16
Kuyie ndɛɛtɛ́ wè kó diwɛ̀ì
Dɑfiti yɛ̀nfɛ̀.
 
Áú Kuyie! Nni nkɑ̃nkɛ́,
fɔ̃́ɔ̃̀ tu n kó disɔ̀rì.
N Yiɛ̀ nKuyie nfɔ̃́ɔ̃̀ m bɑkɛ́,
m pɛ́ú fɔ̃́ɔ̃̀ mɑ́ɑ̀ borɛ̀ diwɛ̀ì.
 
Bɛsɑ̀ɑ̀bɛ̀ bɛ̀ɛ̀ bo dihɛì miɛkɛ
bɛɛ̀ tu bɛnitimɔ́mmɔmbɛ n dé bɛ̀.
Bɛ̀ɛ̀ kɔ̀rì yɛbɔkɛ̀ borɛ̀,
m bɑ́ɑ́ kɔtɛ bɛ̀ feu dɛ̀ bɛ kó iwũɔ̃,
m bɑ́ɑ́ fíé bɛ kó iwũɔ̃,
n ketɛ́ kɛ bɑ́ɑ́ ɑɑtɛ kɛ́yú bɛ bɔkɛ̀ kó yɛyètɛ̀.
 
N Yiɛ̀ nKuyie nfɔ̃́ɔ̃̀ tu n kpɛrɛ dɛmɔu,
fɔ̃́ɔ̃̀ n duɔ̀ n dɔ́ dɛ̀,
n kpɛti timɔu bo ɑ nɔu miɛkɛ nkɛ.
A n duɔ́ ndɛ̀ n nɑɑtimu,
dɛ̀ tu dɛsɑ̀ɑ̀rɛ̀ ndɛ n kpɛ́í
kɛ n duɔ̀ ndiwɛ̀ì.
 
N sɑ̃ntímu Kuyie nkùù n tiè,
bɑ́ kɛyènkɛ̀ n yɛ̀mmɛ̀ ɔ̃ n dentɛmmu dɛ kó itié.
M buɔ́ n Yiɛ̀ nKuyie nku sɑ̃́ɑ̃̀,
kù m bonɛ̀mu, m bɑ́ɑ́ kpeutɛ.
Dɛɛ̀ te kɛ̀ n yɛ̀mmɛ̀ nɑɑti,
kɛ̀ n dìènnɛ̀ diwɛ̀ì.
10 Kɛ yɛ̃́ kɛ dò mbɑ́ kɛ̀ n ku,
m bɑ́ nkpɑɑ́ kufɔ̃ti miɛkɛ,
kɛ yɛ̃́ ɑ í yóó yóumɛ̀ ɑ kou kòo pɑ̃ɑ̃kɛ.
11 A m bɛnkɛmu mufòmmu kó kucɛ,
kɛ yo nni mbonɛ̀ kɛ n duɔ̀ ndiwɛ̀ì.