dɔɔ̀ mɛsɑ̀ɑ̀ nkɛ̀ n nɑ kɛ́tũnnɛ ɑ kó ikuɔ́.
30 N tɑ̃ɑ̃tɛ́mu timɔ́mmɔnti kó kucɛ.
N tũ nhɑ tɑnnɔ̀ nyɛ.
31 N Yiɛ̀ nKuyie n tũ nhɑ tié nyi.
A bɑ́ɑ́ yie nkɛ̀ n di ifɛi.
32 M bɛti ɑ kó yɛtɑnnɔ̀ nyɛ,
kɛ yɛ̃́ ɑ cɑ́tinnɛmɛ̀ n yɛ̀mmɛ̀.
33 N Yiɛ̀ nKuyie n tié nhɑ kuɔ́,
kɛ̀ dɛ̀ɛ yie nkɛ̀ nní nyì tũ̀ nkɛ́tuɔkɛnɛ̀ kumɑ̀nku.
34 M pɑ̃ mɛciì nkɛ̀ n tũnnɛ ɑ kuɔ́
kɛ́ nyì pĩ̀ńnɛ̀ n yɛ̀mmɛ̀ mɛmɔu.
35 A nni nni ɑ tɑnnɔ̀ kó kucɛ miɛkɛ,
n wɛ̀ì bo kùù miɛkɛ.
36 Yṹɔ̃́nní n yɛ̀mmɛ̀ ɑ tié bíɛ́kɛ̀,
kɛ̀ mɛ̀ bɑ́ ndɔ́ mucɔ̃́ntimu.
37 Bentɛ n nɔ̀nfɛ̀ kɛ̀ fɛ̀ bɑ́ nwúó ndɛ̀ɛ̀ tu dɛtetìrɛ̀,
duɔ́ nkɛ̀ nni ntũ nhɑ kó kucɛ.
38 Dɔɔ̀ mí nhɑ kóo tɔ̃ntì ɑ bɛ́i ntì bɛ̀ɛ̀ dɑ dé bɛ kpɛ́í.
39 A m péítɛ́ munitidɑɑ́, m mu nyĩɛ̃̀kù,
ɑ tɑnnɔ̀ yɛɛ̀ tu yɛsɑ̀ɑ̀yɛ̀.
40 N dɔ́mu kɛ́ntũ nhɑ tɑnnɔ̀,
yóu kɛ̀ nni nfòù ɑ kó timɔ́mmɔnti miɛkɛ.
41 N Yiɛ̀ nKuyie nhɑ́ n dɔɔ̀ ɑ kó mɛsɑ̀ɑ̀,
n dɛɛtɛ́ kɛ́ndò nhɑ bɛ́immɛ̀.
42 Kɛ̀ dɛ̀ɛ yie nkɛ̀ n níí nɑ kɛ́tɛ̃́nnɛ́ tinɑ́ɑǹtì bɛ̀ɛ̀ n sɑ̃́ɑ̃̀,
kɛ yɛ̃́ n yĩkúmɛ̀ ɑ nɑ́ɑǹtì ĩ́nkɛ̀ nkɛ.
43 Á bɑ́ɑ́ dɛitɛ timɔ́mmɔnti n nùù miɛkɛ yúó,
m bɑɑ ɑ tɑ̃ɑ̃tɛ́ tìnti.
44 N yóó mpĩ́mmu ɑ kuɔ́,
n yí yóó yóu ɑ kuɔ́ nɛ̀ m bo mbomɛ̀.
45 Yóu kɛ̀ nní mbonɛ̀ kuyɛǹnɑɑtí,
kɛ yɛ̃́ n tũmmɛ̀ ɑ tɑnnɔ̀.
46 N yó nnɑ́ɑ́mmu ɑ tié bɛkpɑ̀ɑ̀tìbɛ̀ ììkɛ̀,
ifɛi í yó nyì nni mbonɛ̀.
47 Dɛ̀ ɔ̃ nni nnɑɑtinɛ̀mu ɑ tɑnnɔ̀,
n yɛ̀ dɔ́mu.
48 N yuo n nɔu nsi kɛ bo cɔutɛ́ ɑ tɑnnɔ̀,
n yɛ̀ dɔ́mu, nh ɑ̃ɑ̃̀mu ɑ kuɔ́ n yɛ̀mmɛ̀ miɛkɛ.
