30
1 Hankàñe amo anake miolao,
hoe t’Iehovà,
misafiry iareo fe tsy ahiko;
mandahatse tolon-draha,
fa tsy an-Troko,
ie hanovoñe hakeo naho tahiñe.
2 O mijelañe mb’e Mitsraime mb’eo
fe tsy nañontane am-bavakoo;
hitsoloha’ iareo ty kijoli’ i Parò
naho hipalitse an-talinjo’ i Mitsraime.
3 Aa le hifotetse ho hameñarañe
ty kijoli’ i Parò,
vaho ho salatse nahareo te mipalitse
an-talinjo’ i Mitsraime.
4 Toe e Tsoane ao o roandria’eo,
naho e Kanese ao o sorotà’eo.
5 Hene salatse
ondatio am’ondaty tsy mahasoa iareo,
tsy mañimba tsy mampitombo,
te mone heñatse naho inje.
6 Ty entañe ty amo bibi’ atimoo.
ie hiranga tane manosotse naho
mañore, ami’ty hirifa’ o liona
rene’eo naho i liona lahi’ey, ty lapetake
naho ty fandrefeala mibelañ’afo;
asese’ iareo an-tsorom-borìke tora’e
ty vara’ iareo, naho an-trafon-
drameva ty fanaña’ areo,
mb’am’ondaty tsy hahasoa.
7 Kafoake ty imba’ i Mitsraime,
toe tsy manjofake,
aa le nitokaveko ty hoe:
Rahabe mihisetse.
8 Akia arè, sorato an-takelake
añatrefa’ iareo eo,
vaho sokiro am-boke ao,
ho amo andro añeo
ho fitaliliañe nainai’e.
9 Amy t’ie ondaty miola,
anake mavande,
ajaja tsy mete mitsanoñe
o Tsara’ Iehovào;
10 ie manao amo mpioniñeo ty hoe:
Ko mioniñe, naho amo mpitokio,
Ko mitoky ama’ay ty hahiti’e;
taroño ama’ay ty raha mora,
mitokia famañahiañe.
11 Isitaho o lalañeo, idisaho i lalam-bantañey, ajihero tsy ho aolo’ay
t’i Masi’ Israele.
12 Aa le hoe t’i Masi’ Israele,
kanao tsambolitio’ areo ty tsara toy,
naho miato ami’ty famorekekeañe
naho ty hamengohañe,
vaho mipitek’ ama’e;
13 le ho ama’ areo i hakeo zay,
manahake ty heba an-kijoly te higorobañe,
ie miboenatse an-kijolim-bato abo ey,
vaho migorogodeboñe amy zao
ty fihotraha’e;
14 ie hiparaitsake hoe valañem-panao valàñe tane,
le akore ty fipoñafa’e kanao
tsy ahatreavañe ndra tsila’e
amo biliti’e niparatsakeo
hahatintinañe vaen’afo
boak’am-patañe ao,
ndra ty hanilofañe rano hirik’ an-kadaha ao.
15 Aa hoe t’i Talè Iehovà, Masi’ Israele;
ty fisolohoañe naho fihendreañe
ty maharombake anahareo;
toe fianjiñañe naho fatokisañe
ro haozara’ areo.
Fe tsy nipaoke nahareo
16 te mone ty hoe: Aiy avao!
hioratse an-tsoavala zahay! —
toe hivoratsake nahareo! naho,
Hiningitse an-tsoavala lahi’e
mahafitsontike zahay—
aa le hipirirìtse ka o
mañoridañe anahareoo!
17 Arivo ty hibioñe
ami’ty fañembaña’ ty raike,
hitriban-day nahareo ami’ty
fañembaña’ ty lime, ampara’ t’ie
miereñereñe hoe hazolahy
an-kaboañe eñe,
hoe viloñe ambone vohitse ey.
18 Toe mandiñe te hañisoke
anahareo t’Iehovà;
hitretrèza’e boak’ añ’abo ao.
