120
Onìtì bɛ̀ wɑ̀tí wè kó mubɑ́ɑmmu
1 Bɛ̀ ɔ̃ nkɔri Kuyie ncĩ́ɛ̃̀tɛ̀ kɛ dentì fɛ̀ɛ̀ yɛ̀nfɛ̀.
N tɑ mɛyɛǹcɑɑ̀rìmɛ̀ kɛ kuɔ́nnɛ̀ n Yiɛ̀ nKuyie nku,
kɛ̀ kù cɔutɛ́ n dɑbònnì.
2 N Yiɛ̀ nKuyie nhɑ n dɛɛtɛ́nɛ̀ siyɑ́ɑ̀bìsí yɛmbɛ̀.
Fũũ mbɛsoùmbɛ̀.
3 Díndi bɛ̀ɛ̀ ɔ̃ mpɑriku kɛ nɛ́ soú.
Di dò mbɛ̀ di yĩ́mɛ?
Di dò mbɛ̀ dí dɔɔ̀ bɑ?
4 Mɛpenyómmɛ̀ bɛ̀ sũ̀ɔ̃́tɛ́ mɛ̀ nɛ̀ yɛhɑ̃ɑ̃kũɔ̃ nyɛ̀ɛ̀ cɔ̀ú mmuhɑ̃ɑ̃́
dɛɛ̀ yó ntú di kó tiyeti.
5 N kóò kɛ́mbo bɛkpɑ́kpɑ̀rìbɛ̀ cuokɛ̀ dɛ̀ í n dɔ̀ɔ̀ mɛsɑ̀ɑ̀,
n kóò kɛ́nhɑ̃nɛ̀ bɛ̀ɛ̀ í yɛ̃́ Kuyie dɛ̀ n cɑ̀ɑ̀rɛ̀mu.
6 N kɑrinɛ̀ bɛ̀ɛ̀ í dɔ́ kunɑɑtí kɛ̀ dɛ̀ mɔ̀ntɛmu.
7 Mí n dɔ́ kunɑɑtí nku,
kɛ̀ n nɛ́ nɑ́ɑ́ mbɛ̀ nni nwɑntinɛ̀ mudoò.