49 Dentɛní ɑ nɑ̀kɛ́ tìì nɑ́ɑǹtì,
mí nhɑ kóo tɔ̃ntì n ti mbɑɑ.
50 Nh ɔ̃ mbo mɛyɛǹcɑɑ̀rìmɛ̀ miɛkɛ, kɛ̀ dɛ̀ɛ m bɑ́ntɛ̀ dɛɛ̀ tu:
A nɑ́ɑǹtì n duɔ̀mmɛ̀ mufòmmu.
51 Sipɔɔ yɛmbɛ̀ n dɑúmu,
m mɛ nyí yetɛ́nɛ̀ ɑ kuɔ́.
52 Nh ɔ̃ɔ̃ dentɛní ɑ tɑ̃ɑ̃tɛ́ tì nti,
n Yiɛ̀ nKuyie nkɛ̀ dɛ̀ɛ nɑ́ríkùnnɛ n yɛ̀mmɛ̀.
53 M miɛkɛ yɛ̀nnímu bɛnitiyonkubɛ,
bɛ̀ dootóomu ɑ kuɔ́.
54 A tié nyiì tu n kó fɛyɛ̀nfɛ̀,
kɛtenkɛ̀ kiɛ m bo kɛ̀ kupɔ̀ɔ̀kù nku.
55 N Yiɛ̀ nKuyie, kɛyènkɛ̀ nh ɔ̃ɔ̃ í nyɛ̃̀ nhɑ kpɛ́í.
N tũmmu ɑ kuɔ́.
56 N kpɛti n te tì tu
m bo tũnnɛmɛ̀ ɑ tɑnnɔ̀.
57 N Yiɛ̀ nKuyie nkpɛti tú tì n ti mbɛ́i.
Tìì tu: M bo ntũmmɛ̀ ɑ nɑ́ɑǹtì.
58 Nɛ̀ n yɛ̀mmɛ̀ mɛmɔu ndi n dɑ kuɔ̀nnɛ̀mɛ̀,
n kuɔ́ mmɛsémmɛ̀ kɛ́ndònnɛ̀ ɑ bɛ́i mmɛ.
59 N wèńnímu n tũ nyìì cɛ̀.
Kɛ wɛ̃̀tɛní kɛ bo tũnnɛ ɑ tié.
60 N tɛ̃́nkɛ í yóó ɔɔtɛ, n dɔ́ mɛfɛì mmɛ,
kɛ bo tũnnɛ ɑ tɑnnɔ̀.
61 Bɛnitiyonkubɛ bɛɛ̀ n dií nticùɔ̀tì kɛ̀ tì m pĩ́.
M mɛ nyí yɛ̃̀ nhɑ kuɔ́.
62 Kɛyènkɛ̀ cuokɛ̀ nh ɔ̃ɔ̃ entɛmu kɛ́ ndɑ sɑ̃ntí.
A tɑ̃ɑ̃tɛ́ tì sìɛ́ mɛ̀ɛ̀ kpɛ́í.
63 N nɑɑtinɛ̀mu bɛ̀ɛ̀ kó dimɑ̀ɑ̀ dɑ dé.
Bɛ̀ɛ̀ kó dimɑ̀ɑ̀ tũ nhɑ tɑnnɔ̀.
64 N Yiɛ̀ nKuyie nhɑ sɑ̀ɑ̀ mmɛɛ̀ pìɛ́kɛ́ kutenkù
n tié nhɑ kuɔ́.
65 N Yiɛ̀ nKuyie nhɑ do tì bɛ́immu,
kɛ mɛ nni ndɔ̀ɔ̀ mɛsɑ̀ɑ̀ m mí nhɑ kóo tɔ̃ntì.
66 M bɛnkɛ mɛsɑ̀ɑ̀ nnɛ̀ m bo mbɑɑ̀tìmɛ̀ dɛ̀ɛ̀ wenni nɛ̀ mɛciì.
Kɛ yɛ̃́ n yĩkúmɛ̀ ɑ tɑnnɔ̀ ĩ́nkɛ̀ nkɛ.
67 N do í kɛ̃kɛ dìì mɔ̀nnì kɛ dɑ dɛ́tirìnɛ̀mu,
di mmɔ̀nnì m mɛ mpĩ̀ḿmu ɑ nɑ́ɑǹtì.
68 A nitimu kɛ dɔɔri mɛsɑ̀ɑ̀,
n tié nhɑ kuɔ́.
