44
Kuyie ndootóomɛ̀ ku kɔbɛ
1 Bɛdèmbɛ̀ kóo kótì dìèmmɛ̀ Kodee bí yɛ̀nfɛ̀.
2 Ti kèèmu nɛ̀ ti to,
ti yɛmbɛ̀ ti nɑ̀kɛ́mu ɑ do dɔ̀ɔ̀ dɛ̀
dimɔ̀nnì kótírì miɛkɛ.
3 Fɔ̃́ɔ̃̀ bɛ̀ti ibotí kɛ kɑ̀nnɛ ti kɔku,
kɛ potɛ́ ibotí kɛ̀ bɛ̀ kɑ̀ri kɛ pitɛ́.
4 Dɛ̀ í tú nɛ̀ bɛ kpɑ̀rìse nyɛ bɛ tiekɛmɛ̀ dihɛì,
dɛ̀ í tú nɛ̀ bɛ wɛ̃rímú mmu bɛ̀ nɑmɛ̀,
nɛ̀ ɑ nɔyɔ̃nkperì ndi bɛ nɑmɛ̀
kɛ yɛ̃́ ɑ do bɛ̀ kòḿmúmɛ̀
ɑ bɛ̀ dɔ́ mɛ̀ɛ̀ kpɛ́í.
5 N Yiɛ̀ nKuyie, nfɔ̃́ɔ̃̀ tu nkóo kpɑ̀ɑ̀tì,
fɔ̃́ɔ̃̀ ɔ̃ɔ̃ duɔ́ nkɑ̀ɑ kɔbɛɛ nɑ.
6 Fɔ̃́ɔ̃̀ te kɛ̀ ti bɛ̀ti ti dootitɔbɛ̀
nɛ̀ ɑ kó diyètìrì ndi ti nɑumɛ̀ bɛ̀ɛ̀ ti dokùnɛ̀
7 n yí tɑ̃́ n tɑ̃mmù mmu,
n siè diì í dɛɛrí.
8 Fɔ̃́ɔ̃̀ ti dɛɛrínɛ̀ ti dootitɔbɛ̀,
kɛ fɛikùnko bɛ̀ɛ̀ í ti dɔ́.
9 Ti Yiɛ̀ nKuyie nti pɔtìnɛ̀ ɑ yètìrì ndi yɛwe yɛmɔu,
kɛ dɑ sɑ̃ntí sɑ̃́ɑ̃̀.
10 Nɛ̀ mɛmmɛ kɑ̀ɑ ti yetɛ
kɛ ti ɑ̃nnɛ́ ifɛi,
ɑ tɛ̃́nkɛ í niɛ̀nɛ̀ ti kó bɛhɑ̃ɑ̃pɔ̀mbɛ̀ dikpɑ̀nnì.
11 Fɔ̃́ɔ̃̀ duɔ́ nkɛ̀ ti cokù ti dootitɔbɛ̀,
kɛ̀ bɛ̀ɛ̀ ti níí nkɛ̀ bɛ̀ ɛí ti kpɛrɛ bɛ̀ dɔ́mɛ̀.
12 Fɔ̃́ɔ̃̀ bɛ̀ nti duɔ́ nyiwũɔ̃ bɛ̀ kɔ̀ù ì kɔ̃mɛ,
kɛ ti cíɛnko kɛ̀ ti tɑɑ̀ yɛhɛkɛ̀ tɛyɛ̀.
13 A fiiti ɑ nìtìbɛ̀ mbɛ dɛtetìrɛ̀
ɑ bɛ̀ fiiti fɑ̀ɑ̀rɛ̀ fɑ̀ɑ̀rɛ̀ nwe.
14 Kɛ yóu kɛ̀ ti cɛ̃pɛɛtitɔbɛ̀ ti senku,
kɛ̀ bɛ̀ɛ̀ ti tɔ́kɛ́nɛ̀ kɛ̀ bɛ̀ ti dɑú.
15 Fɔ̃́ɔ̃̀ duɔ́ nkɛ̀ ibotí ti diè,
bɛ̀ ti dɑúmu kɛ éùròo.
16-17 Nh ɔ̃ nkɛ̀ n kèè n kpɑntídɛ̀ntɔbɛ̀ tɑmmɛ̀ ifɛi iì ɔ̃ mpĩ́
kɛ̀ m pi n yììkɛ̀,
nh ɔ̃ nkɛ̀ n yɑ̀ n dootitɔbɛ̀ bɛ̀ɛ̀ ti sɑ̃́ɑ̃́ nkɛ ti wɛ̃́nnì
kɛ dɔ́ kɛ́pɛitɛ nh ɔ̃ senkɛ̀rì mmɑ́ɑ̀ ndi.
18 Dɛndɛ kó dimɑ̀ɑ̀ ti tùɔ̀kùmmu ti mɛ nyí dɑ yɛ̃̀,
ti í yetɛ ɑ tɑummɛ̀.
19 Ti í wɛ̃̀tɛ ti fɔ̃nkó,
ti í yóu kucɛ ɑ ti bɛnkú kù.
20 Kɑ̀ɑ nɛ́ ti kùɔ sikpɑmɔɔ́ miɛkɛ,
kɛ̀ mukṹṹ nkó dibiìnnì ti dɑ̀tínnɛ́.
21 Kɛ̀ ti do ndɑ yɛ̃̀, fɔ̃́ nKuyie,
kɛ̀ ti do ntũ̀nnɛ yɛbɔkɛ̀,
22 ɑ nɑ nyɛ̃́mu,
kɛ yɛ̃́ ɑ yɛ̃́mɛ̀ onìtì yɛ̀mmɛ̀ dòmmɛ̀.
23 Fɔ̃́ɔ̃̀ kpɛ́í nkɛ kɛ̀ bɛ̀ ti dɔ́ mukɔ̀ù yɛwe yɛmɔu,
ti do ntipìètì tìì bo tìnti mukɔ̀ù kpɛ́í.
24 N Yiɛ̀ nKuyie, entɛ! Bɑ nte kɑ̀ɑ duɔ́? Entɛ!
Bɑ́ɑ́ ti bɔntóo sɑ̃́ɑ̃̀.
25 Dɛ̀ yĩ́mɛ kɑ̀ɑ ti sɔrìnɛ̀?
Kɛ yɛ̃̀ mbɛ̀ ti yommɛ̀ nɛ̀ muwɛ̃rímú mmu kɛ ti fɛ̃́ũnko,
26 kɛ̀ ti yɛ̀mmɛ̀ cɑ̀ɑ̀rɛ̀ kɛ̀ ti duɔ́ mutɑ̃́ɑ̃́ mmiɛkɛ,
kɛ cɑ̃ɑ̃̀nko kɛtenkɛ̀.
27 Ítɛ́ kɛ ti dɛɛtɛ́! Nɛ̀ ɑ sɑ̀ɑ̀ nkpɛ́í nti coo.