41
Bɛ̀ fɛ̃́ũnko wè bɑ̀ɑ́mmɛ̀ Kuyie
1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
2 Dɛ̀ nnɑɑti wèè dɑ̀kɛ bɛcĩ̀rìbɛ̀ kpɛ́í,
kɛ̀ mɛhɑ́ɑ́rìmɛ̀ ò tùɔ̀kɛní Kuyie nhɔ̃ɔ̃ ò dènnɛmu.
3 Ti Yiɛ̀ nKuyie nhɔ̃ nhò kɑ̃nkɛ́mu kòo ńfòù,
kɛ́di kunɑɑtí kɛtenkɛ̀ miɛkɛ,
kù ɔ̃ɔ̃ í nyóu kòo dootitɔbɛ̀ɛ ò nɑ.
4 Kòò mɔ nkɛ duɔ́ Kuyie nhɔ̃ nhò bɑ̀ɑ̀mu,
kɛ yɑ́úkùnko o kɔ̃̀ntì o muɔndɔ́ù ĩ́nkɛ̀.
5 Mí nhɔ̃ɔ̃ yĩ́: N Yiɛ̀ nKuyie n kuɔ́ mmɛsémmɛ̀
kɛ́ m miɛkùnnɛ n dɑ yetɛ́nɛ̀mu.
6 N dootitɔbɛ̀ nɑ̀ɑ́mmu n kpɛ́í nkɛ tú:
Ò yóó kú ɔ̃̀mmɔ̀nnì?
O yètìrì yóó kpɑ́nnɛ́ ɔ̃mmɔ̀nnì?
7 Bɛ miɛkɛ kòò mɔù kɔ̀tɛní kɛ n yɑ̀,
ò nni nwɑ́tìrì,
kɛ́tɔ siyɑ́ɑ̀bìsí kɛ́yɛ̀nnɛ̀ kɛ́pitɛ́.
8 N dootitɔbɛ̀ ɔ̃ɔ̃ tíímmu kɛ́nwɛ́ú n kpɛ́í,
bɛ̀ nɑ́ɑntɛ n kó mɛyɛi mmɛ.
9 Bɛ̀ tu dɛ̀ɛ ǹ tùɔ̀kɛní dɛ̀ í tú dɛsɑ̀ɑ̀rɛ̀,
bɛ̀ tu n domu kɛ tɛ̃́nkɛ í yóó ítɛ́.
10 Kɛ̀ n nɛ́po mɔ́mmuɔ n tɑ̃́ wè,
nɛ̀ wè ti wɛ̃ nkɛ yo, weè kòńtɛ́ kɛ n cuùtì.
11 N Yiɛ̀ nKuyie n kuɔ́ mmɛsémmɛ̀,
n yíi nkɛ̀ m bɛ̀ fɔ̀ɔ́ mbɛ̀ n dɔ̀ɔ̀ dɛ̀.
12 N yóó bɑntɛ́ ɑ n kómmúmɛ̀,
n dootitɔbɛ̀ n yĩɛ̃kɛ dìì mɔ̀nnì ndi.
13 A yó nni ntɔ n yíé mmɛ̀ɛ̀ kpɛ́í nkɛ ɑ kuɔ́,
kɛ̀ nni mbo ɑ borɛ̀ sɑ̃́ɑ̃̀.
14 N Yiɛ̀ nKuyie nyIsidɑyɛɛribɛ dɔú nkù,
ɑ yètìrì ńdɛu kɛ̀ tí ndɑ sɑ̃ntí sɑ̃́ɑ̃̀ fɔ̃́ nnɛ̀ mutɔ̃mmú ɑ pĩ́ mmù,
kɛ yó mmù pĩ nsɑ̃́ɑ̃̀,
kɛ̀ dɛ̀ mmɛ ndò. Ami.