69 Sipɔɔ yɛmbɛ̀ bɛɛ̀ n sĩ̀nkùnnɛ nɛ̀ bɛ kó siyɑ́ɑ̀bìsí,
mí m mɛ mpĩmmu ɑ tɑnnɔ̀ nɛ̀ n yɛ̀mmɛ̀ mɛmɔu.
70 Bɛ̀ ɑnkɛmu tìmɑtì í bɛ tɑɑ̀,
dɛ̀ mɛ nni nɑɑtimu nɛ̀ ɑ kuɔ́.
71 Bɛ̀ n dií nyifɛi kɛ̀ dɛ̀ n dɔ̀ɔ̀ mɛsɑ̀ɑ̀ mmɛ,
kɛ̀ n yĩ̀ɛ̃́tɛ́ ɑ kuɔ́.
72 Mí m borɛ̀ ikuɔ́ ìì yɛ̀nní ɑ nùù ì pɛ̃ɛ̃tɛ́mu yɛsɔɔwèrɛ̀,
sikɔupí sikɔupí yoo timɑ́tì pɛ́ítì kpɛyɛ.
73 A nɔu siì n dɔ̀ɔ̀ kɛ̀ siì n kpénkùnnɛ,
m pɑ̃ mɛciì, kɛ̀ n nɑ kɛ́yĩ́ɛ̃́tɛ́ ɑ kuɔ́.
74 Bɛ̀ɛ̀ dɑ dé, bɛ̀ n wùó nkɛ̀ dɛ̀ bɛ̀ nɑɑtimu.
Kɛ yɛ̃́ n kémmúmɛ̀mu ɑ nɑ́ɑǹtì.
75 N Yiɛ̀ nKuyie n yɛ̃́mu kɛ dò nhɑ tɑ̃ɑ̃tɛ́ tì wenni,
ɑ n kɛ̃́kùnnɛ kɛ nɑɑtimu.
76 A sɑ̀mu m bɑ́ntɛ̀!
A tì nɑ̀kɛ́mu mí nhɑ kóo tɔ̃ntì.
77 A n kuɔ́ mmɛsémmɛ̀ kɛ̀ nní nfòù.
Kɛ yɛ̃́ n nɑɑtinɛ̀mɛ̀ ɑ kó ikuɔ́.
78 Ifɛi iì bo pĩ́ sipɔɔ yɛmbɛ̀ bɛ̀ɛ̀ n fɛ̃́ũnko dɛtetìrɛ̀,
mí n wèè pĩ nhɑ tɑnnɔ̀.
79 Bɛ̀ɛ̀ dɑ dé, bɛ̀ɛ kɔtɛní m borɛ̀.
Kɛ̀ dɛ̀ɛ yie nkɛ̀ bɛ̀ɛ bɑntɛ́ ɑ tié.
80 N dɔ́mu nɛ̀ n yɛ̀mmɛ̀ mɛmɔu kɛ́dɔɔ̀ ɑ kuɔ́,
kɛ̀ dɛ̀ɛ yie nkɛ̀ ifɛi bɑ́ m pĩ́ nhɑ ììkɛ̀.
81 Dɛ̀ nh ɔɔtímu ɑ bo n dɛɛtɛ́mɛ̀,
n kémmúmu ɑ bo dɔɔ̀mɛ̀ ɑ bɛ́i ntì.
82 N kémmú ɑ bɛ́i ntì bo dɔɔ̀mɛ̀ mmɛ, kɛ̀ dɛ̀ nh ɔ̀u,
kɛ̀ m bèkú mmɑ́ɑ̀ kɛ tú: Ɔ̃mmɔ̀nnì ndi ɑ yó m bɑ́ntɛ̀mɛ̀?
83 N dònnɛ̀ kudɔukù bɛ̀ nùńnɔ́ɔ kùnku muhɑ̃ɑ̃fɔ̃rímú ĩ́nkɛ̀,
m mɛ nyí yɛ̃̀ nhɑ kó itié.
84 Mí nhɑ kóo tɔ̃ntì n we kpɑɑ́ yɛ̀dɛ?
A yóó bekɛ́nɛ̀ ɔ̃̀nyiè bɛ̀ɛ̀ n fɛ̃́ũnko?
85 Sipɔɔ yɛmbɛ̀ n keù yɛfɔ̃̀tɛ̀ nyɛ.
Kɛ búútóo ɑ kuɔ́ kpɛti.