Fa Andrianañaharen-katò t’Iehovà;
haha iaby o mitamà Azeo.
19 Ry ondaty e Tsione,
mpimoneñe e Ierosalaimeo,
tsy hirovetse ka nahareo;
Ie hatarike ama’o
ty amy feom-pikaiha’oy,
hanoiñe kanao mahajanjiñe azo.
20 Aa ndra t’ie nazotso’ i Talè
mofon-kasotriañe
naho ranon-kaloviloviañe,
tsy hietake an-kotsok’ ao ka
i Mpañòke azoy.
le ho isam-pihaino’oo i Mpañana’oy;
21 Ho janjiñen-dravembia’o ty saontsy
am-boho’o ao manao ty hoe:
Intoy ty lalañe, añavelò,
naho itsile’o mb’ankavana
ndra mb’ankavia.
22 Le ho tivà’ areo o sare-sokitse
nipakoreñe volafotio,
naho o sare trinanake
nohoñem-bolamenao,
ho faohe’ areo añe
hoe raha maleotse;
vaho hanoa’o ty hoe, Soike!
23 Le ho tolora’e orañe ty tabiry
ho tongise’o an-tane eo,
hampitomboañe
mahakama boak’ an-tane ao,
ho kobokara vaho hiregorego;
hangadagadañe ty fiandraza’
o añombe’oo amy andro zay.
24 Mbore hihinañe hane nisorobaeñe
o añombe naho birìke mpitrabake taneo,
ie fa nitsongae’ ty letsoro naho firango.
25 Kila vohitse abo,
naho ze hene haboañe,
ro hikararahan-drano an-torahañe—
amy androm-panjamanañey,
ie mihotrake o fitalakesañ’ aboo.
26 Hanahake ty hazavà’ i àndroy i volañey,
le ho impìto ty hazavà’ i àndroy,
mira ami’ty hazavan-andro fito,
amy andro ampibandia’ Iehovà
ty fere’ ondati’eoy,
vaho hampimelañe’e o naràn-dafa’eo.
27 Hehe te mb’atoy boak’ an-tsietoiañe
ty tahina’ Iehovà,
miforoforo ami’ty haviñera’e,
milodolodo o hatoe’eo;
pea-pifombo o fivimbi’eo,
vaho hoe afo mamorototo i famele’ey.
28 Torahañe manganahana ty kofò’e,
mahatakatse am-bozo,
ho tsongà’e o kilakila’ndatio
ami’ty tsikelom-pandrebahañe;
vaho ho am-balañorà’ ondatio
ty laboridy mampandilatse.
29 Hanan-tsabo hoe amy haleñe
fañambena’areo i sabadidakey nahareo;
naho hafalean-troke manahake
ty fionjonañe
am-peon-tsoly mb’am-bohi’ Iehovà
mb’an-damilami’ Israele mb’eo.
30 Le hampijanjiñe’ Iehovà
ty fiarañanaña’e lifots’ engeñe,
naho hampahaisaha’e
ty fivangoam-pità’e mañambane
ami’ty fitrotrofiaha’ i haviñera’ey
ami’ty fisotratràhan’ afo hamorototo,
ami’ty fiporitsahan-drahoñe
naho ty fikojojoahan’ orañe
vaho ty havandra-gadaboñe.
31 Hampangebahebake i Asore
ty fiarañanaña’ Iehovà
ie fofohe’e an-kobay.
32 Le ze fandafàn-kobaim-pandilovañe
apao’ Iehovà ama’e,
harahem-pikantsañañe naho jejo-bory; le am-piekotsekòran-kotakotake,
ty hialia’e am’ iareo.
33 Fa nihajarieñe haehae ty Topete,
hinalankañe ho a’ i mpanjakay,
laleke naho mangorabake;
afo manodotse an-katae tsifotofoto;
viañe’ ty kofò’ Iehovà, hoe
t’ie fifororoahan-tsolifara.