86
Nh ɔ̃ mbo mɛyɛǹcɑɑ̀rìmɛ̀ miɛkɛ kɛ́kuɔ́nnɛ̀ fɔ̃́ nwe
Dɑfiti bɑ̀ńtɛ̀mɛ̀ Kuyie.
 
N Yiɛ̀ nKuyie n kéntɛ́ kɛ́cɔutɛ́ m bɑ́ɑmmìi,
n tú ocĩ̀rì nwe, osénnìwè.
N tú wèè dɔ̀ɔ̀ri wènwe ɑ dɔ́mɛ̀, ɑ nni nkɑ̃nkɛ́,
mí nhɑ kóo tɔ̃ntì, n dɛɛtɛ́,
n yĩkú fɔ̃́ɔ̃̀ ĩ́nkɛ̀ fɔ̃́ nwèè n te.
N Yiɛ̀ nKuyie nhɑ́ n kuɔ́ mmɛsémmɛ̀,
n tṹṹ nkɛ kuɔ̀nnɛ̀ fɔ̃́ nwe.
Nɑ́ríkùnnɛ n yɛ̀mmɛ̀ mí nhɑ kóo tɔ̃ntì,
n Yiɛ̀ nKuyie m búɔ́ fɔ̃́ nwe.
N Yiɛ̀ nKuyie nhɑ sɑ̀mu kɛ cĩ́ɛ̃́mmu,
kɛ kuɔ̀ mmɛsémmɛ̀ mɛdiɛ̀ mbɛ̀ɛ̀ dɑ kuɔ̀nnɛ̀.
N Yiɛ̀ nKuyie nkéntɛ́ m bɑ́ɑmmu,
kéntɛ́ n dɑbònnì n dɑ kuɔ̀nnɛ̀ dì.
Kɛ̀ mɛyɛǹcɑɑ̀rìmɛ̀ n sɔ̃̀ńkɛ́ nh ɔ̃ɔ̃ kuɔ́nnɛ̀ fɔ̃́ nwe, kɑ̀ɑ n keènɛ̀.
 
Dibɔɔ̀ mɑrì í dɑ dònnɛ̀,
fɔ̃́ nti Yiɛ̀ nKuyie,
òmɔù bɑ́ɑ́ nɑ kɛ́dɔɔ̀ ɑ dɔɔri dɛ̀.
Fɔ̃́ɔ̃̀ dɔ̀ɔ̀ yɛbotɛ̀ yɛmɔu,
yɛ̀ kɔ̀rinímu kɛ bo nínkú fɔ̃́ nti Yiɛ̀ nKuyie nhɑ ììkɛ̀,
kɛ́dɛ́úkùnnɛ ɑ yètìrì.
10 Kɛ yɛ̃́ ɑ dɛumɛ̀ kɛ dɔɔri tidiɛtì,
fɔ̃́ɔ̃̀ mɑ́ɑ̀ tu Kuyie.
 
11 N Yiɛ̀ nKuyie m bɛnkɛ ɑ cɛ kɛ̀ nni ntũ nhɑ kó timɔ́mmɔnti,
yɔkùnnɛ n yɛ̀mmɛ̀ kɛ̀ nní dɑ dé.
12 N Yiɛ̀ nKuyie n yó ndɑ sɑ̃ntímu nɛ̀ n yɛ̀mmɛ̀ mɛmɔu,
n yó ndɛ́úkùnkomu ɑ yètìrì sɑ̃́ɑ̃̀.
13 Kɛ yɛ̃́ ɑ sɑ̀ɑ̀ ndɛumɛ̀ n yĩ́nkɛ̀,
kɑ̀ɑ dɛɛtɛ́ n wɛ̃nnì kɛ́ n dennɛní kudɔnkù.
 
14 Kuyie, sipɔɔ yɛmbɛ̀ bɛɛ̀ n dintɛ́,
bɛnitiyonkubɛ bɛɛ̀ m munnɛ́ kɛ bo n kuɔ bɑ́ bɛ̀ í dɑkɛ ɑ kpɛ́í.
15 Fɔ̃́ nti Yiɛ̀ nKuyie nhɑ sɑ̀mu kɛ mɔkɛ onìtì kó mɛsémmɛ̀.
Kɑ̀ɑ miɛkɛ boo kɑ̀ɑ dɔ́ onìtì mɛdiɛ̀,
kɛ tú timɔ́mmɔnti yiɛ̀.
16 Wɛ̃ɛ̃tɛní m bíɛ́kɛ̀ kɛ́ n kuɔ́ mɛsémmɛ̀,
duɔ́ mmí nhɑ kóo tɔ̃ntì muwɛ̃rímú,
n dɛɛtɛ́ mí nhɑ kóo nitipotɔ̃ntì birɛ.
17 Dɔɔ̀ tidiɛtì n kpɛ́í tìì bɛnkú ɑ n dɔ́mɛ̀,
kɛ̀ n dootitɔbɛ̀ɛ yɑ̀ kɛ̀ ifɛi bɛ̀ pĩ,
N Yiɛ̀ nKuyie n teennɛ̀ kɛ nɑ́ríkùnnɛ n yɛ̀mmɛ̀.