86 A tɑnnɔ̀ tu yɛmɔ́mmɔnyɛ nyɛ,
bɛ̀ n fɛ̃́ũnko dɛtetìrɛ̀ ndɛ, yɑ̀ɑ n dɛɛtɛ́.
87 Dɛ̀ do kpɑɑ́ sɑ́m̀pɔ́ nwe kɛ̀ bɛ̀ n dɛitɛ kɛtenkɛ̀ ĩ́nkɛ̀,
nɛ̀ mɛmmɛ m mɛ nyí bùtínnɛ́ ɑ tɑnnɔ̀.
88 A sɑ̀mu, n foukùnnɛ,
kɛ̀ dɛ̀ɛ yié nkɛ̀ nní mpĩ́ nhɑ tié.
89 N Yiɛ̀ nKuyie, ɑ nɑ́ɑǹtì bomu nsɑ̃́ɑ̃̀,
tì fìíkú kɛĩ́nkɛ̀ nkɛ.
90 A tú timɔ́mmɔnti yiɛ̀ nwe nɛ̀ ɑ bomɛ̀!
Fɔ̃́ɔ̃̀ fìí nkɛtenkɛ̀ kɛ̀ kɛ̀ fìíkú.
91 A bɛ́immu dɛmɔu kɛ̀ dɛ̀ buotɛ́ kɛ bo nɛ̀ yíenní,
kɛ yɛ̃́ dɛmɔu dɛ̀ pĩ̀ḿmɛ̀ ɑ tɔ̃mmú mmu.
92 Kɛ̀ dɛ̀ do í n nɑɑtinɛ̀ ɑ kuɔ́,
nɛ̀ yíe n do kumu n sémmɛ̀ miɛkɛ.
93 N yí yóó yɛ̃̀ nhɑ tɑnnɔ̀ bìtì!
Kɛ yɛ̃́ ɑ n duɔ̀mmɛ̀ mufòmmu nɛ̀ yɛɛ̀ borɛ̀ ndɛ.
94 N tú ɑ kou nwe, n dɛɛtɛ́,
kɛ yɛ̃́ n tũmmɛ̀mu ɑ tɑnnɔ̀.
95 Bɛyɛibɛ n díímu kɛ bo n kuɔ,
mí mmɛ n kèḿmú ɑ tié nyi.
96 Dɛmɔu bɑ́ dɛ̀ɛ̀ dɔ̀ɔ̀ kɛ wenni dɛ̀ mɔ̀kɛmu kumɑ̀nku,
ɑ tɑnnɔ̀ yiɛ mɛ̀ nyí mɔkɛ kumɑ̀nku.
97 N dɔ́mu ɑ kuɔ́ mɛdiɛ̀,
yɛwe yɛmɔu nh ɔ̃ ntoti n yɛ̀mmɛ̀ iì ĩ́nkɛ̀.
98 A kó yɛtɑnnɔ̀ n ciikùnnɛmu.
Kɛ̀ n ciì kɛ pɛ̃ɛ̃tɛ́ n dootitɔbɛ̀.
Kɛ yɛ̃́ yɛ̀ bomɛ̀ n yɛ̀mmɛ̀ miɛkɛ nkɛ sɑ̃́ɑ̃̀.
99 N ciìmu kɛ pɛ̃ɛ̃tɛ́ bɛ̀ɛ̀ n tiè,
kɛ yɛ̃́ n totimɛ̀ n yɛ̀mmɛ̀ ɑ tié nyĩ́nkɛ̀.
100 N yɛ̀mmɛ̀ dɛunɛ̀mu bɛhɛikɛ̀nkótíbɛ̀ kɔ̃mɛ,
kɛ yɛ̃́ m pĩ́mmɛ̀mu ɑ tɑnnɔ̀.
101 N yennínɛ̀mu mɛyɛi nkó icɛ imɔu,
kɛ̀ dɛ̀ bo yie nkɛ̀ nni mpĩ́ nhɑ nɑ́ɑǹtì.
102 N yí bùtínnɛ́ ɑ tɑnnɔ̀,
kɛ yɛ̃́ fɔ̃́ɔ̃̀ yɛ̀ nni ntiémmɛ̀.
103 A nɑ́ɑǹtì wɛ̀ɛ̀timu n nùù miɛkɛ,
kɛ pɛ̃ɛ̃tɛ́ mɛcekùɔ̀.
