40
Dɑfiti dɔ́mɛ̀ bɛ̀ɛ bɑntɛ́ Kuyie nhò dɔ̀ɔ̀ dɛ̀
Bɛ̀ dìèmmɛ̀ Dɑfiti yɛ̀nfɛ̀.
 
M bɔ̀útɛ́ Kuyie nku kɛ̀ kù cuonní m bíɛ́kɛ̀
kɛ kèè n dɑbònnì,
kɛ n dènnɛní difɔ̃̀tìrì n nɑ nku dìì miɛkɛ,
kɛ n fũ̀ṹtɛ́ disɑ̃̀ũ̀ miɛkɛ,
kɛ n còńnɛ́ dipèrì ĩ́nkɛ̀,
kɛ kpénkùnnɛ n tɑ̀ɑ̀kɛ,
kɛ ɑ̃nnɛ́ n nùù fɛyɛmpɑ̀nfɛ̀,
ku sɑ̃nni kɔfɛ,
bɛsṹkùbɛ̀ bo kù yɑ̀ kɛ́ kù depɛ,
kɛ́ kù duɔ́ mbɛmɑ́ɑ̀.
Dɛ̀ nnɑɑti wèè duɔ́ nhomɑ́ɑ̀ Kuyie,
wèè í tũ nsipɔɔ yɛmbɛ̀,
nɛ̀ siyɑ́ɑ̀bìsí yɛmbɛ̀.
 
N Yiɛ̀ nKuyie nhɑ pĩ́ mmùù tɔ̃nsɑ̀ɑ̀mù ti kpɛ́í mmù sũmu,
ɑ dɔ́ kɛ́dɔɔ̀ tì ti kpɛ́í ntì sũmu,
òmɔù í dɑ mɑ̀nnɛ̀ ɑ tɔ̃mmú sũmu,
m bɑ́ɑ́ nɑ kɛ́nɑ́kɛ́ mù mɑ̀mɛ̀.
A dɔ́ dɛ̀ í tú bɛ̀ bo ndɑ feumɛ̀ iwũɔ̃ yoo yɛpɑ̃rɛ̀,
n tì bɑntɛ́mu,
ɑ í dɔ́ bɛ̀ ndɑ feu iwũɔ̃ kɛ tuɔ̀ nyɛwũɔ̃tɔ̀rɛ̀ ĩ́nkɛ̀,
yoo bɛ̀ dɑ feu ì mɛyɛi ncĩ́ɛ̃́mmɛ̀ kpɛ́í.
Dɛ mɔ̀nnì ndi n yĩ́mɛ̀: Ntɛ mí,
tì wɑ̃̀ri n kpɛ́í nyikuɔ́ pɑ́tíri miɛkɛ kɛ yɛ̃mmɛ̀.
Kuyie n dɔ́ kɛ́yie nhɑ kpɛti nti,
ɑ kuɔ́ bomu n yɛ̀mmɛ̀ miɛkɛ.
10 N nɑ̀kɛ́mu ditĩ̀nnì cuokɛ̀ ɑ sɑ̀ɑ̀,
n yí muti n nùù, n Yiɛ̀ nKuyie nhɑ ti yɛ̃́mu.
11 N yí sɔrì mɛsɑ̀ɑ̀ nhɑ n dɔ̀ɔ̀ mɛ̀,
n nɑ́ɑ́mmu ditĩ̀nnì diɛrì miɛkɛ ɑ tú mɛ̀ n dɛɛtíwè kɛ wenni,
n yí sɔrì ɑ sɑ̀ɑ̀ nnɛ̀ ɑ kó timɔ́mmɔnti
12 Kuyie nhɑ yó n kuɔ́mmu mɛsémmɛ̀,
ɑ sɑ̀ɑ̀ nnɛ̀ ɑ kó timɔ́mmɔnti dɛɛ̀ m bɑ̀ɑ̀ sɑ̃́ɑ̃̀.
 
13 Mɛyɛi mmɛ̀ɛ̀ n tùɔ̀kùní tipíìtì timɔu mɛ̀ í mɔkɛ mɛ̀ mɑ̀mɛ̀,
n yɛi mmɛ̀ɛ̀ n tũ̀ m mɛ̀ ɔ̀unɛ̀mu,
mɛ̀ sũnɛ̀mu n yùtì,
n kɔ̃m̀bùɔ̀ yɛ̀mu.
14 Kuyie nyɑ̀ɑ̀ n dɛɛtɛ́!
N teennɛ̀ mɛcɑ̃ɑ̃.
15 Bɛ̀ɛ̀ n dɔ́nɛ̀ mukṹṹ bɛmɔu ifɛii bɛ̀ pĩ nkɛ bɛ̀ɛ sĩ́nnɛ́,
bɛ̀ɛ̀ n dɔ́nɛ̀ mɛyɛi mbɛ̀ɛ bótí nɛ̀ ifɛi.
16 Dɛ̀ɛ di bɛ̀ɛ̀ n ti mudɑɑ́,
ifɛii bɛ̀ pĩ.
 
17 Dɛ̀ nnɑɑti bɛ̀ɛ̀ wɑɑ̀ nKuyie,
kɛ̀ diwɛ̀ì mbɛ̀ bo.
Bɛ̀ɛ̀ dɔ́ mɛdɛɛtímɛ̀,
bɛ̀ ntú sɑ̃́ɑ̃̀: Kuyie nkuù dɛu.
18 N tú ocĩ̀rì nwe, osénnìwè,
N Yiɛ̀ nKuyie nnɛ́ yɛ̃́mu n kpɛ́í,
Kuyie nfɔ̃́ɔ̃̀ tu n kóo teentì,
n dɛɛtíwè, bɑ́ɑ́ ɔɔtɛní!