57
Dɑfiti yumɛ̀ Kuyie nhoĩ́nkɛ̀nkpɑ̀ɑ̀tì
(Yɛnɑ́ɑǹkékɛ̀ 8-12, wéntɛ́ Yɛsɑ̃ɑ̃ 108:2-6)
Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ ò do cokùnɛ̀ Sɑuri titɑ̃dèntì miɛkɛ kɛ́dentɛ̀ fɛ̀. Bɛ̀ do fɛ̀ dìènnɛ̀ mɛtɑmmɛ̀ mɛ̀ɛ̀ tu mɛ̀ mmɛ bɑ́ɑ́ kuɔ.
 
Áú Kuyie, n dɛɛtɛ́, yɑ̀ɑ n dɛɛtɛ́!
N sɔri ɑ fìɛ̀ti dɛ́ɛ̀ mmɛ,
kɛ kémmú mɛfɛ̃́ṹtímɛ̀ bo deèmɛ̀.
Kuyie n dɑ yumu fɔ̃́ wèè bɑkɛ́ kɛĩ́nkɛ̀ nɛ̀ kɛtenkɛ̀,
fɔ̃́ɔ̃̀ te kɛ̀ n kpɛti timɔu yíé.
A yó mboní kɛĩ́nkɛ̀ nkɛ kɛ́ n dɛɛtɛ́,
kɛ́fɛìkùnnɛ wèè m bɛ̀tì,
kɛ́ m bɛnkɛ ɑ sɑ̀ɑ̀ nnɛ̀ ɑ kó timɔ́mmɔnti.
 
N sokɛ́ yɛcìrícìrɛ̀ cuokɛ̀ nkɛ,
n duɔ́ bɛnìtìcɑ́ɑ̀mbɛ̀ cuokɛ̀ nkɛ,
Bɛ nìì ndò nyɛkpɑ̃ɑ̃̀ nyɛ nɛ̀ ipie,
kɛ̀ bɛ nɔ́ndiɛ́ ndò tikpɑ̀rìseuti.
 
Kuyie nhɑ yètìrì ńdɛu kɛĩ́nkɛ̀,
bɛnkɛ ɑ kpetì kɛtenkɛ̀ kɛmɔu miɛkɛ.
 
Bɛ̀ n dii ticùɔ̀tì nti,
bɛ̀ ɑ̀ɑ nkuhɔ̃ũ deè ndi kɛ bo n dúú,
bɛ̀ keù difɔ̃̀tìrì ndi n yììkɛ̀.
Bɛ̀ɛ do bɛmɔ́mmɔmbɛ di miɛkɛ.
 
Kuyie, m bùɔ̀tì tɛ̃́nkɛ í duò, n tɛ̃́nkɛ í yĩɛ̃̀kù,
m bo ndiè nkɛ dɑ sɑ̃ntí.
N wɛ̃nnì, entɛ,
n kùtìdùkù nɛ̀ m bómbonku, entɛnɛ̀,
n yóó entɛmu dikṹnweńnì sɛ̀ì kɛ́dentɛ̀.
 
10 N Yiɛ̀ nKuyie n yó ndɑ sɑ̃ntímu bɛnìtìbɛ̀ cuokɛ̀,
kɛ́ndiè nkɛ dɛ́úkùnko ɑ yètìrì ibotí cuokɛ̀.
11 Kɛ yɛ̃́ ɑ sɑ̀ɑ̀ ndɛumɛ̀ kɛ tuɔ̀kù tiwɛtì,
kɑ̀ɑ mɔ́mmɔnti tuɔ̀kù yɛwɛtɛ̀.
 
12 Áú Kuyie! A yètìrì ndɛu kɛĩ́nkɛ̀,
bɛnkɛ ɑ kpetì kɛtenkɛ̀ kɛmɔu miɛkɛ.