104 A kó yɛtɑnnɔ̀ yɛɛ̀ te kɛ̀ n ciitɛ́,
Dɛɛ̀ te kɛ̀ n yí dɔ́ iyɑ́ɑ̀bisícɛ.
105 A nɑ́ɑǹtì tu dɛfìtírɛ̀ ndɛ dɛ̀ɛ̀ m mí,
Tiì n duɔ̀ nkuwenniku n kó kucɛ miɛkɛ.
106 M bɛ́i ndìì nùù n yó ndi pĩ̀ḿmu.
Diì tu m bo tũmmɛ̀ ɑ tɑnnɔ̀ yɛ̀ɛ̀ tu timɔ́mmɔnti.
107 N di ifɛi nyi mɛdiɛ̀,
n Yiɛ̀ nKuyie nhɑ n fòùkùnnɛ ɑ nɑ́ɑǹtì yɛ̃mmɛ̀.
108 N Yiɛ̀ nKuyie ncɔutɛ́ n sɑ̃ɑ̃,
kɛ́ n tié nhɑ tɑnnɔ̀.
109 M bo mukṹṹ nnɛ̀ mufòmmu dɛ sɑku nku,
m mɛ nyí yɛ̃̀ nhɑ kuɔ́.
110 Bɛyɛibɛ n dii ticùɔ̀tì nti,
m mɛ nyí dɛ̀tɛ́nɛ̀ ɑ tɑnnɔ̀.
111 A tié nyiì tu n kpɛrɛ n te dɛ̀,
n yɛ̀mmɛ̀ i nnɑɑtinɛ̀.
112 N duɔ́mmu n yɛ̀mmɛ̀ kɛ dɔɔri ɑ kuɔ́ yɛ̃mmɛ̀,
kɛ yó mmɛ̀ dɔ̀ɔ̀ri sɑ̃́ɑ̃̀ n fòmmu mumɔu.
113 N yí dɔ́ yɛnɔ̀ yɛ̀dɛ́ɛ̀ yɛmbɛ̀,
n dɔ́ ɑ kuɔ́ nyi.
114 Fɔ̃́ɔ̃̀ tu n kó disɔ̀rì, n kó kudɔpìkù,
n kémmú ɑ yó n nɑ́kɛ́ tì nti.
115 Díndi bɛnitiyɛibɛ fũtɛnɛ̀ m borɛ̀.
Kɛ̀ dɛ̀ɛ yie nkɛ̀ nní ntũ n Yiɛ̀ nKuyie ntɑnnɔ̀.
116 A nni mpĩ́ nhɑ bɛ́i nkɛ yɛ̃ mmù.
Kɛ̀ dɛ̀ɛ yie nkɛ̀ nní fòù.
A bɑ́ɑ́ yóu kɛ̀ nní ndɑ kémmú kɛ́di ifɛi.
117 Fɔ̃́ɔ̃̀ yó ntú nkó dipĩ̀ńnì kɛ̀ n nɑ kɛ́cootɛ́.
Kɛ̀ dɛ̀ɛ yie nkɛ̀ nní ndɑkɛ ɑ kuɔ́ kpɛ́í.
118 A dootóomu bɛ̀ɛ̀ kó dimɑ̀ɑ̀ bùtínnɛ́ ɑ kuɔ́.
Kɛ yɛ̃́ bɛ kó mutɔ̃mmú mumɔu túmɛ̀ siyɑ́ɑ̀bìsí kɔ̃mu mmu.
119 A ùtóomu bɛyɛibɛ kó dimɑ̀ɑ̀ tiyontì kɔ̃mɛ.
Dɛɛ̀ te kɛ̀ n dɔ́ ɑ tié.
120 N wúó nhɑ kuɔ́ kɛ̀ n kɔ̃̀ntì ɑumu,
kɛ̀ n kɔ̃m̀bùɔ̀tì duònɛ̀ ɑ tɑ̃ɑ̃tɛ́ tì.
121 N dɔɔrimu dɛ̀ɛ̀ sìɛ́,
kɛ tũ ntimɔ́mmɔnti,
bɑ́ɑ́ yóu kɛ̀ n do bɛ̀ɛ̀ n fɛ̃́ũnko bɛ nɔu miɛkɛ.
122 Dɔúnnɛ̀ mí nhɑ kóo tɔ̃ntì dinùù kɛ yĩ:
A yó nni ndɔɔri mɛsɑ̀ɑ̀.
