THESSALONICA
MITE HENGA
PAUL LEKHA THOT KHATNA
Thina le hinna thudol
Paul in khonunga dia tahsan le kinem'a hinje eivetsahnau
1 Thessalonica sung thu umdan
Tulaija jonthan hoi thu akiha sei tobang hin, Thessalonica khopi jeng jong chu jonthanhoina thua ki boina mun khat anahi. Eiho jong hi, inop nop-u bolthei ahi kiti Kiloikhomna (permissive society) lah'a khosa ihinauva, hinkho thenga ihin theina diuva Thessalonica Houbung mite kithuhilna hi eiho ding adeh'a khangthah tedinga phachom ahi. Pathen in Alunggon'a akou ho ding in Alunggon abulhit theiye ti iheuve 5:23,24.
Thessalonica Houbung mite hi Paul in Pastor hina lungchang pu'in agelkhoh in, Pathen Thu thaneitah in ahinkhou akhelpeh chung changa akipapin ahi.
Lekhathot jihpa chule ajih kum
Solchah Paul'in AD 50 vel'a Corinth mun'a anajih ahi.
Koi ho dinga a ajih ham?
Paul ani-channa Missionary kholjin'a ache sunga Thessalonica Houbung mite henga ajih ahi. Ama deidan toh kitoh louvin anasuboi tauvin, ahengu adalhah loinadin angeh uvin ahi. Ahinlah hitobang thusoh ho jal chun Paul in Pakaiya akhanlhit nadiuvin kihetthem louna jouse suhdihna dingin ngehna aneiyin ahi. Solchah Paul'in lekhathot ajihhoa hin atamjon amin achonsah tha cheh in ahi.
1
Salam Thu
1 Hiche lekhathot hi Paul, Silas chule Timothy a kon ahi. Keihon Pa Pathen le Pakai Yeshua Christa a hiho Thessalonica Houbung mite henga kahin thot nahiuve. Pathen chun lungset le cham-lungmon napeu hen.
Thessalonica miten pathen atahsan u chule vetkahna
2 Keihon nangho jouse jal'in Pathen kathangvah jingun chule nangho dingin kataojom jinguvin ahi.
3 Keihon Pa le IPathen un nangho chung thua kataonauva, tahsan umtah'a natoh nau, ngailutna neiya nathil bol hou chule IPakaiyu Yeshua Christa jal a thoh hattah'a kinepna naneiyu chu kageldoh ui.
4 Kasopi deitahte, Pathen in nangailu uvin chule Pathen in Amite hidingin nalhengdoh tauve, ti kaheuve.
5 Ajehchu keihon Kipana Thupha kahin pohpeh u chu thucheng jengseh a hilouvin, thaneina to kilhon a Lhagao Thengin hetchetna lhingset napeh u ahitai tia keihon kaseiyu chu thutah ahi. Chule keihon nangho kagel khohnau nangho toka umkhom laiyun kahin danuvin nahe tauvin ahi.
6 Hiti chun nanghon kathuseiyu chu nangho dinga hahsatna khohtah Lhagao Thenga konin kipah tah in nasangun ahi. Hiti chun nanghon keiho le Pakai umchan chu najom un ahi.
7 Hitichun nang ho Greece a tahsan saho jouse-Macedonia le Achaia gam jousea vetjui thei nahung hitauve.
8 Chule tun, Pakai thu chu Macedonia le Achaia gamkallam peh geiyin, hoilai mun hijongleh kachenau chan ah Pathen natahsannau thudol hi aseiyui. Keihon koima koma hithu chu kasei diu angaipoi.
9 Ajehchu amahon phatah a eina lamtonau thudol aseiyun, chule nangho milim houna'a kona Pathen hing le dihtah kinbol dinga nalung naheiyu thudol aseijom jinguve.
10 Chule amaho chun Pathen Chapa–Pathen in athilah a kona akaithou Yeshua, vana kona ahung ding ngah jinga uma nahiu thudol aseiyun ahi. Ama hin ahunglhung ding thutanna kichat umtah'a kona eihuhdoh u ahi.