45
Okpɑ̀ɑ̀tì potúòmù yɛ̀nfɛ̀
Bɛdèmbɛ̀ kóo kótì dìèmmɛ̀ Kodee bí yɛ̀nfɛ̀ nɛ̀ tibómbonti. Fɛcɑnyɛ̀nfɛ̀.
 
Tinɑ́ɑǹsɑ̀ɑ̀tì tiì doorí n nùù.
N dɔ́ kɛ́keutɛ́ fɛyɛ̀nfɛ̀ nfɛ okpɑ̀ɑ̀tì kpɛ́í,
n yóó dèntɛ̀ fɛyɛnsɑ̀ɑ̀fɛ̀ nfɛ
opɑ́tíwɑ̃ɑ̃̀tì sɑ̀ɑ̀wè ɔ̃ɔ̃ duɔ́kɛ́mɛ̀ o pɑ́tíri.
 
A wenni kɛ pɛ̃ɛ̃tɛ́ bɛnìtìbɛ̀ bɛmɔu ndi,
kɑ̀ɑ nɑ́ɑǹtì nɑɑti.
Dɛɛ̀ te kɛ̀ Kuyie ndɑ dɔ̀ɔ̀ mɛsɑ̀ɑ̀ nsɑ̃́ɑ̃̀.
Okpɑ̀rìteu túótɛ́ ɑ siè
dɛɛ̀ tu ɑ sɑ̃nni nɛ̀ ɑ yetìdiɛrì.
Túótɛ́ ɑ tɑ̃mmù kɛ́kétɛ́
dekɛ ɑ sɑ̃ntɛ̀,
kpɑ ntimɔ́mmɔnti kpɛ́í,
kónnɛ́ bɛcĩ̀rìbɛ̀.
Kónnɛ́ bɛ̀ɛ̀ nɑɑti.
A wɛ̃rímú muù yó nte kɑ̀ɑ nɑ dikpɑ̀nnì diɛrì.
Nɛ̀ ɑ penyómmɛ̀ mmɛ ɑ yóó buɔ́mmɛ̀ ibotí,
okpɑ̀ɑ̀tì, ɑ yóó mɛ nkuɔnɛ̀ ɑ dootitɔbɛ̀.
Dikpɑ̀ɑ̀tìkɑ̀rì Kuyie ndɑ duɔ́ ndì yó mbomu sɑ̃́ɑ̃̀,
ɑ bɑkɛ́ nɛ̀ timɔ́mmɔnti nti.
A dɔ́ timɔ́mmɔnti nti, ɑ í dɔ́ mɛyɛi,
dɛɛ̀ te kɛ̀ Kuyie nhɑ Yiɛ̀ ndɑ tɑ̃ɑ̃tɛ́ ɑ kɔbɛ miɛkɛ
kɛ wɑɑrɛ ɑ yuu mɛkùɔ̀,
kɛ dɑ dɔ̀ɔ̀ diwɛ̀ì.
A yɑ̀ɑ̀tì ɑ̃ tudɑ̀ɑ̀ríbɛ̀ bɛ̀ tu bɛ̀ míírì nɛ̀ ɑdòwɛ́ɛ̀ nɛ̀ kɑ́sì
bɛ kó kufɔ̃ɔ̃ku nku,
kɑ̀ɑ cĩ́ɛ̃̀tɛ̀ sɑ̃̀ri yɛpɑ́pɑ́nìì nkó tisɑ̃tì kɛ̀ bɛ̀ bie
dɛbémbénnɛ̀ ɑ cĩ́ɛ̃̀tɛ̀ kɛ̀ dɛ̀ dɑ nɑɑti.
10 Bɛkpɑ̀ɑ̀tìsɑpɑ̀mbɛ̀ bɛɛ̀ ɔ̃ɔ̃ dɑ́ co,
onitipokpɑ̀ɑ̀tì ɔ̃ ncómmú ɑ píkù nku kɛ sɑ̃̀ri
mɛsɔɔ nsɑ̀ɑ̀mɛ̀ kó tisɑ̃tì.
 
11 N kóo sɑpɑ̀ɑ̀, nkéntɛ́ mɛsɑ̀ɑ̀ nkɛ́keè!
A tɛ̃́nkɛ bɑ́ ntoti ɑ yɛ̀mmɛ̀ ɑ botí kɔbɛ nɛ̀ ɑ cĩ́ɛ̃̀tɛ̀ kɔbɛ kpɛ́í.
12 Okpɑ̀ɑ̀tì dɑ dɔ́ mɛdiɛ̀ mmɛ ɑ wenniku kpɛ́í,
ò tu ɑ yiɛ̀ nwe, nnínkú o ììkɛ̀.
13 Tiiri ɛì kɔbɛ bɛdítíkpɑ̀ɑ̀tìbɛ̀ yóó dɑ wɑmmú nɛ̀
yɛpɑ̃rɛ̀ nyɛ.
 
14 Okpɑ̀ɑ̀tìsɑpɑ̀ɑ̀ mbo tɛkpɑ̀ɑ̀tìcĩ́ɛ̃̀tɛ̀ ntɛ kɛ wenni
kɛ dɑ́ɑ́tí tiyɑɑ̀sɑ̀ɑ̀tì tìì dùɔ̀kɛnɛ̀ musɔɔpɑ̀ɑ̀kómmú.
15 Kɛ̀ tì kpɛ̃̀ nkɛ kpɛ̃̀ mmɛɔ̃̀rìmɛ̀ mɛbotí mɛbotí,
kɛ̀ bɛ̀ ò tɑtinɛ̀ okpɑ̀ɑ̀tì borɛ̀ kòo dúɔ̀bɛ̀ ò urí.
16 Kɛ̀ bɛ̀ mbɛ̀ urí kɛ yɑ̃nku nɛ̀ diwɛ̀ì kɛ́tɑnnɛ̀nko
okpɑ̀ɑ̀tì cĩ́ɛ̃̀tɛ̀.
 
17 A bí iì yóó sɔɔtɛ́ ɑ yɛmbɛ̀ kpɑ̀tì,
kɑ̀ɑ ì bɑɑ́ nkɛ̀ ì mbɑkɛ́ kutenkù kumɔu.
18 N yó nnɑ́ɑ́mmu ɑ kpɛ́í nyidɑpùntɛí imɔu,
kɛ̀ bɛnìtìbɛ̀ bɛmɔu ndɑ sɑ̃ntí sɑ̃́ɑ̃̀.