Bɑ́ɑ́ yóu kɛ̀ sipɔɔ yɛmbɛ̀ nni nfɛ̃́ũnko.
123 M bɔ́ú nhɑ kó mɛdɛɛtímɛ̀ kɛ ɔ̀umu,
n kémmú timɔ́mmɔnti ɑ nɑ̀kɛ́ tìì kpɛ́í kɛ̀ dɛ̀ m bimu.
124 Dɔɔ̀ mí nhɑ kóo tɔ̃ntì mɛsɑ̀ɑ̀, ɑ nitimu,
m bɛnkɛ kɛ̀ n yĩ́ɛ̃́tɛ́ ɑ kuɔ́.
125 N tú ɑ kóo tɔ̃ntì nwe,
m pɑ̃ mɛciì nkɛ̀ m bɑntɛ́ ɑ tié.
126 N Yiɛ̀ nKuyie ndɛ̀ tùɔ̀kɛmu ɑ bo pĩ́ ndɛ̀ ɑ tɔ̃mmú.
Bɛnìtìbɛ̀ cɑ̀ɑ̀rimu ɑ kuɔ́.
127 N dɔ́mu ɑ tɑnnɔ̀ kɛ̀ dɛ̀ pɛ̃ɛ̃tɛ́ mɛsɔɔ.
Kɛ pɛ̃ɛ̃tɛ́ mɛsɔɔ nsɑ̀ɑ̀mɛ̀.
128 A tɑnnɔ̀ yɛmɔu n yɛ̀ wùó nkɛ̀ yɛ̀ wennimu,
n yí dɔ́ dɛyɑ́ɑ̀bìsíkpɛrɛ ndɛ.
129 A tié ntú isɑ̀ɑ̀yì nyi.
Dɛɛ̀ kpɛ́í nte kɛ̀ n yì ɑ̃ɑ̃̀ n yɛ̀mmɛ̀ miɛkɛ.
130 Kɑ̀ɑ wɛ̀ɛ́tɛ́ ɑ nɑ́ɑǹtì kɛ bɛnkɛ onìtì dɛ̀ ɔ̃ɔ̃ ò duɔ́ nkuwenniku nku.
Tiì duɔ̀ mmɛciì mbɛsĩ́ntíbɛ̀.
131 Nh onnɛ́ n níí nku kɛ bo mɑɑ́nko ɑ tɑnnɔ̀,
n dɔ́ mɛ̀ɛ̀ kpɛ́í nhɑ tɑnnɔ̀ kɛ̀ dɛ̀ nh ɔɔtí.
132 Wɛ̃ɛ̃tɛní m bíɛ́kɛ̀ kɛ́ n kuɔ́ mmɛsémmɛ̀,
kɛ́ndònnɛ̀ ɑ dɔɔrimɛ̀ bɛ̀ɛ̀ dɑ dɔ́.
133 N teennɛ̀ kɛ̀ nní nyĩkú ɑ nɑ́ɑǹtì ĩ́nkɛ̀.
A bɑ́ɑ́ yóu kɛ̀ mɛyɛi mmɑmɛ̀ n nɑ.
134 A n dɛɛtɛ́nɛ̀ bɛ̀ɛ̀ n fɛ̃́ũnko
kɛ̀ n nɑ kɛ́ntũ nhɑ tɑnnɔ̀.
135 Wéntɛ́ní mí nhɑ kóo tɔ̃ntì fɛnɔnsɑ̀ɑ̀fɛ̀,
kɛ́ n tié nhɑ kó ikuɔ́.
136 N nɔnniɛti tiì pũɔ̃̀,
bɛnìtìbɛ̀ í tũ mmɛ̀ɛ̀ kpɛ́í ɑ kuɔ́.
137 N Yiɛ̀ nKuyie nhɑ wetímu,
kɑ̀ɑ beéntì dò nsɛ́i.
138 A wɑ̃̀ri ɑ tié kɛ̀ ì wennimu,
kɛ tú timɔ́mmɔnti mɑ́ɑ̀.
139 N wúó n dootitɔbɛ̀ yɛ̃̀mmɛ̀ ɑ nɑ́ɑǹtì,
kɛ̀ dɛ̀ n yóumu.
140 N yɑ̀ɑ́kɛ́mu ɑ nɑ́ɑǹtì, tì mɛ̀nkɛ tú timɔ́mmɔnti nti.
Mí nhɑ kóo tɔ̃ntì kɛ̀ n tì dɔ́.
141 N kũɔ̃nnìmu kɛ̀ bɛ̀ n sènkɛ̀rì.
M mɛ nyí yɛ̃̀ nhɑ tɑnnɔ̀.
142 Timɔ́mmɔnti ɑ dɔú ntì bomu nsɑ̃́ɑ̃̀,
kɑ̀ɑ kuɔ́ tú timɔ́mmɔnti.
143 Mɛyɛǹcɑɑ̀rìmɛ̀ nɛ̀ kukɔ̃m̀bɔ̀doróo dɛɛ̀ n tùɔ̀kɛní.
Dɛ̀ɛ̀ n nɑɑti dɛɛ̀ nɛ́ tú ɑ tɑnnɔ̀.
144 A tié ndò nsɛ́í nwe sɑ̃́ɑ̃̀.
M pɑ̃ mɛciì kɛ̀ dɛ̀ɛ yie nkɛ̀ nní nfòù.
145 N Yiɛ̀ nKuyie n dɑ yu nɛ̀ n yɛ̀mmɛ̀ mɛmɔu ndi.
Yie nkɛ́ n teennɛ̀ kɛ̀ nní ntũ nhɑ kuɔ́.
146 N dɑ kuɔ̀nnɛ̀mu kɛ tú ɑ́ n dɛɛtɛ́,
kɛ̀ nni ntũ nhɑ tié.
147 Dɛ̀ ɔ̃ nkpɑɑ́ kɛ í wentɛ́,
kɛ̀ n kuɔ̀nɛ̀ fɔ̃́ nwe.
N kémmú ɑ yó n nɑ́kɛ́ tì nti.
148 Dɛ̀ ɔ̃ n kpɑɑ́ uú kɛ̀ n nɔ̀nfɛ̀ sìékɛ́ ɑ nɑ́ɑǹtì nti.
Kɛ̀ nh ɑ̃ɑ̃̀ ɑ tié n yɛ̀mmɛ̀ miɛkɛ.
149 N Yiɛ̀ nKuyie, nkéntɛ́ n dɑbònnì,
ɑ sɑ̀ mɛ̀ɛ̀ kpɛ́í, n fòùkùnnɛ kɛ́ndò nhɑ tɑ̃ɑ̃tɛ́ tì.
150 Bɛ̀ɛ̀ n fɛ̃́ũnko bɛ̀ n tɔ̀ɔ́ntɛnímu,
dɛ kó isɔkɛ yɛmbɛ̀ dɛ̀tɛ́nɛ̀mu ɑ kó ikuɔ́.
151 Fɔ̃́ n Yiɛ̀ nKuyie nhɑ n tɔ́kɛ́nɛ̀mu,
ɑ tɑnnɔ̀ yɛmɔu tú timɔ́mmɔnti nti.
152 N yɛ̃́mu nɛ̀ dimɔ̀nnì ɑ tié,
fɔ̃́ɔ̃̀ ì nɑ̀kɛ́ kɛ̀ ì bo sɑ̃́ɑ̃̀.
153 Wéntɛ́ n yo mmɛ̀ɛ̀ sémmɛ̀,
kɛ́ n dɛɛtɛ́ kɛ yɛ̃́ n yí yɛ̃̀mmɛ̀ ɑ kuɔ́.
154 N kónnɛ́ kɛ́ n dɛɛtɛ́
n fòùkùnnɛ kɛ́ndò nhɑ bɛ́immɛ̀.
155 Bɛyɛibɛ í yóó cootɛ́,
kɛ yɛ̃́ bɛ̀ í wɑntimɛ̀ kɛ bo tũnnɛ ɑ kuɔ́.
156 Áú n Yiɛ̀ nKuyie! A sémmɛ̀ dɛumu.
N dɔ́ kɛ́ntũ nhɑ tɑnnɔ̀ nyɛ.
157 N dùɔ̀ntɔbɛ̀ bɛ̀ɛ̀ n fɛ̃́ũnko bɛ̀ í sénní
m mɛ nyí bùtínnɛ́ ɑ tié.
158 N yɑ̀mu bɛnìtìbɛ̀ fiiti mɛ̀ɛ̀ botí bɛtɔbɛ̀,
kɛ̀ dɛ̀ m pĩ nyisíɛ́.
Dɛ yɛmbɛ̀ í tũ nhɑ kó ikuɔ́.
159 N Yiɛ̀ nKuyie n wéntɛ́ n dɔ́mu ɑ tɑnnɔ̀.
A sɑ̀mu n fòùkùnnɛ.
160 A nɑ́ɑǹtì kó dikũ̀nnì tu timɔ́mmɔnti nti.
A tɑnnɔ̀ tu yɛmɔ́mmɔnyɛ nyɛ kɛ bo sɑ̃́ɑ̃̀.
161 Sikpɑ̀ɑ̀tìbìí n fɛ̃́ũnko dɛtetìrɛ̀ ndɛ,
m bùɔ̀tì mɛ nduò ɑ nɑ́ɑǹtì mɑ́ɑ̀ ndi.
162 A nɑ́ɑǹtì n duɔ̀ ndiwɛ̀ì ndi
kɛ̀ dì dònnɛ̀ wèè dokɛ́ kɛ ɛí o kpɛri ɔ̃ ndommɛ̀.
163 N yí dɔ́ siyɑ́ɑ̀bìsí, sì n dò nyisíɛ́ nyi.
N dɔ́ ɑ kuɔ́ nyi.
164 Diyiè dimɑ́ɑ̀ miɛkɛ kucɛ mɛ̀yiekɛ̀ ndi,
nh ɔ̃ɔ̃ dɑ sɑ̃ntɛmɛ̀.
A tɑnnɔ̀ tu yɛmɔ́mmɔnyɛ nyɛ.
165 Diwɛ̀ì diɛrì bo bɛ̀ɛ̀ dɔ́ ɑ kó ikuɔ́ bɛ kpɛ́í nkɛ.
Mɛdítímmɛ̀ mɑmɛ̀ í bo bɛ kpɛ́í.
166 N Yiɛ̀ nKuyie n kémmú ɑ bo n dɛɛtɛ́mɛ̀ mmɛ,
kɛ yɛ̃́ n dɔɔrimɛ̀ ɑ tɑnnɔ̀ yɛ̃mmɛ̀.
167 N tũmmu ɑ tié nnɛ̀ n yɛ̀mmɛ̀.
N yì dɔ́mu mɛdiɛ̀.
168 N tũmmu ɑ tɑnnɔ̀ nɛ̀ ɑ tié.
N cɛ imɔu ɑ ì wùómmu.
169 N Yiɛ̀ nKuyie nyóu kɛ̀ n dɑbònnìi tuɔkoo ɑ borɛ̀.
N duɔ́ mmɛciì kɛ́ndò nhɑ tì bɛ́immɛ̀.
170 Yóu kɛ̀ m bɑ́ɑmmìi tuɔkoo ɑ borɛ̀,
n dɛɛtɛ́ kɛ́ndò nhɑ tì bɛ́immɛ̀.
171 A sɑ̃nni bɑ́ɑ́ yɛ̀ n nùù miɛkɛ.
Kɛ yɛ̃́ ɑ m bɛnkɛmɛ̀mu ɑ kuɔ́.
172 M bɑ́ɑ́ yóu m bo n dièmmɛ̀ ɑ n dɔúnnɛ̀ dìì nùù
kɛ yɛ̃́ ɑ tɑnnɔ̀ yɛmɔu túmɛ̀ yɛ̀ɛ̀ sìɛ́ yɛ̀ nyɛ.
173 A nɔ̀ùtɛ̀ nni nteénnɛ̀.
Kɛ yɛ̃́ n tɑ̃ɑ̃tɛ́mɛ̀ ɑ kó yɛtɑnnɔ̀ nyɛ.
174 N Yiɛ̀ nKuyie, n yɑ́ɑ́mu ɑ bo n dɛɛtɛ́mɛ̀,
n yɛ̀mmɛ̀ nɑɑtinɛ̀mu ɑ kó ikuɔ́.
175 N dɔ́ nni nfòùmu kɛ dɑ sɑ̃ntí.
Yóu kɑ̀ɑ tɑ̃ɑ̃tɛ́ tì nni ncúɔ́.
176 Nh ɑ̃tirɛmu kɛ dònnɛ̀ fɛpìèfɛ̀ fɛ̀ɛ̀ feti.
N wɑmmú mí nhɑ kóo tɔ̃ntì,
kɛ yɛ̃́ n yí yɛ̃̀mmɛ̀ ɑ tɑnnɔ̀.